أنثى الأسد

340\341\342\345

★أنثى الأسد★
340-كاتليك قرقشات عليه واخا واخا ابنت لغالية دواحة دابا نوريك الما كحلت ليكم ضواسا منتسماش غير بلاتي،مشات دخلات لدار طلعات لبيت عمتها دخلات لعندها نيشان:
إيثار:عميتو اجي نكوليك مزال عندك دوك قفاطن ولقمايس دجداتي الله يرحمها؟
سعاد:مزال عندي علاش بغيتيهم؟
إيثار:غير واحد البنت كنعرفها كدير لمسرح وبغاتهم هاد لعشية غير تسالي منهم ونرجعهم ليك
سعاد:وراه واسعين الى كانت البنت رقيقة راه مي كانت مرة وافية
إيثار:لالا ماشي مشكيل هيا بغاتهم كيما كانو وعطيني حتى دوك سراول ديالها لي فيهم جياب لاستيك من لتحت وديك لمضمة لي بصقلي اعميتو ودوك زيوف حياتي
سعاد:هادشي كامل بغاتو صاحبتك(كتشوف فيها بشك)
إيثار:والله اعميتو الى بغاتو عندها مسرحية قلت نعاونها فسبيل الله
سعاد:واخا صبري نجبدهم ليك،ناضت لماريوها حلاتو واحد بلاكار كان خاص بحوايج جدات إيثار جبدات ليها قميس بحزامو وزيف حياتي مع سروال قندريسي مدجة ديال لعنق وشي دبالج دنقرة كلشي جمعاتو ليها فصرة ومداتو ليها
سعاد:وهاهوما عندك ديهم ولا تمشي فيهم شيحاجة راني دايرة ليهم شم ولم
إيثار:داخت بريحة)وهيا ناري اعمتي وعلى ريحة لكافور ومديرة فيهم صافي اعمتي كوني هانية أصلا متقدش دي فيهم شيحاجة الى قدات تكمل بيهم لمسرحية بهاد ريحة ومغيبات حد ميكولها لحد غدا ونرجعهم ليك اعمتي هاني مشيت،دات لحوايج لبيتها حطاتهم ورجعات نزلات لمخزن لي عندهم فلور ديال دار دخلات ليه روكشاتو لقاتو واحد جوج بواطات ديال صباغة وحدة كحلة ولوخرا فالقهوي واحد لبونجة وطلعاتهم معاها لبيتها دخلات سدات عليها بساروت حيدات حوايجها ودخلات لحمام هزات واحد بونجة صغيرة وبدات كتصبغ شعرها بلون لكحل خصلة خصلة حتى سلات شعرها كلو ركبات سيشوار وكلست تنشف فشعرها حتى نشف رجعها شعرها بحال لحلفة
★أنثى الأسد★
341-لحلفة حرش ولونو كحل هزات لبواتا لي لونها قهوي وبدات تلون من راسها لرجليها سلات وهزات سيشوار وكلست تنشف فلجسد ديالها كلو دوزات صبع على لحمها تأكدات من صباغة راها لاصقة مزيان دارت ايدها تحت روبيني متحيد والو عاد جمعات لحمام وخرجات لبيتها لبسات حوايجها تحتانيين عاد لبسات جوج كولونات ةدارت تحتهم لي حاجة لقاتها قدامها ياتقشيرة ياشرويطة اي حاجة عمرات كرشها عاد لبسات سروال قندريسي مع تريكو فوقو قميس فشيبي مع شمار مع مضمة وعكفات راسها ولات كتبان غليضة بزااف وختماتها بطبلية ديال ستان لواتها على لخصر ديالها مشات جيهت لمراية كتفكر كتفكر
إيثار:شنو نسيت ياربي شنو نسيت اياااه هضرتي هضرتي اتفضحني،خرجات لمجر كتقلب على شيحاجة علات راسها بحال الى تفكرات شيحاجة حلات لباب كطل واش كاين شيواحد مبان ليها حد مشات لبيت عمتها حفيانة كتجري فتحاتو ودخلات ليه مشات لكوافوز عمتها حلاتو هزات واحد صندوقة فيها لكحل لبلدي ويواك كحلات عينيها وهزات كمسا ديال سواك عمرات بيه فمها شافت جيهت لماريو بانت ليها لبلغة ديال عمتها هزاتها لبساتها وخرجات كتسكل شافت فساعة لقاتها 8
إيثار:عامر فمها)هدا هو لوقت،طلات عليهم من لتحت مكاين حتى واحد وهي تهبط كتمشى بحال لحاملة تدق لباب مشات جيهتو فتحاتو لقاتها حليمة
حليمة:سالمو عليكم كاينة إيثار
إيثار:غلضات صوتها ورداتو ديال مراكشيين) لا ا لالة واش نتي هيا حليمة؟
حليمة:أه هي أنا انت هي خدامة لي كالت ليا إيثار ياك؟
إيثار:لا الالة انا طباخة لي انعاونك فهاد لعشا هدا واش نمشيو ولا انباتو هنايا
حليمة:لالا نمشيو،كطلع فيها حليمة وتهبط ردات إيثار لباب وشدو طريق
حليمة:واجي كولي ليا أش سماك الله بعدا
إيثار:سميتي "شامة زاز"كي شتي انا هي مولات الاناقة وزين كنت كنهبل فصغري داكشي
★أنثى الأسد★
342-داكشي باش والديا الله يواليهم برحمت الله سماوني شامة زاز
حليمة:هكاك مزيان اشامة ولكن اجي نكوليك اول مرة نشوفك حنا واش دار الحاج جابوك جديدة؟
إيثار:شوفي انا مكنحملش نميمة الله يرحم لوالدين لخدمة خدمة ياه جيت جديدة راجلي مات وعندي دراري كيقراو فسكويلة وخاص نصور طرف دلخبز
حليمة:ايوا مرحبا بيك شوفي بغيتك تحمري ليا وجهي عند دار لمعطي
إيثار:من نحية تحمار متخميش انخلي كولشي يولي يكول حليمة مرا وكادا اكوني هانية راه مزال مكتعرفينيش
حليمة:وهكاك نبغيك يلاه هاحنا وصلنا،وصلو لدار لمعطي دقات وهي تفتح لغالية شادة لباب كلو طول وعرض كتندغ فلمسكة ومطردكة عينيها مجبدة حجبان بلقلم راداهم كي شقيف
لغالية:على سلامة أحليمة وكون اسكنتي حسن شكون هادي لي معاك
حليمة:هادي شامة طيابة لي معايا منكولش ليك اش كتحط من ايديها اشمنك يا بساطل اشمنك يامحمر
لغالية:ودخلي خلاص براك عليا من كترت لهضرة راه كوزينة قدامكم راكي عارفة بلاما نحتاج نوريك ماشي هادي هي لمرة لولة ونبغي ل 10 كلشي يكون مجود على حقو وطريقو تفاهمنا
حليمة:الله الالة لغالية عاد اتوصيني(شافت فإيثار)شامة يلاه تبعيني،دخلو لكوزينة كانت كبيرة بزااف ولكن ممنضماش
إيثار:هي كولي ليا احليمة بيت هانسولك واش هاد لغالية مرا ولا بكرة؟
حليمة:اويلي تي كوني تحشمي دروك تسمعك
إيثار:وانا كولت هي صراحة واه شوفي كوزينة يجري فيها لعود وكاعما منضمة ويلي على لعفن
حليمة:وحنا مالنا جايين نديرو خدمتنا ونمشيو يلاه يلاه نغسلو دجاج باش يلاه نديرو فيه ليقامة ديالو ونردوه يطيب
إيثار:اويلي لا علاه مافخبارك دجاج مابقاش كيتغسل اغير نتقبوه وندهنوه بداك اسميت باباه لاموطارد ويدخل لفران يطيب
حليمة:تي منين جبتي هاد طياب لملاوط
إيثار:علاش مكتليكش راه كنت خدامة فرياض ديال
ديال شاف موحا وهو لي كان كيلعمنا واش انت كتعرفي حسن من شاف موحا؟
حليمة:لا ايوا صافي بلاما نغسلوه ديري لي كتعرفي وانا غادي نطيب دغميرة ديال لكنيصات ولكبيدات،هزات إيثار داك دجاج لي اصلا مزفر تقباتو ودهناتو بلموطارد وحطاتو على جنب وبدات فطياب لحم خلاتو بجلافطو
حليمة:اويلي اشامة تي قطعي دوك جلافط راه يلصقو على لمعدة
إيثار: واش انا طباخة ولا انتي هي كولي واش انت لي كنتي خدامة عند شاف موحا ولا انا هي كولي ليا ياك كلتي نحمر ليك وجهك والله حتى نلوح هاد طبلية ونمشي فيحالاتي وانا كنكوليك
حليمة:صافي صافي ديري لي بغيتي غير لمهم يكون كولشي ناضي،رمات إيثار لحم دارت معاه ربطة ديال لكرافص كلها كرضتها لاحتها بانت ليها لحريكة نابتة فواحد لفاز هي وسالمية هزاتهم كرضاتهم لاحتهم معاه دارت معلقة دسمن على قدها مع تلات معالق كبار ديال راس لحانوت عاد كرضت لبصلة ودارت لعطرية بلات لكوكوت وسدات عليها
إيثار:دابا شنو بقا لينا؟
حليمة:كتعرفي لديك شلاضة ديال جردة؟
إيثار:الله اودي كنعرف ليها كندير فيها اشمنك يا نوار اشمنك ياشجر هادشي كاملو كانديرو بلخضرة ليوم غادي يعيطو عليك دوزيم تقدمي بلاصة ديك شوميشة
حليمة:ويلاه وريني حنت ايديك،هزات إيثار لخضرة كاملة كرعة لفت كورجيت ماطيشة كولشي كرضاتو مع فلفة لحارة وقداتو بشكل كيشهي وسقاتو بطون ديال زيت لوسيور وكترت لملحة وزوقات بيه لبلاطو،دخلات عليهم لغالية
لغالية:امضرا فين وصلتو ضيف راه ايوصل دابا
إيثار:متخميش الالة كولشي بايكون هو هداك الالة الله يفرحك ويكون هاد سيد من سعد بنتك
لغالية:امين داكشي لي بغينا غير نجمعو ليه حب وتبن وياخود بنيتي وعلى هاد لهضرة زينة راكي بحلاوتك اشامة ويلاه هاني مشيت
إيثار:كتحلف)ليوم نحرق ليكم لمسارن وغادي نوشم ليكم بلحركوز ابلاتي يابيا يابيكم.
★أنثى الأسد★
345-دارت ليهم صريرة هوما راه كنس بوحاطي مهم انا داخلة ناكول،دخلات إيثار لكوزينة ميتة بضحك
إيثار:نوريك انا بلا حشمة بلا حيا مانتك ومقاد ومسبسب ليا شعر كيف كان كيبان بحال لبيبي ءحح هاداك زين ديالي انا وأسر ليا انا بوحدي وحموس تقرب شي وحدة ليه والله حتى نوريها كتر من هكا،حطات لعشا او واحد طرف دلكيكة كلسات كتاكول على خاطرها سلات لعشا وبدات بالكيكة ولعصير على أقل من مهلها تفتح لباب كتسمع صوت كتير خرجات راسها من سرجم دلكوزينة كايبان ليها كريم داخل ومعنقو آسر شاد فكرشو
الحاج:زيد أولدي زيد دخل ترتاح الحاجة الحاجة،ناشت عندو الحاجة مليكة
الحاج:وجدي بيت ضياف لأسر ايبقى عندنا هاد ليام بينما برا راه مكاين لي يقابلو،خرجات إيثار وجها عامر شكلاط
إيثار:مالو فاتح على لمرارة ولا لمسران لغليض علاش فين مشات فاتي لي مراضعة معاه تكابلو
الحاج:كون تحشمي راه خطيبك زعما وزايدون البنت مشات شحال هادي فاش كنتي غايبة
إيثار:خطيبي كاليه شي حد يمشي ياكول عند لمعطي لمعفون
الحاج:لا حول ولا قوة إلا بالله هدا خطيبك ولازم عليك انت تقابليه
إيثار:خرجت عينيها)نقابلو تجي فاطم زهرا بنت لمعطي تقابلو،رجعات لكوزينة تكمل ماكلتها سلات هزات ماعن غسلاتهم وخرجات عندهم لمراح كولشي دايرين بيه
مليكة:شنو طرا أولدي؟
آسر:غير كيشوف فإيثار)تحط لعشا أخالتي غير بديت كناكول ماكلة ماهياش لحم معرفتش شنو فيه روايح فشكل مقديتش نكمل ولكن مرات سي لمعطي أسرات عليا ناكول دجاج مكانش طايب مزال بدمو وبمصارنو صافي حسيت بلوجع فكرشي مقديتش نكمل
الحاج:وهوما أولدي علاش مكيحسوش؟
آسر:كانو كايكابرو باش ميتحاشموش ولكن وقت صح ولا واحد تابع تاني معقلتش على راسي حتى جات لومبيلونص داتنا
سعاد:على سلامتك اولدي
إيثار:باين لمعفونة دبنتهم لي طيبات