أنثى الأسد

36\37\38\39

★أنثى الأسد★
36-زايدون انا كيعجبني راجل لكتيوت لحنيون لغزيول ودريويش مايتململش من بلاصتو ويحدر راس
أسية:اه باش انت تخلي دار بوه الى هضر وهدا راه مبقاش راجل ولا حمار تكولي ليه شا شا ويحدر راس ويخليك تركبي عليه
إيثار:اشمن سيري اش كتعرفي فرجال انت حتى دابا مبعيدة العيون سيري فبلاصتي ولا عرفتي شنو نمشي نصيفطو ليك فكاغط ديال سكر اش بان ليك
أسية:اليهبيل يهضر معاك اجي اجي ديري لينا شي فيلم نتفرجو فيه راه مليا بوحدي، نقزات إيثار من فوق لكرسي دفعات بختها وخرجو لصالون شعلات تلفازة وبرونشات لكلي خدمات فيلم لسندرا بيلوك وتلاحت على فوتوي
أسية:هاد لفيلم تفرجنا فيه مليون مرة
إيثار:وانا بغيت نعاودو كايعجبني بزاف، كلسو كايتفرجو مجموعين جا كريم دوش بدل حوايجو وتلاح حدا إيثار معنقها وهي ناعسة على صدرو وكتلعب برجليها حطات لحاجة لعشا لي كان غبارة على كراتان دخلات فيه تاني إيثار عمية غير سلاو طلعات لبيتها حلات ماريوها جبدات جوج باليزات ديالها عمراتهم بالحوايج وبرودويات ديالها غير شومبوان وباندوش وريحتها وستيك ديالها اما مكياج وتكول مكدورش بيه وحتى من ريحة ليكادير ريحة ديال رجال ماشي لبنات جمعات لي برودوي ديال روني والكس وسام سبريدالتها وصبابطها كلشي تجمع بقاو شي حوايج قلال فالماريو شافت فساعة لقات 12 دليل بدا العد لعكسي ومابقا والو لرحلة ديالها لي ممكن تغير مجرا حياتها كلو.
ليل ولى قصير دغية وصل صباح دخلات سعاد على إيثار لبيت حلات سراجم باش يدخل شعا
إيثار:ولا ولا وحشومة عليكم واش معسكر لهيه ومعسكر هنا
سعاد:الله يقلل حياك نوضي براكة من نعاس 12 هادي ضهر قرب يأدن وانت نعستي حتى حماض بولك نوضي واش نسيتي راسك ليوم بليل عندك طيارة ولا لا، رمات لكوفر عليها ربعات رجليها فزق ناموسية وشعرها مغطي وجها كولو
★أنثى الأسد★
37-ايثار:اه بصح نسيت كاع نزلات من على نموسيتها علاين متعطر
سعاد:يلاه دوشي عليك وهبطي تفطري خلاص متعطليش
إيثار:واخا واخا وغير حاضييني الله يطعل سلامة،نباتها عمتها من برا
سعاد:راني سمعتك اديك لعودة وحتى متسربي ونتفاهم معاك،دوشات دغية غسلات حالتها لبست حوايجها وهبطات لتحت دخلات لكوزينة لقات عمتها كتوجد ليها فالفطول ولحاجة كتصايب شي حلوة فشي بواطات
إيثار:لواليدة ديالمن ديك لحلوة
الحاجة:ديالك ديها معاك تم راه ميعرفو لا لحلوة لا لوالو حتى الى بغيتي تصايبي شيحاجة معندك كيديري
إيثار:واش انا غادية فاكونص الله يهديك
الحاجة:فطري وسكتي هادشي ماشي شغلك هاد شغل بعيد عليك
إيثار:واخا هاهي سكتات، فطرات إيثار حطات لماعن فالغسالة خدماتها ورخىجات على برا لجردة كتلعب مع كلابها تمات داخلة نوال
إيثار:ها صاعقة جات
نوال:نرجع والله حتى نرجع انا راجعة كاع، عطاتها بضهر وهي تجبدها إيثار من لقب ديال دجاكيط ديالها جاراها بلور بغات طيحها
إيثار:انت اجي كالك ترجعي كنلعبو هنا دوزي تكلسي
نوال:لكليكة بغاو يحيو عندك لعشية يتسيفطو معاك
إيثار:كتليك فمك حامي مشيتي وصلتيها ليهم
نوال:عادي مافيها باس ياك حنى صحاب
إيثار:اه بصح مزيان يجيو نتسيفط معاهم
نوال:هانتي لبيسي راه عندك ياك اتمشي ونبقاو ندويو كاميرا وتعاودي ليا شادة ولفادة لي طرات ناري اتخلي عليا لقنط اتمشي دابا مابقيتش كاع انبقى نخرج
إيثار:وابقاي كالسة فدار ديري شيحاجة اصاحبتي دفعي لشيحاجة
نوال:حتى تمشي ونشوف
إيثار:مزيان منين جيتي تغداي معانا ودوزي معانا نهار اجي اجنية وصلك كريم لبارح، ضحكات نوال وتزنكط
نوال:اه وصلني ههه فخبارك طلب ليا نمرة وفاش تفارقنا سلم عليا بالوجه
إيثار:وزيدك لصلكوط لمسلكط دغية زعم عليك مساهلش بالحنطويل لاخور
نوال:متعيريهش
★أنثى الأسد★
38-إيثار:كتعيبها) متعيريهش باز، دوزو لوقت كولو فالمناكرة تحط لغدا تجمعو عليه كولشي من غير كريم لي ايتغدا فالخدمة تغداو فأجواء ديال ضحك لي مولاتها هي إيثار بطبيعت لحال مكتخليهمش يساليو ماكلتهم على خاطرهم لوقت غادي وكيدوز لحاجة كل دقيقة تسول إيثار يكما نسات شيحاجة كل دقيقة داخلة لكوزينة جايبة ليها شيحاجة وصلات 8 دالعشية جا كريم سلم عليهم بدل حوايجو كلى شوية هبط بالز ديال إيثار دارهم فطوموبيلتو، هي فبيتها لبسات تيشورت شورط ديال دجين عكدات عليه دجاكيطة ديال دجين طلقات شعرها دارت كسكيطة مرجعاها باللور هزات سكادو فيه بيسي ديالها او وراقها كلهم تيليفونها طفات ضو دالبيت وهبطات لتحت كتلقى كليكة جات مجموعين وكلابها سابقينها وكوميسير رشدي حتى هو
رشدي:إيثار هادي شي وراق ايخصوك ياك هزيتي لبيي ديال طيارة
إيثار:لقيت جوج بيي مفهمت والو
رشدي:اتمشي من هنا لمطار ايطاليا ومن إيطاليا لبرازيل وتلقاي تما موسيو لهلالي كايتسناك
الحاجة:لغصة فحلقها بغات تبكي وحابسة راسها) تهلاي فراسك ابنتي وديري عقلك الله يغطيك برضى الله يسهل عليك ويسر ليك امورك ياربي ردي لبال، عنقاتها إيثار بجهد
إيثار:ماما لي يسمعك يكول واش مهاجرة يلاه تهناو من صداعي شوية وتعرفو بقيمتي هاء هاءهاء (ضحكة دالخنازير)
الحاجة:شفتي كلمت ماما كي كطلع منك كنحسك راه بنت ماشي بحال ديك لواليظة مكنحملها
الحاج:الى على لهنا انتهناو يلاه منبقاش نشرب دوا ديال طانسيو
إيثار:اح عليك الحاج عارفا واصلة ليك لعظم وانت أكتر واحد اتوحشني اظافع علي كبير اح فيك اعميمير شتي انت هو لحب لاول والاخير، شداتو من حناكو كتبوس فيه وتعنق وفعلا هو ادافع كبير اما حاس بدموعو ايهبطو، عنقات عمتها
إيثار:عميتو تهلاو فبعضياتكم انبقا نهضر معاك انت لي كتجيبي ليا لخبار
★أنثى الأسد★
39-لخبار هوما هدوك وتبركيكات فالميكة
سعاد:ههه الله يمسخك وليت انا هي مقدم لحومة، عنقات ختها أسية
أسية:تهلاي فراسك وبون شونص اروبن هود
إيثار:براكة شحال عزيز عليك تبوسي، جات تسلم على نوال
نوال:بلاتي انا منتفاك معاك حتى لمطار
عصام:وحتى حنا انكشيو معاك حتى لمطار،
رشدي: الله يوفقك ان شاء الله وتيليفون بيناتنا ديما باش نعرفو فين وصلتي حركات ليه راسها و شيرات ليهم بيديها بمعنى بسلامة وخرجات غير خرجات لحاجة ساحو دموعها كتبكي وتعنقها سعاد تسكت فيها، ركبات إيثار لور مع كلابها ونوال لقدام اما صحابها ركبو مع عصام فطوموبيلتو وتبعو طوموبيلت كريم كتشوف فالمرايا وحاضية خوها ونوال ونظراتهم
إيثار:الله يقلل حياكم انتوما بجوج خليوني غير حتى نمشي انا وارى متحابو
كريم:إيثار
إيثار:اشمن إيثار راه شفتك بغيتي تاكول سيدة بعينيك نوصيك من هنا لوصية متقتل متحيي مطولش فهادشي ودخل من لباب
كريم:انت الما سكتي ودخلتي سوق جواك ادخلك فداك سرجم
إيثار:وجرب انا اساهلة ليك
نوال:هنيونة انتوما بجوج، شدو طريق كازا نيشان مطار محمد لخامس وصلو بلاصا كريم طوموبيل نزل بالز ديالها جرهم معنقينها لكليكة دايرينها لوسط قدام لمطار دارو سيلفي معاها وينزلو فالفيسبوك عطات وراقها لخوها قام بالازم وجميع الاجراءات غير سالهام جا عندها
كريم:حولي كلابك تخليهم حداك ميسيحوش فطيارة
إيثار:كتخافش جايبة حزام ديالهم، بقات ربوع ساعة تسيفطات مع صحابها ومع نوال لي مبغاتش تسكت من لبكا تخلطات خنونة مع دموع اما هي ادور وتفرنس معرفت مناش مصنوعة هاد لبنت عنقات خوها بجهد جرات لبالز ديالها او واحد صمطة داراها فيديها فيها تلاتة صماط كل وحدة مديورة فعنق واحد من كلابها سلمات بيي ديال طيارة ديالها عطاوها اشارة دخول دارت لور وشيرات ليهم ومشات..