قلتا ليها صدقني حاسدات وراصدات قبل ما نكمل كلامنا اتلفتا وراء لقيت عمتي وداد واقفة ورانا... اتجمدنا في مكانا وما عرفنا نقول شنو وانا بقيت ببلع في ريقي من الخوف وجسمي من شدة الخوف لمن عرق الليلة دي مصيبة شنو لو طلعتا سمعتنا خلاص قيامتنا ج تقوم وح تمشي تزيد لي ناس ابوي في الكلام وماف زول بقدر ينقذنا من لسانها تاني يارب الطف بينا وان شاء الله ما تكون سمعت شئ والا الليلة مشنتقتنا ح تتعلق ونموت بقيت بعاين لي تسنيم وتاني بعاين لي عمتي وانا خلاص قلبي حاسة ح يقيف من شدة التوتر.. عمتي قالت لينا رصو الاكل دا في الصواني سريع وجيبوهو وبطلو كلام كتير ومشت.. ياداب قدرتا اتنفس عديل قلتا لي تسنيم الحمدلله ما سمعتنا والا الليلة كان قيامتنا قامت.. قالت لي والله المرة دي الله لطف بينا وطلعنا منها من غير اي خسائر.. قلتا ليها خلينا نخت الاكل قبل ما تجينا تاني وفعلا رصينا الصواني وختينا الاكل وناديت حسن ولد عمو عبد الجليل شال الاكل بعد خلصنا فطور لمينا العدة وغسلناها وسوينا الشاي وشربنا ونحنا قاعدين نتونس جاني حسن قال لي هيومة اختي السمحة وحبيبتي.. قلتا ليهو بطل كسير تلج وطلس وقول عايز شنو.. قال لي ممكن تكوي لي جلابية الجمعة.. قلتا ليهو اصلا انت ما بجيبك غير المصلحة بس.. قال لي ما كدا انتي براك عارفه انا ما لي غيرك يا عسل انتي.. قلتا ليهو خلاص بطل طلس وامشي جيب الجلابية اكويها ليك.. قال لي انتي الزيك منو يا قمر.. قلتا ليهو امشي جيبها قبل ما اغير رأيي.. كوثر بنت عمتو ندى قالت لي حسن جيب انا بكويها ليك بدل تحنسها كدا.. حسن قال ليها شكرا بس انا عايز هيومة بالذات تكويها لي.. قالت ليهو لي هي بتعرف ونحنا ما بنعرف ولا شنو.. قال ليها ما كدا بس هيومة مكوتها مميزة ومختلفة.. قلتا ليهم هيي بطلو نقاش كتير وانت يا حسن امشي جيب الجلابية سريع.. قال لي حاضر ومشى جابها وجاء.. بديت اكوي ليهو جاء منذر قال لي اكوي لي جلابيتي معاك.. قلتا ليهو على ما اعتقد انت عندك اخوات امشي لي وحدة منهم تكوي ليك.. قال لي انا عايزك انتي تكوي لي.. قلتا ليهو انا ما فاضية نادي تسنيم أو توسل وحدة منهم تكوي ليك.. قال لي انا ما فاضيه عشان تكوي لي لكن حسن فاضيه تكوي ليهو صح.. قلتا ليهو انت ما حسن عشان اكوي ليك مع الأسف وشلتا الجلابية وانا طالعة شفتا رهف بنت عمتو وداد قلتا ليها امشي منذر بناديك قال ليك اكوي ليهو جلابيتو ومشيت أديت حسن جلابيتو.. بعد ناس ابوي وعمي جو من الصلاة مشينا جهزنا حاجات القهوة وانا عملتها وجبتها ليهم وكبيتها وهم بقو يشربو بس انا ما شربتها لاني اصلا ما بحبها.. حسن قال لي القهوة عندك ولا بلاش والله سمحة شديد.. عمي عبد الجليل قال ليهو كلامك صح احلى من يسوي قهوة.. قلتا ليهم تسلمو دا من زوقكم.. عمتي ندى قالت ليهم كلها قهوة وبتي كوثر بتعمل احسن منها.. حسن قال ليها في دي يا عمتي بالغتي كوثر منو بتعرف تعمل قهوة احسن من حقت هيومة انتي بتهظري صح.. عمتي قالت ليهو واهظر لي شنو يعني.. قال ليها بتك القهوة البتعملها احمض من الملح ليمون.. كوثر قالت ليهو في النهاية يا حسن تطلع قهوتي حامضة كويس.. قال ليها دي الحقيقة انا ما كذبتا في شئ.. عمي عبد الفتاح قال لينا خلاص اقفلو الموضوع دا هي كلها قهوة ما محتاجة الكلام دا كلو.. قلتا ليهم كلامي عمي صح اي زول فينا عندو طريقة بعمل بيها القهوة وما ضروري كلنا يكون طعم القهوة واحد.. ونحنا قاعدين جاء مهدي داخل ما عارفه كان وين لانو لمن جينا ما كان قاعد جاء داخل وسلم علينا وقال يكبو ليهو القهوة بعد كبوها ليهو وشرب منها قال الله دا منو العمل القهوة الحلوة دي.. حسن قال ليهو دي اختك هيومة.. قال مالا حامضة كدا.. حسن قال ليهو هسي مش قلتا حلوة.. قال ليهو لمن شربتا منها تاني لقيتها حامضة.. ما رديت عليهو لاني عارفه قال كدا عشان آخر مشكلة حصلت بعدها قلتا ليهم بعد كدا يا ابوي انا عايزة امشي البيت عشان عايزة اقرأ.. قال لي خلاص كويس امشي.. عمي عبد الفتاح قال لي نشوف آخر قرايتك دي ح تعمل ليك شنو.. منذر قال لي خليني اوصلك لي البيت.. قلتا ليهو ماف داعي حسن ح يوصلني ولا ما كدا يا حسن.. قال لي طوالي بوصلك انا عندي كم هيومة اصلا.. قلتا ليهو واحدة بس، ودعتهم وطلعنا.. حسن قال لي ممكن أسألك سؤال.. قلتا ليهو اتفضل طوالي.. قال لي هيومة انتي مع انك عارفة انو منذر بحبك ومن زمان كمان لي بتتعاملي معاهو بالطريقة دي وبتصديهو.. قلتا ليهو لاني ما عايزة اديهو امل مزيف انا ما بقدر افكر مجرد تفكير اني احبو وبعدين الشئ البخليني أرفض انو هو رافض قصة القراية نهائي وما بتفاهم فيها وتفكيرو بشبه تفكير عمي وانا متأكدة زي ما انا شايفك انو ح يمنعني من الجامعة وانا ما بقدر الخاطر بي مستقبلي بأي شكل كان.. قال لي كلامك صح وفيهو وجهة نظر بس ممكن انتي تتكلمي معاهو وتقدري تغيري طريقة تفكيرو دي.. قلتا ليهو ما ح تتغير صدقني طول ما هو قاعد في البيت داك مع ابوهو وعماتو ما ح تتغير وانا ما بعمل شئ انا متأكده انو ح يدمر لي حياتي عشان كدا احسن ليهو يفهم من بدري انو انا ما بحبو وما عايزاهو ويقتنع عشان يمشي يفتش واحدة تانية تقدر تعيش معاهو وتكون هي ما عايزة تقرأ واكيد بلقى بس انا لا.. قال لي على راحتك بس انا قلتا احتمال تديهو فرصة بس.. قلتا ليهو انا ما عايزة اديهو فرصة ويتأمل على الفاضي لاني متأكدة اني ما ح اقدر احبو أو اتعايش معاهو لو مهما حصل فأحسن لينا الإثنين أنو نفضل بعيدين عن بعض لي مصلحتنا.. قال لي والله كلامك صح ونقول شنو غير ربنا يقدم الفيهو الخير ولو ليكم قسمة في بعض ح تجتمعو ولو ما ليكم ربنا يسعد اي واحد فيكم مع البكون قسمتو.. قلتا ليهو أن شاء الله ياخ وصلتا البيت حسن ودعني وانا دخلتا البيت غيرتا عبايتي ورقدتا نمتا قمتا بعد العصر صليت ورشيت الراكوبة وفرشتها وقعدتا اقرأ لي قريب المغرب كدا امي وابوي جو ختيت الاكل واكلنا وبعدها قمنا صلينا المغرب وقعدتا اتونس مع امي وابوي ومرة اهظر معاهم وبضحك
