ونحنا قاعدين سمعنا صوت كواريك من برة طلعنا لقينا رهف بتكورك تعالو الحقوني منذر وقع........ مشينا ليها لقيناهو فعلا وقع وانضرب في يدو لمن بقت تنزف مهدي وحسن رفعوهو في السرير ورهف مشت جابت علبة الاسعافات ونضفت ليهو جرحو وضمدتو ليهو بعدها كلهم طلعو بقينا انا ورهف قاعدين.. منذر قال ليها خلاص عملتي شغلك بتقدري تطلعي.. قالت ليهو خليني اقعد معاك شوية بس.. قال ليها ما عايز اشوفك اطلعي ولزاها لمن قربت تقعد الا جريت مسكتها قعدت تبكي وطلعت صراحة غاظني تصرفو شديد وما قدرتا امسك اعصابي اكتر قلتا ليهو انت يا منذر عايز تصل لي شنو يعني ليه بتتعامل مع اهلك بالطريقة دي ومتقصد انك تزعلهم وتجرحهم اي نعم الحصل معاك سيئ وصعب انك تتقبلو بس فهمني اهلك ومرتك ذنبهم شنو في القصة هل هم العملو ليك الحادث ولا هم القالو ليك اتشلى ولا عملو شنو ليه بتلومهم على شئ هم ما ليهم يد فيهو الحصل دا كلو قدر ربنا وماف زول ليهو دخل فيهو الا انت لو عايز تعترض على حكمة ربنا يبقى دا شئ تاني وبعدين قايل بي تصرفاتك دي ح تخليهم يكرهوك ولا فهمك شنو وثانيا انت لو واصلتا في عنادك دا وانك ما بتأخد الدواء ولا عايز تمشي العلاج الفيزيائي ما بتضر زول غير نفسك وبس ما اكتر، اها ح تستمر بالحالة دي لي متين انك تأذي وتجرح وتزعل اي زول قريب منك وانت لو فاكر انهم شفقانين عليك بتكون غلطان وغلط كبير كمان هم كل البعملو لي مصلحتك وبس ما اكتر كل شئ بتمنوهو انو يشوفوك كويس ورجعتا تمشي تاني بغض النظر عن اي شئ بس انت زول يأس ومحطم وعاجز وضعيف وبي طريقتك دي بتخلي الناس تشفق عليك.. انت رهف دي قصرت معاك في شنو لمن تعاملها بالطريقة دي رهف لو حبت زول اكتر من اي شئ في الدنيا فهي حبتك انت ودائما كانت بتعمل اي شئ عشانك وعشان تكون مبسوط واتحملت معاك المافي زول بقدر يتحملو وهسي هي كان في امكانها بعد الحادث الحصل معاك انها تتخلى عنك وتقول ما عايزاك وعايزة تطلق وماف زول بقدر يجبرها تكمل معاك بس هي عشان بنت اصول وبتحبك من جوة قلبها اختارت انها تفضل معاك حتى وانت بتأذيها وبتجرحها وبتزعلها في اليوم الف مرة ومع ذلك هي ما اتخلت عنك وقررت تقيف معاك في محنتك لحدي ما تتجاوزوها مع بعض بس انت عملت شنو اتخليت عنها بكل بساطة، رهف الدائما كانت بتضحك وبتهظر وبتتونس الليلة انطفت وحتى بسمتها اختفت ودا كلو بي سببك انت بي سببك وصلت لي درجة تطلب مساعدة الناس عشان تقدر تساعدك وتطلعك من الحالة الانت فيها وبعد دا ياريت لو انت بتقدر الحاجات البتعملها عشانك وبتحاول تساعد نفسك قبل ما تساعدها، طيب لنقول انك ما بتفكر في نفسك ولا بتفكر فيها طيب ما بتفكر في طفلك الجاي في الطريق اي اب بكون مستني لحظة يشيل طفلو في يدو بي فارغ الصبر وقبل ولادتو بعمل اي شئ عشان ما ينقص عنو حاجة بس انت ما عملتا ولا شئ عشانو، الطفل لمن يتولد في الدنيا ويكبر دائما بكون شايف ابوهو هو القدوة بالنسبة ليهو بس انا بأكد ليك انك ح تكون قدوة فاشلة لي ولدك لانك ما ح تعلمو شئ غير يأذي الحوليهو وانو يكون ضعيف وعاجز ويستسلم قدام اول مشكلة تحصل معاهو وما يحاول اصلا عشان يتخطى المشكلة او يحلها ومن هسي برفع ليك قبعة الابن والزوج والاب الفاشل لانك في اول اختبار ليك في الحياة اخترتا الفشل وعدم المحاولة في حين انو الفرص قدامك عشان تقدر تغير اي شئ.. اكعب شئ انك تكون زوج فاشل لانو الراجل هو البعرف يخلي مرتو مبسوطة وفرحانة وحاسة بالامان وهي معاهو بس انت عملتا العكس تماما حتى ابسط حقوق مرتك عليك ما بتنفذها وبدل تكون مبسوطة بقيتها يأسة وحزينة وكئيبة وعاجزة حتى انت كزوج صالح ما فلحت ما عارفة ح تقدر تكون اب صالح وقدوة حسنة لي اولادك كيف انا اصلا ما عارفة بقول ليك الكلام دا لي شنو مع اني عارفة انك واحد اناني وما بتفكر غير في نفسك وبس وانت عارف انو حتى الحب البتحبك ليهو رهف خسارة فيك وياريتها حبت ليها حجر ولا حبتك انت مع اني ظلمتا الحجر لمن شبهتك بيهو، انت عارف حتى الحب خسارة فيك وانا لو علي كان ما كان خليت رهف تحبك لانك ما بتستاهلها وحرام عليها كل لحظة من عمرها تقضيها مع واحد زيك لانها بتستاهل شخص يبادلها نفس المشاعر شخص يسعدها ويهتمة بيها وتكون دائما هي الاولوية في حياتو شخص يرجع ليها الضحكة على وشها ويرجع ينورها وينور حياتها بعد ما هي انطفأت معاك، ونصيحة اعتبرها من اخت ليك صدقني رهف دي لو خسرتها ح تفضل عمرك كلو تندم عشان فرطتا فيها بس الوقت داك الندم ما ح يفيدك ولا ح يرجعها ليك لانو المرأة لمن تنجرح وتنكسر بتتعلم القسوة ولو قست ما بترجع تلين بسهولة عشان كدا اعرف قيمتها قبل ما تخسرها.. انا ما عارف بقول ليك الكلام دا لي شنو مع اني متأكدة انك ما ح تفهمو بس قلتا اجرب احتمال الصخرة الفي صدرك دي تتحرك وتبدأ تحس وتشعر بالحوليك وتفكر في زول غير نفسك.. قمتا طلعتا ياداب ارتحتا بعد قلتا ليهو الكلام الفي قلبي كلو حتى مشيت بيت عمي عبد الجليل.. يُوسف قال لي اتأخرتي كدا لي شنو.. قلتا ليهو كان في كلمتين لازم اقولها لي منذر وقلتا ليهو.. قال لي كلمتينك ديل ظاهر عليهم تقال شديد.. قلتا ليهو لانو هو بستاهل وقليل زاتو القلتو ليهو.. قال لي هسي اهدي وخلينا نمشي بيتنا.. قلتا ليهو بيت شنو نحنا عندنا بيت هنا.. قال لي اي عندنا وجاهز مستنيك تمشي وتنوريهو.. قلتا ليهو متين لحقتا تجهزو.. قال لي في الايام الفاتت كنتا بشتغل عليهو ووصيت صحبي وجهزو.. قلتا ليهو بس هسي ما ظريفة نمشي ونحنا جينا الليلة.. قال لي طيب شايفاها حلوة في حقي اني ابيت في بيت نسابتي.. قلتا ليهو طيب عندي فكرة الليلة نمشي بيتنا قصدي بيت امي وابوي وبكرة نمشي بيتنا قلتا شنو.. قال لي امري لله خلينا نمشي.. مشيت كلمتا عمتو عفراء اننا مشينا بيتنا في الاول اعترضت بس اقنعتها اننا ح نكون مرتاحين هناك شلتا منها المفاتيح ومشينا بيتنا اول ما دخلتا البيت ذكرياتي كلها بقت تتعاد قدامي زي شريط الافلام من لمن كنتا بلعب مع ابوي ومكان بدسة وبرضو بلقاني ومكان بنقعد نتونس انا وهو وامي ولمن اهظر معاهو حتى لمن كنتا بشاكل مع مهدي كلها بقت مجرد ذكريات دخلتا الصالون طوالي جاني منظر ابوي لمن مات وهو راقد في سريرو مسحتا دموعي النزلت غصبا عني مشيت على الراكوبة دخلتا الصالون التاني جاني منظر امي لمن كانت واقعة والمكان مليان دم في اللحظة ديك حسيت قلبي بنزف من الالم.. يُوسف قال لي لو مضايقة خلينا نمشي من هنا اصلا جيتنا هنا من الاول غلط.. قلتا ليهو لالا انا عايزة اقعد عايزة احس انو امي وابوي جنبي.. قال لي انتي كدا بتوجعي قلبك وانا ما بهون علي اشوفك زعلانة.. قلتا ليهو انا ما زعلانة بس حنيت لي كل ذكرياتي معاهم ياريت لو يرجع الزمن واقدر احضنهم لي مرة واحدة واقول ليهم قدر شنو انا بحبهم ومفتقداهم.. دخلتا غرفة امي وابوي لقيتها زي ما خليتها بالظبط فتحتا الدولاب لقيت صندوق صغيرة طلعتو وقعدتا في السرير وفتحو لقيت فيهو البوم بتاع صور لي انا وامي وابوي من انا صغيرة لحدي ما كبرتا كل تفصيلة في حياتي موجودة جواهو في نهاية الالبوم شفتا نفس الصور الشفتها في غرفة يُوسف دي اول مرة كان اشوفها عندنا هنا برضو في الصندوق كان في دفتر صغير فتحتو في اول صفحة مكتوب لي ولدي وحبيب قلبي يُوسف لو الله مدى في عمري وشفتك ح اديك الدفتر دا ما حبيت اقرأ باقي الكلام ختيتو بالجنبة كان في صندوق صغير اخر شئ فتحتو لقيت ورقة مكتوبة بي خط يد امي قالت لي انا ما عارفة الزمن مخبي لينا شنو بس حبيت اشتري ليك الهدية دي بمناسبة نجاحك احتمال ربنا ما يطول في عمري واشوف اليوم دا بس دي هدية مني انا وابوك ليك ختيت الورقة لقيت سلسل فضة مكتوب فيهو اسمي ناديت يُوسف لبسني ليهو واديتو الدفتر الكان في الصندوق قلتا ليهو امي كاتبة في الدفتر دا انو يدوك ليهو وشوف حتى في البوم الصور محتفظة بي صورك معاها.. قال لي كنتا بتمنى ارجع اقابل ماما منى تاني واتكلم معاها بس قدر الله ما شاء فعل.. ختيت الصندوق في الارض ورقدتا في السرير جاء رقد وراي وحضني ونمنا صحينا مع صلاة الفجر صلى بي ورجعنا رقدنا تاني لمن الشمس شرقت شربنا الشاي يُوسف قال لي عندي شوية شغل بخلصو وبجي اسوقك نمشي بيتنا.. قلتا ليهو كويس في طريقك وديني بيت عمي وامشي.. قال لي من عيوني.. وصلني بيت عمي ومشى قعدتا اتونس مع عمتو عفراء وروان جات رهف داخلة وملامح وشها بتوحى انها مبسوطة جات قعدت جنبي.. قالت لي انا ما عارفة اشكرك كيف وارد ليك الجميل العملتي معاي كيف.. قلتا ليها جميل شنو انا ما فاهمة.. قالت لي انتي مش امبارح اتكلمتي مع منذر.. قلتا ليها اي صح بس علاقتو شنو.. قالت لي بعد كلامك معاهو ناداني واعتزر لي عن اي شئ عملو معاي وطلب مني نبدأ صفحة جديدة مع بعض وبدأ يأخد العلاجات واقتنع انو يبدأ بالعلاج الفيزيائي ودا كلو حصل بفضلك انتي.. قلتا ليها صراحة مصدومة من كلامك بس فرحتا ليك من جوة قلبي لانك بتستاهلي وان شاء الله تبقى بداية حلوة عليكم.. قالت لي اميين وانا بعتزر ليك عن اي تصرف بدر مني زمان وضايقك او جرحك.. قلتا ليها ماف داعي للاعتزار الحصل خلاص حصل وانتهى خلينا نبدأ صفحة جديدة وننسى الحصل في الماضي وننبسط بي بدايتك الجديدة وطفلك الجاي في الطريق.. قالت لي اثنين ما واحد.. قلتا ليها كذابة.. قالت لي والله جادة.. قمتا انطط قلتا ليها يعني ح اكون خالة وعمة توأم الله ياخ ودا غير ولد روان يا الله انا ح اطير من الفرحة بس الح تولد الاولى منو عشان اجهز نفسي اقعد انفس منو اول.. روان قالت لي انا ح اولد قبليها بي شهر.. قلتا ليها حلو اتفقنا اول بجيك انتي وبعدها بمشي لي رهف ومنها بشيل واحد وبخلي ليها واحد.. رهف قالت لي تشيلي لي شنو واحتمال للزمن داك انتي برضو تكوني حامل.. قلتا ليها لسه بدري على الموضوع دا.. عمتي قالت لي ماف شئ اسمو بدري كل شئ قسمة من ربنا.. قلتا ليها ونعمة بالله وانا ما قلتا شئ.. قالت لي هسي ح اخليكم متأكدة عندكم ونسة عايزين تتونسوها ماشة اعمل الفطور وماشة لي ندى بهناك.. بعد عمتو عفراء مشت روان قالت لي اها لقيتي الزواج ويُوسف معاك كيف.. قلتا ليها انا لو قعدتا سنة اتكلمت عن تعاملو معاي ما بكفي حقو من يوم اتزوجنا ولي هسي ما قال لي او اتصرف معاي بي طريقة زعلتني دائما بحسسني اني وسعادتي مهمين عندو وانا معاهو بحس نفسي طايرة في السماء من الفرحة.. رهف قالت لي الله حظك والله بتمنى حياتنا الجاية انا ومنذر تكون كدا.. قلتا ليها صدقيني ح تبقى انتي اتفائلي بالخير بس.. قالت لي والله انا متفائلة شديد كمان انو ح تكون بداية حلوة لينا.. روان قالت لينا نحنا كلنا فقدان ناس مقربين ومهمين لينا في حياتنا كتير وفراقهم كسرنا من جوة بس شفتو ربنا لمن يأخد مننا شئ بعوضنا بي شئ تاني وربنا ادانا العوض دا على هيئة ازواجنا كانو لينا السكن والسكينة والسند والامان والكتف البنتسند عليهو لو مالت بينا الدنيا ح تسندنا.. قلتا ليها فعلا والله ربنا عوضو بكون جابر وماحي لي كل الاحزان الحصلت قبلو الحمد لله.. رهف قالت لينا مش بقولو كلو بحصل لي خير و وراء كل شر في الخير نحنا ما بنعرفو وربنا مخبيهو لينا بس الحصل معانا كلو مقابل السعادة البنحس بيها هسي كلو بهون.. ونحنا قاعدين جات تسنيم داخلة قالت لينا الحب الظهر بينكم دا فجأة شنو زمان كنتو بتتشاكلو وهسي قاعدين بتتونسو وما احلاكم.. رهف قالت ليها انتي يا تسنيم مشكلتك شنو ليه ما عايزة تشوفينا مبسوطين قلتا ليك انا وهيومة كان في بينا سوء تفاهم وحليناهو وهسي مبسوطين انتي متضايقة لي شنو وبعدين انتي مش هيومة دي كانت صحبتك مالك فجأة قلبتي عليها.. تسنيم قالت ليها سوء تفاهم وحليتو جميل جدا البشوفك قبل كم اسبوع بتقولي بتكرهيها ما يشوفك الليلة بتتونسي معاها وعاملة بتحبيها وثانيا هيام دي انا ولا حبيتها ولا عمري كنتا بحبها بس الوقت داك مصلحتي كانت معاها وهسي انتهت.. قلتا ليها انا اعتبرتك اقرب صديقة لي وكنتا بحكي ليك اي شئ بخصني.. قالت لي عليك الله بطلي دراماتك دي انا ما ناقصاك كل شئ كنتا بعملو عشان اقرب من حسن وبس وانتي كنتي الفرصة الوحيدة لي الشئ دا بس ما فدتيني بي اي شئ.. قلتا ليها انتي عملتي اي شئ عشان حسن صح بس انا بقول ليك حسن ولا تحلمي بيهو لانو ما ح يكون ليك وانا ح اسعى للشئ دا حسن ح يكون ليك مجرد حلم وبس وما ح تقدري تحققي.. قالت لي بنشوف.. قلتا ليها اصلا ح نشوف وطلعت مشت.. رهف قالت لي انتي جادة في كلامك القلتي ليها دا.. قلتا ليها يا بت دا كلام ساي انا ما دخلني بيها ولا بضيع فيها زمني على الفاضي وحسن هو حر يختار العايزها بس انا قلتا كدا عشان اغيظها ما اكتر خسارة والله اني كنتا معتبرة واحدة زيها اختي وصحبتي.. روان قالت لي ما تزعلي اصلا هي ما تستاهل وحدة حقادة وحاسدة ما اكتر ما تركزي معاها.. قلتا ليها اصلا ما مركزة معاها، انا في يُوسف قال لي عندو شغل بسيط وبجي ولي هسي ما جاء.. روان قالت لي بالسرعة دي اشتقتي ليهو.. قلتا ليها اي اشتقتا ليهو وفقدتو.. قالت لي حبيتيهو بالسرعة دي.. قلتا ليها الحب ما محتاج ليهو زمن بحصل فجأة من غير ما الشخص يحس انو يكون متوقع.. رهف قالت لي انتي وصلتي درجة بعيدة عديل اها ان شاء الله كلمتي يُوسف انك بتحبيهو.. قلتا ليها لسه بس الليلة اكيد ح اكلمو..
