مر شهر كامل على وفاة يسرا وراجلها وفاتها كانت صدمة بالنسبة لينا كلنا وصعب نقدر نتجاوز الموضوع بي سهولة بابا عبد الرحمن بي سبب الخبر رقد في المستشفى اسبوع وماما عايدة ضغطها طبيعي بقى نازل ويارا ويزيد ويُوسف حالتهم ما احسن كلهم موت يسرا أثر عليهم شديد وخصوصا انا لانو خلت بتها أمانة عندي بقيت خايفة ما اكون قدر المسؤولية دي ولا اقدر اعتني بي بتها كويس خايفة أقصر في حقها بس صراحة معاها لي اول مرة بحس بي احساس الأمومة لمن تكون نايمة بقعد اعاين ليها وبتأمل في برائتها وجمالها ولمن اشيلها في حضني كأني شايلة قطعة من روحي حتى لمن تجيها حمة هي بتكون بتبكي وانا ببكي معاها يُوسف ما بعرف يسكت منو فينا الا يشيلها مني ويطلع برة الغرفة وبجي يجيبها لي نايمة بس حتى ارتاح.. في فترة الشهور الماضية وخصوصا الشهر بعد وفاة يسرا وراجلها حصلت تغيرات كتيرة واحداث حلوة بس ما قدرنا نفرح بيها زينا وزي باقي الناس اولا عمتى ندى ساقتا أولادها وسافرت لي أهل راجلها وقالو تاني ما جايين، وتسنيم الفترة الأخيرة وخصوصا بعد خطوبة حسن من يارا بقت عدوانية شديد ومستعدة تتشاكل مع أي زول وتضربو ما بهمها تحس بيها زي الخلاص فقدت عقلها ولا ما عارفة شنو وعمي عبد الفتاح لمن خلاص غلبو البعملو معاها وداها لي دكتور نفسي على أساس تتعالج هناك بس حالتها كل ما كانت ماشة للأسوء وبقت تشكل خطر عليها وعلى الحوليها بصورة كبيرة حتى في يوم ضربت توسل بالطربيزة عشان كانت بتتكلم معاها ولو ما لحقوها كان ممكن تحصل ليها حاجة وكم مرة اتهجمت على بيت ناس يارا عشان تقتلها على أساس هي خطفت منها حسن وبي سبب حالتها دي دكتورها النفسي قال من الأحسن انو يودوها مشتسفى الامراض النفسية والعقلية ناس عمي في البداية اعترضو وقالو ما بودوها بس مشاكلها كترت وكتر معاها اذيتها لي نفسها قبل ناس البيت كم مرة خلت الغاز فاتح ولو ما مرة عمي أو توسل جو قفلو كان ح يموتو كلهم ودا غير محاولاتها تأذي نفسها ولمن خلاص ناس عمي اقتنعو بي كلام الدكتور وانو وجودها في المستشفى ح يكون لي مصلحتها ومصلحتهم هم كمان اخيرا ودوها المستشفى، كل شئ بزيد عن حدو بتقلب ضدو وتسنيم حبها الزايد لي حسن حولها لي مجنونة مستعدة تأذي نفسها والحوليها كل واحد في الدنيا بيأخد نصيبو بس في حاجات نحنا بنكون سبب فيها وبرانا بنأذي في نفسنا واكبر مثال قدامكم تسنيم.. صلاح بعد ما انفصل عن حبيبتو هو وماجد ولد عمي عبد الفتاح جاهم عقد عمل في الإمارات وامورهم ظبطت وسافرو هناك وبدو حياتهم المهنية من الصفر.. ومهدي وروان بفضل الله ربنا رزقهم بي مولود عسل سموهو عبد القادر على ابوي وحياتهم ماشة وسعادتهم اضاعفت بعد ما الولد دا نور حياتهم وزاد حبهم لي بعض اكتر واكتر.. طول الشهور الفاتت منذر كان بيتعالج عشان يقدر يمشي والحمدلله حالتو اتحسنت شديد وبقى يقدر يمشي على رجلينو بس لسه بستعمل عجازات لحدي ما رجلينو تتعافى على الآخر بس فكرة انو رجع يقيف على رجلينو دي بحد زاتها معجزة وعلاقتو مع رهف اتحسنت شديد وبقى بحبها وبهتم بيها وبراعاها تقول دا ما منذر الزمان اتغير لي واحد تاني تماما بقى مهتم جدا بي مرتو وبناتو اي صح رهف ولدت وجابت احلى بنوتين وسمتهم منى ومنة اي ما تستغربو سمت واحدة من البنات على امي وقالت لي طالما امي سرقت منك امك ماف ضرر من اني اسميها عليها وان شاء الله تطلع طيبة وحنونة زي خالتو منى، احساس انو سمو على امي وابوي حتى لو ما انا سميت ليهم دا احساس مفرح شديد كأنو بقولو لي انو امك وابوك اي صح ماتو بس ذكراهم وطيبتهم وحبنا ليهم ح يفضلو دائما في قلوبنا وما ح ننساهم ابدا.. حسن ويارا بعد تصرفات تسنيم شوية العلاقة بيناتهم اتوترت بس الحمد لله بعد فترة قصيرة حسن قدر يزيل التوتر ورجعت علاقتهم زي الأول واحسن كمان..
