وصلنا البيت لقينا باب الشارع فاتح قلتا ليهو شفتا قلتا ليك في شئ حاصل جرينا دخلنا جوة وانا قلبي مقبوض دخلنا البرندا لقينا امي واقعة في الأرض وغرقانة في دمها...... جريت عليها امي امي قومي حسن اتصل بالاسعاف سريع بقيت بضغط على مكان الضربة في رأسها عشان النزيف يوقف وبقيت ببكي امي عليك ما تخليني انتي كمان انا بموت ما بتحمل.. حسن قال لي اهدي أن شاء الله ح تكون بخير بس هسي لازم نأخدها سريع على المستشفى لانو الإسعاف ح يتأخر شديد.. جاء صلاح داخل قال لينا حصل شنو وعمتي مالا.. حسن قال ليهو انت الجابك شنو.. صلاح قال ليهو ابوي كلمني انكم جيتو تشوفو عمتي وقال لي الحقكم احتمال تحتاجو شئ.. قلتا ليهم دا ما وقت الكلام دا خلونا نودي امي المستشفى نحنا بنخسرها.. حسن وصلاح شالو امي وركبناها في العربية واتحركنا على المستشفى يارب تحفظ لي امي انا ما لي غيرها يارب ما اخسرها.. وصلنا المستشفى نزلناها ودخلوها غرفة العمليات بقينا قاعدين ومستنين الدكتور يطلع ويطمنا عليهم بعد مسافة جو ناس عمي كلهم.. عمتو عفراء جات حضنتني قالت لي هيومة حبيبتي ما تخافي أن شاء الله امك ح تبقى كويسة وح ترجع ليك بالسلامة.. قلتا ليها أن شاء الله يا عمتو انا امي ما فضل لي غيرها ما بقدر اتحمل فراقها هي كمان ابوي ما تم ثلاثة شهور ميت وانا لسه قلبي ما برد كتير علي انا لي بحصل معاي كل دا عملتا شنو عشان استاهل اتعذب كدا وافقد اي زول بحبو.. عمتو قالت لي يا بتي دا كلام شنو انتي جنيتي عايزة تعترضي على حكمة ربنا كمان استغفري ربك وانعلي الشيطان كل شئ بحصل لي خير وانتي خليك واثقة في ربنا وكل شئ بحصل لي حكمة بيعلمها ربنا انتي عليك بالصبر ونهاية الصبر دائما جبر وما ضاقت الا لتفرج.. قلتا ليها ونعمة بالله بس والله كتر علي وقلبي ما بتحمل اخسرها هي كمان.. قالت لي خلي أملك في ربنا كبير وما بحصل الا الكاتبو ربنا وهسي خلينا نقوم نصلي وندعي ليها.. قلتا ليها حاضر قمنا مشينا المسجد الفي المستشفى اتوضينا وصلينا وقعدنا ندعي ليها بعد مسافة قمنا مشينا قعدنا جنب غرفة العمليات قام مهدي وروان ورهف ومنذر جو بعد غيرو ملابسهم حقت الحفلة.. مهدي قال لينا خالتي منى كيف أن شاء الله كويسة الدكتور قال ليكم شنو.. قلتا ليهو بهمك يعني تعرف لو هي كويسة ولا لا.. قال لي اكيد بهمني ولا ما كان جيت وسألتا عنها.. قلتا ليهو ياريتك ما جيت وهسي امشي من هنا كمل عرسك بي راحتك.. عمي عبد الجليل قال لي هيام دا ما وقتو خلينا هسي نطمن على امك الأول وبعد كدا اعملي العايزاهو بس هسي ما وقتو لو سمحتي.. قلتا ليهو اصلا الحصل دا كلو بي سببو لو ما عمل عرسو هسي وامي غصبتني عشان امشي ما كان حصل دا كلو وهسي امي كانت معانا.. مهدي قال لي وانا ذنبي شنو في الحصل بعدين انا ما جبرتك تجي.. عمي عبد الجليل قال لينا صحي انتو الحصل شنو وامك وقعت ولا شنو.. قلتا ليهو لالا ما وقعت ظاهر في زول. دخل وضربها لانو لمن وصلنا البيت لقينا باب الشارع فاتح يعني ضربها وهرب.. حسن قال لي طيب منو بكون ليهو مصلحة يعمل كدا وهدفو شنو.. قلتا ليهو ما عارفه بس اي كان السبب في الحالة الوصلت ليها امي دي انا ما ح اخليهو واكيد ح يتعاقب.. عمي عبد الجليل قال لي ويمكن الدخل البيت كان عايز يسرق ولمن شاف امك خاف وضربها.. قلتا ليهو لو كان حرامي أو اغيرو انا ما ح اسيب القصة دي لمن اعرف منو وراها واخليهو يتعاقب على عملتو دي.. عمتو وداد قالت لي قصدك شنو بي كلامك دا.. قلتا ليها ما قصدي ولا شئ يس العمل كدا عاجلا أو آجلا ح يتكشف بس يدعي الله انو امي تقوم وتبقى كويسة.. عمي عبد الفتاح قال لي انتي بتلمحي لي شنو قصدك نحنا عملنا كدا.. قلتا ليهو انا ما قلتا كدا العفو بس لو مين ما كان العمل كدا ح يتحاسب.. عمو عبد الجليل قال لي هيام خلاص كفاية كدا هسي دا كلو ما وقتو خلينا نطمن على امك الأول والكلام دا كلو ملحوق.. الدكتور طلع من غرفة العمليات جرينا عليهو قلتا ليهو يا دكتور طمني امي كويسة صح ما ماتت رد علي.. قال لي الحمدلله الوالدة لسه عايشة ونحنا عملنا كل العلينا بس لسه ما انجاوزت مرحلة الخطر لانو الضربة كانت قوية شديد وهسي ح ننقلها لي العناية المركزة وح تبقى تحت المراقبة لحدي ما وضعها يتحسن بس خليكم جاهزين لكل الاحتمالات لانو صعب الزول يعيش بعد ضربة قوية زي دي انتو أدعو ليها وخلو املكم في ربنا كبير.. قلتا ليهو يعني ممكن تموت.. قال لي الأعمار بيد الله نحنا عملنا العلينا والباقي على ربنا عليها العافية ومشى.. عمتو عفراء قالت لي اتفائلي.. قلتا ليها انتي ما سمعتي الدكتور قال انو صعب الزول يعيش بعد ضربة زي دي وانو وضعها لسه ما مستقر يعني ممكن انها تموت.. عمتو قالت لي ما تفاولي عليها أن شاء الله ح تقوم وتبقى كويسة امك قوية وما ح تخليك بإذن الله.. حسن قال لي هيومة انا ما متعود عليك ضعيفة كدا وامك ح تقوم انتي خليك قوية ومتماسكة عشان عمتو لمن تقوم ح تزعل لو شافتك وانتي بالحالة دي.. قلتا ليهو يا حسن ح تقوم صح.. قال لي اكيد ح تقوم وما ح تلقيها بعد كم يوم الا قاعدة معاك وبتتونسو.. صلاح مشى جاب لي عصير قال لي اشربي وروقي أعصابك شوية.. قلتا ليهو ما عايزة.. قال لي كدا بزعل منك والله اشربي عشان خاطري طيب.. قلتا ليهو حاضر شلتا شربتا منو وقعدنا.. عمو عبد الجليل قال لينا القعدة هنا ما ح تفيدكم ارجعو البيت وح نقعد انا وعفراء هنا ولو حصل اي شئ ح نكلمكم.. قلتا ليهو عمو انا ما ح امشي من هنا واخلي امي براها.. قال لي هيومة اسمعي الكلام وارجعي معاهم البيت.. قلتا ليهو ما برجع ودا قراري النهائي انا ما بخلي امي هنا وامشي.. قال لي خلاص اقعدي وخليهم يرجعو.. حسن قال ليهو انا زاتي يا ابوي ح اقعد لو احتجتو لي شئ عشان اكون معاكم.. منذر قال بي صوت شوية واطي اصلا انت لو ما قعدتا معاها ما بترتاح مكان ما قاعدة انت بتتحشر.. هم ما سمعو كلامو انا قلتا ليهو منكر قلتا شئ.. قال لي ما قلتا اي شئ.. مهدي قال لي عمي انا كمان ح اقعد معاكم.. قلتا ليهو شكراً ما محتاجين وجودك هنا انت عريس سوق مرتك وامشي من هنا ووشك ما عايزة اشوفو.. عمو عبد الجليل قال ليهو مهدي يا ولدي ما عايزين مشاكل سوق مرتك وامشو ارتاحو ولو حصل اي شئ نحنا بنكلمكم.. قال ليهو حاضر يا عمي البتشوفو مناسب.. كلهم مشو وبقينا قاعدين نحنا الأربعة بس بقيت قاعدة قدام غرفة العناية المركزة وبعاين لي امي وهي الأجهزة مركبة فيها ورأسها ملفوف بالشاش تلقائياً دموعي نزلت صعبة علي اشوفها بالحالة دي ياريت ما سمعتا كلامها ومشيت لو قعدتا معاها كان قدر احميها وما حصل ليها دا كلو.. حسن قال لي عارفك بتفكري في شنو بس ما تلومي نفسك لانك ما كنتي عارفه ح يحصل كدا ولا في زول فينا اتوقع الح يحصل دا.. قلتا ليهو لو كنتا اصريت عليها زيادة اني اقعد معاها كان اقتنعت.. قال لي الحصل دا مقدر ومكتوب وحتى لو كنتي معاها كان حصل كدا برضو هسي دا كلو ما مهم دعواتنا ليها هي الح تفيدها في الوقت دا بس.. جاء عمو عبد الجليل جاب معاهو اكل قال لي تعالي اكلي يا بتي.. قلتا ليهو والله يا عمو ما عندي نفس اكل اي شئ.. قال لي اكلي حاجة بسيطة تسندي بيها نفسك بس عشان امك لمن تقوم ما تشوفك بالحالة دي.. قلتا ليهو بأكل بعدين هسي ما قادرة.. قال لي عشان خاطري بس اكلي حبة.. بعد إصرار منو وافقتا اكل.. بقيت قاعدة في الكرسي ما حسيت على نفسي نمتا متين صحيت مع أذان الصبح قمتا مشيت انا وعمتو عفراء نصلي في مسجد النسوان وناس عمي مشو جهة الرجال صلينا وقعدنا قرينا قرأن شوية ودعينا ليها لحدي ما الشمس شرقت مشينا لي امي لقينا الدكتور طالع من غرفتها قلتا ليهم طمنا يا دكتور امي بقت كيف.. قال لي والله ما عارف اقول شنو بس وضعها لسه على حالو وماف اي تحسن ملحوظ ولسه ما اتجاوزت مرحلة الخطر.. قلتا ليهو كيف يعني ومن امبارح خاتنها هنا ومناعننا نشوفها لي شنو.. قال لي انا مقدر خوفك على الوالدة بس نحنا عملنا كل العلينا وزيادة بس ماف استجابة من جهة امك.. قلتا ليهو لو عملتو العليكم هسي كان صحت واتحسنت.. عمتو عفراء قالت لي هيومة اهدي ما كدا هم دكاترة وعارفين بعملو في شنو.. قلتا ليها لو بعرفو هسي امي كان صحت وبقت كويسة.. عمو عبد الجليل قال لي الدكتور انا بعتزر ليك بالنيابة عنها هسي هي زعلانة على أمها وما عارفة بتقول في شنو.. الدكتور قال ليهو ولا يهمك انا مقدر حالتها وكل زول في مكانها كان عمل كدا واكتر.. قلتا ليهو هسي بقدر اشوفها.. قال لي اكيد نادى ممرضة وقال ليها دخلني جوة وقال لي حاولي ما تطولي عشان ما تتعبيها.. مشيت مع الممرضة لبستني الف حاجة حتى خلتني ادخل ليها لقيت في كرسي قعدتا فيهو مسكتا يد امي قلتا لي يمة ما عايزة تقومي وتشوفيني يعني انتي عارفة انا ما لي زول غيرك ما تخليني زي ما ابوي خلاني انا والله ما بقدر اتحمل اخسركم الإثنين على الأقل انتي خليك معاي وما تحرميني من وجودك لاني من غيرك ما بقدر الله يرضى عليك قومي انا محتاجة ليك شديد ما تخليني وبقيت ببكي بعد مسافة مسحتا دموعي وطلعتا برة لقيت في مرة وراجل اول مرة اشوفهم واقفين مع عمي وعمتي بقيت بعاين ليهم ساي وما عرفتهم.. جات المرة قالت لي انتي هيام صح.. قلتا ليها اي انا هيام بس انتي منو ما عرفتك.. قالت لي انا منال.. قلتا ليها برضو ما عرفتك.. عمي عبد الجليل قال لي هيومة بتي دي خالتك منال ودا خالك متوكل واشر على الراجل.. قلتا ليهو ديل منو وانت بتعرفهم من وين ولا هم اصلا بعرفوني من وين.. عمي قال لي ديل اخوان امك.. بقيت بحاول اتذكرهم بعد مسافة اتذكرتا انو امي كان بتحكي لي انو عندها اخو واخت بس من وقت عرست ابوي قطعو علاقتهم معاها عشان ما كانو موافقين انو تعرس ابوي وتاني ما جو سألو عنها نهائي.. قلتا ليهو وهسي الجابهم هنا شنو.. عمي قال لي كيف يعني جابهم شنو اكيد جو يطمنو على اختهم.. قلتا ليهو بعد السنين دي كلها أخيراً اتذكرو عندهم اخت وبعدين الكلمهم انها في المستشفى منو.. عمي قال لي انا الكلمتهم لانو من حقهم يعرفو.. قلتا ليهو هم خسرو الحق انو يعرفو من يوم خلوها وما سألو عنها وهسي خليهم يمشو من هنا.. خالتو منال قالت لي كيف يعني نمشي واختي في العناية وما عارفين لو هي كويسة ولا لا.. قلتا ليها تمشو وتكملو حياتكم زي ما السنين الفاتت ما سألتو عنها ولا جيتو شفتوها هسي ما تسألو.. عمتو عفراء قالت لي هيومة عيب ما تتكلمي معاهم كدا في النهاية دي خالتك وهو خالك.. قلتا ليها انا ولا عندي لا خالة ولا خال السنين دي كلها كانو وين جايين هسي بعد اختهم عايزة تموت.. عمتو عفراء قالت لي ما تفاولي على امك أن شاء الله ح تبقى كويسة.. قلتا ليها أن شاء الله وهسي يا عمو زي ما خليتهم يجو ح تمشيهم من هنا.. خالو متوكل قال لي نحنا ما ح نمشي من هنا الا نطمن على اختي.. قلتا ليهو اختك هدي واقفة معاك وكويسة على ما أعتقد وتاني انت ما عندك اخت هنا.. خالتو منال قالت لي انتي لي بتتعاملي معانا بالطريقة دي.. ضحكتا ضحكة استهتار قلتا ليها عايزاني اتعامل معاكم كيف اخدكم بالاحضان ولا اعمل شنو انتو ولا يوم ما جيتو سألتو عن امي وقلتو هي عايشه ولا ميتة كويسة ولا لا عمركم كلو ما فكرتو تجو تشوفوها وتطمنو عليها ولا كأنها اختكم يعني لحمكم ودمكم وهسي جايين عادي ولا كانو في شئ وعايزني اتعامل معاكم عادي انا امي طول السنين الفاتت قضت ليالي طويلة وهي بتبكي وفاقداكم وانتو ما فكرتو فيها هسي جايين تسألو عنها ودا كلو عشان عرست ابوي بس وانتو زي ما عشتو السنين الفاتت من دون ما تجو تشوفوها هسي برضو ح تمشو وتنسو عندكم اخت.. عمو قال لي هيومة عيب البتقولي دا في النهاية هم اخوان ولو مهما اتشاكلو وبعدو عن بعض برجعو يتصالحو ما تعملي كدا.. قلتا ليهو ما اعمل شنو اصلا الغلط غلطك من البداية ما كان في داعي تكلمهم.. خالو متوكل قال لي كيف يعني ما يكلمنا دي اختنا وواجب علينا نكون معاها في وضع زي دا.. قلتا ليهو هسي انت مصدق كلامك دا قال اختنا قال ومن زمان لي ما اتذكرتا انو عندك اخت ولا هسي ضميرك صحى وقررتا تشوفها.. خالتو منال قالت لي من حقك تزعلي مننا انو ما جينا سألنا منها بس هسي عرفنا غلطنا وجينا نصلحو.. قلتا ليها جيتو بعد فات الأوان كنتو وين لمن ابوي وراجلها مات ولا في زول فيكم جاء العزاء وإدانا الفاتحة ساي وكنتو وين لمن اختكم احتاجت ليكم وانتو كنتا ماف.. خالتو قالت لي كنا عايزين نجي بس.. قلتا ليها ما بس ولا شئ ما عايزة اسمع منكم اي اعزار وهسي اتفضلو امشو من هنا لو سمحتو.. عمي قال ليهم زي ما شايفين هيومة اعصابها تعبانة لو سمحتو امشو هسي وتعالو مرة تانية.. قلتا ليهو ولا مرة ثانية ولا ثالثة واحسن ما يجو هنا تاني.. قبل اخلص كلامي شفتا الدكتور ومعاهو كم ممرض جاريين على غرفة امي حاولتا ادخل بس منعوني بقيت امشي واجي وخلاص اعصابي باظت وحيلي مات واطرافي بقت باردة تلج وحسيت رأسي لافي وبقيت اشوف سواد سواد بعد مسافة الدكتور جاء طالع وملامح وشو نهائي ما بتبشر بالخير وانا خلاص الفيني انتهت.. الدكتور قال لينا.........
________________♥️_______________
🌸ُ... هي امي ، ومأمني ، وأماني ، وأمتي ، ومسكني ، وسكني ، وروحي ، وراحتي ، وكل كلي ... امي والباقي تعوضه الأيام
🌸ُ... اللهم أمي ثم أمي ثم أمي فلا تريني فيها ابدا بأسا يبكيني يا ربي لأخر يوم في عمري واعني على برها ورعايتها وطاعتها كما تحب وترضى يا ربي وإغفر لي ذنبي وتقصيري في حقها وأرزقني عفوها عني يا ربي ✨💗
في امان الله♥️
