عمتو وداد عاينت لي وقالت لي هيام سامحيني والله انا لمن رسلتو بس عشان يخوفها ما كنتا متخيلة انو ح يقتلها.. قلتا ليها عمتو يخوف منو ومنو المات انا ما فاهمة انتي بتتكلمي عن شنو.. قالت لي انا الكنتا السبب في موت امك......... قلتا ليها كيف يعني انتي السبب في موت امي انا ما فاهمة.. قالت لي بصوت متقطع من البكى انا بس رسلتا مؤيد عشان يخوفها بس هو ضربها لمن ماتت والله انا ما كنتا عايزاها تموت كنتا عايزة اخليها تخاف بس ما كان قصدي تموت.. عمتو ندى قالت ليها انتي مجنونة يا وداد ترسلي ليها مؤيد لي شنو انتي ما جنيتي معقوله الحقد والكره وصلك لي درجة انك ترسلي يقتلوها.. عمتو وداد قالت ليها انا ما قلتا ليهو يقتلها هو من رأسو عمل كدا.. عمتو ندى قالت ليها حتى ولو انتي من البداية ما كان ترسلي ليها انتي ما كفاك العملتي فيها خليتي مهدي يكرهها هي وبتها بدون سبب وكنتي مفهماهو انو منى السبب في انو امو خلتو وهي اصلا امو اتخلت عنو من قبل ما منى تظهر في حياتنا وغير المشاكل الكنتي بتعمليها ليها ما كفاك دا كلو وقتلتيها.. مهدي قال ليها عمتو ندى دا كلام شنو القلتي دا.. عمتو ندى قالت ليهو السمعتو صح منى ما كان ليها اي علاقة امك خلتك وهربت براها ومنى ما ليها ذنب بس عشان وداد بتكرهها فهمتك انو هي السبب انو امك خلتك ومشت.. مهدي وروان بقو يعاينو ليها وهم مصدومين ما مصدقين انو هي بتعمل كدا.. عمو عبد الجليل قال ليها انتي مصنوعة من شنو يا وداد انتي ما بتخافي الله الخلقك شايفة حقدك وصلك لي ياتو محل بقيتي قاتلة ويتمتي بنت مسكينة أن شاء الله هسي مبسوطة انا ما مصدق انك اختي كيف قدرتي تعملي كدا من وين جبتي القسوة دي.. قلتا ليها امي عملت ليك شنو عشان تقتليها عملت ليك شنو فهميني زي ما هي ماتت انتي لازم تموتي مشيت خنقتها انتي لازم تموتي انا امي ماتت انتي ما لازم تفضلي عايشة ابدا.. حسن جاء قال لي هيام فكيها انتي مجنونة عايزة تعملي شنو وزحاني منها.. قلتا ليهو حسن فكني هي لازم تموت انتي سمعتها هي القتلت امي.. قال لي سمعتها بس البتعملي دا غلط.. قلتا ليهو والعملتو هي ما غلط يعني هي حرمتني من امي بي سببها انا خسرتا امي فاهمة يعني شنو خسرتا امي بي سببها.. قال لي انا عارف انو خسرتي امك بس انتي لو قتلتيها ح يكون الفرق بينك وبينها شنو وريني انتي أعقل من كدا اخذي الشيطان واستهدي بالله وختي الرحمن في قلبك واستغفري.. قلتا ليهو أهدأ كيف وانا عارفة انو هي القتلت امي وريني بس أهدأ كيف وبعد دا بكل وقاحة جاية تعترف وكأنو قتلت ليها نملة ما إنسانة.. قال لي عارف ومعاك حق في كل كلمة بتقوليها وانا ما بلومك بس حقك ح يأخدو ليك القانون ما انتي مش انتي كنتي بتحلمي تبقي محامية ومهمتك انك تدخلي المذنبين السجن وهسي هي ح تدخل السجن.. قلتا ليهو حسن انت جادي في كلامك ح تدخل السجن صح.. قال لي اي انا عند كلمتي ليك والقتلت عمتي منى لازم تتعاقب.. رهف قالت ليهو حسن انت جنيت ولا شنو كيف يعني عايزة تدخل امي السجن وعشان منو عشان هيام انا مستحيل اسمح ليك تعمل فيها كدا.. حسن قال ليها ما على كيفك امك غلطت ولازم تتعاقب على غلطها.. عمي عبد الفتاح قال لي حسن انت ما تدخل في الموضوع دا نحنا بنعرف نحلو وشرطة واحدة ح تعرف بالموضوع دا ماف منى ماتت وخلاص وحتى لو وداد انسجنت ما ح ترجع عشان كدا اقفلو الموضوع والحصل خلاص حصل انسو وكملو حياتكم عادي.. بقيت واقفة اعاين ليهو ومصدومة هو كيف قدر يقول كدا دي امي الماتت ما اي زول البرود والقسوة دي جايبها من وين.. قلتا ليهو كيف يعني ننسى الحصل ما فاهمة، الماتت دي امي فاهم يعني شنو امي وعايزني انسى واسامح الحرمتني منها عادي كدا انت شكلك بتحلم.. قال لي يابت ما تناقشيني كتير انا قلتا كلامي وح يتنفذ من غير اي اعتراض .. قلتا ليهو كلامك دا بلو واشرب مويتو ولا انت ولا اي زول غيرك ح يقدر يمنعني اشتكي على المجرمة دي واخليها تأخد عقابها على العملتو.. قال لي ما على آخر الزمن شافعة زيك تجي تكسر كلامي وتعمل الفي رأسها.. قلتا ليهو اي ح اعمل الفي رأسي وماف زول فيكم ح يقدر يمنعني.. جاء رفع يدو عايز يضربني عمو عبد الجليل مسك ليهو يدو وقال ليهو في دي غلطتا يا اخوي وانا ما بسمح ليك تتمادى معاها اكتر اختك غلطت ولازم تتعاقب على غلطها وهيام معاها حق تطلب انو القتلت امها تتعاقب وماف زول فينا ليهو حق أنو يتدخل في قرارها دا.. عمي عبد الفتاح قال ليهو حتى انت يا عبد الجليل واقف معاها انت سامع نفسك بتقول شنو البنت دي عايزة تدخل اختك السجن وبعدين انا كلمتي ما بتراجع عنها غصباً عنكم كلكم ح تسمعو كلامي وتنفذوهو من غير اعتراض انا ما بسمح انو اختي تدخل السجن فاهم.. عمو عبد الجليل قال ليهو اختك دي كانت سبب في موت إنسانة بريئة وما ليها ذنب وانت بعد السمعتو كلو واقف معاها بس انا ما بقدر اكون زيك لانو ديل أمانة اخوي لي وبي سبب اختك انا ما حافظتا على الأمانة دي لكن ح أوفي واجبي واخلي العمل كدا يتعاقب على العملو.. خليتهم بيتشاكلو طلعتا مشيت على قسم الشرطة القريب مننا اصلا كانت قضية امي مفتوحة لانو ما كانو عارفين هل لو دي حادثة ولا جريمة مشيت للضابط المستلم القضية وقدمتا شكوى على عمتي وداد جو معاي الضابط ومعاهو شرطيين تانين البيت وصلنا ودخلنا لقيناهم لسه بيتشاكلو.. الضابط قال لي عمتو وداد تمشي معاهم على القسم بجريمة انها متهمة بي قتل امي.. عمي عبد الفتاح قال لي عملتي الفي رأسك صح انا قلتا ليك شنو مش قلتا ليك ما تدخلي الشرطة في القصة دي.. وجاء عايز يضربني.. الضابط مسكو قال ليهو انت بتعمل شنو يا سيد انتبه لي حركاتك.. عمي عبد الفتاح قال ليهو ما حضرتك البتعملني اتصرف مع بنت اخوي كيف وهسي زح من قدامي.. الضابط قال ليهو لو ما زحيت ح تعمل شنو انت عارف انا بقدر اسجنك بي تهمة انك بتعتدي على ضابط شرطة أثناء أداء عملو.. عمي طوالي زح من قدامو والشرطة ساقت عمتي وداد معاهم.. رهف قالت لي هسي ارتحتي خلاص انتي عايزة مننا شنو اها أن شاء الله مبسوطة بعد شلتي امي مننا انتي كرهك لينا وحقدك ح يوديك وين ما كفاية انك كنتي عايزة تشيلي راجلي مني ولمن ما قدرتي شلتي أمي مننا.. قلتا ليها انتي بتقولي في شنو انا ما شلتا منكم اي شئ انتي امك اخدت مني امي وحرمتني منها انتو العايزين مني شنو، وراجلك البتتكلمي عنو دا انا ما عايزاهو لاني لو كنتا عايزة ما كان خليتو يجيك وانتي وانا والكل عارفين كويس انو لو ما انا رافضتو ما كان فكر فيك مجرد تفكير ساي، وثانيا انا لو عايزاهو في أقل من دقيقة بخليهو يطلقك ويعرسني انا وانتي براك عارفة انو هو لي هسي عايزاني فأحسن تحترمي نفسك وتتلمي وتطلعي من بالي واتقي شري لأنك عارفة النار لو ولعت بتحرق كل شئ عشان كدا انتبهي ما تحرقك معاها ولي مصلحتك خليك بعيدة مني أحسن ليك دخلتا جوة الغرفة وقفلتها علي كلهم بقو واقفين برة وبدقو لي في الباب.. قلتا ليهم خلوني عايزة اقعد براي شوية لمن احس نفسي كويسة بطلع بس هسي خلوني محتاجه اقعد مع نفسي شوية تاني ما سمعتا صوتهم..
