الباب دقة مشيت فتحتو طلع مهدي.. قال لي انتو لي هسي ما طلعتو من البيت مستنيين شنو فهموني.. دخل وبقى يرمي لي حاجاتنا في الارض وبقول لينا اطلعو من البيت.. تاني سمعتا صوت الباب بدق خليت مهدي برمي في حاجاتنا وفتحتا الباب لقيت دا....... عمو التاج الكنتا المؤجرين منو البيت.. قال لي يابتي كيفك.. قلتا ليهو انا كويسة يا عمو انت كيف.. قال لي انا كويس الحمد لله، اعفي لي يابتي ما قدرتا اجي اعزيكم الا هسي لاني كنتا مسافر.. قلتا ليهو ولا يهمك يا عمو.. قال لي البركة فيكم وربنا يتقبلو قبول حسن.. قلتا ليهو أن شاء الله يارب، قلتا ليهو يا عمو عارف اتأخرنا على الإيجار بس ادينا كم يوم لحدي ما أمورنا تظبط.. قال لي إيجار شنو والبيت حقكم.. قلتا ليهو كيف حقنا ما فهمتا.. قال لي ابوك قبل ما يموت اشترى مني البيت وسجلو بي اسمك.. سمعتا صوت مهدي بقول لي تعالي يا الزفتة الاسمك هيام لمي حاجاتكم واطلعو من البيت دا.. قلتا ليهو عمو التاج كدي ادخل جوة وفهمنا في شنو، فضلتو لي جوة وقلتا لي مهدي خلي البتسوي فيهو دا وتعال اسمع عمو التاج عايز يقول لينا موضوع مهم.. قال لي انا ما عايز اسمع اي شئ شيلو حاجاتكم واطلعو من البيت بس.. عمو التاج قال ليهو ما بتقدر تطردهم لانو البيت اصلا مسجل بي اسم هيام.. قال ليهو كيف يعني مسجل بي اسمها انت سامع نفسك بتقول في شنو.. عمو التاج قال ليهو دي الحقيقة ابوك قبل ما يتوفى بي كم شهر اشترى مني البيت وسجلو بي اسم اختك هيام يعني البيت حقها والأوراق بتثبت كدا وما بتقدر تطلعها منو.. مهدي قال ليهو انت بتكذب اكيد دا اتفاق بينك وبينها عشان ما تطلع من البيت قايلني غبي وح أصدق الكذبة وبعدين طالما عارف كدا ليه ما جيت لمن ابوي مات وجيت هسي تكلمنا بالموضوع دا وفي نفس اليوم الح يطلعو منو انتو شايفني شافع قدامكم لمن أصدق الكذبة دي.. عمو التاج قال ليهو ماف سبب بخليني اكذب عليك وانا ما قدرتا اجي وفاة ابوك عشان كنتا مسافر وهدي جيتي وقلتا لازم اجي واعمل معاكم الواجب وانا ما كنتا عارف اصلا انو ابوك ما وراكم انو اشترى من البيت وسجلو بي اسم هيام وثانيا انا راجل كبير البخليني اكذب في عمري دا شنو.. مهدي قال ليهو ما عارف بس انا ما مصدق كلامك دا واكيد بتقول كدا بطلب من هيام صح.. قلتا ليهو انت جنيت ولا شنو انا زاتي ما كنتا عارفة وسمعتا هسي زيي زيك كدا.. مهدي مشى وقف قدام أمي قال ليها انتي كنتي برضو مشاركة معاهم في الكذبة دي صح.. امي قالت ليهو والله يا ولدي انا ما عارفة اي شئ ونحنا زيك متفاجأين وماف كذبة في الموضوع.. عمو التاج قال لينا انا ما كنتا عارف انو عبد القادر ما كلمكم بي قصة شراء البيت وانت يا مهدي لو ما مصدق هسي اضرب لي المحامي يجي ويجيب معاهو أوراق البيت وأثبت ليك صحة كلامي.. مهدي قال ليهو اي اضرب لي خلي يجي ونشوف كذبكم دا نهايتو وين.. عمو التاج ضرب لي المحامي وقال ليهو يجي بيتنا ويجيب معاهو كل أوراق البيت وعقد اشتراء البيت.. بقينا قاعدين في الراكوبة منتظرين المحامي يجي بعد زي ساعة كدا الباب دقة مهدي مشى فتح الباب وجاء معاهو راجل أظن دا المحامي.. عمو التاج قال لينا دا المحامي جمال وقال ليهو اعرفك ديل عائلة المرحوم عبد القادر القبل كم شهر اشتراء مني البيت دا وانت تميت لينا الإجراءات القانونية.. المحامي جمال قال ليهو يا ساتر متين مات ربنا يرحمو ويحسن إليه.. قلنا ليهو امين يارب.. مهدي قال ليهو بطلو كلام كتير ووريني أوراق البيت مسجل بي اسم منو.. المحامي طلع أوراق وقال لينا البيت مسجل بي اسم هيام عبد القادر ودي أوراق بتثبت كدا.. مهدي شال الأوراق وبقى بشوف فيها.. قال لينا انا البخليني اصدقكم شنو احتمال الأوراق دي تكون مزورة.. المحامي قال ليهو زي ما شايف دي كلها اختام قانونية ولو مشيت لي اي محامي ح يقول ليك نفسي كلامي.. مهدي قال لي انتي عملتي شنو لي ابوي خليتي يسجل ليك البيت فهميني.. قلتا ليهو اعمل ليهو شنو وانا ما كنتا عارفة وبعدين انا لو عارفة مثلا ح اخليك تطلعنا من البيت اكيد لا ويمكن ابوي عشان كان عارف انك ما بتأمن ليك عشان كدا قرر يضمن حقي وحق امي وأننا من بعدو ما نترمي في الشارع زي ما كنتا ح تعمل عشان كدا سجل البيت بس اسمي.. مهدي قال لي ما تفكري انو كدا ما ح تطلعي من البيت انتي وامك ح تطلعو منو لو شئتو أو ابيتو.. قلتا ليهو ما بتقدر تطلعنا منو لانو البيت حقي انا ولو حاولتا ممكن عادي ارفع عليك قضية وهدا المحامي وعمو التاج شاهدين.. المحامي جمال قال ليهو ما بتقدر تطلعهم من البيت ولي مصلحتك انك تخليهم وتتفق معاهو لانو لو حاولتا تطلعهم ورفعو عليك قضية ممكن المحكمة تمنعك من انك تقرب على البيت ولو اتعرضتا ليهم ح تتحبس.. قلتا ليهو ماف اي اتفاق بيناتنا وهسي اطلع من بيتي سريع وما عايزة اشوف صورة وشك تاني.. قال لي انتي منو عشان تطرديني من بيت ابوي.. قلتا ليهو صحح معلوماتك دا بيتي انا وزي ما انت كنتا ح تطردنا منو انا هسي بطردك وهسي اطلع من هنا سريع.. قال لي ولو ما طلعتا ح تعملي شنو.. قلتا ليهو المحامي هدا قاعد برفع عليك قضية وبتدخل السجن بالبساطة دي.. امي قالت لي دا كلام شنو انتو اخوان وماف اي قضاية بينكم الموضوع يتحلى هنا وبرواقة.. قلتا ليها امي ماف شئ ح يتحلى غير لمن دا يطلع من البيت دا ومن حياتنا على الآخر.. عمو التاج قال لي يابتي اخزي الشيطان وما تخلي يدخل بيناتكم في النهاية انتو اخوان وما ليكم غير بعض في الدنيا دي.. قلتا ليهو يا عمو اخو شنو البتتكلم عنو الأخ الكان ح يطرد امو واختو ولا الأخ المن يوم ابوهو مات ما فكر يجي ويسأل علينا ويطمن عن أحوالنا ورامينا من غير سند وظهر وراجل معانا عن اخ شنو انتو بتتكلمو انا البعرفو الاخ بكون حنون على امو واختو وخصوصاً لو ابوهو مات بس دا العكس تماما نحنا لو كنا اعدأو ما بعاملنا بالطريقة دي وبخاف الله فينا.. عمو التاج قال لي دي لحظة شيطان وخلاص مرت وان شاء الله تاني ما ح تتكرر صح يا مهدي.. مهدي عاين ليهو ولا رد عليهو وقال لي ما تفتكري انو القصة خلصت هنا وحسابك معاي بعدين وقام طلع من البيت.. المحامي قال لي لو احتجتي لأي شئ أو رجع أتعرض ليكم تاني بس اتصلي علي.. عمو التاج قال لي وانا قريب وبتعرفي بيتي بي وين في أي وقت تعالي لي، بعدها استئذنو وطلعو.. مشيت اتوضيت وجيت صليت ركعتين شكر الحمد لله يارب انك استجبتا دعوتي انا كنتا عارفة انك ما ح تخزلني وما ح تردني خايبة الحمد لله حمدا كثيرا مباركا فيه ياما انت كريم يارب الحمدلله وبحمدك حمد كثيرا انك ما حرمتني من ذكرى ابوي الحمد لله
