من جانب عفراء:-
صحينا الصباح انا وعبد الجليل جهزنا وصحيت هيام جهزت وطلعنا في الشارع قلتا لي هيام انتي ابوك وين.. قالت لي عمتو كيف يعني ابوي وين انتي عارفة انو هو مات قرب يتم ثلاثة شهور.. قلتا ليها طيب امك وين.. قالت لي امي قبل أربعة يوم سافرت اني نسيتي يا عمتو ولا شنو ولي بتسأليني الأسئلة دي كلها.. قلتا ليها لالا بس سألتك ساي.. قالت لي انتي يا عمتو نحنا ماشين وين.. قلتا ليها ماشين لي دكتور عايزنو يشوفك.. قالت لي لكن يا عمتو انا ما عيانة عشان امشي دكتور هدي انا قدامك كويسة وما فيني الا العافية.. عبد الجليل قال ليها ما دكتور عشان انتي عيانة دا دكتور نفسي عايزين نوديك ليهو.. قالت ليهو بس عمو انا ما مجنونة لي تودوني لي دكتور نفسي.. قال ليها نحنا ما مودنك عشان مجنونة بس مجرد مقابلة بسيطة وبعدها ح نرجع ماف شئ بخوف.. قالت ليهو طالما انت قلتا كدا خلاص كويس بس خلوني اضرب لي امي واكلمها.. انت وعبد الجليل بقينا نعاين لي بعض.. طلعتا تلفونها وضربت لي امها قالت لينا برضو تلفونها مقفولة لي يومين بضرب لي امي وبلقى تلفونها مقفول.. قلتا ليها بتكون ما عندها شبكة اول ما تصل مكان شبكة بتتصل علينا ما تخافي.. قالت لي كويس يا عمتو بعدين تاني بجرب اضرب ليها.. بقت تعاين جهة الشباك بقيت متحيرة البنت دي مالا ولي بتتصرف بالطريقة أن شاء الله الدكتور دا يورينا مالا ونلقى حل لي مشكلتها دي.. وصلنا العيادة نزلنا قعدنا لانو الدكتور كان عندو مريضة بعد طلعت قعدنا زي 5 دقائق ودخلنا انا وعبد الجليل وخلينا هيام برة قعدنا وحكينا للدكتور الحصل مع هيام في الفترة الأخيرة كلها وبعدها نادينا هيام جات عرفنها على دكتور مؤمن.. الدكتور قال لينا ممكن تطلعو وتخلوني معاها.. قلنا ليهو كويس طلعنا انا وعبد الجليل وبقينا مستنينهم برة قعدو قريب ساعة ونص جوة بعدها دكتور مؤمن طلع هيام ونده علينا دخلنا قعدنا معاهو.. عبد الجليل قال ليهو يادكتور طمنا على بنت اخوي عندها شنو.. دكتور مؤمن قال لينا والله ما عارف اقول ليكم شنو لانو حالة هيام دي غريبة ونادر ما تحصل مع زول.. قلتا ليهو يا دكتور ما تخوفنا عليها عندها شنو.. قال لينا ح اشرح ليكم هيام بسبب الحصل معاها في الفترة الأخيرة وأنها خسرت امها بعد فترة بسيطة من خسارتها لي والدها عقلها الواعي رفض يتقبل فكرة موت انها فبالتالي عقلها اللاواعي بقى يخترع في مبررات عشان تبرر ليها غياب امها وما تتقبل فكرة موتها.. قلتا ليها طيب يا دكتور نحنا نعمل شنو عشان تطلع من الحالة دي وتتقبل موت امها.. قال لينا حاليا نحنا ما بنقدر نوريها كدا لازم شوية شوية نبدأ نقنعها بي موت امها لانو لو حاولنا نوريها كدا حالتها ممكن تتأذم اكتر.. عبد الجليل قال ليهو يا دكتور انت ورينا مفروض نعمل شنو ونحنا ح ننفذ البتقولو كلو المهم بنت اخوي تبقى كويسة.. قال لينا اولا لازم شوية شوية نبدأ نحسسها بي غياب امها ونقتل في عقلها كل الأفكار البتبرر ليها غيابها وانا مع الجلسات ح احاول اساعدكم عشان حالتها ما تسوء اكتر.. قلتا ليهو طيب يا دكتور هسي مفروض نرجعها تقعد في البيت عشان تتذكر امها وغيابها ولا لا.. قال لينا لالا ما تخلوها تقعد في البيت لانو كل مكان ح يذكرها بي امها وفي كل زاوية ح تحاول تخلق ذكرى تبرر بيها غيابها عشان كدا قدر ما تحاولو ابعدوها من البيت وفي كل فرصة حاولو اتكلمو عن موت امها في البداية ح تضايق وترفض الفكرة بس لمن تلقاكم كلكم مصرين على كلامكم عقلها اللاواعي الأفكار فيهو ح تتلخبط وهنا انا بتجي مهمتي اني أرتب ليها أفكارها وفي نهاية ح تقتنع وتتقبل فكرة موت امها وتقدر تكمل حياتها عادي بس المهم انكم لازم توروني بي كل شئ بحصل وردات فعلها عن كلامكم.. عبد الجليل قال ليهو أن شاء الله ح نعمل كل البتقولو.. بعدها عبد الجليل شال رقمو وطلعنا رجعنا بيتنا الفي البيت الكبير عملتا ليها الفطور أكلت وبعدها رقدت نامت.. مشينا كلمنا باقي العائلة بالكلام القالو لينا دكتور مؤمن واتفقنا انو ننفذ كلامو بالحرف عشان حالة هيام تتحسن وترجع زي الاول
