وانا واقفة سمعتا صوت واحد بي وراي قال لي انتي السمح ليك تدخلي الغرفة دي منو...... قبلتا وراي لقيتو دا نفس الولد الكان بعاين لي من بعيد، قلتا ليهو صور امي الجابها هنا شنو والولد الشايلاهو دا منو.. قال لي انتي منو عشان تسأليني الأسئلة دي.. قلتا ليهو انا بنت المرة دي ومن حقي اعرف الولد المعاها دا منو.. قال لي ماما منى ما كلمتك يعني.. قلتا ليهو لو كانت كلمتني ما كان سألتك وبعدين انت بي ياتو حق بتناديها ماما.. قال لي بي حق انها امي الثانية انا بقول ليها امي.. قلتا ليهو يعني انت الولد الفي الصور طيب كيف هي امك الثانية انا ما فاهمة اي شئ.. قال لي ما ضروري تفهمي وهسي اطلعي من الغرفة دي سريع وثانيا انتي علاقتك بي ماما منى شنو.. قلتا ليهو انا بقول ليها امي ح تكون علاقتي معاها شنو مثلا اكيد هي امي.. قال لي عشان كدا بتشبهيها للدرجة دي.. قلتا ليهو هاك الذرة دي وهسي فهمني انت ليه بتناديها امي الثانية.. قال لي انا ما مجبور أوضح ليك اي شئ وهسي اتفضلي اطلعي من الغرفة دي سريع.. قلتا ليهو انا ما طالعة من هنا قبل ما توريني علاقتك بي امي شنو وكيف هي امك الثانية وليه عندك ليها كل الصور دي وهي معاك انا ما فاهمة شئ البحصل هنا دا شنو.. قال لي ما ضروري تفهمي وللمرة الأخيرة بقول ليك اطلعي من الغرفة دي.. قلتا ليهو وانا قلتا ليك ما طالعة قبل ما توريني كيف أمي هي امك الثانية واصلا انت امك منو.. قال لي انا ما مجبور اقول ليك اي شئ.. قلتا ليهو مجبور تكلمني وتوريني في شنو، رجعتا اعاين في الصور تاني شفتا صورة من الصور انا متذكرة اني شفتها عند امي قبل كدا بس كل ما اجيها عايزة اشوفها عديل هي بتدسها مني ولمن اسألها من الشافع منو ما بتجاوبني، شلتا الصور قلتا ليهو الصورة دي انا شفتها عند امي قبل كدا الله يرضى عليك وريني امي كيف هي امك الثانية.. سمعنا صوت واحد من برة بنادي يا يُوسف تعال عايزنك.. قال ليهو امشي هسي انا بلحقك.. يعني طلع اسمو يُوسف.. قال لي زي ما سمعتي بنادوني ممكن تطلعي برة عشان اقفل غرفتي.. قلتا ليهو انت ما بتقدر تتصرف معاي وتتجاهلني كدا انا من حقي اعرف اي شئ بخص أمي.. قال لي وانا من حقي برضو اخفي حاجات بتخص ماما منى وطالما هي ما ورتك يبقى هي ما كانت عايزاك تعرفي.. قلتا ليهو انت ليه بتتصرف معاي كدا هي امي ومن حقي اعرف حصل في ماضيها شنو وما ورتني ليهو ولو كنتا انت ولدها لي اتخلت عنك ومشت وتاني ما سألت منك ولي ما جابت لي سيرتك حاسة رأسي ح يطق من كترت الأسئلة.. قال لي يا بنت الناس انا ما فاضي ليك وزي ما شايفة عندي عرس اختي وفي حاجات كتيرة مفروض اعملها ممكن تطلعي من هنا.. قلتا ليهو انا هسي ح اطلع بس ما تفتكر القصة انتهت هنا انا ح اجي تاني وثالث لحدي ما اعرف قصتك مع امي شنو.. طلعتا وانا حاسة رأسي ح ينفجر من الأسئلة يُوسف علاقتو شنو بي امي وكيف يعني امي هي امو الثانية معقوله تكون امو لكن لو كانت امو مستحيل تخليهو وتمشي طيب ممكن تكون في الربتو بس ح تربيهو لي شنو لو امو قاعدة يُوسف الوحيد البقدر يجاوبني على الأسئلة دي وهو رافض يقول لي اي شئ، يبقى ما عندي حل غير اسأل يا خالتو منال أو خالتو عايدة وهم اكيد بكونو عارفين أي شئ ومجبورين يحكو لي لاني من حقي اعرف لو عندي اخ تاني ولا لا
