بلسان الكاتبة:-
هيام بدأت تفتح عيونها شوية شوية عاينتا حولها لقت روحها في غرفة لونها ابيض ومركبين ليها درب في يدها حست بي صداع قوي شديد لمست رأسها لقت مركبين ليها شاش قالت بي صوت مبحوح عايزة موية عطشانة عايزة موية.. سمع صوتها حسن قال ليها هيومة عايزة شنو.. قالت ليهو عايزة موية.. جاب موية وشربها ليها قال ليها حاسة نفسك بقيتي احسن خوفتينا عليك.. قالت ليهو اي احسن الحمدلله بس حاسة بي صداع ح يكسر رأسي.. قال ليها دا بكون بي سبب الوقعة على رأسك هسي بنادي ناس امي وبخلي الممرضة تجيب ليك مسكن.. طلع نده على اهلو جات امو وابوهو ومعاهم خال هيام وخالتها ومهدي فضل واقف برة ما دخل منذر كان ح يدخل بس حسن منعو قال ليهو كفاية الحصل ليها بي سببك انت ومرتك احسن ليك تفضل بعيد عنها لي مصلحتها قبل مصلحتك وحسن مشى نادى الممرضة وجات ادتها المسكنة وقالت ليهم ما تطولو عندها كتير عشان ما تتعبوها هي محتاجة لي راحة.. قالو ليها كويس وطلعت الممرضة.. عمتها عفراء قالت ليها خوفتينا عليك انتي هسي كويسة.. قالت ليها انا كويسة يا عمتي بس شوية صداع وهسي ح يروح.. عمها قال ليها أنتي متأكدة انك كويسة.. قلتا ليهو اي يا عمي والله انا كويسة ما تخافو علي.. خالتها جات قعدت جنبها وحضنتها ودموعها نازلة قالت ليها الحمدلله انك كويسة.. قالت ليهم انا لي كم ساعة هنا.. قالو ليها ليك قريب اليومين نايمة.. قالت ليهم دا كلو لي ما صحيتوني.. قالو ليها دي كان تعليمات الدكتور.. قالت ليهم انتو كلكم هنا طيب امي وين معقوله ما جات تشوفني.. ملامح وشهم اتغيرت وبان الحزن في عيونهم.. قالت ليهم ما كان كابوس صح.. ماف زول رد عليها.. قالت ليهم انا بتكلم معاكم زول رد علي ما كان كابوس وامي ماتت صح خسرتها زي ما خسرتا ابوي والاثنين مشو وخلوني وتاني ما برجعو بقيت وحيدة صح.. خالتها قالت ليها انتي ما وحيدة نحنا كلنا معاك.. قالت ليها كلكم كذابين كلكم ح تخلوني زي ما اهلي خلوني ومشو وبقت تبكي بكل قهر ووجع انا لي الناس البحبوني بموتو وخلوني لي شنو انتو زاتكم ما تحبوني اطلعو خلوني عايزة اقعد براي ما عايزة زول.. عمتها قالت ليها هيومة ما تقولي كدا كلنا بنحبك وما ح نخليك.. قالت ليها كذابة كلكم كذابين اطلعو من هنا وخلوني وبقت تكورك وتبكي.. كل ما زول يحاول يقرب عليها بتلزو وبتزيد في البكى الا جو الممرضين مسكوها وادوها حقنة مهدئ حتى شوية هدأت ونامت.. ناس عمها بقو واقفين برة وما عارفين يعملو شنو ويقدرو يساعدوها كيف عشان تتحسن.. خالتها منال قالت ليهم اتصلو لي الدكتور الكان بتمشي تتعالج معاهو خلي يجي يشوفها ويورينا ح نعمل شنو ونتعامل معاها كيف براكم شايفين حالتها ساءت لي ياتو درجة.. عمها قال ليها دا احسن حل ضرب لي دكتور مؤمن وطلب منو يجي المستشفى عشان حالة هيام ساءت.. دكتور مؤمن قال ليهو مسافة الطريق وبكون معاكم.. مرت زي نصف ساعة ودكتور مؤمن وصل عندهم حكو ليهو الحصل من البداية.. قال ليهم انا حذرتكم انو توروها شوية شوية غلطتكم دي ممكن ترجعنا لي نقطة الصفر وما بعيد انو حالتها تسوء اكتر.. عبد الجليل قال ليهو نحنا كنا ملتزمين بي كلكم وما قاعدين نضغط عليها شديد بس الله يسامح بنت اخوي هي السبب.. دكتور مؤمن قال ليهم حصل الحصل بس في الفترة الجاية لازم نكون حذرين لانو لي هسي ما عارفين تأثر الصدمة ممكن يعمل ليها شنو هسي ودوني لي الدكتور المتابع حالتها.. حسن قال ليهو اتفضل معاي.. دكتور مؤمن مشى مع حسن للدكتور المتابع حالة هيام واتكلمو مع بعض مسافة ودكتور مؤمن طلع.. قعد مع أهل هيام لمن هيام صحت قال ليهم ماف زول يدخل ليها انا بس ح ادخل واتكلم معاها.. دكتور مؤمن دخل لي هيام لقاها قاعدة والدموع مالية عيونها وبتعاين بعيد قعد يتكلم معاها قريب لي ساعة وهي ولا بتعاين ليهو ولا بترد عليهو ولا بتدي اي ردت فعل وقف قدامها وبقى يأشر بي يدو قدام وشها ومرة يتقطق بي اصابعو بس هي ما بتتجاوب كأنها في عالم تاني تماماً بس قاعده وبتبكي.. دكتور مؤمن طلع لي أهلها برة.. عبد الجليل قال ليهو طمنا يا دكتور هيام كويسة.. متوكل قال ليهو حالتها ساءت ولا بقت أحسن.. دكتور يوسف قال ليهم تبقى احسن كيف بعد الصدمة الاتعرضت ليها دي انا حذرتكم قبل كدا لانو عارف لو عرفت بالطريقه دي ممكن تنتكس وتدخل في حالة اكتئاب حاد وهسي حصل الكنتا خايف منو هيام دخلت في حالة اكتئاب حاد.. منال قالت ليهو يا دكتور نحنا هسي نعمل شنو عشان نقدر نطلعها من حالة الاكتئاب دي.. دكتور مؤمن قال ليهم الفترة الجاية دي حاولو تكونو معاها دائما ولازم تحسسوها انكم بتحبوها وما تخلوها براها نهائي لازم تحس انكم جنبها في أي وقت وما ح تتخلو عنها والوقت كلو لازم تتكلمو معاها عسى ولعل في وقت تتجاوب معاكم وترد عليكم وبرضو ح اكثف الجلسات عشان تتحسن في أسرع وقت ان شاء الله بتقدرو تنفذو القلتو ليكم ما زي المرة الفاتت.. قالو ليهو المرة دي ح ننفذ البتقولو وما ح نسمح بأي خطأ يحصل تاني.. قال ليهم أن شاء الله تكونو قدر كلامكم وبعدها استئذن منهم ومشى.. بعد يومين خرجو هيام من المستشفى ورجعوها البيت مرو اسبوعين وهيام في نفس الحالة ناس عمها وخالها كل يوم بيجو يتكلمو معاها وحتى جلساتها مع دكتور مؤمن مستمرة وبرضو هيام على حالها ما بتتكلم مع أي زول بس بتكون قاعدة وسامعة هم بقولو في شنو بس ما بترد
