بعد الزلابية جهزتا شلتا في صحن ومعاها كبابي عشان اوديهم الراكوبة محل النسوان قاعدين اول ما جيت داخلة سمعتا تسنيم بتقول ليهم هدي زوجة اخوي منذر السمحة جات...... بقيت واقفة بعاين ليها بي عدم استيعاب كيف يعني زوجة منذر قامت جات علي.. قالت ليهم هدي رهف الح تكون زوجة اخوي منذر شايفنها سمحة كيف.. النسوان قالو ليها نحنا كنا قايلين هيام هي الح تعرس منذر.. تسنيم قالت ليهم هيام شنو كمان نحنا اخترنا ليهو الاحلى منها وهي رهف.. في مرة قالت ليها لو جينا للحق هيام احلى من رهف بي كتير.. قلتا ليها شكراً يا خالتو وصحي مبروك ليك يا رهف فرحتا ليك شديد وان شاء الله بيت مال وعيال يارب.. قالت لي بي طرف نخرتها الله يبارك فيك وعقبالك كدا.. قلتا ليها انا بدري علي عندي جامعة أكملها ما مستعجلة عليهو خليتو ليك وختيت الحاجات ومشيت حسيت كأنو في صخرة وانزاحت عن قلبي كنتا خايفة شديد بس الحمدلله انو اختارو ليهو رهف وكدا موضوع منذر اتقفل وربنا يهنيهم ويسعدهم سوى.. قضينا اليوم كلو في توزيع حاجات الكرامة بعد المغرب كدا قعدنا انا وروان وكوثر نغسل في العدة ونلم فيها بعد خلاص خلصنا قلتا ليهم شكراً ليكم كتير تعبتو معاي الليلة ما قصرتو.. روان قالت لي ماف اي تعب دا واجبنا وبعدين نحنا اخوات وماف شكر بيناتنا ولا ما معتبرانا اخواتك.. قلتا ليها العفو والله اخواتي واعز.. مشيت جهة الصالون(بيتنا فيهو غرفتين وراكوبة وبرندا ولي قدام بعد مسافة قريبة في غرفة ومعاها صالون حقين الرجال) عشان انادي حسن أو صلاح واحد فيهم يجي يدفق لينا الموية قبل ما احصل لقيت منذر في وشي.. قال لي الجابك بي هنا شنو.. قلتا ليهو عايزة حسن في شئ.. قال لي كان ممكن تقولي بي أي زول ينادي ليك حبيب القلب ولا ما بتقدري الا تجي انتي وتشوفيهو.. قلتا ليهو الله عليك فهمتها على الطايرة هسي خليني ماشة اشوفو وين لاني اشتقتا ليهو.. قال لي بطلي قلة أدب وبعدين حسن مافيش.. قلتا ليهو مشى وين.. قال لي شايفاني معلق في رقبتو لمن اعرف مشى وين يطير مكان عايز يطير انا دخلني شنو.. قلتا ليهو انا ما مصدقاك ح امشي اشوف براي.. مسكني من يدي قال لي ماشة وين انا قلتا ليك هو مافيش وبعدين انتي مالك ميتة عشان تشوفيهو كدا.. فكيت يدي منو وقلتا ليهو انت ما دخلك وبدل تركز معاي احسن تمشي تشوف خطيبتك وين.. قال لي انتي قولي زعلانة عشان كدا.. ضحكتا ضحكة استهتار قلتا ليهو ازعل عشان شنو والله انا فرحتي ما بديها لي زول اكتر شخصين ما بحبهم ح يتزوجو في أحسن من كدا بالمرة بخلص منكم الاثنين دفعة واحدة حلو.. قال لي ما تحاولي تخبي انا متأكد انك زعلانة واتمنيتي لو تكوني مكان رهف هسي.. قلتا ليهو والله انت مسكين شديد وعارفة دا البتتمناهو بس ما حصل وبعدين انا عندي حسن معقوله افكر فيك والله خسارة زاتو لو قلتا اقارن حسن بيك لانو بكون ظلمتو وهسي انا ما فاضيه ليك امشي لي خطيبتك وابعد مني لي مصلحتك وجيت راجعة الحوش التاني لقيت رهف في وشي.. قالت لي الموقفك مع خطيبي شنو وعايزة منو شنو.. ما رديت عليها وكنتا ماشة.. قالت لي انا بحذرك احسن ليك تبعدي عن منذر لانو منذر لي انا وبس.. قلتا ليها عليك الله منذر دا اكليهو واصلا انا ما بهمني ولا خاتاهو في حساباتي فأفرحي بيهو وابعدي هو مني وكدا بتكوني ما قصرتي لانو انا زاتي ما حابة اشوفو أو اتكلم معاهو ومشيت خليتها.. جيت شلتا الجردل عشان اكشح الموية في الشارع فتحت الباب عايزة ادفقها لقيت حسن في وشي.. قال لي بتعملي شنو.. قلتا ليهو زي ما شايف عايزة ادفق الموية.. قال لي خشي جوة سريع وما ألمح وشك تاني هنا.. قلتا ليهو في شنو هي موية بس.. قال لي كلامي ما اكررو مرتين ادخلي جوة وبعدين ناس صلاح وين لمن انتي تدفقيها.. قلتا ليهو ما عارفه ما شفتو.. قال لي خلاص انا بدفقها وتاني لو شفتك طالعة بكسر رجلك فاهمة خشي جوة.. قالها بي نهرة لمن خفتا وجري دخلتا جوة قعدتا.. بعد الناس مشو بقينا قاعدين نحنا ناس البيت بس.. عمي عبد الجليل قال لي هيومة بتي لمي حاجاتك انتي وامك ح تجو معانا البيت.. قلتا ليهو لي يا عمو نحنا قاعدين هنا.. قال لي يابتي انتو هنا براكم وانا خايف عليكم احسن تمشو معاي وتقعدو معاي وقدام عيوني كدا انا بطمن عليكم وانتو وصية الغالي عندي و لازم احافظ عليها واصونها.. قلتا ليهو عمي كلامي فوق رأسي بس انا ما بقدر اخلي البيت وامشي ريحة ابوي فيهو وهنا انا بحس كانو ابوي لسه معاي عشان كدا عايزة اقعد هنا.. قال لي يابتي كدا ما ممكن انا ما بقدر اخليكم هنا براكم ومهدي زاتو ما قاعد انتو نسوان براكم خايفة يحصل ليكم شئ.. قلتا ليهو عمو ما تخاف ما بحصل لينا شئ وبعدين نحنا الله معانا وحارسنا.. عمي عبد الفتاح قال ليهو اصلا البنت دي رأسها قوي وما بتسمع الكلام خليها مالك ومالها.. عمو عبد الجليل قال ليهو كيف يعني مالي ومالها دي بنت اخوي زي بتي وبعدين دي أمانة اخونا لينا كيف بتقول كدا.. عمي عبد الفتاح قال ليهو انا ما دخلني فيها ولا عندي شغلة فيها خليها تعمل العايزاهو.. قلتا ليهو وانا اصلا ما طلبتا منك تشتغل بي انت خليك بعيد وكدا كفاية.. امي قالت لي هيام اسكتي ودا عمك احترمي نفسك وانتبهي لي كلامك معاهو.. عني عبد الفتاح قال ليهو شايف يا عبد الجليل قلة ادبها وعدم احترامها.. عمو عبد الجليل قال لي هيومة بتي اسكتي واخذي الشيطان وخلينا نلقى حل للمشكلة دي.. امي قالت ليهم انا بعتزر ليكم بالنيابة عنها هي صغيرة لسه وما عارفة بتقول في شنو.. قلتا ليها امي انا عارفه بقول في شنو وما عايزة زول يتمننا علينا عشان يهتم بينا نحنا قادرين نهتم بي روحنا.. عمتو عفراء قالت لينا عشان الموضوع دا يتحلى خلي كل يوم حسن أو صلاح يجو يبيتو معاهم وكدا نحنا بنكون مطمنين انو في راجل معاهم ولو حصل اي شيء ح يقدر يحميهم.. عمو عبد الجليل قال ليها كلامك عين العقل وكدا ما بنخاف عليهم يبقى الليلة حسن ح يبيت هنا لاني عايز صلاح في شغل وبكرة صلاح بجي وحسن برجع البيت ويا هيومة ما عايز اي اعتراض في الموضوع دا.. قلتا ليهو البتقول عليهو يا عمي ح يحصل ما عندي اي مشكلة.. منذر قال لينا كيف يعني حسن يبيت معاهم الناس تقول علينا شنو.. عمو عبد الجليل قال ليهو قصدك شنو يا منذر.. منذر قال بيهو قصدي واضح يا عمي البيت فيهو بنت ما متزوجة ويكون راجل داخل ومارق الناس اكيد ح تشك.. قلتا ليهو انت لو فهمك وسخان ما ضروري الناس كلها تكون زيك وبعدين انا ابوي عرف يربيني كويس الحمدلله واقول ليك شئ يا عمي ما عايزين اي زول يقعد معانا انا وامي بنعرف نحمي نفسنا كويس وانا بستئذن منكم ودخلتا غرفتي وقفلتا الباب علي وبقيت قاعدة وببكي هسي لو ابوي كان لسه عايش ما كان حصل دا كلو ولا احتجنا لي زول يقعد معانا ولا منذر قال كلامو المقرف دا يا حليلك يا ابوي مشيت وين وخليتني براي.. بعد مسافة الباب دقة عرفتا دي بتكون امي قشيت دموعي وفتحتا ليها الباب ورجعتا قعدتا جات قعدت جنبي.. قالت لي انا عارفاك فاقدة ابوك ومشتاقة ليهو شديد وبتتمني لو كان لسه عايش بس نعمل شنو دي حكمة ربنا حتى لو بتوجعنا نحنا لازم نتقبلها ونرضى بي واقع انو ابوك ما ح يرجع وأننا لازم نكمل حياتنا من بعدو انتي قايلة ابوك هسي لو كان عايش وشافك بتتصرفي بالطريقة دي ح يقبل، بيني وبينك شايفة طريقة كلامك وتعاملك مع اعمامك دي صح انا وابوك ما ربيناك على انك تقللي من احترام الأكبر منك حتى لو هو غلط انتي واجب عليك تحترميهم وتقدريهم ولا انتي عايزة يقولو انو ابوك وامك ما عرفو يربوك وتجيبي لينا الكلام الشين.. قلتا ليها امي اكيد انا ما عايزة شئ زي دا بس انتي براك شايفاهم بقولو في شنو واطلع انا الغلطانة لمن ارد عليهم.. قالت لي ما غلطانة بس انتي اسلوبك في الكلام غلط ممكن بي طريقة ظريفة تفهميهم غلطهم وكدا بتكوني كسبتي احترام الناس ليك بس عمرها الوقاحة وقلة الزوق والأدب ما ح تخلي الناس تحترمك بالعكس ح تخلي الناس ينفرو منك ويكرهوك وينبذو اهلك لانو ما عرفو يربوك وانا ما عايزة شئ زي دا يحصل عشان كدا برضاي عليك يابتي عماتك واعمامك لو مهما قالو ليك انتي ما تردي عليهم اعتبري نفسك ما سمعتي الكلام ومشيهو لو ما عشانهم عشاني انا على الأقل.. قلتا ليها كويس يا أمي عشانك انا بعمل اي شئ وبحاول اتجنبهم وما ارد عليهم لو مهما قالو المهم انتي تكوني راضية علي.. قالت لي انا عمري كلو ح اكون راضية عليك يا حبيبتي، وهاك دا التلفون الجابو ليك ابوك وجاب ليك معاهو سلسل قال اديك ليهو وما تطلعي من رقبتك لو مهما حصل.. طلعتا السلسل كان مكتوب فيهو اسمي وبي الطرف فيهو اول حروف من اسم امي وابوي.. امي لبستني ليهو وباستني في خدي وقالت لي ربنا يحفظك لي من كل شر.. قلتا ليها ويحفظك لي يارب وبستها في رأسها.. قلتا ليها يا أمي ناس عمو مشو صح.. قالت لي اي مشو وبقينا قاعدين برانا تاني وحسن قاعد في الصالون بهناك.. قلتا ليها مش انا قلتا ليهم ما عايزة زول معانا حسن القعدو شنو.. قالت لي هيومة بالعقل كدا نحنا الاثنين برانا كان حصل لينا اي شئ ماف زول بجيب خبرنا خلي حسن معانا احسن.. قلتا ليها كويس يا أمي البتشوفي مناسب ولو على قعدتو انا ما عندي اي مشكلة.. قالت لي اي خلاص فالحة وبتسمعي الكلام.. جاء حسن واقف من قدام باب الغرفة وما دخل قال لينا يا عمتي محتاجه حاجة عشان عايز اقفل البيت وانوم.. امي قالت ليهو لالا يا ولدي ما محتاجين شئ تسلم.. قال ليها خلاص اقفلو الباب عليكم كويس وانا نايم في الحوش لو احتجتو اي شئ بس نادو علي وبجيكم.. امي قالت ليهو كويس يا ولدي ومشى.. قلتا ليها يا أمي ينوم في الحوش لي مش كان مفروض ينوم في الصالون.. قالت لي الصالون بعيد شوية وهو قال لي الضمان يبيت في الحوش ومنو يكون قريب لو حصل شئ.. قلتا ليها مع اني قعدتو دي كلها ما راكبة رأسي بس كويس ماف مشكلة.. ختيت التلفون يشحن وقفلتا الباب والانوار ورقدنا نمنا.. صحيت بي صوت حسن بدق على الباب وبقول لينا هيومة عمتي قومو عشان تصلو الصبح أذن.. قلتا ليهو كويس قايمين.. صحيت امي وقمنا مشينا اتوضينا وجينا حسن صلى بينا قاعدين في المصلاية اتذكرتا لمن ابوي كان بصحينا للصلاة وبصلي بينا من غير ما أشعر دموعي جات نازلة مسحتها سريع قبل ما ناس امي يشوفوها قمتا عملتا الشاي وجينا شربناهو مشيت جبتا التلفون وريتو لي حسن وقلتا ليهو يجيب لي معاهو شريحة.. قال لي حاضر من عيوني الإثنين وكدا لو حصل اي شئ أو احتجتو لي حاجة بتقدرو تتصلو علي في أي وقت.. امي قالت ليهو تسلم يا ولدي تعبناك انت وابوك معانا.. قال ليها يا عمتي ماف اي تعب دا واجبنا وبعدين هيومة دي الغالية واي تعب في سبيل راحتها هين.. امي قالت ليهو عايزاك تخت بتي في عيونك وتهتم بيها.. قال ليها ما تخافي يا عمتي هيومة دي في عيوني.. بعدها حسن طلع الشغل وبقينا قاعدين انا وامي للمساء دا حسن جاء وجاب لي معاهو الشريحة وسجل لي رقمو وأرقام ناس عمي وبعدها اتعشينا ومشينا نمنا
بعد كم يوم كان شيلة مهدي ومنذر وانا رفضتا امشي وامي شاكلتني وهرجت.. قلتا ليها مهدي ابوهو ما تم شهرين ميت عايز يعرس كانو المات دا ما ابوهو انا البوديني شنو.. قالت لي الحي ابقى من الميت وهو عرسو كان مفروض يكون قبل كدا بي كتير بس ابوك مات عشان كدا اجلوهو وهسي جاء الوقت عشان يعملو وانتي ح تمشي.. قلتا ليها امي انا من هسي وريتك ما ح امشي اي مكان ولا دخلني فيهم وقمتا دخلتا الغرفة مسكتا تلفوني وبقيت بلعب بيهو ومرة اتصفح في الفيس.. مرت الايام سريع وجاء يوم حنة مهدي ومنذر.. امي قالت لي امشي دا اخوك ومفروض تكوني معاهو في يوم زي دا.. قلتا ليها انا ما عندي اخو وما ح امشي اي مكان.. جاء حسن وعمي عبد الجليل اتكلمو معاي بس برضو ما حبيت امشي العرس كلو على بعضو ما هاميني ولا خاتاهو في بالي.. يوم العرس بالعصر امي حلفتني الا امشي وقالت لي برضاي عليك تمشي.. قلتا ليها امي انا ما عايزة امشي.. قالت لي طلب واحد طلبتو منك وما عايزة تنفذيهو لي الله يرضى عليك امشي.. قلتا ليها يا أمي انتي اخليك لي منو طيب.. قالت لي انا ما بجيني اي شئ انتي بس امشي.. قلتا ليها حاضر يا أمي جهزتا ملابسي وانا ما كنتا ماشة وقلبي قابضني عشان ح اخلي امي براها في البيت بس ما سمعت مني بعد المغرب جاء حسن لبستا ومشيت معاهو كانو عاملين العرس في صالة وصلنا وطوالي قعدتا العرسان بعد وصلو مشيت باركت ليهم وتبارك الله روان كان طالعة حلوة شديد عسل بس ورهف زاتها كانت حلوة بس روان احلى منها بي مراحل ومشيت باركت لي ناس عمتي واعمامي وقعدتا بعد مسافة قلبي قبضني شديد وحسيت بي ضيق ما طبيعي ناديت حسن قلتا ليهو ارح معاي البيت انا قلبي ما مطمن وخايفة على امي خلينا نمشي نشوفها.. قال لي طيب خلينا نكلم ابوي ونمشي.. قلتا ليهو حاضر.. مشى كلم عمي وجينا اتحركنا وانا طول الطريق انا بتصل على امي في التلفون ما بترد بقيت بدعي انو امي تكون بخير وما حصل ليها اي شئ.. حسن قال لي ما تخافي أن شاء الله عمتي ح تكون بخير انتي اطمني وبتكون ما ردت عليك عشان ما سمعت التلفون.. قلتا ليهو أن شاء الله تكون بخير، وصلنا البيت لقينا باب الشارع فاتح قلتا ليهو شفتا قلتا ليك في شئ حاصل جرينا دخلنا جوة وانا قلبي مقبوض دخلنا البرندا لقينا امي واقعة في الأرض وغرقانة في دمها.........
________________♥️_______________
أُمي هي نجمتي المضيئة وغيمتي الناعمة ، زهرة عُمري وشمسي الدافئة امي هي الام المثالية،عوضي والوحيدة التي تغني عن الجميع 💙
في امان الله♥️
