سبحانه الي زود الزين بالزين

البارت 44

طقت نجود الباب ودخلت عليهم وهي متحمسه اكثر منهم.
نجود: عادي تتعدلون اصوركم؟.
تعدلوا ذكرى ودايل وجلست نجود تصورهم وتتفنن فيهم وصورتهم من كل زاويه حرفيًا.
دايل: نجود نادي عماتي وامي اسلم عليهم.
نجود: طيب.
طلعت نجود ولف دايل بسرعه على ذكرى وحضنها مره ثانيه.
ذكرى: دايل لا لا بيجون امي هنادي وامي خوله وامك بعد شوي!.
دايل: بس شوي يا شيخه مشتاق لتس.
ذكرى: حتنا مشتاقه لك بس مو الحين!.
فتح فهد الباب فجأة وهو طفيان ضحك.
فهد: يا حياتي عليكم والرومانسية المخنزه ذي! والله لافضح فيكم انتوا الاثنين واخليهم يستلمونكم ذي يوم استلموكم يوم علم عليكم راكان، تذكرون؟.
دايل: فهد يا سامج بلا سماجه!.
فهد: بسكت اذا خليتني افرفر بسيارتك الجديدة.
دايل: تخسي ما تطبها! انا ما اخلي سليمان يسوقها تجي انت تبيني اخليك تفر فيها!.
فهد بضحك: براحتك تصرف معهم اذا عرفوا بالسالفه.
خرج فهد وسكر الباب بسرعه وطبعًا دايل ما تاب وجاء قرب من ذكرى وباسها بسرعه على خدها بعدها تعدل ووقف لانهم وصلوا.
هنادي: السلام عليكم.
دايل: وعليكم السلام.
قرب دايل وباس راسها ويدها بعدها امه بعدهم خوله.
خوله وهي تمط خده: والله وكبرت يا ديّول!.
نزل دايل راسه وابتسم بسحى.
خوله: هااووو!! استحيت؟.
دايل بخجل: لا يعني بس من زمان عنتس.
خوله بضحك: لا ماشاءالله!! وصاير عتيبي اصلي بعد!.
ضحك دايل وبدوا بعده كلهم يضحكون واحد واحد.
هنادي بضحك: ماش ماش شكلك سحاوي.
خوله بضحك: هو على الاقل يستحي ذكرى ما تستحي ابد شوفيها هناك.
لفوا كلهم على ذكرى الي ضحكتها واصله اخر الدنيا وجالسه تتصور هي وخوات دايل ويسوون وضعيات غريبه.
هنادي: بنت ذكرى! تعالي هنا يمي شوي.
ذكرى بغباء: هلا يمه؟.
خوله بهمس: ما ودك تستحين وتخافين شوي؟.
ام دايل بضحك: دايل هو الي متقمص شخصيه المخطوبه المستحيه وانتي فالتها.
دايل: يمه خلوها على راحتها عادي!.
الهنوف بضحك: ياعيني!! بدينا من الحين؟ يقول خلوها على راحتها.
ذكرى: وانتي وش حارك؟ انقهرتي علشانه يحبني ولا يرضى علي؟.
لفوا الامهات كلهم عليه وعطوها نظرة الي اسكتي الله يفشلك يالخفيفه وجت ام دايل مسكت دايل: يله يا وليدي رح للرجال لا تطول عليهم.
دايل: ياه في امان الله توصون على شي؟.
خوله: لا ولا شي سلامتك.
خرج دايل من المختصر ولفوا الامهات كلهم على ذكرى.
ذكرى: بسم الله شفيكم؟.
ام دايل: انا كم مره قت لتس اثقلي يا الخفيفه!.
ذكرى: خاله منيره ايش فيك؟ تراه ولدك!.
هنادي: واذا ولدها يالخايسه خليك ثقيله وهاديه!.
خوله: قبل كنا نقول بزر عادي تكبر وتعقل بس شكلك كبرتي وما عقلتي.
ذكرى: والله انكم مكبرين الموضوع على الفاظي.
صكتها هنادي في راسها من ورا: امشي امشي قدامي على الصاله والله ياخوفي يرجعك علينا يوم بكره يقول عقلوا بنتكم.
ذكرى: لا يمه ما يسويها دايل يحبني!.
البتول: شف الحيوانه! لهم ساعه يقولون استحي وتجين تعيدين نفس الشغله!.
ضحكوا الكل على ذكرى وفهاوتها ودخلوا واخذوا باقي الكيكه وجلسوا ياكلونها ويتقهوون اما دايل فرجع هناك للرجال ووجهه منور وواضح عليه الوناسه وجلسوا ضحك وسواليف الين جاب علي لهم عشاء من برا والتموا عليه كلهم نفس ما كانوا يسوون قبل واخذوا الاغراض من يده وراحوا يركضون فيها للمجلس وبتوا السفر وخلوا راكان وسعود يودون اكل الحريم لهم والبنات هناك اخذوا العشاء وبتوه وصراخ وضحك والغريبه الوحيده بينهم كانت نجوان الي كانت تعرف انهم قريبين من بعض بس ما كانت متوقعه ان قربهم جميل كذا وان لمتهم تونس كذا وكانت مستحيه شوي تشاركهم ذي التفاصيل لانها مو متعوده.
ذكرى: نجّو تعالي ساعديني بالله.
نجود: يا زق لا خليها هي الحين عروس بعدين نكرفها.
ذكرى: حتنا عروس يا حيوانه.
البتول: انتي الي قمتي محد ضربتس على ايدتس.
ذكرى: خلاص دام كذا تصرفوا بروح اجلس.
الهنوف: علشان اصك ذي الرضاعه في راستس، شيلي قشار الحب الي في الارض قبل يجون امهاتنا ويلعنونا.
قامت ذكرى وهي تتحلطم ولمت قشار الحب وشالت صحن القهوه وودتها للمطبخ والبنات خلصوا السفره وجلسوا كلهم وجلسوا يتعشون وياخذون علوم بعض وسواليفهم وفجأة جا حمود طق الباب ونادا نجوان لان رحلتهم بعد ساعه وهي جت بسرعه لبست عبايتها واغراضه وودعت البنات وطلعت.
واول ما خلصوا الباقين من الاكل ناظروا نجود وذكرى في بعض وفزوا ولموا السفر كلها وجابوا السماعه وحطوها في نص الصاله وبعدها شبكتها نجود على جوالها وابتسامه الشر باينه في وجهها وشغلت الاغنيه وهربت للغرفه وفجأة كلهم التفتوا على الاغنيه المصريه الي اشتغلت ولا يعرفون من شغلها وعلى دخلت دايل علشان يقول لهم يرخون السماعه لانهم كلهم يكشفون عليه خرجوا نجود وذكرى من الغرفه وهم حازمين على خصورهم كشكاشات وفالين شعورهم وجالسين يهزون ويرقصون ومو منتبهين لدايل ابدًا وجالسين يهزون من قلب ومقفين لدايل بظهورهم.
قامت الهنوف بسرعه ووقفت قدام دايل علشان ما يقدر يشوف بس دايل طويل والهنوف واصله الين عند صدره بس😭.
وقف دايل يطالع في ذكرى بفهيان وهي ترقص وتلعب بشعرها وما امداه يشبع منها الا وهنوف دافته على ورا وسكرت الباب وراهم.
دايل: وراتس ما خليتيني اشوفها!.
الهنوف: اثقل يا الخفيف اثقل!! لاحق عليها بتتزوجها وترقص لك الين تتكسر رجولها.
دايل: بعيد الشر عنها!.
الهنوف بضحك: بعيد الشر عنها ما قلنا شي بس لعاد تعيدها الله يوفقك.
دايل بضحك: طيب ترا ارسلوني عليكم علشان ترخون الصوت.
الهنوف: واصلكم الصوت!؟.
دايل: ايه.
الهنوف: يله باي بروح ارخي.
دخلت الهنوف للصاله وخفضت صوت السماعه وجلسوا يعززون لذكرى ونجود وهم يرقصون ومستانسين.