أنثى الأسد

350\351\352\353\354

★أنثى الأسد★
350-مع لغالية تقيلة دغية طاحت الارض نعساتهم بجوج وكلست تشتف عليهم آسر يجر وباها يجر مادخلوها غير بزز
إيثار:والله ومزال دور بيا شي وحدة حتى نخلي ناس مايعرفوهاش تسحابوني اكليولة اتغلبوني العود لي تحكرو يعميكم ومزال نشوف شي وحدة فيكم ارباعة لحرشة تريكة شمع لبلدي تفو تريكة ناقصة(شافت فأسر لي مزال هازها)وصافي انت طلقني،هبطها قدات حوايجها وضربات فيهم وطلعات لبيتها خبطات لباب مشات جيهت سرجم بانت ليها لغالية وبنتها غاديات ويعكزو رجعات كتقلب كتقلب بانت ليها واحد طاسة كادير فيها ماكلة روني هزاتها وشيرات بيها عليهم جات لغالية فظهر
إيثار:ومزال دوري بيا يا سامة لعقروشة نلقاك دوري بيا نحيد ليك دوك جوج زغبات الى ما درتها انا خليت دل،سدات سرجم وكلسات
إيثار:استغفر الله العظيم وأتوب إليه انا صلكوطة انا ياربي تصبرني راك كتشزف كولشي مكنجبد حتى واحد ولكن هاد لعقروشة ديما كتجبدني ديما،ناضت لدوش دوشات تكالمات خرجت نشفت شعرها لبست حوايجها وهبطات لاقاتهم كلهم مجموعين على طبلة ديال لفطور جرات لكرسي كلسات هضر الحاج:
الحاج:واش داكشي لي كالت لغالية بصح؟
إيثار:بابا انت عارف مزيان لمعطي وعايلتو وخصوصا مراتو وكتسولني
الحاج:مكانش خاصك ديري داك تصرف سدي لباب وخليها تهضر حتى تشبع
آسر:الحاج عندو صح مكانش عليك ضاربي معاهم
إيثار:بابا لا انت ولا آسر معارفينهمش مزيان عمري جبدتهم والحمد لله كلشي هنا كيشكرني ديما راجلها يدوز ويرمي لهضرة الما داز هو دوز هياوانا كنعل فشيطان ونكول منديش عليهم خليهم ولكن بنادم فهاد الوقت الى شافك ساكت كيكول غير خايف منو وبراكة عييت ديما تمعني وتعاير وتنعت فيا بكلام خايب وكنسكت ودابا خليها تستاهل وتقلب عليا اندير ليها كثر من هكا مايلقاو مايجمعو فيها جيني حتى لحكرة منبغيهاش
★أنثى الأسد★
351-وهوما لي جبدو ماشي انا لي هاجمة عليهم
الحاجة:صافي خليونا نفطرو سدو هاد الموضوع ومن جيهتي انا عبرات عليهم
الحاج:الحاجة حتى انت؟
الحاجة:ايااه انا منبغيش لي يجبد ليا بنتي خليها مزيان واحد مايكونش خواف باش بنادم مايطلعش ليك فوك راسك فطري ابنتي فطري، رجعو كيفطرو هضر آسر:
آسر:الحاج انا انرجع لخدمة ليوم
الحاج:كون غير عفيتوني من هادشي والله اولدي
آسر:لا الحاج عطيت كلمة وراجل هو لكلمة ياك؟
الحاج:لي بغيتي اولدي بغيتي ترجع رجع،رجعو كيفطر آسر كيشوف فإيثار علات عينها شافت فيه غمزها خرجات فيه عينها بمعنى حشم رجعت لفطورها آسر حلف حتى يجبدها ويرجع ليها لي كدير فيه حيد رجلو من صباطو ومدو تحت طبلة حتى مس رجليها وبدا كيطلع فرجليها ويهبط فرجليها هيا مامسوقاش كتاكول بانت ليها عمتها نقزت من حداها شافت فيها
إيثار:بتساؤل)عميتو مالك كضرك شيحاجة؟
سعاد:وجها حمر متوترة)لا ابنتي مابيا والو،آسر مزال كيطلع فرجلين إيثار ويلعب فيهم رجعات شافت فعمتها لي كل مرة تنقز
إيثار:عميتو لالا بيك شيحاجة؟نزلات براسها تحت طبلة كتبان ليها رجل آسر كتلعب فرجل عمتها شداتها ضحكة لهيستيرية ديال ضحك رجعات براسها شافت فيها عمتها مخرجة عينيها
إيثار:موجها كلامها لأسر) آسر نسيت مكتليك شحال كنلبس فرجلي انا كنلبس 38 ولكن عمتي كتلبس 40(مع ابتسامة)آسر بحال الى فهم قصدها دار راسو شيحاجة طاحت ليها طل تحت طبلة عرف شنو دار رجع راسو حشمان وقف ورجع لكرسي
الحاج:على فيه عينيه)كمل فطورك اولدي
آسر:لا الحاج بصحة انا مشيت لخدمتي بسلامة عليكم خرج بزربة وسد باب دار إيثار ديك ساعات طلقاتها كضحك حتى سخفات
الحاج:مالك كضحكي؟
إيثار:لا والو والو،قربات منها عمتها
سعاد:هاد لمرة كولي ليه يبقى يفرق بين رجليك ورجليا لاباس لي مجات رجلو فرجلين باك
★أنثى الأسد★
352-باك وديك ساعة تشوفي شوهة ديال بصح كوليه يتبت شوية ويلي زربان
إيثار:واخا واخا عميتو،داز داك نهار وأسر مبانش ليها الاثر حشمان من عمت إيثار ومقادش عينيه تجي فعينها غير رجع لدار طلع لبيتو نيشان،دوش بدل عليه وخرج كيتسكل فتح باب إيثار دخل وسد علات عينها لقاتو قدامها
إيثار:أش كدير هنا دابا يشوفوك
آسر:مكاين حتى واحد جيت نشوف خطيبتي ياه مافيها والو،وقفات باش تخرجو جرها عنقها
إيثار:دابا يدخل شي واحد شنو بغيتي؟
آسر:جيت نتفاهمو على شوهة لي درتي ليا فلفطور مابقيتش قاد نشوف فعمتك
إيثار:واش انا لي مديت رجلي كنتحكحك عليك؟أنت لي ماد دوك رجلين طوال كيديال نعامة ههههه أجي نسولك زعمة انت شحال وانت هنا عمري تغالطت ليك مع ختي أسية؟
آسر:لا باين شكون أسية وشكون انت اول حاجة لون شعر تصرفات واخا متشابهين فالوجه ولكن لفعايل وطريقة لهضرة ولباس مختالفين ودابا خلينا من كثرت لهضرة اجي عند حبيبك توحشك،يلاه تم هابط بفمو يبوسها كيتسمع صوت هضرة كثيرة وصوت طومبيل قدام لباب بعدات عليه مستغربة
إيثار:شكون ايكون جا؟
آسر:يجي لي بغا يجي واش فينما نبغي نكون بوحدي معاك تخرج ليا حاجة شي نهار انخطفك يلاه نقد نكون بوحدي معاك،مداتهاش فيه بعدات عليه وفتحات لباب تمت هابطة وهو تابعها من لور دخلات لصالة كايبانو ليها لبالز مع وقفات وهو وقف دارو ربعة ديال ناس آسر خرج عينيه بدهول:
آسر:ماما بابا أمنية غسان نتوما هنا؟
نادية:شنو بانت ليك فهاد لمفاجئة حبيبتي إيثار توحشتك،شوية تسمع صداع عند لباب
إيثار:شنو واقع،خرجات كتجري تبعها آسر كتبان ليها ختها مشادة مع شي واحد
إيثار:أسية شنو واقع؟
أسية:بنادم همجي مكيعرفش يهضر
إيثار:معامن كدابزي طل شخص لي كضارب معاه توسعو عينين إيثار ونطقات دقة وحدة هيا وأسر:
ايثار/آسر:سهيل!!......
★أنثى الأسد★
353-كولشي كالس فصالون سهيل كيخنزر فأسيا وحتى هيا محملاهش
الحاجة:مرحبا بيكم وألف مرحبا نهار كبير هدا والله
نادية:ربي يخليك الحاجة لهلا يخطيك،قربات إيثار من ودن آسر
إيثار:حال ختي وصاحبك ماعجبنيش بقا ليهم غير ينوضو يتنتفو لينا هنا
أسر:وراه عندها لمن تشبه عقلتي على لمناتفة ديالنا ولا نسيتي واخا مكنتش ضانة ختك عصبية بحالك
إيثار:ضروري مايكون سهيل لي مسبق لعيب
آسر:وعلاش متكونش ختك هي لي مسبقة لعيب نكونو منطقيين شوية
إيثار:صافي غير سكت لانصدقو منوضينها حتى حنا
نادية:ايوا حدتو ايمتا يكون العرس اولدي؟
آسر:مزال اماما مزال محددناش نهار علاش مكلتوش ليا راكم جايين
غسان:كانحس بحال الى معجبكش حال اولد خالتي
آسر:شنو كتكول انت من نيتك بالعكس مزيان منين جيتو
إيثار:كتحاول تلطف الجو)سهيل مرحبا بيك نهار كبير هدا توحشناك والله،شاف فيها أسر
أسر:كيفاش توحشناك شكون نتوما لي توحشتوه زعمة انا كالس حداك بلا حشمة كالسة تغزلي فصاحبي؟
إيثار:انت مالك مالك فيك لفزة سكتنا شوية مكتشوفش داك لبركان لي قريب ينفاجر
سهيل:حتى انا توحشتك اختي إيثار مزيان منين رجعنا تلاقينا مرة خرا
إيثار:ايعجبك الحال هنا بزااف ماشي بعيد نزوجوك كاع ياك ا أسر
أسر:وليتي خطابة على تواخر زمان
أسية:كتبغم)الى لقى لي تقبل بيه بعدا
سهيل:غوبش)كلتي شيحاجة اسي لبوليسي؟دورات راسها أسية مخرجة عينها فيه
أسية:أش كلتي سي لبوليسي؟وقفات إيثار وشدات ختها من ايدها نوضاتها
إيثار:اسية اجي نوريو أمنية دار ونوريوها بيتها فين اتكون اجي أختي جرات امنية وقفاتها وخرجات ختها غير بزز من صالون،قرب آسر من سهيل وكلس حداه
آسر:مالك مع خت إيثار شنو واقع
سهيل:بغيت نبلاصي طوموبيلتي كاتليك لا بلاصة طوموبيلتها هاديك جيت نتفاهم معاها غير بلهداوة طلعات لسما وكتجبد
★أنثى الأسد★
354-وانت عارفني مكنحملش شي حد يبقى يتجبد عليا غير جاتني مرة ومابغيتش ندير فيها شرع ايديا
آسر:شفتيني مع إيثار كيف كنت راهم خواتات
سهيل:سمح ليا إيثار مزال نشوطية ولي فقلبها على لسانها اما هادي عاجبها راسها بزااف اصلا كون ماشي انت لي سيفطيلي نجي منجيش
آسر:انحتاجك معايا هنا ضروري لخدمة غادية بوحدها خاص لي يكون هنا ويقابلها بينما ساليت
سهيل:علاش شنو كدير؟
آسر:اجي نخرجو على برا نعواد ليك؟..
أسية:غادية جايا فالبيت معصبة)انا دابا بوليسي انا؟
إيثار:ونكولو صراحة لافوت منك هو لي وقف طوموبيلتو لول وهوما ضياف عندنا حشومة
أسية:باش انعرفو انا ضيف عندنا وزايدون مكنحملش لي يبقى يتهز وعند راسو معرفت شكون هو كون غير مشا بحالو
إيثار:شوفي هاديك هاه خلينا هانيين سهيل صاحب آسر بحال خوه وغير عولي على راسك تشوفيه بزااف وأصلا عزيز عليا وضريف راه حتى انت فيك شوكة ديال نفاخة ولكمل زرك توطاي شوية وانت باغية طيري وبلاما ابقاي تشوفي فيا كتعرفيني صريحة وكلسي هنا حتى تفشي وهبطي الى بغيتي تعشاي أجي أ أمنية معايا نوريك بيتك، خلاو أسية فبيتها ومشاو هوما بجوج كيضورو فدار،تحط لعشا تزادو كراسا اخرين تجمع كولشي على لعشا فجو عائلي إيثار غير كالسة وحاضية طبلة كتشوف فواحد جهة نغزها آسر:
آسر:مالك من صباح وانت اكتشوفي فاش ساهية
إيثار:مصغرة عينيها)هداك هاه كول لداك ولد خالتك بو عينين زايغة يبعد عينيه من على ختي ريم راها مزال صغيرة يلاه عندها 16عام وراني عارفاه زهواني والله حتى نشتف عليه راك عارفني
آسر:ششش كنتعشاو دابا غسان خليه عليا انا انهضر معاه دابا خلينا هانيين،حول انتباه ديالو لكريم
آسر:كريم ايمتا ناوي ان شاء الله
كريم:كنت اندير لاكط هاد سيمانة ولكن نوال عكسات حلفات حتى دير نهارها مكانش هادشي فبالها