ما عرفتا كيف وصلتو وشلتو والعربية قربت علينا غمضتا عيوني وتاني ما شفتا ولا حسيت بي أي شئ....... لمن فتحتا عيوني عاينتا لي غسان الفي يدي ونزلتو انت كويس ما حصلت ليك شئ وعاينتا لي نفسي برضو نحنا كويسين ما حصلت لينا حاجة طيب العربية مشت وين عاينتا حولي لقيت العربية قريبة شديد مننا نزل منها شاب كدا قال لي انتو كويسين حصلت ليكم حاجة.. قلتا ليهو نحنا كويسين الحمد لله.. قال لي انا اسف بس كنتا مشغول بي مكالمة وما انتبهت ليكم.. قلتا ليهو ولا يهمك نحنا الغلطانين الولد وقف بالغلط في الظلط وانا خفتا عليهو.. قال لي حصل خير المهم ماف زول فيكم جاتو حاجة دي براها سلامة وبكرر اعتذاري.. قلتا ليهو ماف داعي للاعتذار وشكراً ليك.. غسان قال لي التورة تورتي وينا.. قلتا ليهو عايز شنو.. قال لي هالتو التورة.. قلتا ليهو عايز الكورة.. الشاب فتش ليهو الكورة واداها ليهو.. شكرتا الشاب وقلتا ليهو مرة تانية وانت سايق ما تتكلم بالتلفون المرة دي عدت على خير بس المرة الجاية ما معروف وشلتا غسان ودخلتا بيت مشاعر وقفلتا الباب، حكيت لي مشاعر الحصل قلتا ليها تاني عليك الله ما تخلي الباب فاتح المرة دي جات سليمة لكن ما معروف المرة الجاية يحصل شنو.. قالت لي دا كلو من واحدة ساكنة جنبنا هنا جابت أخلاقي ما عندها سيرة غير الكلام في الناس وغير الوسوسة والخراب ما عندها شئ احسن ليك تبعدي عنها.. قلتا ليها ما تقولي كدا احتمال تكوني فاهماها غلط او شئ.. قالت لي انا ما فاهماها غلط ولا شئ هي اي شئ تسمعو في البيت دا بتطلعو برة وقبل كدا برضو كانت ح تعمل مشكلة بيني وبين مدثر لو ما الله ستر بس.. قلتا ليها طالما هي بتاعت مشاكل بدخليها بيتك لي شنو قولي ليها ما تجيك.. قالت لي انتي قايلاني ما قلتا ليها بس ما بتفهم ولو جات وما فتحتي ليها الباب ما بتتحرك وبتفضل تدق في الباب لحدي ما تفتحي ليها عاملة زي اللصقة ما بتزح منك.. قلتا ليها والله غريبة وعجيبة معقوله في ناس زي دي.. قالت لي والله اكعب من كدا المهم هي اسمها عرفات مرة سمينة كدا لو جاتك عشان تأخدي بالك منها وما تتكلمي قدامها ولا كلمة عن حياتك.. قلتا ليها غايتو الله لا جابها لي.. قالت لي ما تخافي ح تجيك لانو لمن جاتني سألتني عنك وانا قلتا ليها ما بعرف عنك اي شئ من هسي الله يديك الصبر عليها.. قلتا ليها اميين يارب، اتونسنا مسافة وبعدها مشيت البيت المساء بعد يُوسف جاء من الشغل قلتا ليهو انت دا شغل شنو بتطلع من الصباح ما بتجي الا المساء.. قال لي بعمل في إجراءات نقل شغلي من سنار لي هنا عشان كدا بطول بس الحمد لله الليلة خلاص كملتا كل الإجراءات وباقي اجيب البضاعة من سنار لي هنا وبس.. قلتا ليهو ح تجيبها متين يعني.. قال لي نحنا بعد يومين ح نسافر سنار ومن هناك بنقل بضاعتي وح نعمل الكرامة ونجي نحنا وناس امي كلنا لانو اخيرا بيتهم جهز.. قلتا ليهو كويس والله بس كرامة شنو.. قال لي نحنا عندنا عادة هناك انو البجو من شهر العسل بعملو ليهم كرامة حتى ينتقلو لي بيتهم.. قلتا ليهو ايواا فهمتا خلاص من هسي بجهز لي السفر.. قال لي تجهزي شنو كلها ح نمشي نقعد اسبوع بالكتير.. قلتا ليهو حتى ولو انا عروس ولازمني تجهيز ولا عايز يقولو زوجتك جات مبشتنة وشينة.. قال لي ويقولو انا مالي ومالهم انتي في عيوني دائما ح تفضلي حلوة.. قلتا ليهو اولا مفروض نمشي لي ناس مشاعر ونكفر ليهم..قال لي لي شنو الحصل شنو.. حكيت ليهو الحصل جبيل قال لي يا ساتر الله لطف بيهم، مشينا ليهم فتح لينا الباب مدثر كفرنا ليهم وقعدنا.. مدثر قال لي مشاعر انا الف مرة قلتا ليك المرة الاسمها عرفات دي ما تدخليها بيتنا تاني شوفي الليلة كان ح يحصل بي سببها شنو كل ما افكر انو غسان ح تحصل ليهو حاجة بقرب اجن.. مشاعر قالت ليهو انت عارف انا ما عايزة ادخلها بس هي لو ما دخلت ما بتمشي وانت براك عارفها.. قال ليها خليها علي انا ح يكون عندي معاها تصرف تاني المرة دي.. يُوسف قال ليهو خلاص يا مدثر أهدأ حصل خير وان شاء الله تاني ما ح تتكرر الحمد لله جات سليمة، وبالمناسبة نحنا ح نسافر بعد يومين وح نجي راجعين.. مشاعر قالت لينا ماشين شهر عسل ولا شنو.. قلتا ليها ياريت بس ماشين سنار يُوسف عايز ينقل شغلو هنا وجايبين ناس خالتو عايدة معانا يسكنو هنا.. مشاعر قالت لي فكرة حلوة والله احسن شئ عملتوهو.. قلتا ليها مش كدا، بعدها اتونسنا معاهم حبة ورجعنا البيت قلتا لي يُوسف بكرة وانت ماشي الشغل وصلني لي ناس عمي معاك.. قال لي في شنو هناك.. قلتا ليهو كيف يعني في شنو ماشة اتجهز هناك ح اقعد اليومين الفضلو ديل وصباح مسافرين تجي تسوقني من هناك.. قال لي ما حاسة انك عصرتي علي في اليومين ديل.. قلتا ليهو ما عصرتا عليك ولا شئ كلهم يومين الفترة دي كلها قاعدة معاك.. قال لي ما بتقعدي يومين يوم واحد بس كفاية وبعد بكرة المساء بجي بسوقك والا من هنا ماف ليك اي مشية.. قلتا ليهو والله يا يُوسف بتبالغ.. قال لي ما ببالغ ولا شئ لو وافقتي بوديك ولو ما وافقتي بحبسك في البيت وما بخليك تطلعي.. قلتا ليهو أمري لله خلاص موافقة.. قال لي تعالي خشي حضن والله اشتقتا ليك.. قلتا ليهو يا ولد بطل قلة أدب.. قال لي قلة أدب شنو مش مرتي وحبيبتي(يلا كفاكم لي هنا بس الباقي برانا🙈🙈) تاني يوم الصباح اتجهزنا ويُوسف وصلني بيت عمي ومشى شغلو دخلتا سلمتا على عمتو عفراء وقلتا ليها ضروري تجهزيني سرعة لانو بعد بكرة مسافرين وما عايزة يقولو علي مرة مبشتنة.. قالت لي انتي ذاتك بتبالغي جايني الليلة عشان اجهزك كان تجي ابدر من كدا.. قلتا ليها والله يا عمتو حتى انا عرفتا امبارح اننا مسافرين ولا اتظبط عشان ما اتفضح قدام نسابتي واهلهم.. قالت لي كويس بس المرة الجاية إياك تعملي العملة دي ومالك قال غبشة لا حنة ولا دخان.. قلتا ليها والله يا عمتو من حنة العرس تاني ما اتحننتا.. قالت لي يا المتخلفة جنيتي انتي كيف يعني من العرس ما اتحننتي انتي عايزاني اقتلك هسي ولا اعمل ليك شنو فضحتينا قدام الولد قاعدة معاهو زي جعفر كدا.. قلتا ليها اعمل شنو يعني ما لقيت زمن.. قالت لي حسابك معاي بعدين هسي خلينا ننجز المهم.. قلتا ليها قبل دا منذر ورهف حاصل بينهم شنو.. قالت لي الحمدلله الوضع بينهم اتحسن شديد وبقينا ما بنسمع أصوات شكلتهم ومنذر اتغير شديد والايام دي قاعد يمشي جلسات العلاج الفيزيائي ومع الايام بإذن الله ح يتحسن ويقدر يمشي.. قلتا ليها أن شاء الله والله بتمنى ليهم من جوة قلبي يكونو مبسوطين وسعيدين.. قالت لي المهم اولا لازم نعمل ليك حمام مغربي وحمام زيت لي الشعر ويظبطو ليك وشك ونعمل ليك ماسكات ولازم تقعدي في الدخان عشان لونك يبقى حلو وبعدها تتحنني.. قلتا ليها انا موافقة على كل شئ إلا الدخان دا.. قالت لي ولا على كيفك ح تقعدي فيهو والا بتشوفي مني شئ ما شفتيهو قبل كدا.. قلتا ليها حاضر انتي بس ما تعصبي ح اعمل كل البتقولي عليهو.. مشينا كوافير قريب مننا عملتا حمام مغربي وحمام زيت للشعر وظبطو لي وشي وعملو لي فيهو ماسكات وبعدها رجعنا البيت بعد المغرب كدا حسن وصلاح جو.. حسن قال لي الليلة معانا بي جاي.. قلتا ليهو اي والله جيت اقعد معاكم عشان بعد بكرة مسافرين سنار، اخد صنة مسافة.. قال لي اي زاتي عايز اسافر معاكم.. كلنا استغربنا طبعا قلتا ليهو ما مشكلة تمشي معانا طوالي بس عندك شنو هناك.. قال بي ولا شئ عجبتني أجواء البلد وقلتا اعيد الزيارة بس دي كل القصة.. قلتا ليهو كان كدا كويس خلاص جهز نفسك وانا بكلم يُوسف، ما عارفه لي حسيت وراء مشيتو دي في سبب بس هو شنو ما عارفة بس اكيد ح يبان سبب مشيتو.. بعد صليت العشاء عمتو قعدتني في الدخان وجو روان ورهف وتوسل وقعدو يتونسو معاي، تاني يوم الصباح عمتو برضو قعدتني في الدخان وبعدها بي مسافة شالت لي جسمي وجابت الحنانة رسمت لي رسمة حلوة شديد.. بعد المغرب جاء يُوسف وساقني لمن وصلنا البيت قال لي المشية دي فادتك وبقتك حلوة شديد.. قلتا ليهو انا من يومي حلوة.. قال لي والليلة زدتي حلاوة والحنة دي ح تأكل منك حتة، تعالي عايز اوريك شئ.. دخلتا معاهو الغرفة لقيت السرير مليان تياب بي طقمهم وشباشبهم ومعاهم كم فستان.. قلتا ليهو ديل كلهم لي شنو.. قال لي في العرس مع الاستعجال ما لحقتا اشتري ليك شيلة فقلتا اعوضك واجيب ليك شوية حاجات.. قلتا ليهو ديل كلهم شوية حاجات وبعدين القال ليك انا عايزة شيلة منو.. قال لي ما الا تقولي لي انا من زوقي حبيت اشتري ليك وبعدين يا نكدية ما تدخلي وخلينا ننبسط.. قلتا ليهو يُوسف مهما حصل انتي ما ح تتخلى عني صح.. قال لي هسي الكلام دا الجابو شنو.. قلتا ليهو انت بس جاوب على سؤالي.. قال لي لو مهما حصل انا مستحيل افكر اتخلى عنك ما بكذب عليك ممكن نتشاكل ونختلف ونبعد عن بعض بس عمري ما ح افكر اتخلى عنك انتي روحي والجسد من غير روح ما بعيش انتي الهواء الانا بتنفسو فأبعدي الفكرة دي من بالك انا ح أفضل متمسك بيك لآخر لحظة في عمري ومستحيل اتخلى عنك.. قلتا ليهو انا بحبك❤️ شديد وبعشقك❤️.. قال لي انا ما بقول اني بحبك❤️ لانو الحب بسيط عليك انا ادمنتك❤️ وبقيت ما قادر اعيش بلاك❤️ وانا بحمد ربنا ليل ونهار لانو جعلك انتي بالذات من نصيبي وربنا يديمك لي نعمة ويحفظك لي من الزوال❤️❤️.. قلتا ليهو كل الكلام بعجز عن وصفك انا بعد ابوي مات ما اتخيلتا انو ح يجي زول يحبني زي ما ابوي حباني اي صح كانو في ناس كتار بحبوني بس دائما كنتا بحس بي فراغ انو ابوي ما موجود معاي بس من دخلتا حياتي واتزوجتك الفراغ دا بدأ يقل لحدي ما اتلاشى نهائيا خوفك علي واهتمامك بي واي شئ بتعملو لي كان بذكرني بي ابوي كانو هو الواقف قدامي انت عوضتني عن الحنان الفقدتو وانا بدعي من جوة قلبي ربنا يخليك لي وما يحرمني منك ابدا❤️❤️.. قال لي يا فرحة عمري❤️ انتي ويا احلى هدية ربنا اداني ليها❤️.. بعدها شلتا التياب بخرتها ورتبتها في الشنطة وبخرتا ليهو جلابياتو برضو ورتبتها.. قلتا ليهو على فكرة حسن قال مسافر معانا.. قال لي اي عارف اصلا من البداية كنتا عايز اكلمو يجي معانا بس اترددتا انو يكون مشغول وانا اعطلو بس الليلة الصباح شفتو واتكلمتا معاهو واتفقنا انو بكرة نتلاقى في الطريق ويمشي معانا.. قلتا ليهو ايواا كويس مع اني حاسة انو مشيتو دي وراها سبب بس هو شنو انا ما عارفة.. قال لي انتي كمان بطلي شكوك بتكون عجبتو البلد وحبة يرجع يشوفها تاني.. قلتا ليهو واحتمال عجبتو حاجة في البلد وماشي عشانها.. قال لي خلي يمشي للعايزو وبعدين احتمال لقى ليهو بنت حلال عجبتو وماشي يشوفها ولو ربنا جعل بيناتهم قسمة يجتمعو.. قلتا ليهو انت عارف انا اول ما شفتا اختك يارا اتمنيت انو تتعرف هي وحسن ويحبو بعض ويتزوجو لانو تحسهم كدا بشبهو بعض وح يطلعو حلوين مع بعض.. قال لي ما اكذب عليك انا زاتي فكرتا كدا بس في النهاية دا قرارهم ودي حياتهم بس لو في بينهم قسمة اكيد ح يجتمعو.. قلتا ليهو يعني هسي لو حسن جاء طلب يد يارا للزواج ما ح ترفض.. قال لي وارفض لي شنو ما عشان ولد عمك بس حسن راجل ويعتمد عليهو وانا متأكد انو اختي ح تكون معاهو بأمان بس كل شئ قسمة ونصيب.. قلتا ليهو ان شاء الله قسمتهم يكونو مع بعض.. قال لي ان شاء الله، وهسي يلا على النوم بكرة عندنا قومة من بدري عشان ما الصباح تقعدي تقولي لي خليني انوم حبة وتعملي درامات كل يوم.. قلتا ليهو هسي انا بعمل درامات.. قال لي كلامي كلو ما ركزتي الا في كلمة درامات دي عليك الله خلاص نومي.. قلتا ليهو ما عايزة انوم ح تعمل شنو.. قال لي انتي عارفه انا بقدر اعمل شنو وغمز لي.. قلتا ليهو بطل قلة أدب وخلينا ننوم.. قال لي مش هسي قلتي ما عايزة تنومي.. قلتا ليهو غيرتا رأيي عندك اعتراض.. قال لي انتي مجنونة والله.. قلتا ليهو شكرا ليك قول لي حاجة انا ما عارفاها.. قال لي بايخة ومسيخة خلاص يلا نومي.. قلتا ليهو هسي بتقول لي كدا بس يوم اموت بتعرف قيمتي.. قال لي دا كلام شنو هسي ما تقولي كدا انا ما بقدر اعيش من غيرك تاني ما اسمعك بتقولي كدا.. قلتا ليهو الموت حق وكلنا مصيرنا يجي يوم ونموت فيهو.. قال لي انا عارف الشئ دا بس برضو ما تجيبي سيرة الموت قدامي انا ما عايز اخسرك.. قلتا ليهو خليك متذكر كلامي دا اليوم دا قريب ما بعيد.. قال لي برضو ما تقولي كدا ان شاء الله يومي قبل يومك.. قلتا ليهو واحتمال اموت انا قبليك انت البعرفك شنو.. قال لي خلاص اسكتي انا غلطان البتكلم معاك.. قلتا ليهو خلاص حبيبي ما تزعل سكتا تاني ما بجيب سيرة الموضوع دا، ما رد علي قبل على الجهة الثانية مشيت رقدتا قدامو وحضنتو قلتا ليهو ما تزعل انا اسفة.. قال لي بطلي كلام ونومي وتاني الموضوع دا ما تفتحيهو معاي.. قلتا ليهو لكن دا واقع وما بعيد احتمال اموت الليلة أو بكرة او البعدو.. قال لي هيام اقفلي خشمك وما تتكلمي معاي تاني انا بقول ليك في شنو وانتي بتقولي في شنو.. قلتا ليهو لكن دا الواقع ومصيرو يجي اليوم وواحد فينا يموت.. قال لي يبقى انا اموت قبلك.. قلتا ليهو ما تقول كدا حرام عليك.. قال لي وهسي انتي لمن قلتي ما حرام المهم اقفلي الموضوع دا وتاني ما تتكلمي فيهو.. قلتا ليهو حاضر يا قلبي ما بفتحو تاني ونمنا.. صحينا الصباح اتجهزنا وطلعنا ودعنا ناس مشاعر واتحركنا في الشارع لاقينا حسن ركب معانا وواصلنا طريقنا لحدي ما وصلنا سنار بعد الظهر دخلنا سلمنا على ناس خالتو عايدة لانو اشتقتا ليهم شديد وقعدتا اتونس معاهم مسافة بعدهم قمتا صليت بقينا قاعدين انا ويارا في الغرفة قلتا ليها أنتي يسرا وين ما شايفاها.. قالت لي يسرا مشت بيتها.. قلتا ليها هي بيتها وين.. قالت لي بيتها مع نسابتها وما بعيد مننا شديد.. قلتا ليها ايواا كويس، جاتني فكرة امشي بيت ناس خالي واديهم الفاتحة بس لو يُوسف ولا حسن أو زول من البيت عرف اني ماشة اكيد ما ح يخلوني فأحسن شئ امشي واجي سريع من غير ما يحسو علي لبستا عبايتي وختيت التلفون في جيب العباية وبراحة انسحبتا من غير ما زول يحس علي مشيت وانا مترددة ردة فعلهم ح تكون كيف لو عرفو اني مشيت ليهم بس المهم اني امشي واديهم الفاتحة واجي راجعة وقفتا قدام الباب بقيت خايفة ادخل ولا لا في النهاية اتشجعتا ودخلتا على بيت خالي ما شفتا زول ناديت على مرة خالي ما ردت وناديت على نجود برضو ما ردت بقيت واقفة مستنية زول يجي سمعتا صوت نجود من وراي بتقول لي انتي الجابك هنا شنو.. قلتا ليها جيت اعزيكم مرة خالي وين.. قالت لي جاية بعد شنو ولي شنو عايزة تشمتي فينا صح.. قلتا ليها الموت ماف زول بشمت فيهو وانا مقدرة حالتك لانو انا كمان ابوي مات وعارفة وحاسة بيك.. قالت لي انتي ما ح تحسي بي ولا ح تفهمي شعوري شنو انا ابوي مات مقتول عارفه يعني شنو مقتول ودا كلو حصل بي سببك انتي.. قلتا ليها انا ذنبي شنو عملتا ليكم شنو لمن اي شئ يحصل معاكم بتلصقو فيني.. قالت لي ابوي مات بي سببك وذنبو ح يفضل في رقبتك طول العمر انتي لو من البداية كنتي وقعتي على أوراق التنازل كان كل شئ اتحلى وابوي كان دفع الديون العليهو وما كان دخل السجن ولا انقتل هناك كل شئ حصل بي سببك انتي.. قلتا ليها ما انا القلتا لي ابوك يأكل قروش الناس وينصب عليهم وثانيا حقي وحق امي انا ما بتنازل عنو وثالثا ما انا السببتا في مشكلة السجن ولا انا طعنتا ابوك أبوك مات بي سبب اعمالو انا ما لي اي علاقة وبطلي تتهميني ظلم.. قالت لي بي سبب حقك انتي وامك حصل كل دا ملعون ابو اليوم العرفناك انتي وامك فيهو كل شيء حصل بي سببك ابوي مات بي سببك وانتي كمان لازم تموتي ما لازم تعيشي.. قلتا ليها انتي جنيتي ولا شنو زحي من طريقي خليني امشي.. قالت لي ما ح تمشي اي مكان انتي لازم تموتي انا ح اقتلك بي يدي واخد حق ابوي منك يا قاتلة، كان في سكين في الطربيزة شالتها ووجهتها علي وقالت لي انتي لازم تموتي حاولت تطعني بيها زحيت منها ولزيتها وقمتا جارية وهي جارية بي وراي جريت على باب الشارع لقيتو مقفول حاولتا افتحو ما قدرتا.. قالت لي الليلة ح تهربي مني وين الباب وقفلتو ما ح تقدري تطلعي الليلة ح تموتي هنا وماف زول ح يجيب خبرك وما تحاولي تصرخي لانو البيت ما فيهو اي زول الا انا وانتي برانا عمتي وأخوان وامي وحتى بنات عمتي كلهم ماف انا كنتا عارفاك ح تجي لأنك واحدة غبية وما بتفهمي والليلة ح اخلص منك ومنها اكون انتقمتا لي ابوي منك ومنها يُوسف ح يكون لي انا وانتي ماف زول ح يعرف انتي اختفيتي وين.. قلتا ليها نجود ما تعملي كدا انتي بضيعي مستقبلك انتي قايلة انو ماف زول ح يعرف اني قتلتيني كلهم ح يعرفو وح تنسجني وتضيعي عمرك ساي ما تعملي كدا وخليني امشي.. قالت لي ما تخافي ح تمشي بس ح تلحقي امك وابوك وكدا بكون جمعتك معاهم وما ح تشتاقي ليهم ابدا وح ارتاح منك.. قلتا ليها نجود الله يرضى عليك ما تأذيني انا ما عملتا ليك شئ.. قالت لي انتي العملتي فيني كتير في الأول سرقتي من حب حياتي والزول الوحيد الاتمنيت اني اكمل باقي عمري معاهو في لحظة اخدتيهو ودا كلو ما كفاك برضو اخدتي ابوي مني وحرمتيني منو العمر كلو وبي سببك انا بقيت وحيدة وخسرتا اكتر اثنين بحبهم في حياتي.. دنقرتا شلتا تراب ورشيتها في عيونها حاولتا افتح الباب تاني ما قدرتا بقيت بجري في البيت افتش لي مكان ادسة فيهو لقيت غرفة كدا ما فيها باب دخلتا وادسيت تحت السرير طلعتا تلفوني ضربتا لي يُوسف رقمو ما بدخل معاي ضربتا لي حسن ما برد حتى يزيد برضو ما برد ويارا برضو ما بترد.. سمعتا صوت نجود بتقول لي مكان ما ادسيتي انا ح القاك وما بتطلعي من البيت دا الا وانتي ميتة.. حاولتا في تلفون يُوسف اخيرا دخل معاي ضربتا ليهو 5 مكالمات ما رد ضربتا ليهو المرة السادسة وقبل ما يرد ما عارفه عرفت مكان كيف جرتني من رجليني وطلعتني برة قالت مش قلتا ليك ما بتقدري تهربي مني والليلة ح تموتي.. قلتا ليها نجود الله يرضى عليك ما تعملي لي شئ والله انا ما لي ذنب في الحصل كلو عليك الله ما تقتليني.. قالت لي الترجي دا ما بنفعك ولا ح يشفع ليك قدام الحزن السببتيهو لي.. لزيتها بي كل قوتي وبقيت جارية المرة دي حاولتا بي قوة افتح الباب واخيرا فتح لي وقبل ما اطلع حسيت بيها مسكتني من شعري وقبلتني عليها وحسيت بي طعنة السكين في بطني وضربت رأسي بالحيطة وتاني ما وعيت على أي شئ............
________________________________❤️
في كل مرة كانت طيبة قلبي توقعني في المصائب اما هذه المرة فأظنها ستجعلني اخسر حياتي💔💔
في امان الله❤️
