وانا قاعده سمعتا صوت الباب لبستا توبي وفتحتو جاء مهدي داخل قلتا ليهو اخيرا اتذكرتا عندك ام واخت تجي تسأل منهم.. قال لي ما عايز معاك كلام كتير لمي حاجاتك انتي وامك وبكرة تطلعو من البيت دا........... قلتا ليهو كيف يعني ما فهمتا.. قال لي لمي حاجاتكم انتي وامك ح تطلعو من البيت دا عشان عايز اعرس واجي اسكن هنا.. قلتا ليهو ونحنا ح نمشي وين.. قال لي امشو مكان ما عايزين انا ما دخلني المهم اطلعوا من البيت.. قلتا ليهو انت بتهظر صح كيف يعني نطلع وبعدين دا بيت ابوي انا ما طالعة منو فاهم.. قال لي ح تطلعي ولا على كيفك بكرة لمن تجي ما عايز اشوفكم.. قلتا ليهو انت ما عندك قلب ولا ضمير كيف يعني ترمينا في الشارع انا اختك ودي امك عايز تخلينا بعد ما ابوي مات في الوقت المفروض تكون بعدو سندنا عايز تتخلى عننا.. قال لي ما تقعدي تصرعي رأسي بي كلامك دا انتي ما اختي ولا ديك امي وبكرة تطلعو من البيت وتطلعو من حياتي وما عايز اشوفك صورة وشكم تاني.. قلتا ليهو حرام عليك ياخ نحنا سوينا ليك شنو لمن تكرهنا بالطريقة دي عملنا ليك شنو.. قال لي ما دخلك وانا كلامي ما بكررو تاني تطلعو والموضوع انتهى.. قلتا ليهو عماتك تاني حرشوك وانت سمعتا كلامهم وعايز تطردنا صح اصلا ح اتوقع شنو من واحد زيك عديم شخصية وما عندو كلمة ونسوان بمشوهو زي ما عايزين.. مسكني من حنكي وقال لي انتبهي لي كلامك احسن ليك.. قلتا ليهو بصوت عالي ولو ما انتبهتا ح تعمل شنو ولا عماتك ح يقولو ليك تعمل لينا شنو اكتر من كدا.. بي صوتي العالي امي جات طالعة.. قالت لينا في شنو ويا هيام بتكوركي مالك.. قلتا ليها تعالي اسمعي مهدي قال عايز يطلعنا من البيت عشان يسكن فيهو.. قالت لي مستحيل مهدي ما بعمل كدا.. قلتا ليها هدا هو قدامك اسأليهو لو ما مصدقاني.. امي قالت ليهو صحي يا مهدي الكلام البتقولو هيومة.. قال ليها اي صحي وبكرة ح تطلعو من البيت دا.. امي قالت ليهو الله يرضى عليك ما تعمل كدا نمشي وين نحنا ما عندنا مكان غير البيت دا نقعد فيهو.. قال ليها انا ما بخصني امشو مكان عايزين ما بهمني.. قالت ليهو معقوله تعمل في امك واختك كدا.. قال ليها انتي ما امي فاهمة انتي ما امي ودي ما اختي ولا شئ انتي مرت ابوي وهي بنت ابوي وبس ماف علاقة تاني بتجمعنا.. قالت ليهو بعد العمر دا كلو تقول علي مرت ابوك بس.. قال ليها اي لانو دي الحقيقة المستحيل تتغير انك انتي مرت ابوي ما امي.. قلتا ليهو انت عارف انا عمري كلو قاعده وبفكر ليه امك من انت صغير اتخلى عنك ومشت من غير ما تسأل عنك ولا تجي تشوفك وتطمن علي لانو عرفت انك واحد خايب وما منك لي رجاء وانك واحد ما عندك رأي وشخصية وما عندك مخ عشان تفكر بيهو وانا لو مكانها لو كان عندي ولد زيك بعمل نفس العملتو وبرميك من غير ما اسأل منك لانك بتستاهل واكيد هسي هي بتكون مبسوطة من دونك ولا بتفكر في واحد علة وهم على القلب زيك.. جاء خنقني وقال لي سيرة امي في لسانك ما تجيبيها فاهمة.. امي قالت ليهو فكها ح تقتلها يا مهدي فكها ح تموت في يدك.. بصعوبة فكتني من بين يدينو يا الله بقيت قادرة اتنفس قعدتا في الأرض اخدتا نفس شوية قلتا ليهو انت قايل لو خنقتني ح تغير حقيقة انو امك ما حبتك ولا كانت عايزاك عشان كدا اتخلت عنك والسنين دي كلها ما فكرت تجي تشوفك وتسأل منك لأنك واحد ما مرغوب فيهو ونكرة.. قال لي لو ما سكتي ح اقتلك اسكتي ياخ اسكتي.. قلتا ليهو لو سكتا الحقيقة ما ح تتغير انت واحد امك ما حبتك وما كان عايزك ودي حقيقة انت لازم تتقبلها انك واحد نكرة.. قال لي انا بصعوبة قادر امسك نفسي اسكتي لي مصلحتك.. امي قالت لي يا هيومة خلاص اسكتي الله يرضى عليك عشان خاطري اسكتي.. قلتا ليها اسكت لي شنو مالي قلتا شئ غلط مش امو جدعتو وانتي ربيتيهو وكبرتيهو وهسي شوفي جزاك شنو عايز يطردك وبدون ما يفكر ولا قال دي المرة الربتني واهتمت بي وحبتني اكتر من امي الحقيقية يس وين هو ما بتنفع فيهو الحسنة.. قال لي كلامك دا ما ح يفيد بي شئ بكرة لمن اجي عايز القى البيت فاضي ولا انتي ولا امك فيهو فاهمة وقام فتح الباب وطلع.. قلتا ليها اها شفتي ولدك عمل لينا شنو اها عايز يطلعنا من البيت بعد العملتي ليهو كلو ما نفع فيهو ومع انك فضلتيهو علي ودائما بتقيفي معاهو هسي شايفة عمل شنو صحي آخر الجزاء أذى هسي ح نمشي وين.. قالت لي ما عارفه نعمل شنو عمري ما اتوقعتا مهدي ممكن يعمل فينا كدا الولد الربيتو كانو ولدي في النهاية يعمل فيني كدا.. قلتا ليها وبعمل اكتر من كدا اهلو منو مش عماتو ديلك اكيد بي سببهم وهو زي الحمار بسمع كلامهم من غير ما يعترض أو يشغل البطيخة الفي كتفو دي، هسي لازم نلقى حل لانو ما عندنا مكان نمشي عليهو، اتذكرتا لمن ابوي اتكلم مع عمي عبد الجليل وقلتا ماف زول غيرو ح يساعدنا في الموضوع دا جريت غرفتي لبستا عبايتي وجيت طالعة.. امي قالت لي ماشة وين.. قلتا ليها ماشة القى حل للمشكلة دي وجاية طلعتا مشيت البيت الكبير لي عمي عبد الجليل دخلتا بيتو لقيت عمتي عفراء قاعدة قلتا ليها عمي عبد الجليل وين.. قالت لي اهدي مالو نفسك قايم كدا اقعدي شوية.. قلتا ليها مافي وقت عمي وينو.. قالت لي عمك مسافر لي في شنو.. قلتا ليها طيب ح يرجع متين.. قالت لي بعد ثلاثة أو أربعة أيام.. قلتا ليها ماف وقت بتقدري تضربي ليهو الموضوع ما بتحمل تأجيل.. قالت لي في شنو فهميني.. حكيت ليها كلام مهدي كلو.. قالت لي دا كلو من عمتك وداد امبارح سمعتها بتتكلم مع عمتك ندى انو ح يطلعو زول من البيت بس ما فهمتا هو منو طلعتو انتو بس ما قادرة افهم مهدي كيف سمع كلامهم.. قلتا ليها ما تستغربي مهدي من زمان عاملنو زي الخاتم في يدينهم بمشو زي ما عايزين وهسي عشان قال عايز روان ح يعمل اي شئ عشان ما يخرب العرس واكيد عمتي وداد بتكون قالت ليهو لو ما طلعنا ما ح تعرس ليهو بتها وهو عشان بحب روان عمل العايزاهو ولا فكر انا وامي ح نمشي وين.. قالت لي كدي نضرب لي عمك ونشوف لو بقدر يجي في باقي الليل دا ويحل المشكلة دي.. ضربت ليهو لقت تلفونو مقفول وضربتا لي حسن لانو هو زاتو سافر معاهو برضو تلفونو مقفول آخر أمل كان عندي خلاص فقدتو.. عمتو عفراء قالت لي خلينا نمشي لي عمك عبد الفتاح نخليهو يتكلم مع مهدي ويقنعو.. قلتا ليها ما ح امشي ليهو لاني متأكدة انو ما ح يساعدنا هو اصلا بكرهني انا وامي من غير سبب وهسي جات الفرصة عشان يخلص مننا صدقيني ما ح يساعدنا.. قالت لي ما بتخسري شئ خلينا نمشي ليهو.. قلتا ليها مع اني ما مقتنعة بس نمشي احتمال يخيب ظني ويقيف معانا.. مشينا لي عمي وحكيت ليهو الحصل.. بكل برود قال لي وعايزاني اعمل ليك شنو البيت بيت ابوهو ومن حقو يكون عايز يقعد فيهو.. قلتا ليهو المات دا ما ابوهو براهو على فكرة وبعدين انت بتتكلم كدا كأني ما بتو والمحبوسة وما خلصتا عدتها دي ما مرتو انتو رحمة في قلوبكم ماف.. قال لي ماف وثانياً لا انتي ولا امك ما بتهموني ولا فارقين معاي.. قلتا ليهو غلطانة انا الجيتك وعشمتا انك تساعدنا، انا قلتا ليك يا عمتو عفراء ما ح يساعدنا تعبنا نفسنا وجينا على الفاضي.. عمتي عفراء قالت ليهو انت ما بتخاف الله دي بنت اخوك يعني زي بتك كيف تقبل ترميها هي وامها من دون ما تسأل عنهم يوم القيامة ح تقابل اخوك بي ياتو وش وانت ضيعتا امانتو وفرطتا فيها..قال ليها انتي ما تدخلي لانو الموضوع دا ما بخصك واحدة غريبة زيك ما مسموح ليها تدخل في مواضيع العائلة.. قلتا ليها عمتو ما تتعبي نفسك وتتكلمي معاهو لانو ماف فايدة وكنا ماشين.. قال لي عندي شرط لو وافقتي عليهو ح اتكلم مع مهدي وح يخلي ليكم البيت.. قلتا ليهو بلهفة مهما كان الشرط انا موافقة المهم أني ما اطلع من البيت لانو كل ذكرياتي مع ابوي فيهو وطفولتي كلها فيهو.. قال لي الشرط انك تخلي قرايتك وتتزوجي منذر ولدي.. بقيت واقفة وبعاين ليهو.. قال بي ما تعايني لي كدا جوابك شنو.. قلتا ليهو جوابي على شنو ما فاهمة.. قال لي على الشرط القلتو ليك.. قلتا ليهو بصوت شبه عالي شرط شنو انت سامع نفسك بتقول في شنو قراية شنو البخليها وولدك منو البعرسو على حس صوتي جو تسنيم وتوسل وامها طالعين من الغرفة.. تسنيم قالت لي هيومة مالك في شنو وصوتك عالي لي شنو.. قلتا ليها تعالي اسمعي ابوك المحترم بتشرط على بي شنو عشان يتكلم مع مهدي وما يطلعنا من البيت.. عمتو اماني قالت لي عمي في شنو يا عبد الفتاح وبيت شنو وياتو شرط.. قلتا ليها راجلك المصون عايزني اخلي قريتي واعرس ولدك منذر عشان ما نطلع من بيت ابوي.. عمي قال لي ما تكتري كلامك واديني قرارك النهائي.. قلتا ليهو انا خرفتا ولا شنو انا لو اقعد في الشارع وجيعانة عمري كلو ما بعرس ولدك ولا بخلي قرايتي لانو قرايتي دي حلم ابوي الكان نفسو اني احققو ومستحيل اتخلى عنو عشان بيت.. تسنيم قالت لي هيام انتبهي لي كلامك واعرفي انك قاعدة تتكلمي مع ابوي.. قلتا ليها لم ابوك يعرف يتكلم بعد كدا اتكلمي معاي منو دي البتعرس اخوك.. قالت لي واخوي مالو عيبو شنو لمن ما عايزاهو انتي تطولي وتعرسي.. قلتا ليها ما عايزة أطول ولا أقصر واخوك دا احتفظو بيهو لي نفسكم انا ما بلزمني وانتو كلكم ما بتلزموني.. قالت لي وانتي زاتك ما بتلزمينا وهسي اطلعي من بيتنا سريع ولحدي ما تعرفي حدودك وتحترمي ابوي تعالي.. قلتا ليها من غير ما تطرديني انا ماشة واصلا ما بشرفني اقعد في بيتكم دا وبدونكم انا بعرف احل مشاكلي وغلطانة انا الجيتكم وطلعتا انا وعمتي عفراء.. مشيت لي عماتي بي هناك قلتا ليهم انا وامي عملنا ليكم شنو لمن تكرهونا وتحقدو علينا بالشكل دا اذيناكم في شنو ليه بتعملو فينا كدا انا خسرتا ابوي من فترة ولسه ما قدرتا اتعود على غيابو هسي عايزين تأخدو آخر ذكرة فضلت لي منو انتو ما بتخافو الله عايزين مننا شنو خافو الله أبوي ما ليهو شهرين متوفي وانتو بتعملو فينا كدا انتو ما عندكم ولا ضمير ولا احساس ولا قلب ياخ الله ينتقم منكم ويحرق قلوبكم زي ما حرقتو قلبي وطلعتا خليتهم.. عمتي عفراء قالت لي تعالو اقعدو معاي لحدي ما عمك يجي ويلقى حل.. قلتا ليها لالا ما عايزين نتقل عليك.. قالت لي انتي عويرة ولا شنو انتي بتي ومستحيل قعادك يتقل علي بالعكس بتونسيني.. قلتا ليها خليني اتكلم مع امي اول هي لسه من العدة ما طلعت وعملو فينا كدا الله يستر من الجاي، رجعتا البيت لقيت امي مستنياني حكيت ليها الحصل.. قالت لي ما كان تتكلمي معاهم كدا لو مهما حصل ديل اهلك وواجب عليك تحترميهم.. قلتا ليها هم ما احترمونا انا البخليني احترمهم شنو.. قالت لي انتي ما عليك بيهم انا ربيتك على انك تحترمي الأكبر منك لو مهما عمل معاك قولي لي هسي انتي بي تصرفك دا فرقك منهم شنو وريني.. قلتا ليها بس يا أمي.. قابت لي ما بس ولا شئ تاني مرة إياك تتكلمي مع زول أكبر منك بالطريقة دي.. قلتا ليها حاضر يا أمي، اها هسي ح نعمل شنو.. قالت لي ح نمشي بيت عمك لحدي ما يجي ويلقى لينا حل ويتكلم مع مهدي.. مشيت دخلتا صليت المغرب وبقيت راقدة اذنو العشاء قمتا صليت وبقيت قاعده في المصلاية وببكي وبدعي يارب انا عالم بي حالي وانا ما لي غير انت اخدتا ابوي وعندك وانا رضيت وصبرتا بس يارب ما تاخدي مني آخر ذكرى لي منو يارب تحصل معجزة وما نطلع من البيت يارب انت قادر على كل شيء وانت رب المستحيل يارب ما تحرمني من آخر ذكرى لي مع ابوي يارب انا أملي كلو فيك وواثقة انك ما ح تردني خايبة يارب، قعدتا الليل كلو بدعي وببكي وبستغفر وبسبح لي أذان الفجر صليت ورجعتا ادعي تاني وانا أملي في ربنا نهائي ما انقطع ومواصلة في دعواتي لحدي العصر الباب دقة مشيت فتحتو طلع مهدي.. قال لي انتو لي هسي ما طلعتو من البيت مستنيين شنو فهموني.. دخل وبقى يرمي لي حاجاتنا في الارض وبقول لينا اطلعو من البيت.. تاني سمعتا صوت الباب بدق خليت مهدي برمي في حاجاتنا وفتحتا الباب لقيت دا.........
______________♥️_____________
كلما ضاقت بك الدنيا وقفلت جميع الابواب في وجهك وظننت أن لا مخرج لك حينها فقط تأكد انا فرج الله قريب♥️♥️
في امان الله♥️
