يُوسف قال ليهو الموضوع بخصني وشديد كمان وهيام البمسها يعني بمسني انا والبلمس زوجتي بقتلو بي يدي..... خالي قال ليهو انت بتقول في شنو كيف يعني مرتك.. يُوسف قال ليهو زي ما سمعتا هيام زوجتي والبلمسها انا مستعد ادفنو وهو عايش ويدك دي تاني لو ارتفعت عليها انا بكسرها ليك وبحزرك تاني لو جيت جنبها انا ما بضمن ليك انا ح اعمل ليك شنو وحقها وحق امها ح تأخدو وغصبا عنكم كلكم وهيام دي لو حصلت ليها اي حاجة انا ح اعتبرك انت السبب ولي مصلحتك انت تبقى بعيد منها.. خالي قال ليهو ما على كيفك البنت دي ح توقع يعني ح توقع وانت ما ليك حق تدخل البنت بنت اختي وانا حر اتصرف معاها بالطريقة العايزها.. يُوسف قال ليهو دا كان زمان بس هسي طول ما انا عايش ما ح تقدر تلمسها أو تقرب عليها وشرفونا يوم الجمعة عشان نعمل المناسبة مع اني ما بشرفني تجو بس في الاخر انتو أهل زوجتي ومجبور اعزمكم وللوقت داك صورة وشكم ما عايز اشوفها وقريب على بيتنا ما تجو.. جاء قومني وساقني مشينا بيتهم بعد هديت حبة قلتا ليهو دا كلام شنو القلتو لي خالي دا.. قال لي ياتو كلام دا.. قلتا ليهو ما تعمل لي فيها ما فاهم انت عارف انا بتكلم عن شنو.. قال لي انتي قصدك لمن قلتا انك زوجتي ما دي الحقيقة يوم الجمعة ح يكون العقد.. قلتا ليهو وانت بتحدد الكلام دا على كيفك انا وين من الكلام دا ولا بتقرر على مزاج وانا ما عندي حق أدي رأيي في الموضوع دا ولا شنو وبعدين تعقد علي كيف وانا اهلي ما عارفين.. قال لي منو القال ليك هم ما عارفين.. قلتا ليهو ح يعرفو من وين وانا ياداب عرفتا وعمي البعقد لي ماف والقال ليك انا اصلا موافقة عليك منو.. قال لي الموضوع دا ما تتعبي نفسك وتفكري فيهو كتير عمك واخوك هسي بكون في الشارع وجايين على هنا ولو على موافقتهم فأنا اخدتها.. قلتا ليهو كويس كلكم عارفين وبتقررو عن حياتي والبحصل فيها شنو وانا اخر من يعلم كويس استمرو كدا انا قاعدة طربيزة وانتو حركوني زي ما عايزين ورأيي ما مهم صح برافو عايزين صفقة وترفع ليكم القبعات.. قال لي المهم حضري نفسك ناس عمك ح يصلو بعدين والعقد ح يكون يوم الجمعة ولو احتجتي لي اي شئ يارا ح تساعدك فيهو وامي برضو موجودة.. بقيت بعاين ليهو وبضحك يعني كلهم متفقين وعارفين وانا قاعده زي الأطرش في الزفة ياخ حتى عمي ومهدي موافقين وما فكرو يأخدو رأيي ولا بهمهم انا بفكر في شنو ولو عايزة يُوسف أو لا هسي لو ابوي عايش انا متأكدة ما كان كل دا حصل ولا كان قررو زواجي من واحد انا ما بعرفو حتى من غير ما يعرفو رأيي في الموضوع شنو وهل انا عايزة اتزوج هسي واحمل مسؤولية زي دي ولا لا.. يُوسف قال لي شردتي وين انا بتكلم معاك.. عاينتا ليهو بي طرف عيني ودخلتا جوة الغرفة جات يارا لاحقاني قلتا ليها انتي يوم قلتي لي نجود اني ح ابقى زوجة اخوي كنتي عارفة انو هو ناوي يتزوجني وكلم عمي صح.. قالت لي نحنا كنا ح نوريك.. قلتا ليها ح توروني متين لمن العقد يحصل يعني انتي انا وثقتا فيك وحكيت ليك اي شئ وانتي قاعدة وشايفاهم بحددو لي مستقبلي وانتي ما كلفتي نفسك تجي توريني على أساس انك اختي وصحبتي عملتي فيني كدا.. قالت لي هيام ما تقولي كدا انا عشان قالو لي ما اوريك سكتا والا انتي عارفة انا ما بدس عنك اي حاجة.. قلتا ليها حتى ولو انا من حقي اعرف حتى لو حزروك ما توريني بس الفايدة شنو كلكم واحد وانا ما فارقة معاكم.. قالت لي هيومة ما تقولي كدا الله يرضى عليك انتي بتفرقي معانا وشديد كمان .. قلتا ليها يارا لو سمحتي انا ما عايزة اتكلم مع زول هسي ممكن تطلعي وتخليني براي.. قالت لي طيب اخدي راحتك ونتكلم بعدين وطلعت.. بقيت قاعدة على نار مستنية عمي ومهدي يجو عشان اقول ليهم اني ما موافقة على الزواج دا والموضوع ينتهي رقدتا غمضتا عيوني وطوالي نمتا.. صحيت سمعتا أصوات رجال جاية من برة لبستا توبي وطلعتا لقيتهم ديل مهدي وعمي عبد الجليل جريت حضنتهم وبقيت ببكي.. مهدي قال لي انتي شافعة هي الببكيك شنو حالتي قلتا البنت كبرت وح تعرس.. أول ما قال كدا زحيت منهم وقلتا ليهم تعالو معاي عايزة اتكلم معاكم.. يُوسف قال لي خليهم يرتاحو الكلام ملحوق.. ولا عاينتا ليهو قلتا ليهم ارح ودخلتا جوة الغرفة بعد شوية جو لاحقني.. مهدي قال لي هي دي طريقة تتعاملي بيها معاهو يتكلم معاك وبتتجاهلي لي شنو.. قلتا ليهو هسي دا ما موضوعنا انتو كيف بتوافقو اني اعرسو من غير ما تسألوني معقوله رأيي بقى ما مهم عندكم للدرجة دي وحياتي ما لي اتخذ قرارات فيها يعني انا وجودي مضايقكم وعايزين ترتاحو مني لمن تزوجوني بالطريقة دي لو ما عايزين وجودي كلموني وانا بختفي من حياتكم أهون لي من انكم تعملو لي كدا وترموني كأني هم على قلبكم وما مصدقين تخلصو منو متين.. عمي عبد الجليل قال لي يا بتي دا كلام شنو انتي براك عارفه انتي غالية علينا لي ياتو درجة وما بنفرط فيك وعارفة برضو انو نحنا عايزين مصلحتك.. قلتا ليهو لكن بالعملتو ما باين اني غالية عليكم ولا عايزين مصلحتي لانو لو كان بالفعل عايزين مصلحتي ما بتزوجوني لي واحد ما بعرفو وثانيا انتو بتعرفو من وين لمن تثقو فيهو لي درجة تدوني ليهو.. عمي قال لي انا بعرفو من زمان لانو كان في شغل وهو زول ما شاء الله ما فيهو كلمة وانا لو ما واثق فيهو معقوله أوافق انك تتزوجيهو.. مهدي قال لي انتي شفتي منو شئ ولا عمل ليك حاجة ما عايزاهو لي شنو.. قلتا ليهو ما عمل لي اي شئ بس ما عايزاهو بالجبر القصة يعني.. قال لي ما بالجبر بس الزول لمن يرفض زول اكيد بكون عندو سبب عشان يرفض.. قلتا ليهو انا ما عندي سبب بس ما عايزاهو.. عمي قال لي بالعقل يابتي فهمينا ما ممكن تقولي كلامك كدا ساي في شنو بخليك ترفضي.. قلتا ليهو طيب في شنو بخليني أوافق انتو بتقبلو ساي وبتتفقو على موعد العقد وانا اخر من يعلم ليه يعني انا عارفة هسي لو ابوي كان عايش ما كان عملتو كدا يس هسي عشان هو ما معاي انتو بتعملو كدا وعايزين تتخلصو مني بي أي طريقة عشان ما بتحبوني وحاسني حمل تقيل عليكم، بعد شوية احس بي كف قوي على خدي.. عمي قال لي مهدي لي عملتا كدا لي رفعتا يدك عليها.. قال ليهو يا عمي انت ما سامعها بتقول في شنو كيف يعني ما بنحبها وهي عارفة اكتر مننا انها بتعني لينا شنو ونحنا لو ما شايفين في الزواج دا مصلحتها معقوله نقرر نزوجها معقوله هي ما عرفتنا وعرفت انو نحنا بنعمل الفي مصلحتها وبس انتي حصل ليك شنو معقوله انتي نفسك هيومة اختي حصل شنو لمن حتى نحنا بقيتي تشكي في حبنا ليك وخوفنا عليك وأننا عايزين مصلحتك.. قلتا ليهو الحصل ليك كتير وانتو ما شايفين انا اتحملتا أكبر من طاقتي اي زول افكر انو هو بحبني وعايز مصلحتي في النهاية بخوني انا لو خالي عشان قروش بس كان مستعد يقتلني وخالتي كانت واقفة وشايفاهو وما عملت اي شئ انا لو اهلي كانو عايزين يقتلوني أثق في منو وأصدق منو تاني وانا العمتي كانت السبب في موت امي انا الحولي كلهم ما بحبوني انا تعبتا والله العظيم تعبتا معقوله انا سيئة لي للدرجة دي طيب انا ما اذيت زول ولا عملتا ليهم اي شئ لي الناس دي بتكرهني وفي كل فرصة بتحاول تأذيني انا لي الوحيد المفروض ازعل وابكي دائما لي كتير علي اني انبسط شوية والله انا تعبتا وقعدتا ابكي.. مهدي جاء حضني وقال لي انا اسف لانو دا كلو انتي حاسة بيهو وانا ما عارف ولا كنتا معاك واسف على كل لحظة احتجتيني فيها وما كنتا معاك واسف انك ولو لي لحظة حسيتي انك وحيدة بس من الليلة ما ح يحصل كدا نهائي واي شئ يضايقك تعالي كلميني والبزعلك بس وريني وانا بعرف اتصرف معاهو كويس انتي بس ما تزعلي لاني ما بتحمل اشوف دموعك، ومسح لي دموعي.. قلتا ليهو طيب لو ما بتتحمل تشوفني زعلانة بطلو العرس وخلونا نرجع بيتنا ونكمل حياتنا عادي وننسى الحصل.. عمي جاء قعد جنبي قال لي انتي عارفة انك وصية اخوي الله يرحمو لي وعارفة اني بحبك زي بتي واكتر كمان وبرضو عارفة اني ما بعمل شئ مافي مصلحتك عايز منك شئ واحد بس قبل ترفضي يُوسف الليلة صلي صلاة استخارة وادعي ربنا وبكرة الصباح اديني جوابك ولو ما اتغير ورفضتي صدقيني ح نمشي طوالي بس عشاني المرة دي اسمعي كلامي وابوك لو كان في مكاني برضو ح يقول ليك كدا صلي استخارة وبعدها البتقولي انا موافق عليهو وما ح اعترض.. قلتا ليهو طيب يا عمو عشانك بس انا ح اعمل كدا بس لو حسيت نفسي ما مرتاحة مستحيل أوافق.. قال لي ما مشكلة انتي البتقولي عليهو نحنا موافقين المهم انتي تكوني مبسوطة وكل شئ بهون قدام سعادتك.. مهدي قال لي زي ما قال عمي البتقولي عليهو بحصل بس عايز منك طلب لي بكرة لحدي ما تدينا قرارك ما تتعاملي مع يُوسف بالطريقة دي حتى ولو ما اتزوجتو حسني تعاملك معاهو لانو ابوي ما علمنا نتعامل مع الناس بالطريقة دي.. قلتا ليهو كويس ان شاء الله بحاول.. بعد المغرب عمو عبد الرحمن أبو يُوسف ناداني مشيت ليهو قال لي تعالي اقعدي جنبي، مشيت قعدتا جنبو.. قال لي يشهد الله علي انا من اول يوم شفتك فيهو وعرفتا انك بنت منى حبيتك زي بناتي، وخصوصاً امك ما قصرت معانا والعملتو لينا ما هين وما قدرنا نجازيها عليهو وهسي نحنا ما عايزين نجبرك على حاجة وانا الما برضاهو لي بناتي ما برضاهو ليك والعرس عمرو ما كان بالجبر وانتي لو ما موافقة بس كلميني وانا بتكلم معاهم وما ح يجبروك ولو ما عايزة ولدي ماف مشكلة نلغي الزواج المهم انتي تكوني مبسوطة.. قلتا ليهو عمو عبد الرحمن كلامك على عيني ورأسي وانا مبسوطة انك بتفكر فيني وفي رأيي وبحترمك جدا وانا ما عندي مشكلة في الزواج دا بس في الأول حابة اصلي صلاة استخارة وبعدها الكاتبو ربنا هو الح يحصل.. قال لي ونعمة بالله بس لو بعد صليتي ما ارتحتي وما حبيتي تواصلي كلميني وان شاء الله ما بيحصل الا الانتي عايزاهو.. قلتا ليهو شكرا ليك كتير يا عمو وهسي عن اذنك ماشة لي خالتو عايدة.. قال لي إذنك معاك يا بتي.. مشيت لي ناس خالتو عايدة سألتها من عمي ومهدي وين.. قالت لي ما عارفه طلعو مع يُوسف وما كلمو زول هم ماشين وين.. قلتا ليها خالتو الله يستر ما يكونو مشو لي خالي لاني عارفة عمي ومهدي مستحيل يخلو الموضوع يعدي بالساهل وخصوصاً بعد عرفو انو هو خنقني الله يستر من الح يحصل.. قالت لي ما تفكري بالشئ الكعب طوالي احتمال مشو معاهو يتفرجو على البلد ما اكتر.. قلتا ليها بتمنى يا خالتو يكون زي ما بتقولي عشان ما تحصل مشكلة تانية.. يارا قالت لي ما بضمن ليك لانو اي موضوع يكون فيهو اخوي يُوسف ما بيخلص من غير مشكلة.. خالتو عايدة قالت ليها يارا اسكتي مالك عايزة تخوفي البنت انتي براك شايفة هي خايفة كيف بدل تطمنيها عايزة تزيدي خوفها.. قالت ليها امي انا ما قاصدة كدا بس براك عارفة ولدك لمن يعصب ببقى كيف وخصوصاً في مواضيع بتخص الناس القريبين ليهو ما بسكت وهيام بعد يومين ح تبقى مرتو واكيد ما ح يرضى فيها الهبشة.. امها قالت ليها برضو الله يكذب الشينة وان شاء الله ما تحصل مشكلة.. قلتا ليها أن شاء الله، انتو يزيد وين ما شفتو.. يارا قالت لي مشى يجيب يسرا وراجلها شوية وبوصلو.. قلتا ليها ايواا ما كنتا عارفة.. قالت لي هي اصلا قبل ساعتين ضربت وقالت جايين وقربو يصلو.. امها قالت ليها هم زاتهم ببالغو كان يضربو من بدري على الأقل كان قدرنا نجهز ليهم حاجة.. يارا قالت ليها تجهزي لي شنو هي اصلا راجلها ح يوصلها ويمشي لي اهلو ويسرا ما غريبة تأكل اي شئ وثانيا تجهيزاتك دي خليها لي عرس يُوسف وهيام يوم الجمعة ومن بكرة الجيران والأهل ح يبدو يجو وتعالي على أسئلة وتفسيرات من رأسهم وخصوصاً انو العرس حصل سريع كدا.. امها قالت ليها ما تشتغلي بيهم ح يتكلمو يومين ويسكتو وثانيا دا عقد بس العرس لسه.. دخلتا جوة وخليتهم بيتكلمو بعد مسافة سمعتهم بسلمو عرفتا يسرا بتكون جات لبستا توبي وطلعتا سلمت عليهم وقعدت معاهم.. يسرا قالت ليهم امي في شنو انتو مستعجلين على العرس كدا.. خالتو عايدة قالت ليها دا اخوك انتي عارفاهو لمن يقول شئ بعملو حتى نحنا فاجئنا بي قرارو دا قبل يومين بس.. يسرا قالت ليها وما لقى غير دي عشان يعرسها نجود مالا عيبها وغير كدا هي بتحبو.. قلتا ليها على فكرة انا ما ميتة في اخوك هو القال عايزني وثانيا انا عندي اسم ما تقولي لي دي تاني وعن اذنكم انا ماشة دخلتا الغرفة جات يارا لاحقاني.. قالت لي ما تركزي ما يسرا هي طيبة والله بس بتقول اي كلام وما بتحسب نتيجة كلامها شنو بس مع الايام ح تتعرفي عليها كويس وتتعودي على طبعها.. قلتا ليها ولي الوقت داك مجبورة اقعد اسمع كلامها يعني وبعدين انا ما بقدر اتحمل وح ارد ليها رد ما بيعجبها وح تحصل مشكلة عشان كدا احسن انا افضل بعيدة منها.. قالت لي اتحملي اليومين دي بس وهي ح تمشي بيت راجلها اصبري بس.. قلتا ليها بحاول ما انو حاسة صبري خلاص انتهى دائما انا المفروض اصبر واتحمل واسامح واتجاوز انا عارفة مشكلتي لساني طويل وما بسكت بس هم البجبروني اتكلم معاهم بالطريقة دي.. قالت لي انا فاهماك بس حاولي طولي بالك واتحملي لانو الحياة دي ما بتمشي كدا مرة انتي شدي ومرة ارخي حاولي غيري فيك شوية اولا لي نفسك وثانيا عشان الناس بس الأهم لي نفسك أول لانو بالطريقة دي ما بتقدري تعيشي مع الناس لازم تطولي بالك وما تخلي نَفسك حار اتعودي انك تتجاوزي وخلي عندك شوية لامبالاة، انا ما عايزاك تزعلي من كلامي بس انا بقول كدا عشان مصلحتك لانو لو فضلتي تركزي مع كلام الناس كتير ح تكوني انتي الخسرانة عشان كدا اي كلامي تسمعي يدخل بي أذن ويطلع بالاذن الثانية عشان راحة نفسك.. قلتا ليها كلامك مافيهو شئ بزعل وانا عارفة كدا وحاولتا كتير اغير الحاجة دي ولسه بحاول على أمل انو يجي اليوم دا واكون اتغيرتا عشاني وعشان الحولي لاني حاسة اني اذيت ناس كتيرة بي اسلوبي دا وانا من جواي عايزة اتغير.. قالت لي طيب لو كدا كويس هو اصلا الزول مستحيل يتغير بي ليلة وضحاها بس الايام ح تساعدك وانا زاتي ح اساعدك.. بقينا قاعدين سمعتا صوت عمي ومهدي برة طوالي طلعتا قلتا ليهم مشيتو وين.. مهدي قال لي ولا مكان مشينا قريب وجينا.. قلتا ليهو قريب دا بيت خالي صح عملتو شنو ما تكونو اتشاكلتو معاهو.. عمي قال لي يابتي اهدي ما اتشاكلنا ولا شئ مشينا اتكلمنا معاهو كلام رجال وجينا دا كل الموضوع.. قلتا لي مهدي وانت ما اتهورتا وسويت شئ صح.. قال لي اطمني ما عملتا ليهو اي حاجة بس المرة الجاية لو هبشك ساي ح يكون لي معاهو تصرف تاني.. قلتا ليها عليك الله ما تعمل شئ انا كويسة الله يرضى عليك ماف داعي للمشاكل والله انا ما متحملة شئ تاني.. قال لي ما تخافي ما ح تحصل اي مشكلة انتي اطمني.. قلتا ليهو بتوعدني.. قال لي ما بوعدك لكن بحاول على قدر ما أقدر انو ما تحصل اي مشكلة.. قعدتا اتونستا معاهم مسافة بعدها قمتا صليت العشاء وصليت ركعتين استخارة وقريت دعاء الاستخارة {صلاة الاستخارة بتصلي ركعتين من غير الفرض وبعدها بتقرأ دعاء الاستخارة البقول: اللهم اني استخيرك بقدرتك وأسألك من فضلك فأنك تقدر ولا اقدر وتعلم ولا أعلم وانت علام الغيوب اللهم ان كنتا تعلم أن هذا الشئ (وتسميه بأسمه) خير لي في ديني وعاقبة أمري أو عاجل أمري وآجله فيسره لي ثم بارك لي فيهو وان كنتا تعلم أن هذا الشئ (وتسميه بأسمه) شر لي في ديني وعاقبة أمري أو عاجل أمري وآجله فأصرفه عني واصرفني عنه وقدر لي الخير حيث كان ثم رضني به اللهم اميين }
