سبحانه الي زود الزين بالزين

البارت 50

راحت ذكرى تمددت بكسل في غرفة البنات وهي تحس انه تبي ترجع وقرفانه من كل شي وما بين ماهي تتأفف من الحمل والوحم وتتحلطم دخلت البتول بسرعه عليها ونفسها مقطوع.
ذكرى: وشفيك؟.
البتول: عمي منير جاء تعالي تكفين اكشخي على كادي واقهريها زي ما قهرتتس امس.
ذكرى: امس؟ شفتينا!!؟.
البتول: اي سمعتها يا حظي والله لو انها قالته لي كان توطيت في بطنها بس انتي سكتي لها على غير عادتتس!.
ذكرى: عاد شسوي مالي خلقها.
البتول: انتي بس تعالي واجلسي واوريتس شلون تكشخين عليها.
ذكرى: يله اسبقيني وبلحقك.
قامت البتول ودخلت الصاله واخذت مخدات وجهزت مكان كذا مريح.
جود بضحك: صانع يصنع لاسته مقعده.
ضحكت البتول بتسليك وقالت: لا مو قاعده اجهزه لي.
جود: اجل لمين؟.
البتول: لذكّور.
استغربوا كلهم وناظروا لبعض وقاطع لحضة الصمت ذي دخول ام دايل عليهم في الصاله وجت تبي تجلس في المكان الي جهزته البتول.
البتول: يمه لا لا لا لا!.
ام دايل باستغراب: وش؟.
البتول بخبث: ذا جهزته لذكّور علشانه بعيد من المطبخ تعرفين ريحة الطبخ.
ام دايل: يوووه نسيت ذكّور! اي معليه خليها هنا علشان ما تتعب.
ام كادي بفضول: ذكرى وش فيها؟.
ام دايل: مافيها الا العافية ان شاء الله.
كملت ذكرى الي كانت دوبها داخله: حامل يا خالة جميلة.
تغير وجه ام كادي وبناتها وهم يشوفون ذكرى تتمختر وهي رايحه علشان تجلس في المكان الي جهزوه لها وابتسامة الكبر مرتسمه على وجهها من المسمع للمسمع.
ام دايل: اذا حسيتي ان نفستس قلبت عليتس ولا ما ارتحتي روحي لغرفتتس يا بنيتي وارتاحي هناك.
ذكرى: ابشري .. الا اقول بتول وش ملطف الجو الي بخيتيه في الصاله؟.
البتول: ملطف؟ ما بخيت شي!.
ذكرى: مدري فيه ريحة عطر لايعه كبدي منها.
ام دايل: انا قايلة لتس يالبتول لاعاد تبخين شي في الجو علشان ذكور.
البتول: بس انا ما بخيت شي والله..
سكتت البتول يوم شافت ذكرى غمزت لها وفهمت قصدها على طول وكملت.
البتول: والله مدري وين ذي الريحه الي شامتها ( ناظرت في كادي ) بس تعالي اخرجي دامها تزعجتس.
قامت ذكرى وخرجت مع البتول وطلعوا فوق لغرفتها.
البتول: اخس اخس اخس ما عرفتس وانتي شرانيه!.
ذكرى: ان ما غديت شرانيه ولا بياكلوني بشرهم زي قبل.
البتول: خليتس حريصه على الي في بطنتس ترا كادي مهبوله وعليها قل صحه ماعندها مشكله تسوي اي شي يضرتس انتي وهو.
ذكرى: اي معليتس منتي احرص مني على نفسي.
البتول بضحك: حركات تتكلمين بالتس؟.
ذكرى: من عاشر قوم اربعين يوم اصبح منهم.