أنثى الأسد

167\168\169

★أنثى الأسد★
167-لسطح تبعاتو كتجري وقفو بجوج
إيثار:شكون انت وشنو كدير هنا، شخص مكيهضر مكايتكلم ملتم وضلام على وجهو جبد عليها سلاح إيثار سلاح ديالها مهازاهش معاها،قرات دير سياسة معاه بدات ضارب معاه ضربة هنا وضربة لهيه ضربة هنا او وحدة لهيه لاحت ليه سلاح من ايدو وبقات معاه دكاتو عصى تكركب من جيهتها ضربها قريبة من لحافة ديال سطح بسرعة لبرق خطف سلاح ضربها جوج ضربات وطار هرب،
هناء:الحمد لله كولشي داز مزيان وهو هداك ولكن مدام مكانوش ناويين يقتلوه علاش سيفطو ليه تهديد؟؟
آسر:بلعاني بغاو يشوفو ردة الفعل ديالو واش ايجي محمي مع لبوليس ولا لا يدرسو لخطة ديالو باش لمرة جايا يكونو موجدين ليه مزيان فهمتي بلان ديالهم
أنور:ولكن شبيه ديالو كان نسخة طبق الأصل ليه معندي منسالك والله أجيو إيثار ماشفتهاش طول لحفلة فين مشات؟
آسر:معرفتش كانت حدايا انا تشغلت بلوزير كنهضر معاها والو
أنور:انت خلي عينك عليه واخا هكاك لخطر مزال داير بيه وانا وهناء انمشيو نشوفو فين هيا، مشاو هناء وأنور يقلبو عليها وأسر بالو مشغول كيسوني ليها والو كيهضر ليها فسناطة ديال لودن او والو لحادكة فاش كانت كتسنط عليهم كلعاتها من ودنها ونسات مرجعاتهاش شوية ها هناء وأنور راجعين
آسر:لقيتوها؟
أنور:لا ولكن لقينا هادو وراوه سنسلة مقطوعة وصندالتها وسانطة دالودن ديالها
آسر:تكول ليا لي كلتي إيثار بيها شيحاجة خليكم هنا انا غادي نقلب عليها مشا كيجري قلب شاينا تاون سفاه على علاه والو طلع لسطح والو مكايناش، زاد تشوش كيترعد وقلبو كيضرب مخلوع لاتكون وقعات ليها شيحاجة رجع هبط عند دراري يلاه وصلا كيسمعو لهضرو ولغوات ديال ناس على برا وأغلبية ضيوف خارجين كيجريو لبرا كيكولو شي بنت مابنت ماركزش مزيان فالهضرة خرج كيجري ناس واقفين وكيشوفو لفوق على عينيه
★أنثى الأسد★
168-عينيه وياريت مهزش عينيه ومشافش هاد لمنظر هدا لي تهز من لداخل ومن برا منين شافو كلمة وحدة لي نطق بيها
آسر:إييييثااار، كانت إيثار معلقة فواحد لحاشية قصيرة نصها كلو مدلدل مقاداش تشوف لتحت لقوة لي بقات ليها هي لي خلاتها تشد فديك لحاشية، دار عند أنور كيغوت وعروقو خارجين بغا يحماق
آسر:بغيت حبل دابا دابا أنور، مشا انور كيجري معرفت كيفاش ولا ايمتا حتى جاب ليه داك لحبل رجع دخل لشاينا تاون كيجري وهناء وأنور تابعينو
آسر:هناء بقاي مع لوزير أنور اجي معايا، طلع مغاه انور كينقز درجة ودرجة لا حتى وصل لسطح ربط راسو بداك لحبل ونص عطاه لأنور ربطو مع واحد لحيط وهو ينقز شوية بشوية حتى وصل عندها
آسر:إيثار طلقي راسك طلقي راسك تيقي فيا واخا،حلات عينيها وعروكاتها كيتساكفو غير شافت فوجهو تبسمات ليه وطلقات راسها شدها غير شدها عنقها جبد لحبل علامة لانور باش يجبدو وتم انور كيجبد فيه حتى طلعو هي سخفانة بين ايديه بدا يفوك فالحبل نعسها بين ايدو كيفيق فيها
آسر:إيثار حبيبة فيقي إيثار صافي راكي بيخير إيثار، قاطعو انور
أنور:آسر واش هداك دم لي فحوايجك، دور آسر راسو لحوايجو لقاهم ملطخين بدم مس كسوة إيثار حيت كانت حمرا لقاها فازكة بدمايات قطع ليها لكسوة كتبان ليه جوج ضربات فكرشها
آسر:لا ميمكنش إيثار مضروبة مضروبة، هزها بين ايديه هبط كيجري بيها مخلوع كيجري على حر جهدو خرجها ركبها فطوموبيل لور نعسها شاف فأنور
آسر:انور انت وهناء وصلو لوزير حتى لوطيل وخلطو عليا واخا
أنور:كون هاني، طار آسر على أقرب سبيطار، يدور ويهضر معاها كيحاول يفيقها والو
آسر:حبيبة ديالي فيقي معايا عفاك عفاك حلي عينيك دابا تولي بيخير كنواعدك عمري نخلي شيحاجة تأديك كنواعدك الله يخليك نوضي ضربيني عيريني غير مديريش فيا هكا الله يخليك. رجع ايدو لور حط ايدو على عنقها نبض منخافض حط صباعو تحت نيفها نفس قليل
آسر:إيثار وياك ديريها وياك هاحنا قربنا إيثار (غوت بجهد حيت بدات كضيع ليه من ايديه) ايثاااااار.
★أنثى الأسد★
169-اسر كيضرب لفولون وسايك بسرعة كبيرة
آسر:الله يخليك الله يخليك كوني قوية كيف عرفتك هانتي تولي بيخير اندير ليك لي بغيتي انا عارف راسي متسرع سمحيليا على اي حاجة نهار قطعت ليك حوايجك والله مكان فنيتي نأديك تصرف لي درت كان طائش مني والله مشعرتش علاش ولا كيفاشدرت هكاك ليك وخليتك تبكي انا حمارمنسواش عارف راسي كنديرها قد راسي معاك وكنغلط ولكن رجولتي مكتخلينيش نتحكم فراسي غير براي والله مانبوسك ولا نقلقك ولانجي جبهتك كنواعدك اسيدي ربي غير نجيها والله منوصلها الله يخليك غير شوية وغادي نوصلو، وقف طوموبيل بجهد قدام سبيطار هبط كيجري فتح لباب وهزها شعرها طايح بين ايديه دخل بيها كيجري لفراملية اشافوه جابو لباياص كيجريو بيه هزوها من عندو ودخلو بيها كيجريو جا طبيب كيجري تلقى ليه آسر وحوايجو كلهم دم
آسر:عفاك ادكتور شوفها دغية راه تعرضات لجوج ضربات ديال رصاص
دكتور:تسنا هنا عفاك، دخل طبيب وأسر كيطل مكايبان ليه والو شوية خرج طبيب كيجري وكيعيط على لفرمليات
دكتور:وجدو غرفة لعمليات دابا سربيو خلاص المريضة ضغط ديالها كينزل، آسر سمع هكاك جمد ليه دم فعروقو دارت بيه دنيا مكيصمع من غير طنين وتصفار فودنيه،خرجو إيثار قدام عينيه وهو ماحاس دخلوها لعمليات كتبان ليه غير ضبابة على عينيه كتبان ليه صورتها نهار لول فاش جات مدابزة ديالو معاها هضرتها تصرفاتها ضحكتها فعايلها كولشي داز قدامو بحال شي فيلم تسند على لحيط ونزل حتى كلس على لكرسي ساهي،دخلات هناء وأنور لسبيطار سولو على لمريضة لي تصابت برصاص كالو ليهم دخلوها لعمليات طلعو كيجريو بان ليهم آسر كالس وساهي
أنور:آسر كالو لينا إيثار دخلوها لعمليات مكاليكم طبيب والو
آسر:إيثار كضيع ا أنور كضيع انا سباب
أنور:آسر متكولش هكاك انت مدرتي والو دابا تولي بيخير