قال لي خالك متوكل.. قلتا ليهو خالي مالو قول في شنو.. قال لي خالك متوكل مات💔..... قلتا ليهو كيف يعني مات وكيف.. قال لي هو كان في السجن وحصلت مشكلة وقتلوهو.. قلتا ليهو هو الدخلو السجن شنو ولي يقتلو.. قال لي خالك كان متهم انو نصب على كم شخص في قروش وقبضوهو عشان يحققو معاهو وفي السجن حصلت المشكلة وانقتل بالغلط.. قلتا ليهو المشكلة حصلت متين.. قال لي حصلت امبارح وطعنو بي سكين ونقلو المستشفى ومات الليلة مع صلاة الفجر.. قلتا ليهو خلينا نسافر البكى.. قال لي بعد العملو فيك كلو عايزة تمشي.. قلتا ليهو الموت دا براهو المشاكل كلها بتنتهي لمن الزول يموت وبدعي ربنا يغفر ليهو كل اخطأو.. قال لي ربنا بغفر اي شئ الا حق الناس خالك آكل مال يتيم وحق ناس مظلومة.. قلتا ليهو انا ما دخلني بالحاجات العملها دي بحاسبو عليها ربنا ما انا وكان على العملو فيني انا مسامحاهو عليهو وربنا يغفر ليهو كل العملو، اها ح نمشي.. قال لي ماف ليك اي مشية.. قلتا ليهو يُوسفي عليك الله ما تعمل كدا خليني امشي واعزيهم.. قال لي هم لمن امك وابوك ماتو فكرو يجو يعزوك اكيد لا ولو ما مصلحتهم ما كانو جو عشان كدا ماف مشية.. قلتا ليهو برضو خليني ابقى احسن منهم واعمل الواجب.. قال لي بي صوت شبه عالي ومليان عصبية انا قلتا ليك ماف مشية ما تكتري كلامك معاي وما تخليني اعيد كلامي مرتين ماف ليك مشية فهمتي.. وشال مفاتيح العربية وطلع من البيت دي كان اول مرة يُوسف يتكلم معاي بالطريقة دي ويعلي صوتو علي ويطلع يخليني من يوم عرفتو ما اتكلم بي طريقة زي دا نهائي قعدت ابكي ما عارفة اصلا ببكي على خالي المات ولا على طريقة كلام يُوسف معاي دس اول مرة يقسى على بالشكل دا مرت قريب ساعتين وانا قاعدة في مكاني ما اتحركتا بس ببكي وببكي بعد مسافة جاء يُوسف داخل ولا رفعتا رأسي عشان اعاين ليهو حسيت بيهو جاء قعد جنبي باسني في رأسي وقال لي انا اسف حقك علي ما كنتا قاصد ازعلك بس انتي عارفة قدر شنو انتي غالية علي وما عايزك تزعلي ولا تضايقي ولا زول يسمعك كلام فارغ، اسف ما تزعلي.. قلتا ليهو انا ما زعلانة منك بس كان ممكن تتفاهم معاي براحة وما تصرخ فيني كدا.. قال لي تاني ما بصرخ فيك كويس.. قلتا ليهو كويس، طيب انت ليه ما عايزني امشي ح اعزيهم بس واجي ماف شئ ولا في شئ حاصل وانت ما قلتو لي.. قال لي صراحة انا ما عايزك تمشي بي سبب نجود.. قلتا ليهو نجود مالا.. قال لي نجود هي الطلعت إشاعة انو نحنا حصل بيناتنا شئ عشان كدا نحنا استعجلنا في العقد.. قلتا ليهو انت بتهظر صح هي لي تعمل كدا ومصلحتها شنو.. قال لي الموضوع دا م فيهو هظار بعد نحنا سافرنا ناس امي سألو في الموضوع ووصلو لي المرة النشرت الإشاعة وقالت ليهم انو نجود هي القالت ليها كدا وعلى حسب انو هي بنت خالك ماف زول ممكن يصدق انو الكلام غلط لانو طالع من أهل بيتك.. قلتا ليهو ما قادرة أصدق انا عملتا ليها شنو عشان تأذيني بالطريقة دي وتشوه سمعتي هي عايزة مني شنو ما كفاية العملو ابوها في امي وفيني الناس ديل عايزين مني شنو ليه بتعمدو يجرحوني ويأذوني انا عملتا ليهم شنو.. قال لي انتي ما عملتي ليهم حاجة بس ديل ناس مريضة وقلوبهم وسخانة وبحبو يأذو غيرهم ونجود مشت على خطوات ابوها.. قلتا ليهو طيب هي مصلحتها من الحصل دا كلو شنو.. قال لي اكيد هي كانت مفكرة لو عملت كدا نحنا ح نلغي الزواج وانتي ح ترجعي الخرطوم.. قلتا ليهو برضو ما فهمتا دا لو حصل ح تستفيد شنو.. قال لي نجود قبل فترة قريبة قبل ما انتي تجي واعرفك كان اعترفت لي بي حبها وصراحة الوقت داك انا ما كنتا شايفها غير اخت لي زيها وزي يسرا ويارا وفهمتها الموضوع بي طريقة ظريفة بحيث اني ما اجرح مشاعرها بس يظهر انها ما اقتنعت بالكلام وفضلت لسه بتفكر فيهو.. قلتا ليهو ايواا صح انا بتذكر مرة لمن يارا كانت بتهظر معاها انو انت عايز تتزوجني زعلت وانفعلت وشاكلت يارا بس نهائي ما اتوقعتا انو تصل بيها للدرجة دي.. قال لي دي بصل معاها لي اكتر من كدا ديل عائلة دمها نجس كلو وحقد وحسد وغيرة عشان كدا انا ما عايزك تمشي ليهم.. قلتا ليهو برضو ما غيرتا رأيي وعايزة امشي لو مهما حصل في النهاية دا خالي ومن حقي امشي اعزي في وفاتو.. قال لي قام في لساني شعر وانا بحاول افهمك انو ديل ما ناس تمشي ليهم بس تقول انا بتكلم مع حيطة انتي عنادك وقوة رأسك دي ما ح تبطليها نهائي.. ودخل الغرفة وخلاني قاعدة براي تلفوني ضرب رديت دا عمو عبد الجليل قال لي البركة فيكم.. قلتا ليهو البركة في أمة محمد، عمي عليك الله اتكلم مع يُوسف اقنعو يخليني اسافر امشي البكى.. قال لي ما ح اتكلم معاهو وانتي خطوة ما ح تمشي.. قلتا ليهو عمي عليك الله انت ما تسوي كدا.. قال لي انا ما سويت شئ ومن هسي لو مشيتي انا ولا عمك ولا بتعرفيني وطوالي قفل الخط في وشي ولا سمعني عايزة اقول ليهو شنو ضربتا لي مهدي برضو رفض اني امشي بقى الخيار الوحيد قدامي حسن عشان يقنعهم اتكلمتا معاهو قال لي هم زاتهم لو كانو قبلو انتي تمشي انا ما بقبل وما ح اخليك ولا تفكري اني ممكن اتكلم معاهم في الموضوع دا واحاول اقنعهم عشان تمشي ولا تحلمي.. كلهم نفس العقلية ما بتفاهمو نهائي لو قالو شئ خلاص معناها انتهى، والمشكلة ما عندي رقم زول من بيتهم هناك عشان اضرب اعزيهم بيهو دا شنو ياخ اتقفلت من كل الجهات.. اليوم كلو انا ويُوسف ما بنتكلم مع بعض جيت قعدتا جنبو قلتا ليهو ح نفضل زعلانين من بعض كدا لي متين.. قال لي منو القال ليك انا زعلان منك.. قلتا ليهو طيب لي ما قاعد تتكلم معاي.. قال لي لانو الكلام معاك ما بجيب نتيجة وانتي ح تكوني مصرة على موقفك وما ح تغيري.. قلتا ليهو خلاص ما عايزة أمشي طالما كلكم اتفقتو علي ما ماشة كدا ارتحتا.. قال لي اي ارتحتا انتي ما قادرة تفهمي انو نحنا ما عايزنك تمشي ما عناد مننا بس نحنا خايفين عليك في الدنيا دي في ناس سيئين شديد ومستعدين يعملو اي شئ وما بفرق معاهم الناس ما كلهم طيبين زيك وقلوبهم بيضاء وصافية وانتي عشان كدا قايلة الناس كلهم زيك بس للأسف الواقع مختلف تماما عن الانتي متوقعاهو.. قلتا ليهو طيب الناس دي بتعمل كدا لي شنو هي ناسية انو في آخرة ولا ناسية انو ربنا موجود وشايف اي شئ وقادر على كل شئ معقوله ما بخافو ربنا يقبض روحهم وهم لسه ما تابوا.. قال لي الناس دي شكلها ناسية في موت وفي حساب عايشة في الدنيا وبتأذي الناس كأنهم مخلدين وما ح يموتو نقول شنو غير ندعي ليهم ربنا يهديهم ويصلح حالهم ويغفر ليهم.. قلتا ليهو خلينا من دا كلو نحنا انتقلنا البيت ولسه ما عملنا الكرامة ولا نسيت.. قال لي ما نسيت بس مستني بيت ناس امي يجهز برضو عشان نعمل الكرامتين مرة واحدة.. قلتا ليهو بيت تاني لي شنو كان ممكن يجو يسكنو معانا البيت كبير وبشيلنا.. قال لي بيتك دا منطقتك الخاصة ومن حقك تأخدي فيهو راحتك بالكامل.. قلتا ليهو حتى ولو كان تخليهم يسكنو معانا.. قال لي امي من البداية كان شرطها عشان تجي تسكن في الخرطوم انو انا وانتي بيتنا يكون منفصل عنهم والا ما ح تجي نهائي.. قلتا ليهو خالتو عايدة لي بتعمل كدا المشكلة وين لو قعدنا كلنا سوى.. قال لي هي قالت لو قعدو معانا انتي ما بتقدري تأخدي راحتك وقصص كتيرة عشان كدا اختصرت الموضوع واشتريت ليهم بيت جنبنا هنا على بعد شارعين بس مننا.. قلتا ليهو كدا كويس بس برضو ح اتكلم مع خالتو عايدة في الموضوع دا.. قال لي انتي بيت ناس امك فاضي وماف زول قاعد فيهو صح.. قلتا ليهو اي من بعد وفاتهم تاني ماف زول مشى هناك الا لمن جينا نحنا.. قال لي طيب بدل يكون فاضي كدا رأيك شنو تأجريهو وقروش الإيجار تتبرعي بيها أو تعملي بيها اي شئ يكون صدقة جارية ليهم بدل البيت يكون قاعد كدا.. قلتا ليهو كلامك صح من زمان انا بفكر اعمل ليهم صدقة بس ما الأحداث الأخيرة راح من بالي بس كويس انك ذكرتني.. قال لي خلي الموضوع دا علي بعرف بتاع عقارات بخليهو يعرض البيت للايجار ونشوف بعدها البحصل شنو.. قلتا ليهو انت ساكن في سنار كيف بتعرف كل شئ هنا.. قال لي طبيعة شغلي بتخليني اتنقل بين الخرطوم وسنار عشان كدا.. قلتا ليهو لو سألتك انت شغلك شنو.. قال لي انا تجار بيجيب بضاعة من دول برة وبوزعها هنا وفي سنار.. قلتا ليهو طيب البضاعة دي نوعها شنو.. قال لي متنوعة مرة ملابس ومرة أدوات كهربائية ومرات قطع غيار للسيارات يعني ماف شئ ثابت.. قلتا ليهو ما شاء الله عليك في ناس شغل واحد ما قادرين عليهو وانت شغال ثلاث وكل واحد مختلف عن الثاني عيني باردة عليك.. قال لي نحمد ونشكر ربنا فاتحها علي من أوسع أبوابو.. قلتا ليهو الحمدلله، رأيك شنو كل شهر نجمع قروش ونتبرع بيها انو نعمل بيها كرامة ونوزعها للفقراء والمساكين وكدا بنكون كسبنا أجر وسدينا جوع ناس محتاجين وطالما نحنا ربنا فاتحها علينا خليني نيسر على ناس أو ممكن كل شهر القروش البنجمعها نفتش عائلة محتاجة ونعمل ليهم بيها مشروع صغير يقدرو يعينو بيهو نفسهم وما يحتاجو لي زول.. باسني في رأسي وقال لي كل مرة انتي بتثبتي لي انو اختياري ليك ما كان غلط او بالأصح انتي اختيار ربنا السمح لي ربنا يديمك لي نعمة ويحفظك من الزوال.. قلتا ليهو ربنا يخليك لي يا تاج رأسي.. قال لي انتي عارفة فكرة المشروع احسن لانو القروش فترة وبتخلص بس المشروع ح يفضل يعينهم طول العمر.. قلتا ليهو عظيم يبقى من الليلة نبدأ نجمع ونهاية الشهر نفتش عائلة محتاجة بس اهم شيء اننا ما نحسسهم كأننا بنديهم شفقة مننا.. قال لي ما تخافي ما ح يحسو بي شئ زي دا ابدا اطمني.. تاني يوم من الصباح يُوسف طلع قال عندو شغل بقيت قاعدة في البيت براي بعد مسافة الباب دقة قلتا احتمال يكون يُوسف نسى المفاتيح ورجع يشيلها فتحتا الباب لقيت مرأة ومعاها بنت وولد صغار سلمت علي وفضلتها لي جوة جبتا ليها موية وعصير قالت لي انا مشاعر ساكنة في البيت القصادك دا وديل أولادي غرام وغسان.. قلتا ليها وانا هيام واتشرفتا بي معرفتك.. قالت لي وانا لي الشرف.. قلتا ليها أكبر الولد ولا البنت.. قالت لي ديل توأم.. قلتا ليها عمرهم كم سنة.. قالت لي عمرهم ثلاثة سنوات.. قلتا ليها ما شاء الله ربنا يحفظهم ليك.. قالت لي اللهم اميين، معليش جيتك من غير موعد بس لي كم يوم بقول عايزة اجيك بلقى عربية راجلك برة بس الليلة لمن لقيتها ماف قلتا اجي أسلم عليك.. قلتا ليها والله ما قصرتي اصلا كنتا زهجانة وياداب جديدة في الحي وما بعرف زول.. قالت لي حتى انا جديدة هنا ياداب تميت شهر ولسه ما اتعرفتا على الجيران كويس.. قلتا ليها ايواا كويس، غرام وغسان بقو يلعبو في الصالون مشاعر بقت تناديهم يا اولاد تعالو هنا وبطلو شغب.. قلتا ليها خليهم يلعبو ساي.. قالت لي هسي بكسرو ليك حاجة.. قلتا ليها ولا يهمك خليهم يكسرو ساي البيتكسر بجي غيرو ما مشكلة.. قالت لي خلينا نمشي ما نزعجك.. قلتا ليها لا والله ما بتمشو قبل ما تفطرو معاي انا ما صدقتا زول جاني بدل قاعدة براي زي المجنونة.. قالت لي ما عايزين نضايقك..قلتا ليها عيب عليك ما تقولي كدا ماف اي ضيق وبعدين الشفع بفرقو لي.. قالت لي طالما قلتي كدا بنقعد بس بساعدك في تجهيز الفطور.. قلتا ليها لالا ما تتعبي نفسك انا بعملو.. قالت لي يبقى كدا انتي عايزانا نمشي.. قلتا ليها العفو ياخ بس انتو ضيوفي.. قالت لي حتى ولو ما فيها حاجة.. فعلا عملنا الفطور وفطرنا وبعدها قعدتا العب مع أولادها لحدي ما تعبنا وما حسين على نفسي نمتا معاهم متين، صحيت الساعة 2 لقيت غرام وغسان نايمين جنبي ومشاعر كانت ماف قلتا معناها بتكون مشت يا الله كيف نمتا وخليتها مل ظريفة حركتي ياخ اف من يا هيام البنت اول مرة تجيك تنومي وتخليها.. حوالي الساعة 4 كدا الباب دقة فتحتو لقيت دي مشاعر فضلتها جوة قلتا ليها والله اسفة بس ما حسيت على نفسي نمتا متين.. قالت لي ولا يهمك اصلا اولادي مشاغبين واكيد تعبتي منهم ونمتي.. قلتا ليها بالعكس كمان اللعب معاهم فرحني والله وغير لي مزاجي.. قالت لي جبيل لقيتكم نايمين ما حبيت ازعجكم عشان كدا مشيت وهسي جيت اسوقهم قاعدين وين.. قلتا ليها خليتهم في الغرفة بلعبو، مشيت جبتهم ليها ودعوني ومشو بيتهم بعد مسافة قصيرة الباب فتح يُوسف جاني قال لي انتي كويسة حاصل ليك شئ.. قلتا ليهو انا كويسة ما فيني شئ انت مالك.. قال لي من جبيل بضرب ليك ما بتردي خوفتيني عليك شديد.. قلتا ليهو بكون نسيت التلفون صامت.. قال لي معقوله من الصباح ما بتشوفي تلفونك مكانو وين ولو صامت ولا لا.. قلتا ليهو كنتا مشغولة مع غرام وغسان ونسيت التلفون.. قال لي غرام وغسان ديل منو كمان.. قلتا ليهو ديل وأولاد جارتنا مشاعر بعد طلعتا جاتني هي واولادها ولعبتا معاهم وما اتذكرتا اشوف التلفون.. قال لي كويس عرفتيهم يوم واحد ونسيتيني انا صح.. قلتا ليهو معقوله ياخ انا القلب ودقاتو ومستحيل تتنسي.. قال لي متأكدة.. قلتا ليهو 100×100.. قال لي خلاص صدقتك بس تاني ما تعيديها وتخوفني عليك كويس.. قلتا ليهو حاضر من عيوني، يلا هسي ادخل اخد ليك حمام مسافة اعمل الغداء.. دخل استحمى وانا جهزتا الغداء ونحنا قاعدين نأكل قال لي جارتك الجاتك دي كيف يعني ارتحتي ليها ولا لا.. قلتا ليهو والله كويسة وارتحتا ليها شديد وظاهر عليها من وملامح وشها انها طيبة.. قال لي ايواا كويس والله.. قلتا ليهو بتسأل لي شنو.. قال لي مجرد فضول حابي اعرف الناس الح تختلطي معاهم بس.. قلتا ليهو ما تخاف ما ح يحصل لي شئ.. قال لي والله ما عارف لو ح يحصل ليك شئ ولا لا المهم انتي انتبهي، انتي عارفة بكرة اعزميها هي وراجلها واولادها خلينا نتعرف عليهم.. قلتا ليهو يعني لو ما اتعرفتا عليها ما بترتاح صح.. قال لي اكيد انا حابي اطمن عليك ما عايز بالي ينشغل عليك وانا ما معاك.. قلتا ليهو حاضر بكرة بكلمها كدا ارتحتا.. قال لي برتاح لمن اتعرف عليها هي وراجلها.. قلتا ليهو على فكرة انا ما شافعة لمن تخاف علي للدرجة دي.. قال لي انتي في عيوني دائما ح تفضلي شافعتي البحبها وبخاف عليها.. قلتا ليهو كويس نشوف الوضع دا ح يستمر لي متين.. قال لي ح يستمر للأبد يا شافعتي الحلوة.. قلتا ليهو ما تقول لي شافعة وصريت ليهو وشي وقمتا.. قال لي على فكرة بتطلعي حلوة شديد لمن تزعلي.. قلتا ليهو المرة دي ما بتقدر تحنكني بالكلام دا.. قال لي عندي طرق تانية بقدر احنكك بيها تجربي.. قلتا ليهو شكرا ما عايزة اجرب ويلا انا ماشة انوم.. قال لي الليلة نومي بس اشوف لي متين ح تقدري تهربي مني
