مشيت فتحتا باب الشارع اتفاجأتا بالشرطة قدام الباب....... لي لحظة فكرتا انو جو يعتقلونا عشان ضربنا الولد وصحبو.. الضابط قال لي دا بيت السيد متوكل خالد.. قلتا ليهو لالا بيتو الباب الثاني داك، ممكن اعرف عايزنو لي شنو.. قال لي عفوا بس دي معلومات ما بقدر اشاركها مع زول.. واستئذنا مني ومشى.. الخالة قالت لي امي شايفة ولدك يا عايدة بتكلم معانا كيف مع احترمنا ونحنا قاعدين في بيتو.. امي قالت ليها انا أولادي لمن ربيتهم وكبرتهم علمتهم انو يحترمو المرأة ويدافعو عن حقها وحتى لو شافوها بتغلط يوعوها وعلمتهم برضو لو مهما حصل يدهم ما تترفع على مرأة وانتي جاية في نص بيتو وعايزة تهيني مرتو وتتكلمي عنها شروي غروي وتقولي حاجة فيها وهي ما عملتها وبتتكلمو عن شرفها وبتتهموها وهي بريئة عايزين منو يعمل شنو انا ما قادرة افهم انتو نسوان زيها كيف بجي من قلبكم انكم تتكلمو على شرف واحدة لو منو ما كانت، عمر بن الخطاب رضي الله عنه قال :- لو رأيت الخطأ بعيني لسترته بعبائتي.. وانتو من غير ما تشوفو حاجة بتتكلمو بالسمعتوهو بس وماف زول فيكم عندو دليل بالحاجة دي انتو ما خجلتو من نفسكم وانتو بتنشرو الكلام دا وبتتكلمو في أعراض الناس خافو الله ياخ هسي لو كان دي واحدة من بناتكم مع كان عملتو دا كلو وبرجع وبقول ليكم هيام دي زي بتي وانا واثقة فيها وعارفة كلامكم دا كلو غلط وزي ما قال ليكم يُوسف طول ما انتو قاعدين هنا تحترمو نفسكم وما تتكلمو عنها كلمة غلط والا الباب بفوت جمل.. الخالة قالت ليها شكرا ليك يا عايدة بعد السنين دي كلها بتقولي لينا نحنا الكلام دا عشان واحدة ما عرفتيها الا قبل كم يوم لكن ما مشكلة نحنا ح نمشي وان شاء الله تقعد معاك وتنفعك.. والنسوان كلهم طلعو وبقو قاعدين خالاتي وعماتي ونسوان اعمامي وخيلاني وبناتهم وأولادهم بس.. يسرا قالت لي امي يا أمي دا شنو البتعملي فيهو انت وولدك دا هسي خسرتي صحباتك وعشرة عمرك عشان واحدة زي دي انتو الحاصل عليكم شنو البنت دي غسلت ليكم مخكم ولا في شنو اي شئ هيام هيام هيام ما شايفين زول غيرها اي صح انا ما بنكر العملتو لينا امها ما شوية بس انتو ما حاسين انك قاعدين تبالغو زيادة عن اللزوم وبعدين انتو شنو العرفكم انو الكلام البقولوهو الناس ما صح وهي كان ما غلطت مع يُوسف احتمال تكون غلطت مع واحد غيرو.. قبل ما تكمل كلامها امي ادتها كف قوي على وشها وقالت ليها مرة ثانية لو عدتي كلامك دا لسانك دا انا بقطعو ليك انتي واعية لي نفسك بتقولي في شنو انتي بنت زيها كيف تقدري تتهميها بي حاجة زي دي يا خسارة تربيتي وتعبي فيك.. خليتهم بيتناقشو ومشيت لحقتا هيام لاني شفتها طالعة براها قلتا ليها ماشة وين.. قالت لي ما عارفه المهم اني مع اقعد هنا ولا ثانية.. قلتا ليها خلاص تعالي معاي.. قالت لي لالا هسي لو شافونا تاني ح يزيدو في كلامهم.. قلتا ليها وانا كلامهم ما بهمني ولا فارق معاي ارح امشي قدامي ركبنا العربية ومشينا البحر وبقينا قاعدين وهي كانت بتبكي ما هان علي اشوفها بتبكي وما عارف اعمل ليها شنو عشان تسكت عشان احسن من مزاجها شوية قلتا ليها على فكرة انتي لمن بتبكي بتطلعي شينة وبتخوفي بطلي بكى زي الشافعة.. قالت لي عايزني اعمل شنو يعني انا الليلة بي سببي امي وابوي في قبرهم بنبذوهم على تربيتي مع اني ما عملتا اي حاجة ولا غلطتا انا امي وابوي ربوني كويس وعلموني الصح من الغلط وعمري ما فكرتا اني اعمل شئ يوطي رأسهم ويخليهم يخجلو والليلة شوف الحصل شنو متهمني بي حاجة انا ما عملتها.. قلتا ليها انا وانتي وأهلنا عارفين انو نحنا ما عملنا اي شئ من البقولو عليهو دا وبعدين الناس لو عملتا السمح بتكلمو ولو عملتا الشين برضو بتكلمو والبتابع كلام الناس هو البكون خسران وثانيا انتي مش واثقة في ربنا وعارفة انو البجي من عندو كلو لي خير وما بعد الضيق الا الفرج اكيد وانتي لو متذكرة في قصة سيدنا يُوسف عليه السلام المرأة الربتو مش كان اتهمتو بي انو حاول يتقرب منها ودخل السجن كم سنة وبعد طلع بقى عزيز مصر في زول كان متخيل انو ح يحصل كدا اكيد لا عشان كدا ما تسيئي الظن بالله لانو ربنا قال انا عند حسن ظن عبدي بي فإن كان خير فخير وان كان شر فشر ونصيحتي ليك احسني الظن بالله لانو كل ما تضيق وتضيق اعرفي انو الفرج قريب وهسي امسحي دموعك دي وعايني لي البحر واستمتعي بي خلق ربنا واتذكري انو الما بنسى نملة في باطن الأرض مستحيل ينساك انتي فتوكلي على ربنا ووكليهو امرك وخليك واثقة انو ربنا ما بختنا في مكان الا وهو عارف انو نحنا بأذنو ح نقدر نتجاوزو ولازم تصبري لانو الصبر مفتاح الفرج وربنا لمن يحب عبد ببتليهو وانتي كل ما تصبري على الابتلاء ربنا ح يجازيك على صبرك دا وزي ما اتخطيتي المصائب القبل دي برضو دي ح تتخطيها بس الفرق الوحيد انو انا معاك واي مشكلة ح نتخطاها مع بعض.. قالت لي كلامك صح كلو لي خير وربنا لو ما بحبني ما بيبتليني وزي ما مرت الابتلاءات الفاتت دي برضو ح تمر وتنتسى والناس خليهم يتكلمو انا عارفة نفسي شنو والباقي ما مهم مع انو ح تكون صعبة علي بس ما مستحيلة وح اتجاوزها وهسي خلينا نرجع لانو ح يكون خايفين علينا لانو طلعنا وما كلمنا زول.. قلتا ليها كلام عين العقل خليك كدا دائما وثانيا انا جبيل رسلتا ليهم ووريتهم اننا طلعنا وما ح نتأخر.. قالت لي كدا كويس على الأقل ما ح يخافو علينا.. قمنا اتمشينا جنب البحر شوية وبعدها رجعنا البيت بعد العصر كدا جمعتا عمها وأخوها وأولاد عمها حبيت أوضح ليهم انو الكلام غلط وانو اي صح هي كذا مرة دخلت غرفتي بس ما حصل بينا حاجة بس ردهم صدمني قالو لي ماف داعي توضح لينا اي حاجة هيومة بتنا ونحنا عارفين مربيين شنو ومتأكدين انها مستحيل تغلط ونحنا لو شكينا فيها ولو مقدار ذرة معناها ماف فايدة للثقة الاديناها ليها عشان كدا ما تبرر وبتنا نحنا واثقين فيها والناس يقولو العايزنو ما بهمنا.. صراحة ما كنتا متوقع ردهم دا لانو لو ديل أهل غيرهم كان ممكن يمسكوها ويضربوها من غيرها ما يفهمو منها اي شئ بس تصرفهم وثقتهم في بتهم بتأكد لي للمرة الثانية انو هي مستحيل تغلط لانو طالعة من أسرة محترمة وعارفين انو البنت لو اديتها الحرية ومعاها الثقة ح تعمل كل البتقدر عليهو عشان ما تكسر الثقة دي وللمرة الثانية انا بتأكد أنو اختياري ليها ما كان غلط وهي ج تكون الزوجة الصالحة والأم المثالية الانا بثق انو أولادي ح يتربو معاهو تربية صحيحة فالحمدلله الربنا قسم لي أتزوج واحدة زيها.......
