أنثى الأسد

335\336\337\338\339

★أنثى الأسد★
335-الشرط لي عندي هو ختبار بسيط
آسر:بتعجب)ختبار وقيلة ختبرتيني بزاف وبينت ليك اني باغيك او لا؟
إيثار:كوليا الى فرضنا مثلا مثلا تزوجنا وشي نهار جاك سيزي هادا غير ميثال ومابقا عندك والو مناش اناكلو ونشربو ونصرفو عندك شي صنعة لي توكلنا ولا شيحاجة كتعرف ديرها؟
الحاج:ولكن ابنتي الارزاق بيد الله هو لي كيعطي هو بي كيدي وتبارك الله آسر ماشاء الله بخيرو
إيثار:أنا كلت غير فالميثال مشا ليه كلشي كاين لي عندو لبارح وليوم صدق ايد وراه ويد قدامو
آسر:دابا شيني نيشان شنو بغيتي؟
إيثار:بغيتك تخدم فالأرض فلاح
آسر:شنو!بعقلك انت لا أنا نخدم فلاح واش صافا با انت لا؟
إيثار:ومالها لفلاحة كيجاتك عيب ولا حرام
الحاج:ماعيبش ابنتي ولكن راه صعيبة شوية خصوصا على شي واحد كبر وعاش فأوروبا واش من مدير شركات لفلاح شوية فشكل
إيثار:هدا شرط ديالي لوحيد يخدم بحالو بحال أي خدام هنا يخدم بكتافو بحالو بحال ناس لي هنا انا منقصتش منو انا بغيت غير صداقي يكون من عرك كتافو ومنها يتعلم حرفة مزيانة ياك حتى هو عندو خدامة وكيعركو ويجيبوها بعيا كتافهم يجرب ياك الراجل فين مامشا يخدم بكتافو مهم راه راجل ولخدمة ماشي عيب وانا راجلي نبغي نعول عليه حتى الى مابقاش عندو يتصاب بعدا عندو حاجة فكتافو يتعلمها وحتى أنا انعاونو بجوج انتعاونو هذا شرط ديالي
آسر:موافق،شاف فيه الحاج!
الحاج:واش ادير لي كالت ليك
آسر:أه الحاج وانا بغيت نخدم عندك مع لفلاحة لوخرين وتعتبرني بحالي بحالهم وتنسا اني نسيبك حتى نجمع صداق بنتك هادشي هو لي غادي يكون
إيثار:تبسمات)ودابا سمعونا زغاريت.
"فبيت إيثار"
أسية:زعمة معندي منكول والله برافو عليك وحتى آسر صدق ولد ناس وكيبغيك
إيثار:حتى انا كنبغيه داكشي باش شرط
★أنثى الأسد★
336-شرط عليه هداك شرط
أسية:الى جيتي تشوفيه راه نفعتيه مزيان لواحد يكون كيعرف يدير شيحاجة حتى الى جاب الله داز من شي ضيق يلقا راسو كيعرف يدير شيحاجة صراحة فرحت ليك كنتسنى نهار عرسك بفارغ صبر والله باينة ايدوز واعر آسر كيبغيك ايدير ليك عرس ولا فالاحلام كسوة عرسك تكون بالبيض منبتة بالحجر كون ادرتوه فالبرازيل ونمشيو كلنا لتم واوووو كانتخايل ايكون عرس اسطوري خاص نخيط شي تكشيطة دايزها لكلام بحال والو تكون صحافة(شافت فيها لقاتها كضحك) مالك كضحكي؟
إيثار:حيتاش انت كتحلمي بزاااف
أسية:ويلي علاش وراه اتاخدي راجل ميليونير عرسك ايدوز فتلفازة
إيثار:ممم واه ان شاء الله ان شاء الله يلاه اختي سيري تنعسي الله يرضي عليك وكملي حلمتك فبيتك
أسية:ياك اشنيولة واخا دابا نشوفو
إيثار:وايييه دابا نشوفو،ناضت اسية لبيتها وبقات إيثار تكات فبلاصتها جاها ميساج هزات تيليفونها لقات ميساج من عند آسر:
"واخا تجيبي تحدايات دنيا ومفيها انديرهم اتولي ليا طال زمان ولا قصار وتشوفي صوصيطة مشوية بشحال كطلع احبيبة ديالي غير وجدي كنبغيك"
إيثار:لماسخ لممسوخ لاخور مكيحشمش مقصدر ياخ ولكن أحح كنبغيه وكنموت عليه، نعسات وهيا مرتاحة وفرحانة معنقة تيليفون.
مع صباح بكري بدا آسر لخدمة جديدة ديالو مع لخدامة يهز صنادق يديهم لكاراجات لي فيهم لخضرة يركب على تراكتور شمس كضرب فيه دغية زعم على لخدامة لوخرين،فاقت إيثار لبسات حوايجها هبكات فطرات وخرجات كتمشى بانو ليها بنات تما خرجات وكيهضرو بيناتهم هضرات وحدة مع تانية:
"ناري ياختي عمر شي واحد بحالو بان ليا هنا كيهبل تكول خارج امن شي فيلم"
"ناري حمقني شفتي عضلات ديالو كداش بغيتو من شوفة لولة ماشتيش فاش كانو كيرتاحو لخدامة ومتكي وشعرو فازك قلبي ضرني ياختي"
إيثار:انتوما علامن كتهضرو
كتهضرو انتوما؟
"ختي إيثار ناري وتشوفي لخدام جديد كيدايركيهبل على عضلات وطولة وسمورية كيهبل اختي"
صغرات إيثار عينيها خنزرات فيهم
إيثار:محشمتوش كتجسو على ناس ا هادشي لي علموكم والديكم ادويو كونو تحشمو وانتوما مزال صغارات زعمة مازال مافقصتو من لبيضة جيل قيمش ميحشم مايريمش سيرو سيرو ولا والله حتى نكولها لوالديكم، خلاتهم مستغربين منهم غادية وكتبغم مشات جيهت فين خدامين علات عينيها رجليها وقفو كاترمش بعينيها كيبان ليها أسر كان متكس تحت براسول سروال دجين لفوق عريان ناض وقف صدرو كيبري تحت شمس عرقان
إيثار:ووووه شنو هادشي لا تبارك الله عليا عريان كيدير عرض الازياء هنا متلف لبنات دا ليهم عقلهم،مشات جيهتو كضرب برجليها حتى وكفات عليه
إيثار:واخا نعرف اش هادشي كدير،على آسر فيها راسو
آسر:لالة إيثار شنو درت خدمتي وكنديرها
إيثار:لالة إيثار تسطيتي لا
آسر:دابا انا غير خدام عندكم بنسبة ليا انت بنت لباطرون ديالي مخاصش نكتر معاك لهضرة
إيثار:لغيرة كتاكول فيها)والبس حوايجك وانت عريان ولي غادية تشوف فيك ولي جايا تشوف فيك
آسر:انا هكا كنخدم الالة وشمس وصهد ميمكنش نلبس غير هكا
إيثار:كتحكني دابا واخا،خبطات برجليها وتمت راجعة
آسر:ميت بضحك) لمغيارة ديالي لقيت ليك نقطة ضعف دابا نشوفو قداش اتبقاي صابرة......
★أنثى الأسد★
337-رجعات إيثار لدار معجبهاش الحال دخلات نيشان لكوزينة دارت طابلية خدمات لموسيقى وبدات طيب طلات عليها مها وعمتها كيشوفو فبعضياتهم متعجبين منها شحال هادي مدخلت للكوزينة ولا دارت بحال هكا بدات تعجن فالمسمن ودلك وتكول مدلكات خلاتو يرتاح وبدات كطيب فالعدس مع دجاج بغات دير رفيسة خدامة بلا عقل خبزات لمسمن على حقو وطريقو المرقة ريحتها عطات فدار كلها جبدات قصرية وطبسيل كبير قباتهم لقصرية حطاتها ليهم فوق طبلة وطبسيل سيفطاتو مع لعساس يديه لأسر ولخدامة لي معاه كلسو كيتغداو وإيثار كتاكول وساكتة نقز باها
لحاج:الله ابنتي على قصرية الله يعطيك الصحة
إيثار:بصحة وراحة
كريم:لوليد ان شاء الله بغيت ندير لعقد فهاد سيمانة مع نوال صافي براكة شحال وانا كنتسنى
إيثار:امم زربان ويااه بصح ضرب لحديد محدو سخون على شوية كانو ايطيرو بنوال فكينيا
كريم:كيفاش ايمتا هادشي؟
إيثار:فاش جات عندي حضرنا لواحد لعرس وكان واحد لكيني باغيها والله
كريم:انا صافي قررت هاد سيمانة اندي دهاز وندي ليها كلشي ونضربو لاكط صافي
الحاج:لي درتوها انا معاكم فيها الله يكمل عليكم بالخير
كريم:امين ياربي انسوني ليها توجد راسها فالعشية ندوز من وراها نديها تختار لي بغات معندناش لوقت بزااف،ناض كريم يهضر مع نوال إيثار سلات لغدا غسلات ايديها وخرجات على برا هازة واحد لمنظار كانت كديه معاها فاش كتكون مسافرة نيشاتو على آسر ومقابلاه من بعيد كتشوف فلبنات كيفاش حاضيينو حرقها قلبها
إيثار:أش داني لشي تحدي ولا شي ويل انا كاع مكفانيش لي دار بقا ليا اتحدي وقيلة انتراجع على قراري حسن ولكن ايسحاب ليه متيقاش فراسي لالا اوووف ياربي شنو ندير؟ بقات مقابلاه حتى وصلات 6دلعشية وبدات شمس كتغرب لخدامة بداو كيمشيو فحالهم تحركات لعندو وصلات لقاتو كيلبس
★أنثى الأسد★
338-كيلبس حوايجو دار شاف فيها تبسم ليها
أسر:انت هنا كاعما شفتك(بلعاني هو شافها منين كانت حاضياه)
إيثار:ماكلتيش بيا كيجاك لغدا؟
آسر:شحال مكليت بحال ديك رفيسة كولي لخالتي الله يعطيها صحة
إيثار:انا لي درتها ماشي خالتك
آسر:وايلي ممم داكشي باش دجاج كان مزفر شوية يمكن مغسلتيهش مزيان وقويتي لملحة شوية حتى لمرقة مكانتش خاترة
إيثار:ياك يلاه كلتي شحال هادي مكليتي بحالها ودابا كتعيب؟
آسر:حيت يسحاب لي خالتي لي صايباتها مابغيتهاش تقلق مدام انت ماشي مشكيل نكوليك لحقيقة
إيثار:والله الى انا نستاهل نيت لي شحال مدخلت لكوزينة وليوم دهلت على قبلك حيت واعدت انا نبقا نوجد ليك مناكول اما انت سرك غير اتاي ولخبز وزيتون كحل
آسر:واو هادوك هوما أحسن حاجة هوما بعدا حسن من ديك رفيسة لي وجدتي
إيثار:بغيتها تحتليك فركابي هاد ليدين نيت خاصهم لقطيع لي كلسو يدلكو فداك لمسمن واشوف شكون مزال يطيب ليك،يلاه اتعطيه بظهر وهي توكفها هضرتو:
آسر:لا من ديك نحية متخميش كاع لبنات لي هنا مستاعدين يطيبو ويجيبو ليا مناكول كل وحدة باغية تبين حنت ايديها خاصني غير نهضر،دورات راسها بشوية كتخنزر فيه صغرات عينيها
إيثار:الله يطليكم مع بعضياتكم،ضربات فيه وتمت راجعة بالخف وقفها صوت حنين بزاااف
"سلامو عليكم سي آسر هاد لبن سيفطو ليك لوليد وكاليك ضروري تعشا عندنا اليوم"دارت إيثار بشوية عليها كتبان ليها بنت لمعطي صغيرة كانت هاديك لبنت فعلا واخدة حقها فزين حسن من خوتاتها عوينات كبار ولبشرة بحال لحليب وحنيكاتها ديما موردين سميتها فاطم زهرا
آسر:شاف فإيثار لقاها واقفة مزال)أه واخا ان شاء الله ليلة نكون عندكم كوليها لوليد منقدش نرفض بحال هاد لعراضة،شافت فيه فاطم زهرا بنظرات ديال الاعجاب عطاتو لبيدو ديال لبن ومشات حادرة راسها ومرة
★أنثى الأسد★
339-ومرة مرة كدور تشوف فيه تبسم وتكمل طريقها
إيثار:ديالاش هاد لعشا سبحان الله داك المعطي مكيعرض لله فسبيل الله باين من وراه كاين شيحاجة
أسر:سيد دار معايا صواب وانا انقبل دعوة ديالو عادي مافيها باس على وعسى ماكلت بنتو حسن من ماكلت شي ناس
إيثار:واخا وانا بغيت داك لعشا يدير ليك صريصرة فكريشتك،ضربات فيه وكملات طريقها لدار تلاقت فطريق مع عيالات ديال تم طلقات ودنيها كتسنط ليهم شنو كيكولو:
"انا بعدا والله لا مشيت كدمر عليك واعطيك حزقة لاروب مالي هبلت"نقزات لوخرا
"انا بعدا غادي نمشي نترزق شوية واخا نجيبو معانا اشيحاجة"
إيثار:خالتي حليمة علامن كتهضرو؟
حليمة:لغالية مرت لمعطي الالة عارضة ليك على لخدام جديد لي خدم هنايا لي سكن فدار ديالكم علاما سمعت انت سمعي وكولي الله وعلم
إيثار:مدياها على قد عقلها)الله علم غير طلقينا خلاص
حليمة:كاتليك بغات تلبقو لبنتها فاطيم زاهرا
إيثار:اويلي على تلبقو ليها مالو مخينزا تلبقو ليها
حليمة:ايوا بنتها قرقشات عليه منين حط رجليها هنا وتقارات هيا ومها راكي عارفة لغالية بناتها لوخرينات زوجاتهم صحة ودابا بقات ليها هادي هاهيا لكات ليها همزة ليلة عارضين عليه داكشي باش سيفطات ليا انا وشي وحدة نطيبو ليها راكي عارفة فيها الفم خلاتها مولاتها لفم ماضي ودراع كاضي،إيثار سكتات كتفكر
إيثار:ولقيتي لي يعاونك؟
حليمة:مزال هانتي تشوفي رقية ومينة بغاوش من نهار دارت ليهم داك لقالب فعرس بنتها لولة
إيثار:صافي لعشية دوزي عندي لدار نسيفط معاك خدامتنا تعاونك
حليمة:هدا هو لمضمون فيك لهلى يخطيك ابنيتي الله يفرحك
إيثار:هانية اخالتي حليمة مابيناتناش،خلاتهم وغادية كتفكر
إيثار:الله يستر حتى كنبغي ندير عقلي ونحيد من هاد تنوعير وتجي شي حاجة ترجعني لفين كنت هاكيني هكاوا كاتليك