سمعتا صوت الباب بدق بصوت عالي لمن انخلعتا مشيت بي خطوات برة وقلبي كان بدق شديد..... فتحتو طلع دا مهدي قلتا ليهو ما بتعرف تدق الباب زي البشر خوفتنا ياخ.. لزاني ودخل قال لي انا بضرب الباب كدا لو ما عجبك اضربي رأسك بي أقرب حيطة.. قلتا ليهو انا ما بضرب رأسي عشان واحد زيك.. قال لي بطلي كلام كتير وطيري من قدامي.. قلتا ليهو اصلا ما حابة اشوفك وشك البقطع الخميرة من العجين دا.. امي جات من هناك حضنتو وقالت ليهو يا ولدي مشيت وين ليك يومين ماف.. زحاها منو قال ليها بطلي الاهتمام الكذاب دا وتمثلي انك بتحبيني.. قالت ليهو انت ولدي كيف ما احبك.. قلتا ليها امي دا ولا بستاهل اي شئ هسي بكون جايي من هناك وكالعادة عماتو حرشوهو علينا وهو زي العوير بسمع في كلامهم وبنفذو من غير اي اعتراض.. قال لي انتي لو ما لميتي خشمك واحترمتي نفسك ح يكون عندي معاك تصرف تاني.. قلتا ليهو اها المرة دي قالو ليك تعمل لينا شنو عايزة تضربني ولا تخنقني ولا شنو.. امي قالت لي هيومة دا كلام شنو ما تنسي دا اخوك الكبير ولازم تحترميهو.. قلتا ليها انا بحترمو لمن هو يكون بستحق الاحترام لكن انا ما بحترم لي زول شورتو وكلامو من نسوان لمن يبقى عندو رأيي انا بحترمو.. قال لي انتي بتجبري حظك معاي كتير ما تخلي صبري ينفذ واعمل ليك شئ تندمي عليهو.. قلتا ليهو انت ما ح تقدر تعمل لي اي شئ.. امي قالت لي هيام احترمي نفسك واتكلمي مع اخوك عديل.. قلتا ليها بعد كل شئ انتي لسه بتدافعي عنو حتى وهو غلطان انتو عارفين اعملو العايزنو انا ما دخلني فيكم ودخلتا غرفتا فتحتا كتاب الدراسات وبقيت قاعدة اقرأ، جاء مهدي وقف قدامي عاينتا ليهو من فوق لي تحت ورجعتا اقرأ.. قال لي قومي.. قلتا ليهو شايفني قاعدة اقرأ لو عايز شئ امشي لي امي.. قال لي انا عايزك انتي التعمليهو.. قلتا ليهو وانت شايفني انا ما فاضية قاعدة اقرأ امتحاناتي قربت في شنو.. قلع مني الكتاب وقال لي عندي ملابس قومي وغسليها لي.. قلتا ليهو بتعرف الغسال بي وين امشي وديها ليهو.. قال لي انا عايزك انتي بذات تغسليها.. قلتا ليهو مش كنتا قاعد مع عماتك وبناتهم امشي خليهم يغسلو ليك انا ما بغسل وهسي اديني كتابي.. شرط الغلاف حق الكتاب.. قلتا ليهو انت مجنون ولا شنو اديني كتابي.. قال لي لو ما قمتي غسلتي هسي بشرطو ليك كلو.. قلتا ليهو ما بغسل ليك واديني كتابي وامشي خليني اقرأ.. قال لي القرو عملو شنو وريني.. قلتا ليهو ماف داعي اوريك عملو شنو هسي اديني كتابي واطلع من هنا ياخ.. امي جات بي صوتنا العالي قالت لينا في شنو.. قلتا ليها دا ولدك دا شال كتابي وبشرط فيهو وما عايز يخليني اقرأ.. مهدي قال ليها انا قلتا ليها تغسل لي رفضت.. امي قالت ليهو جيب ملابسك انا بغسلها ليك.. مهدي قال ليها خليها هي ح تغسلها.. امي قالت ليهو شايف اختك قاعدة تقرأ وامتحاناتها قربت خليها.. قال ليها قراية شنو وكلام فاضي شنو القراية غير قلة الأدب ما بتعلم البنات شئ.. قلتا ليهو انت من زمن التفكير الرجعي والمتخلف دا نحنا في العصر ال21 وانت لسه بتفكر كدا.. قال لي امي شايفة بتك وقرايتها بتعلمها شنو.. امي قالت لي هيومة بطلي قلة أدب واقعدي اقري وانت يا مهدي اطلع معاي خليها.. مهدي لزاها لمن قربت تقع مشيت مسكتها قلتا ليهو انت حيوان ولا شنو كيف يعني تلز امي بالطريقة دي انت عايز تصل لي شنو ولا كالعاده ديل عماتك قالو ليك تعمل فينا كدا انت عايز مننا شنو ياخ اطلع من هنا.. مسكني من شعري وقال لي انتي لسانك طول وبقى عايز ليهو قص.. قلتا ليهو البقصو لي منو انت البتسمع كلام النسوان من غير ما تعترض زي الطير وهسي جاي تستقوى علي انا وامي.. امي جات تفكني منو لزاها تاني لمن قربت تقع إلا ابوي جاء مسكها ما عارفة متين جاء لانو مع الكواريك ما سمعنا صوت الباب وهو بفتح.. ابوي جاء فكاني منو وأدى مهدي كف قوي انا لمن خفتا.. ابوي قال ليهو دي آخرة تربتي ليك ترفع يدك على اختك وامك عدم الاحترام وقلة الأدب دي جبتهم من وين انا علمتك تتعامل مع النسوان كدا.. مهدي قال ليهو ابوي انت ما عارف شئ.. ابوي قال ليهو ما عايز اعرف ولا اسمع منك ولاشئ وهسي اطلع من بيتي لانو راجل ما بحترم نسوان بيتي ما بقعد في بيتي ولا دقيقة ولمن تتعلم تحترم البيت والناس القاعدين هنا تعال راجع.. مهدي قال ليهو بتطردني يا ابوي عشان ديل.. ابوي قال ليهو اي بطردك ولحدي ما تتعلم الاحترام ارجع وهسي اطلع من البيت دا.. مهدي مشى وامي طلعت وراهو.. ابوي قال لي في شنو ولي اصواتكم كانت عالية.. حكيت لي ابوي الحصل كلو.. قال لي هيومة يا بتي مهدي اخوك الكبير ما صح تتكلمي معاهو كدا لو مهما حصل انتو الإثنين ما ليكم غير بعض.. قلتا ليهو عارفة يا ابوي بي ولدك براهو بدأ وشوف حتى شرط لي الغلاف حق كتابي.. ابوي قال لي ما مشكلة هسي بلصقو ليك.. امي جات داخلة قالت لي ابوي لي طردتو كان ممكن تتفاهم معاهو بي طريقة أهدأ من كدا لكن ما بالشكل دا.. قلتا ليها امي بعد الحصل كلو انتي لسه بتدافعي عنو ما تنسي هو رفع يدو عليك وكان ح يرميك انتي مستنية يقتل واحدة فينا.. ابوي قال لينا خلاص اسكتو ما عايز اسمع صوت واحدة فيكم خلاص الموضوع دا ح يتقفل هنا وما عايز يتفتح مرة تانية ومشى.. امي قالت لي هسي ارتحتي بعد ابوك طرد اخوك.. قلتا ليها انا ذنبي شنو لو ولدك بغلط كل مرة انتي بتلوميني انا وبتقيفي مع مهدي مرة واحدة بس اقيفي معاي زي ما بتعملي معاهو انا زاتي بتك ما جايباني من الشارع لي مرة واحدة بس شوفي اغلاط مهدي وما تقعدي تقولي هو بعمل كدا عشان الحصل معاهو في الماضي.. قالت لي انتي اكتر واحدة عارفة مهدي عاش شنو لانو كل شئ حصل قدامك اتفهميهو شوية.. قلتا ليها انا اتفهمتو اكتر من اللازم وكف بي الكيل خلاص ما ممكن كل مرة انا اللازم أتفهم واستوعبو انا ذنبي شنو بالحصل ليهو.. قالت لي انتي من متين بقيتي قاسية كدا وما بهمك غير نفسك.. قلتا ليها من يوم فضلتي مهدي علي انا بقيت كدا وعليك الله يا أمي انا تاني ما عايزة اسمع اي شئ بخص مهدي ولا عايزة ادخل فيهو.. قالت لي اي انتي خليك كدا ما تتغيري نهائي وطلعت خلتني.. انا تعبتا خلاص من حاجة اسمها مهدي كل مرة بجي البيت بعمل مشكلة وبمشي بس المرة دي زودها تصل بيهو لي درجة يرفع يدو على امي كدا كتير وبعد دا كلو امي لسه واقفة معاهو وشايفاهو ملاك ما بغلط وكل شئ بتبررو ليهو بالحصل ليهو زمان انا خلاص صبري قرب يخلص ربنا يديني زيادة صبر عشان اتحمل.. بعد المغرب عملتا الاكل ومشيت راضيت امي وابوي واعتزرتا منهم وقعدنا نأكل ونتونس ورجعنا سمنة على العسل بقينا قاعدين لي بعد العشاء قمتا صليت وقعدتا اقرأ بعد خلصتا مشيت جبتا تلفون امي عشان عاملة بيهو المنبه ختيتو ورقدتا نمتا
