# وطحت بحبك يا ام العيون السود ..!!!

البا( 23 )رت

------------------------------------------------------------

كانت متوتره هل تنام أو تستناه هو قال لها أنه بيتسحر في الطريق بس خافت انه يرجع و يبهدلها بهديل بس كانت حاطه في رأسها ان في جني ماسه لان أفعاله غريبة معها عشان كذا ارتاحت لما تذكرت انه رمضان و مافيه جن برمضان عشان كذا هدت و ارتاحت و نزلت تستقبله من رسل لها أنه وصل .
آسر نزل من سيارته و هو مروق تلفت و مالقاها بالحوش أو عند الباب تنهد بضيق و دخل كان بيروح غرفتهم اللي هي غرفته القديمة بس ابتسم بحب من شافها نازله من الدرج تركض بسرعه .
فتح لها يدينه بحب ...
نجلاء نزلت بسرعه خايفه انه يعصب لو ما لقاها بس وقفت من شافته ينتظرها و هو فاتح يدينه لها .
ابتسمت بحب و هي تحاول تستغل كل لحظه يكون فيها آسر مروق .
ركضت و حضنته و هي تقول : خوفتني ترا .
آسر : ماعليتس خل ندخل للغرفة قبل لا احد يجي و يشوفنا .
نجلاء حركت رأسها بأي و راحوا للغرفة ..
انسدح آسر على السرير ينتظر نجلاء تخرج من الحمام عشان يتوضأ لصلاة الفجر اللي توه يأذن .
الكل راح يصلي الفجر و بعدها ناموا .

كان بالها مشغول على وليدها و ما قدرت تنام اكثر مو معقول كل هذا الوقت بالمستشفى بسبب جروح لعب اكيد في شيء ثاني ، راحت فرشت سجاده و جلست تقرأ القرآن و تدعي ألين يأذن الظهر .
رجع محمد و عبد التواب اما سالم جلس عند مبارك بصفته الأقرب له .
أذن الظهر و الكل راح يصلي و يقرأ إلا البنات جالسين بالمطبخ لانهم صحوا الساعه 2 الظهر طبعا زينه و جميلة اشتكوا للحريم عن لطيفة اللي حطت لهم ملح في سحورهم و كانوا تعبانين كثير عشان كذا الحريم خلوهم مايشتغلون بس يراقبون البنات و حصة زودت شغل لطيفة كعقاب لها ...

شادن : ااااااااااااي .
لطيفة : تكفين مو مره ثانيه تحرقيها .
شادن : لا هذي المره في قطرة زيت صقعت بيدي .
لطيفة : احسن هذا جزاتس .
شادن لفت على البنات و قالت : ابغى تبديل .
صيته سحبت الملعقه من يد شادن و قالت : هاتي بس بزران ما يعرفوا شيء .
شادن مبسوطه للآخر : اي انا بزره بقره ماتعرف شيء .
هيله مدت كفها لشادن و قالت : كفتس .
شادن مدت لها كفها و تصادموا بقوة و هي تقول : كفتس .
صبحيه : توه بدري ، الناس تقلي العصر مو الحين .
زينه : العصر نحن نبي نتبطح بالسرير .
هيله : ليه نجلاء و مزنه ما يشتغلون معانا حرام و ظلم ترا .
صيته : لا تستعجلين دورتس قريب .
هيله ناظرته بحقد و كملت شغل .
دخلت و إتكأت على الباب و هي تبتسم بخبث و تقول : اقول انقلعوا صلوا العصر بعدها كملوا شغل يالعوانس .
هيله : كلي زق ترا رمضان الجاي بصير زيتس .
نجلاء : ما بيتغير شيء لانه بعدني متزوجه .
صبحيه : وين ياختي في دار زوجتس تطبخين لوحدتس على الاقل نحن هنا نتساعد .
لطيفة : خلاص كلن يروح يصلي ورانا شغل طويل .

قريب يأذن المغرب و الدنيا حوسه و الحريم و البنات يراكضون من مكان لمكان و يجهزون السفرة .

فاطمه : شادن يابنيتي خذي ذا الصحن و اعطيه اخوتس يفطر به هو و العيال اعرف الشياب مايحبون ذي الطقاطق .
شادن زفرت بتعب و قال : طيب .
دخلت المطبخ و شافت هيله تغسل و تجهز اكواب الشراب .
ابتسمت بخبث و قالت : هيله امي تقولتس خذي ذا الصحن و اعطيه متيعب يوصله للعيال عشان يفطرون عليه لان الشياب مايحبون ذي الطقاطق .
هيله : خير ليه انا ؟
شادن : لأني مو مملكه زيتس يعني انتي عندتس متعيب ناديه و بس .
هيله : و اخوتس؟
شادن : فهيد تعبان مره .
هيله زفرت بتعب : اوف هاتي بس بشرط توصلين الاكواب للسفرة .
شادن : ما طلبتي شيء .
طلت برأسها من باب المطبخ و نادت متعب .
جاء يركض و هو يبتسم .
هيله مدت له الصحن و قالت : خذ هذا افطروا عليه انتم العيال .
متعب : ياقلبي على اللي تفكر ببطني .
هيله : مو أنا هذي عمتي فاطمه .
متعب هز كتوفه و حرك حواجبه ب ولو .
متعب ناظر للصحن و بعدها ناظر لوجهها و هي ناظرته بأستغراب بعدها قال : عيونتس بحر من الزيت وأنا كالسمبوسة أتقلب فيها .
هيله : احلف بس وش ذا اللي تقوله .
متعب رجع شعره لوراء و قال : غزل رمضاني .
هيله : ادري بك ما تعرف في هذي الخرابيط مين اللي قالك بس .
متعب ضحك و قال : مطلق قلت له ابي غزل يعجب هيله و اعطاني ذا و هو يضحك استغربت من ضحكه بس ما اهتميت لاني كنت تعبان .
هيله : استغفر الله بس انقلع تراه اذن و العيال يستنوك .
متعب راح و هو يقول : اشوف الشيطان راح لما جاء رمضان .
هيله حركت رأسها بعدم رضى و هي تبتسم و دخلت تفطر .

في الليل تحديدا بالمستشفى ...
صحى و ناظر للي عنده اللي كانوا يسئلوه عن حاله و قال : زينه .
جميلة من تكلم بدر توهقت احد يعرف بزينه بس ابتسمت براحه من تكلمت نجلاء .
نجلاء ابتسمت و قالت : حالتك ماهي زينه لا تسذّب .
شوق : إن شاء الله تكون بخير اخوي .
( شوق هذي نسيت انها موجوده اصلا ) .
هيا و هي تمسح على رأسه : وليدي حبيبي شيء فيه يوجعك ؟
مبارك : مين سوى لك كذا قول و أنا اربيه .
بدر غمض عيونه بقوة و هو يتذكر نظرات آسر الغريبه له و كأنه شخص ثاني ما يعرفه ماكان آسر نفسه ابد .
هيا : مبارك خله يرتاح اول بعدين نسأله .
مبارك : ادري بس قلبي حارقني على حالته .
بدر و هو يلا يتكلم ما قدر يرفع صوته عشان كذا همس و قال : امي ابوي تقدرون تخلوني دقيقه وحدي مع نجلاء ابي اكلمها بموضوع .
مبارك : ايش قال ؟
هيا : يقول اخرجوا دقيقة ابي اكلم نجلاء بموضوع .
نجلاء استغربت وش يبي منها بس قالت : لا تخافون أنا عنده .
مبارك حرك رأسه بطيب و خرجوا .
بدر بهمس : ماء اعطيني ماااء .
نجلاء صبت له كوب ماء و شربته و بعدها مسكت بيده و قالت : هاه حبيبي وش تبي .
بدر : آسر .
نجلاء قطبت حواجبها : آسر ؟ وش جابه الحين .
بدر : هو اللي سوى فيني كذا .
نجلاء فتحت عيونها لآخر درجه و وقفت و هي تقول في نفسها : الأمر زاد عن حده ذا مجنون اكيد .
بدر شد على يدها و قال : اصبري اكمل .
نجلاء تنهدت بضيق و جلست تسمع له .
بدر : كان مو آسر نفسه اللي نعرفه .
نجلاء فتحت عيونها لآخر درجه و هي تتذكر تصرفاته الغريبه اللي كانت تستغرب منها كل يوم .
بدر : اسمعي هنا و قولي لي وش جرى به و وش كان يسوي فيتس .
نجلاء : كان أحيانا يكون عصبي و يضربني على ابسط الحاجات و احيانا يكون طيب و يدللني بس ينقلب فجأة و يرجع عصبي و بعدها فجأة يرجع طيب من جديد .
بدر : غريبه ! بس بين الفترات اللي تنقلب حاله وش كان يسمع و يشوف .
نجلاء ابتسمت و هي تعرف ان أخوها بدر درس طب و تقدر تعتمد عليه : احيانا يكون فيه ازعاج و ضغوطات لما ينقلب و يصير عصبي اما بالنسبة للتقلبات الثانيه فما اعرف كيف يصير طيب .
بدر : اشك ان فيه شيء بس لازم نتحقق عشان ما نستعجل بالحكم عليه يمكن هو يسوي كذا بإرادته .
نجلاء : مو لازم تتعب نفسك ارتاح بس .
بدر : أنا اتعب نفسي لأضمن لتس مستقبل تكونين فيه اكثر من مرتاحه مع رفيق جيد مو متقلب الحال .
نجلاء : يعني هو يعاني من مرض او أنه ابو وجهين ؟
بدر : قلت اني اشك .
نجلاء : اي صح انا معك بس كيف اساعدك بالضبط ؟
بدر : معتس جوال صح ؟
نجلاء : اي معاي .
بدر : لو شفتيه بدأ يتقلب حاله صوريه أو سجلي صوته .
نجلاء ابتسمت بنصر : اظن اني عرفت وش اسوي معه .

------------------------------------------------------------

البارت قصير لاني اجتهدت و نزلت اليوم قبل بكرة .

مع حبي : JANET 🔥✨