# وطحت بحبك يا ام العيون السود ..!!!

البا( 24 )رت

------------------------------------------------------------

بعد أسابيع كثيره خرج بدر من المستشفى و ما رضى يقول من اللي سوا له كل ذا لان نجلاء ترجته ما يقول و نجلاء صارت تصور كل ما عصب و اما هيله فتحدد عرسها رابع يوم بالعيد اما مزنه و سلطان الكل عرف بزواجهم و طبعا الكل كان مبسوط و مستغرب من زواجهم و سالم و محمد و مبارك حبوا كيف الزواج صار بلا عرس و خرابيط اما عبد التواب اللي اعترض و قال انه لازم يسووا عرس حتى لو كان بين الأهل و وافقوا الشياب بعد ما تذكروا انه زواج سلطان الغالي احسن واحد في انظارهم و غيروا رأيهم و قالوا انه لابد يسووا عرس كبير بس مزنه رفضت و قالت إنها ما تبي اي عرس حتى لو كان بين الأهل بس سلطان كلمها و بالآخير رضت و اتفقوا على عرس بين الأهل في هذا اليوم .....
اليوم المنتظر يوم عرس مزنه & سلطان
الكل تمكيج عند زينه و جميله هذي المره حتى صيته و صبحيه و شادن لان مزنه غلاها غير عندهم اما بالنسبة لهيله اللي بعد تكفيخ و مناقره من امها وافقت انها تتكشخ كشخه زينه و حقت وحده مملكه عشان يشوفها متعب و يعجل على العرس لان حصة قافلة معاها و لأن عجبها وضع انها تكون أم العريس و ناويه تجرب وضع ام العروس هذي المره .

عند الحريم اللي طفشوا من الغناء و الرقص و يبون يشوفوا العروس .
خالة مزنه : وينها مزنه ذي طولت علينا .
فاطمه بتوتر : البنت متوتره شوي .
خالة مزنه : وش اللي متوتره ترانا اهلها مو ناس غريبة .
فاطمه ما تدري ويش تقول و انقذتها حصة .
حصة : شوي و نازله العروس .
خالة مزنه اخذت نفس و صدت .

فاطمه : يلا قومي ارقصييي زي صيته و صبحيه .
لطيفه : لا يمه مابي ارقص قدام هذول اخاف يخطبوني لعيالهم البدو .
فاطمه : وش فيهم البدو ترا ابوتس واحد منهم و انا تزوجته عادي .
لطيفه : ادري بتس يمه ماتبينه بس اهلتس غصبوتس .
فاطمه : اي غصبوني و الحين دوري بعصبتس .
لطيفه : وش فيتس علي ليه ما تغصبين شادن .
فاطمه : شادن أصغر منتس يالعوبه .
لطيفه : أنا ما بتزوج إلا بعد صيته و صبحيه لانهم اكبر مني .
فاطمه : شهرين ما تفرق .
لطيفه : بروح ادور على دحومي امه تبيه .
فاطمه : الله يأخذتس من مسودة الوجه .
بعد ما راحت لطيفه .
فاطمه : يمه شادن .
شادن لفت و هي تبتسم : وش يمه .
فاطمه : ليه لابده ( جالسه بدون حركه ) محلتس قومي ارقصي و حركي جسمتس شوي .
شادن : و الله يمه اني ما اعرف ترقص زين زي صيته و صبحيه و زينه و جميله عشان كذا لابده محلي .
فاطمه ماسكه أعصابها : مو لازم تعرفي كثير زي الباقيات المهم ارقصي حتى شوي .
شادن : يمه بس رجيلاتي يوجعني .
فاطمه : الله يأخذتس من مسودة الوجه انتي و العوبه ذيك .
شادن و هي تبتسم بنصر : آمين آمين .
حصة : شكل أنا اللي بسبقكن و ازوج عيالي .
فاطمه : الله يهديهن بناتي مو راضيات يرقص و يظهرهن قدام الناس و فهد مابي ازوجه لين يعقل زين .
حصة : أنا زوجت سلطان و هيله باين قريب و تتزوج و زينه بتلحقها و زين ألين يتمرجل قليل بس بيتمرجل قبل لا يعقل فهد .
فاطمه : ياليل الغثى بس .
هيا : أنا عن نفسي زوجت نجلاء و افتكيت و باقي بدر و قريب ازوجه و بتلحقه شوق و زينه وراهم .
حصة : يا فاطمه شكلنا بنزوج عيالنا قبلتس .
فاطمه : لا باقي ساره .
هيا : سارة و زوجت مزنه و تبقى صيته و قريب زواجها اما مطلق عاقل و يعتمد على نفسه بيلحق مزنه قريب و صهيب الواضح انها ما بتزوجه لين يعقل زي فهد .
فاطمه : زين دامه كذا .
حصة : الله يعين اللي بتتزوج مشعل و شلته .
فاطمه : اي الله يبعدهم عن بناتنا .
الكل : آمين .
هيا : بس ترا عبد العزيز مو زيهم و رجال كفو .
حصة بمزح : ازوجه بنتي زينه ؟؟؟؟
فاطمه : سلطان بيرفض زي كل مره .
حصة : سلطان يهجد شعليه من بنتي و بعدين هو تزوج و بينقلع لبعيد و لعاد نشوفه .
هيا : ايه حظتس انه راح اخيرا بتعيشين براحه .

عند باقي البنات ....
سارة : يا بنتي انزلي تحت الحريم يبون يشوفونتس .
مزنه : لا لا لا مابنزل .
نجلاء : ليكون متوتره من العرس ترا حتى انا كنت زيتس بس الله سترها و عدا كل شيء براحه .
مزنه : مو بسبب التوتر .
سارة : و إلا بسبب وش ؟
مزنه سكتت و ناظرت الأرض بحزن .
نجلاء وقفت و خرجت من الغرفة و توجهت للمطبخ و طلت برأسها من باب المطبخ و شافت دحومي يلعب مع العيال و نادته و رفض يجي لين رفعت له يدها و كان فيها حلاوة .
دحومي ابتسم وشق الحلق وجاء ركض لعندها .
دحومي : هاه خاله نجلاء قلب عبد الرحمن و روحه .
نجلاء تقرفت و قالت : ناد لي خالك آسر بس كلمه بأذنه و قل له نجلاء تبيك .
عبد الرحمن : طيييب .

عند الرجال ...!!!
الكل مبسوط بزواج سلطان اولا لأنه بيروح و بيفكهم من شره و تحكمه فيهم و ثانيا لانه المفضل عند الشياب .
مطلق : مبروك سلطان .
سلطان : ادلف بس .
متعب : الله يعينك على فرقتنا نحن العزابيه .
سلطان : اهجد بس انا مبسوط عشان فرقتكم و بعدين انت مو عزابي .
متعب : هههه .
بدر دف متعب و قال : مبروك عقبال ما اتزوج أخ..
دفه فهد و قال : الحمد لله جاء هذا اليوم اللي تنقلع فيه عن حياتنا و تفكنا من نكدك .
سلطان : يا جعلك تكون جاري .
فهد : تخسي .
دفه عبد العزيز و مشعل و صهيب و قالوا : الله يجعلك تدلف بعيد و لا نشوفك ابد .
سلطان : آمين .
آسر : ثاني معرس بالبركة و الله يرزقك الذرية الصالحة .
سلطان : آمين و يرزقك من واسع فضله .
دحومي سحب آسر من يده و قال له : نجلاء تبيك .
آسر بإستغراب : نجلاء ؟

------------------------------------------------------------