قالو لي ما تمثلي قدامنا دور البريئة العملتي مع يُوسف عارفنو عشان كدا عايزين تعقدو سريع كدا نسيتي لمن كنتي ايام عرس اختو بتمشي ليهو في غرفتو وبتبيتي هناك ومعروف البحصل شنو لمن بنت وولد يكونو في غرفة براهم....... قلتا ليهم انتو بتقولوا في شنو اكيد فاهمين غلط.. يارا قالت لي انتي عويرة بتتكلمي معاهم وبتبرري ليهم لي شنو خليهم يقولو العايزنو انتي مش واثقة في نفسك الباقي ما مهم وهسي خلينا نمشي.. جينا عايزين نمشي واحد منهم مسكني من يدي قلتا ليهو فكني انت عايز مني شنو.. قال لي ما بفكك هو احسن مني في شنو عشان تمشي معاهو وانا لا ما تخافي بدفع ليك اكتر منو.. ما عارفه جبتا الشجاعة دي من وين واديتو كف قوي لمن يدي وجعتني قلتا ليهو ما عشان سكتا ليك انت تقعد تتمادى وتقل في أدبك وانا أشرف منك ومن قبيلتك كلها وتاني مرة لو حاولتا تقرب علي ساي ما ح يحصل ليك خير.. قال لي انتي قايلة نفسك منو لمن ترفعي يدك علي.. مسك لي يدي ولواها لي لمن حسيت بيها قربت تنكسر يارا جات عايزة تفكني منو صحبو المعاهو مسكها.. قال لي ح تجي معاي وغصبا عنك نحنا زاتنا من حقنا نجرب زي ما يُوسف جرب ولا ما كدا ولا حلال عليهو وحرام علينا نحنا وما تخافي البحصل بينا ماف زول ح يعرفو.. قلتا ليهو انت واحد مريض ووسخ وافكارك وسخة زيك والناس الوسخة بتشوف الناس كلها زيها، مع انو يدي كانت بتوجعني لكن نهائي ما حسستو اني موجوعة أو ضعيفة ما عارفه لي يزيد مشى وين والناس واقفة زي الصنم مع انو شايفة الاولاد بعملو لينا شنو بس ولا زول فيهم فكر يجي ويساعدنا لمن خلاص غلبني قلتا ليهو فكى لي يدي ياخ وزح مني لمن رفض عضيتو في يدو وضربتو في رجلو ولزيتو لمن وقع ويارا اتفكت من الولد التاني وقمنا جاريين ما عارفه جرينا مسافة قدر شنو لمن تعبنا وقفنا ارتحنا حبة لقينا يزيد ضارب لينا وصفنا ليهو محل واقفين بعد مسافة جانا.. قال لينا انتو مش كنتو عايزين تشترو الطلعكم من السوق شنو.. قلتا ليهو دا ما وقتو بنحكي ليك في البيت هسي خلينا نمشي.. قال لينا ما بتحرك لو ما حكيتو لي في شنو.. يارا قالت ليهو عليك الله يزيد خلينا نمشي وأول ما نحصل البيت بنحكي ليك بس هسي ما قادرين.. قال لينا كويس.. واتحركنا وصلنا البيت شربنا موية وقعدنا وكان يُوسف لسه ما طلع من البيت.. يزيد بقى واقف قدامنا قال لينا هدا وصلنا البيت اتكلمو في شنو.. يُوسف قال ليهو مالك معاهو يا يزيد.. يزيد قال ليهو وصلنا السوق انا خليتهم يمشو قدامي لاني لاقيت واحد عايز منو حاجات ووقفتا اتكلم معاهو واتفقنا يجيبها لي ولمن دخلتا السوق ما عرفتا هم مشو ياتو دكان اتصلتا عليهم في الأول ما ردو بس بعدها رجعو لي ووصفو لي مكان وكأنو طلعو من السوق واصلا ما اشترو اي حاجة وانت براك شايف حالتهم كيف.. يُوسف قال ليهو انت حسابك معاي بعدين لانو انا لو عايزهم يمشو براهم ما كان خليتك تمشي معاهو وبعدين شغلك ما أهم من اختك وزوجة اخوك بس خليها لي بعدين، وانتو في شنو حصل معاكم شنو.. انا اترددتا وما قدرتا افتح خشمي.. قال لي يارا انا بتكلم معاك في شنو.. يارا قالت ليهو انت بتعرف ولد عمي الحسين وصحبو صح.. قال ليها اي بعرفهم لي في شنو.. حكتو ليهو بالكلام القالو والعملو لينا كلو يُوسف دا عيونو بقت زي الدم من الغضب وعروق جبينو بقت بارزة ومهدي لز الكرسي لمن اتكسر.. مهدي جاء مسك يدي وشافها قال لي بتوجعك شديد حاسة بي شنو.. قلتا ليهو بتوجعني لكن ما شديد لو ختيت ليها مرهم ح تبقى كويسة.. يُوسف قال لي المرهم ما كفاية ح نمشي المستشفى ونعمل ليها صورة ونشوفها لو مكسورة أو فيها شئ.. قلتا ليهو يُوسف ما بحتاج ح تبقى كويسة.. قال لي كلامي ما اكررو مرتين قومي ارح المستشفى.. مهدي قال لي هيومة بطلي عناد وخلينا نمشي انتي براك شايفاها محمرة كيف ووارمة خلينا نمشي ونطمن.. قلتا ليهو كويس، بس عمو مشى وين.. قال لي عمي طلع من الصباح مع عمو عبد الرحمن.. قلتا ليهو كويس ما تكلمو عشان ما يخاف ساي لمن نمشي المستشفى ونطمن بعد كدا نوري.. قال لي البتقولي عليهو ح يحصل.. يسرا اخت يُوسف قالت من بدايتها قبل ما تدخل جابت لينا معاها المشاكل الله يستر من الجاي وكمان بدت الدراما من هسي وما تخافو.. يُوسف عاين ليها عين خلاها تسكت وقامت من المكان اصلا.. خالتو عايدة قالت لينا امشو وطمنونا عليك الحاصل شنو ويدك أن شاء الله ما فيها كسر.. يُوسف قال ليها ما تخافي ح نطمنك عليها وانتو اهتمو بالضيوف البرة ديل وما تحسسوهم بي أي شئ.. وقال لي يزيد لحدي ما نجي راجعين تمشي تفتش لي ابن الكلب دا وصحبو مكان ما كانو وتجيبهم لي وانت عارف بتوديهم وين وانتظروني هناك اخلص وبجي.. الطريقة الكان بتكلم بيها يُوسف خوفتني منو ركبنا العربية واتحركنا على المستشفى وصلنا مشينا قابلنا الدكتور وقال نعمل صورة أشعة مشيت عملتها ووديت الصور للدكتور.. الدكتور قال لينا الحمدلله مافي اي كسر اتجمع الدم عشان كدا ورم المكان امشي الصيدلية وجيبي المرهم وامسحي صباح ومساء وان شاء الله الورم ح يخف وعليك العافية.. قلتا ليهو الله يعافيك وشكرنا الدكتور وطلعنا قلتا ليهم شفتو قلتا ليكم مافي داعي الشغلة بتتحلى بي مرهم بس بتحبو تكبرو القصص.. يُوسف قال لي اي قصة بتخصك بتستحق انو يكبروها وبعدين احسن وقت اطمنا عليك.. بعدها مشينا فطرنا واشترينا المرهم ونحنا راجعين البيت تلفون يُوسف ضرب ما عارفه كان منو سمعتو بقول ليهو خليك هناك مسافة الطريق وبكون معاك قلتا ليهو ماشي وين.. قال لي ديل ناس الشغل اتصلو علي وضروري امشي.. صراحة ما اقتنعتا بي كلامو نهائي خصوصا انو كان بعاين لي مهدي بي نظرة ما فهمتها وصلوني البيت وقبل ما ادخل داس فرامل وهو ومهدي مشو انا متأكدة انو دا ما شغل لانو مهدي من وين بعرفو شغلو اكيد عرفو مكان الولد ومشو ليهو ربنا يجيب العواقب سليمة دخلتا جوة البيت لقيتو مليان ناس طوالي اتجهتا على غرفة يُوسف لأنها شوية بعيدة من الناس دخلتا بقيت راقدة وبفكر.. جاتني يارا قعدت معاي قالت لي مهدي أخوك ويُوسف مشو وين.. قلتا ليها ما عارفه يُوسف جاهو اتصال وصلوني بس ومشو.. قالت لي اكيد ح يكون مشى لي ولد عمي الحسين.. قلتا ليها انتي عندك فكرة ح يكون مشى ليهو وين.. قالت لي ما عارفه بس في مكان واحد بخطر على بالي ح يكونو مشو هناك.. قلتا ليها المكان دا وين.. قالت لي عندنا مخزن قديم مرات كانو بمشو هناك والليلة برضو احتمال يكونو هناك.. قلتا ليها ارح معاي وريني مكانو وين.. قالت لي انتي مجنونة عايزة يُوسف يقتلنا صح.. قلتا ليها يارا ما تكتري كلامك يا تمشي معاي يا إما توريني مكان المخزن وين وانا بمشي براي.. قالت لي انتي رأسك قوي وما بتسمعي الكلام ولو حاولتا امنعك ما بقدر.. قلتا ليها اها قلتي شنو.. قالت لي استني هناك هسي بجيك وبنمشي.. قلتا ليها تمام منتظراك.......
