يا بني قومي نومي بعد كدا كفاية وواصلي قراية بكرة.. قلتا ليها كويس يا أمي بس اخلص الجزئية دي وبمشي انوم.. قالت لي خلاص اشربي اللبن وكملي قرايتك لكن انتي بتعبي نفسك شديد كدا.. قلتا ليها اي تعب عشان خاطر أحقق حلمي وادخل كلية الشريعة والقانون وابقى احسن محامية قليل تعبي دا بعدين كلو ح يتنسي لمن اشيل شهادتي .. حضتني وقالت لي ربنا يحقق ليك كل أحلامك انتي بس خليك واثقة في ربنا واتوكلي عليهو واعملي العليك وخلي الباقي على ربنا وبإذن الله لو ربنا كاتب ليك تدخلي كلية القانون وتبقي محامية مهما حصل ح تدخليها بس انتي إياك يجي يوم وتفقدي إيمانك وثقتك في ربنا لانو لو كل الناس قالو ليك مستحيل وكلام كتير ما تشتغلي بيهم لانو ربنا سبحانه وتعالى ما بعلق قلب زول بي حاجة الا لي سبب هو وحدو عالم بيهو.. قلتا ليها ونعمة بالله وانا عشان متوكلة على ربنا وواثقة فيهو ما خايفة وكل شيء بجي من ربنا حلو لو كان خير أو شر كلو لي حكمة نحنا ما بنعلمها ورب الخير لا يأتي إلا بالخير.. قالت لي ونعمة بالله انتي بس خلي إيمانك دا قوي كدا ومرقت شربتا اللبن وكملتا قرايتي ورقدتا نمتا صحاني المنبه الساعة 3:30 قمتا اتوضيت وصليت قيام الليل ودعيت لي ولي امي وابوي واستغفرتا ورجعتا نمتا تاني، جاء ابوي صحاني مع أذان الفجر قال لي هيومة حبيبتي قومي صلي.. قلتا ليهو حاضر يا ابوي قايمة قمتا اتوضيت لقيت امي قاعدة تصلي صليت بعدها قعدتا مع امي شوية وقمتا عملتا الشاي قعدنا انا وامي وابوي نشرب.. امي قالت لي ابوي انت يا عبد القادر مهدي الايام دي وين ما قاعد يرجع البيت.. ابوي قال ليها قاعد في البيت الكبير انتي براك عارفاهو بحب يقعد مع اولاد اعمامو.. قلتا ليها احسن خلي يقعد هناك ويريحنا من مشاكلو الكتيرة على الأقل نعيش يومين حلوين.. امي قالت لي دا اخوك كيف تتكلمي عنو كدا.. قلتا ليها انا قلتا الحقيقة وبراك عارفة ماف داعي اوريك ولدك.. قالت لي حتى ولو انتي عارفة هو المرة بيهو ما هين وصعب يقدر يتجاوزو ينساهو بسهولة.. قلتا ليها دا ما ببرر ليهو يتعامل معانا بالطريقة البشعة دي وبعد البسوي ليك كلو انتي لسه بتدافعي عنو وبتحامي ليهو.. قالت لي لاني مقدرة هو مرة بي شنو وعازراهو.. قلتا ليها برضو ما عزر ليهو نحنا ذنبا شنو عشان يقعد يطلع فينا عُقدُو حقت الماضي ويتفشش فينا ويعذبنا معاهو.. ابوي قال لينا خلاص كفاية اسكتو وبعدين يا منى مهدي ما صغير وعارف هو بسوي في شنو ومهما حصل ليهو زمان بس دا ما ببرر ليهو يتصرف كدا وطالما هو مرتاح مع اولاد عمو خليهو هناك ووقت ما يكون عايز يجي هنا يجي البيت بيتو بس طالما هو هنا لازم يتعلم يحترم الناس الفي البيت دا بس.. امي قالت ليهو انت وبتك ما قادرين تفهمو وتستوعبو مهدي حاسي بي شنو ولا عايزين تقدرو ظروفو وتقيفو معاهو.. ابوي قال ليها انا عارف حاسي بي شنو بس انا ما بدعمو على الغلط ولا بأيدو عليهو وانا ما بقيف معاهو في شئ انا متأكد انو ما صح وهسي احسن نقفل الموضوع دي وقال لي وانتي يا هيومة ما ماشة تقري.. قلتا ليهو كنتا ماشة هسي دي يا ابوي وانت جايي بعدين جيب لي معاك طعمية وفول من البتعملهم عيب الناس يأكلو منهم وانا بتك ما تجيب لي منهم.. قال لي من عيوني يا اميرتي الحلوة بعدين بجيب ليك معاي.. امي قالت ليهو البنت دي خربتها انت بي دلعك الكتير ليها.. ابوي قال ليها بتي الوحيدة وأميرتي البمنعني شنو ادلعها وانا ما عندي غيرها في الدنيا.. امي قالت ليهو انا ما قلتا ليك عندك غيرها بس الدلع الزايد ما كويس.. ابوي قال ليها انتي مالك دا شئ بيني وبين بتي انتي اطلعي منها.. قالت ليهو كويس انا بتقول لي كدا.. قلتا ليهم ماف داعي للمشاكل خلاص انا عارفة بتحبوني قدر شنو بس ما تتشاكلو فيني بستا ابوي في رأسو ومشيت بستا امي ودخلتا غرفتي فتحتا كتاب الجغرافيا عشان اقرأ قعدتا قريت لحدي ما الشمس شرقتا قمتا نضفتا البيت وبخرتو وغسلتا العدة وخليت امي بتعوس في الكسرة عشان تبيعها لمن جاء زمن الفطور مشيت سويتو وناديت امي عشان نأكل سوى قلتا ليها امي اديني تلفونك اضرب لي ابوي عندي حاجات عايزة اقول ليهو يجيبها لي.. قالت لي خلي ابوك انا بجيبها ليك لاني الايام دي حاسة انو شغل ابوك ما كويس شديد مع انو هو ما كلمني بس خلينا ما نضغط عليهو زيادة وانا بجيب ليك اي حاجة عايزاها.. قلتا ليها كويس، انتي يا أمي مش قبل كدا قلتي لي قريتي اقتصاد واتخرجتي.. قال لي اي صح.. قلتا ليها طيب لي بعد خلصتي ما اشتغلتي ولا ابوي منعك.. قالت لي بالعكس كمان ابوك دعمني وكان حابب اني اشتغل بس انا رفضتا واخترتا اني اقعد واربيكم واهتم بيكم وما حبيت الشغل يشغلني منكم.. قلتا ليها يعني مشيتي بي مقولة الشهادة للحيطة والمرة لي بيتا😂😂😂😂😂.. قالت لي يا بت احترمي نفسك انا امك وبعدين انا غلطتا يعني عشان ضحيت بي مستقبلي وشغلي عشان اهتم بيك انتي واخوك وما أقصر معاكم في شئ.. قلتا ليها ابدا والله انتي احسن واحلى ام في الدنيا وانا بحمد ربنا عشان انتي طلعتي امي.. قالت لي بطلي كسير تلج.. مشيت قعدتا جنبها وقلتا ليها والله دا ما كسير تلج دي الحقيقة وانا بقولها ليك انا محظوظة عندي ام وابو زيكم انتو وقعدتا ابوسها في خدها.. قالت لي خلاص زحي مني ما تخليك لصقة.. قلتا ليها حرام عليك ياخ عشان بحبك تقولي لي لصقة.. قالت لي اي لصقة.. قلتا ليها برضو بحبك، بس ما كان تخلي شغلك في النهاية طبقتي المقولة.. قالت لي والله انتي قليلة ادب وعايزة ليك تربية من اول وجديد.. قلتا ليها والله دي نتيجة تربتك انتي.. قالت لي انا ربيتك بس ابوك الخربك بي دلعو الكتير ليك.. قالت ليها انا اميرتو الحلوة ضروري يدلعني.. قالت لي طيري من قدامي ما ارتكب فيك جريمة.. قلتا ليها خلاص قايمة شلتا الصينية ومشيت غسلتها ودخلتا غرفتي واصلتا قرايتي لحدي الظهر قمتا صليت ورقدتا نمتا صحيت بعد العصر صليت ورشيت الراكوبة حقتنا وفرشتها وجبتا كتاب التاريخ وعملتا لي كباية شاي لبن وبقيت بشرب وبقرأ خلصتا باقي الجزئية الحددتها قمتا غسلتا الكباية وجيت امي قالت لي قومي امشي بيت خالتك عطيات عندي عندها قروش امشي جيبيها لي.. قلتا ليها امي انتي عارفة انا ما بحب امشي بيتهم.. قالت لي انا عارفه وانا لو ما رجلي بتوجعني كان مشيت ليها براي.. قلتا ليها خلاص بمشي مشيت لبستا توب امي ومشيت بيت ناس خالتو عطيات دقيت الباب ودخلتا سلمتا عليها قلتا ليها خالتو عطيات امي قالت ليك عايزة القروش العايزاها منك.. قالت لي اقيفي هنا امشي اجيبها ليك واجي.. قلتا ليها كويس وانا واقفة سمعتا أصوات كواريك جاية من بيت ولدها المتزوج.. مرتو قالت ليهو طلقني خليني امشي بيت ابوي وارتاح انا تعبتا منك ومن العيشة معاك.. قال ليها ما بطلقك.. قالت ليهو انت ما بتخاف الله عايز مني شنو وعايز تعمل لي شنو اكتر من العملتو الذلة والإهانة الاتعاملتها بيها في البيت دا انا في بيت ابوي ما عاملوني بيها.. قال ليها ياتو ذلة وإهانة انتي العيشة العشتيها معاي في البيت دا لو قعدي الف سنة في بيت ابوك ما بتشوفي زيها كما كتر خيري عرستا واحدة زيك.. قالت ليهو عيشة فيها ذلة وإهانة انا ما عايزاها أهون لي ارجع اعيش في بيت ابوي معززة مكرمة من العيشة معاك ثانية واحدة ياخ انا ندمانة على اللحظة الاتزوجتك فيها ياريت لساني اتقطع اليوم داك وما وافقتا اتزوج.. قال ليها ماف زول جبرك براك وافقتي وانا الغلطان عشان عرستا واحدة زيك.. قالت ليهو ياريت ما اتزوجك وهسي طلقني وخليني ارجع بيت ابوي.. قال ليها ترجعي عشان تقعدي هم عليهم انتي جامعتك ما خلصتيها وشهادة عشان تشتغلي بيها ما عندك لو طلقتك ح تعملي شنو قالت ليهو ياريتني كملتا جامعتي قبل ما اعرسك هسي ما كان مضطرة اتحمل العذاب دا كلو.. قال ليها ماف زول قال ليك تخلي جامعتك وتعرسيني.. قلتا ليهو كلامك صح ياريت لو يرجع الزمن لي وراء وقتها مستحيل كان اخلي جامعتي وقرايتي ومستقبلي عشان واحد زيك ياريت لو كملتها شلتا شهادتي هسي ما كان اتزليت وانهنتا منك.. قال ليها ياريت دي هسي ما ح تفيدك احسن ليك تقعدي بي أدبك.. قالت ليهو الله ينتقم منك ياخ.. خالتو عطيات جات أدتني القروش شلتها ومرقتا الطريق كلو وانا بفكر في الكلام السمعتو كمية الحزن والوجع والكسرة الفي صوتها كسرت قلبي وصلتا البيت دخلتا أديت امي القروش.. قالت لي مالك في شنو لون وشك مخطوف كدا.. قلتا ليها لالا ماف شئ.. قالت لي انا امك وعارفاك احكي لي في شنو.. حكيت ليها الكلام السمعتو
امي قالت لي يا بتي في الدنيا دي بتلقي كل أنواع الرجال بتلقي القاسي وبتلقي الحنون في الأخلاقو ضيقة والعصبي وفي البتفهم والعقلو كبير وفي العقلو صغير في التعاملهم كويس وبحترمو المرة وفي التعاملهم اسوء من سيئ في الكريم والبخيل وفي المؤدب والمحترم وفي التافه وقليل أدب اي نوع يخطر على بالك بتلقاهو بس اكعب واسوء نوع بتلقيهو البهينك ويذلك عشان انتي اتخليتي عن حلمك ومستقبلك عشانو الما بقدر انك ضحيتي بي شئ غالي عليك شنو البعيرك بي تعليمك وبي انك ما كملتي جامعتك عشانو دا واحد ما بيستاهل تقعدي معاهو اكتر لانو البهينك وبِذلك اكيد ح يجي يوم ويرفع يدو عليك والبعمل كدا مرة بيقدر يعملها الف مرة وما بهمو عشان كدا انا بقول ليك يا بتي شهادتك سلاحك البتحاربي بيهو الدنيا دي انا وابوك ما دايمين ليك وح يجي يوم وربنا يأخد امانتو.. قلتا ليها امي ما تقولي كدا.. قالت لي خليني اكمل كلامي.. قلتا ليها كويس.. قالت لي شهادتك الوحيدة الح تكون ليك السند وهي معاك ماف راجل بيقدر يهينك لأنو ح يكون متأكد انو لو خلاك بعدو انتي ح تقدري تستمري وتعيشي وتحققي حلمك وتشتغلي وتصرفي على نفسك وتكوني ليها السند وحتى لو جاء يوم واطلقتي انتي ح يكون عندك شغل ومصدر دخل مستقل يعني ما ح تحتاجي ليهو نهائي بس برضو بقول ليك راجلك عليك تحترميهو وتسمعي كلامو وتطيعيهو مالم يقلل من احترامك لي نفسك ويحاول يهينك أو يجبرك على شئ.. قلتا ليها طيب يا أمي هم بعملو كدا لي شنو وما بقدر تضحيتها عشانو.. قالت لي قليل من الرجال البقدرو تضحية المرة وفي منهم بحترموها وبشيلوها فوق رأسهم وبتعيش معاهم معززة مكرمة.. قلتا ليها زي ما بعاملك ابوي صح.. قالت لي اي صح عشان كدا عايزاك تختي كلامي حلقة في اذنك.. قلتا ليها اصلا يا أمي أنا مقررة اني ما اتزوج الا بعد اكمل جامعتي واشيل شهادتي عشان في المستقبل عايزة أولادي يفتخرو انو عندهم ام زيي زي ما انا فخورة انو انتي امي.. قالت لي وانا فخورة انو انتي بتي يا حبيبتي.. حضنتها وقلتا ليها انا بحبك.. قالت لي وانا بحبك يا عمري.. قلتا ليها خلاص كفاية الحب دا انا بعد كدا ماشة اقرأ.. قالت لي اي امشي اقري.. قمتا من جنبها طلعتا التوب وكنتا عايزة ادخل جوة الغرفة سمعتا صوت الباب بدق بصوت عالي لمن انخلعتا مشيت بي خطوات برة وقلبي كان بدق شديد.....
____________♥️__________
بعض البدايات قد تكون مؤلمة لكن النهاية دائما ما تحمل لنا الكثير من المفاجآت♥️♥️
في امان الله♥️
