أنثى الأسد

6

★أنثى الأسد★
6-ولكن برات لخدمة كتهلى فراسها وانتوية عكس ايثار لي ختارت تسلك طريق أخرى مجنونة الى اقصى لحدود جريئة وقوية مكتخافش ومكتحشمش مغامرة مخلات جبال اي دولة سمعات عليها فيها جبال واعرة خاصها تمشي ليها اما اخر لعنقود ريم 16سنة وردة ديال كتشبه لكريم،نوال صحبت إيثار الانتيم فينما مشات معاها وكتحناق على كريم اما باقي صحاب ايثاركلهم دراري فاش مكيكون عندها حتى ماتش هي لي كتكون مكلفة باش تبيع وتشري لباها فلبهايم وهي لي مكلفة كتفرق ديسير ولخضرة على جمالة ولخضارة بنت ولكن ب100راجل.
أحمد:على سلامتنا يلاه هبطو دغية قبل مايشوفني شاف مشيت فيها
ايثار:تاسير على رجلة كيدليرة طر ، شافت فنوال لي كانت ناعسة، هاديك هاه اديك لبكرة نوضي راه وصلنا ، فاقت نوال كتشبح وتحك فعينيها
نوال:الله ياربي وأخيرا، هزات صكادو وتبعات إيثار نزلو من طيارة
إيثار:احمد تهلى فراسك شكرا بزاف برو لعز الله يحفظك على هاد لوقفة نردها لخويا فساعة لخير.سلمو على أحمد وخرجو على برا خداو طاكسي لمرجان تما فين خلات إيثار طوموبيلتها وصلو خلصاتو إيثار ومشات لطوموبيلتها لي كانت من نوع بيكوب تويوتا فالكحل فتحات لباب لوراني لاحت فيه سكادو ديالها ولبيسي وركبات طلعات حداها نوال وشدو طريق لفيرما.
نوال:ناري ياختي بحال الى كنت كنحلم والله شوفي فين كنا وفين ولينا
إيثار:انت عارفة فمك كياكلك تكولي واكلة قزيبة دجاجة والله ونعرفك حليتي فمك وعاودتي بشي حد وبالخصوص خويا كريم عارفاك اكتشوفيه كتحلي من لفوق ومن لتحت وريوكك كايسيلو كتخوي ليه لمزيودة كامل لي سولك فين كنت اش اتكولي علاش وصيتك؟
نوال:كنا فرباط كان عندك تدريب حبت اتلعبو مع لفرقة دمراكش
إيثار:هكاك نبغيك ودابا عجبتيني، مدات إيثار ايدها لسجالة خدمات(جونيفر لوبيز) وهدات صوت على حر جهدو..