سبحانه الي زود الزين بالزين

البارت 19

الساعه 3:09AM
ارتفع صوت التكبيرات من مأذن المساجد وتلفزيونات البيوت، بدت ينتشر من البيوت ريحة البخور والعطور.
دايل الي قاعد يغني وهو داخل المطبخ: وكل عااام وانتتمم بخير، كل عاااام وانتتمم بخير، ضحكة فرح من كل قلب لأحلى ام. ( حضنها من ورا )
ام دايل: يا ولدي الله يصلحك اتركني اكمل شغلي.
دايل: يمه علامك ما تحنين علي!! لو سمحتي حني علي الان.
ام دايل: حننننننننن.
انفجر دايل ضحك على تصرف امه وباس راسها وراح طلع لاخواته الي كانوا يتجهزون الهنوف ومحيوسيين.
دايل: علامكم كذا تفرون كنكم نحل؟!.
نجود: المصروع خطيبها قرر يعيد معنا لان اهله مسافرين واكيد بينادي الهنوف علشان يسلم عليها.
دايل: والله وبتعرسين يا هنوفتي.
الهنوف: يوه يا الوناسه بفتك منكم ومن نكدكم، انا اكثر انسانه فرحانه.
البتول: انا قايله لك يا نجود خليها تسوي من نفسها ما صدقديني.
نجود: معليه والله ان اخليك في كبتك واروح ازبط نفسي، الشرهه مو عليك الشرهه على الي قايمه من الساعة ثنتين تزبطك.
دايل بضحك: دامها باعتنا فحيلكم فيها.
راح دايل لغرفة الغسيل عند سليمان الي بالفنيله والسروال وقاعد يكوي غترته لانه نسي ما يحطها مع الملابس الي راحت للكواي امس.
دايل: وراك تكويه؟ ما زبط لك الكوي!.
سليمان: هو كواها اصلًا! تخيل يوم جيت ادور لها قبل شوي ابخرها اكتشفت اني ما وديتها مع اغراضنا.
دايل: على العموم انا بطلع ادور ابوي من اليوم ادوره ما لقيته.
سليمان: شفته قبل شوي صحى من الازعاج وطلع للمشب الي بالحوش ينام.
دايل: بعمري عنه والله انه ما نام امس زين ارهقته ذي القحه. ( اهل شمال الرياض القديمين يسمون الكحه قحه )
راح دايل لغرفته وفتح شنطته وقعد يطلع الهدايا الي جابها لهم من الجبيل ويتفقدها اذا قد خربت او لا وقعد يفرزها وحدد الهدايا بعلامه تميز كل شخص علشان ما يلخبط بالأكيس وبعدها طلع الفلوس الي قعد يدخرها من كل مكافأه له علشان يعايدهم وتأكد انها كامله وحطها في جيبه علشان ما ينساها بعدها شال الهدايا كلها وحطها بالصاله علشان يوزعها عليهم بعد الفطور.
نجود: الاااه وش ذي؟.
دايل: هدايا جبتها لكم يا بعد اكبادي انتو.
نجود بضحك: كم عندك كبد انت؟!.
دايل: وحده بس تقسموها.
انطلقت نجود للبنات تقول لهم وقعدت كل وحده تخمن هديتها.
بعد ما خلص دايل راح للمطبخ عند امه تفاجأ ان فيه حرمتين معها فتوقع انهم ذكرى وخوله بس شك لانه ذا مو حجاب خوله الي كان حجابها عباية راس.
صد دايل بسرعه.
دايل: يمه من الي عندك؟.
ام دايل: تعال تعال مافيه الا كادي وجود بنات عمك منير.
دايل: السلام عليكم.
الكل: وعليكم السلام.
ام دايل: فين رايح.
دايل وهو خارج مع باب المطبخ: بروح لعمي خالد اسلم عليه ما قابلته امس.
ام دايل: طيب اطلع مع الباب الرئيسي!.
دايل: لا لا يمه ذا مختصر على طول على حوشهم.
ام دايل: وانت رايح لهم قل لخوله وذكرى لا يسون شي كل شي جاهز.
دايل وهو خارج: ابشري يمه.
كادي بهمس لجود: استعدي للفعاليات الي بصير اليوم.
جود: وشو؟ قالوا لك البنات انهم جهزوا شي؟.
كادي بتبسم: اي قالوا فيه فعاليه كبيره بس يقولون مفاجأة.