سبحانه الي زود الزين بالزين

البارت 56 والأخير

قامت ذكرى بعد بكاء مستمر دام نص ساعه وجت راحت للتسريحه حقتها وجلست على الكرسي تناظر في وجهها شوي في المرايه بعدها قامت عدلت شعرها ومسحت مكياجها وعادته وجلست فتره الين راح حمار عيونها بعدها نزلت بسرعه وراحت دخلت المجلس وعلى وجهها ابتسامه مصطنعه وجت مشت بكل ثقه الين راس المجلس عند البتول وسلمت عليها وحضنتها.
البتول: وينتس كنت ادور لتس!
ذكرى: كنت مشغوله هناك يا عمري اعذريني.
البتول: لا عادي شدعوه بس فقدتتس مرره لانتس اكثر وحده كانت متحمسه لزفتي.
ذكرى: شفتها زفتك بس ما مداني ادخل معك.
البتول: يمه يا ذكّور خايفه.
ذكرى: اكبر غلط تسوينه انك تخافين وربي الخوف بيخرب عليك احلى لحضات حياتك خليك مبسوطه واستمتعي بكل لحضه، تذكرين وش سويت في عرسي؟
البتول بضحك: الي سويته في عرسك ما ينسي واما بالنسبه لتحليل اللحضات والله انك صادقه.
ابتسمت ذكرى وراحت وطلعت تدور لجوالها الي ما تدري وين نزلته.
ذكرى: جوجو بالله دقي على جوالي ما ادري وينه.
نجود: خذي جوالي ودقي به مشغوله بروح اجيب عوده ابخر فيها النسوان.
اخذت ذكرى الجوال وجلست تدق على جوالها وتدور له الين حصلته ويوم جته تشيله لقت دايل داق عليها اكثر من مره استغربت وجت دقت عليه.
ذكرى: الو دايل دقيت؟
دايل: ايه دقيت عليتس الين ضامني راسي، تعالي بسرعه لقسم الرجال عمي خالد يبي يسلم عليتس.
ذكرى: ابوي؟
دايل: اي بسرعه تعالي.
ذكرى: يله جايه.
راحت ذكرى بسرعه لقسم الرجال ودخلت المجلس لقت ابوهد واخوانها وجلست تسلم عليهم تحضنهم واحد واحد.
ابو ذكرى: يا هلا بذكّور، هلا بروحي، هلا بوحيدتي، هلا بونيستي.
ذكرى: يا جعلني فداك يبه، تو ما نورت الرياض يا بعدي.
حمود: النور نورك يا ذكّور.
فهد: اشتقنا لك يا ذكراي علشان كذا قررنا ناخذك من زوجك نتسلفك منه اسبوع.
دايل: وهو على كيفك! ماحد ياخذ زوجتي مني واذا بتاخذونها اسبوع خذوني معها.
فهد: شفيك تحتك بأختنا واجد؟
دايل: دز امها زوجتي!
ابو ذكرى بضحك: بلا مناقر انت وياه البنت مالها الا بيت زوجها، وانتي يا ذكّور بس حبينا نسلم عليك قبل نطلع ونشوف وش في خاطرك.
ذكرى: ما في خاطري الا كل شيء طيب وتسلمون وما تقصرون.
حمود: مع السلامه يا ذكّور.
ذكرى: في امان الله.
طلعوا كلهم من المجلس وطلع معهم دايل وصلهم برا ورجع بسرعه كان يبي يكلم ذكرى واول ما دخل انتبه انها جالسه مسرحه وتهوجس ولا حست فيه يوم دخل عليها.
دايل: ذكراي علامتس؟
ذكرى: هاه.. لا ولاشي بس كذا فهيت.
دايل: عجينتي واعرفتس، كلامنا مو الحين كلامنا بعدين اذا راحوا العربان.
ذكرى وهي تناظر دايل بنظرات حزينه: حتنا ابيك بعدين بكلام.
دايل بتوتر: تمام اشوفتس بعدين.
ذكرى: مع السلامه.
دايل: يوووه كنت بنسى وش رجعت علشانه.
ذكرى: وش فيه؟
دايل: قولي للبتول انه زوجها بيمشي بعد شوي خليها تجهز.
ذكرى: يله بروح اقول لها.
قفت ذكرى وراحت ماشيه لكن فجأه سحبها دايل لجهته حضنها من وراء بقوه.
ذكرى وهي تحاول تحبس دمعتها: دايل انت سويت لي اكثر شي كنت محتاجته الحين.
فكها دايل ولف جسمها جهته وجلس يناظر عيونها: ذكراي صار شي؟
ذكرى: لا ولا شي بس كنت محتاجه اضمك.
رجع دايل حضنها بقووه وهو قلبه بيتقطع على دموعها الي جالس يحس فيها على كتفه.