نرجع لي القصة في الخرطوم:-
من جانب منذر:-
الليلة خلاص عقدو ليها وبقت لي واحد غيري وح تكمل معاهو باقي حياتها انا الغلطان لاني فرطتا فيها وفي الوقت الكانت قدامي ومعاي خسرتها من غير ما احاول اصلا عشان اكسبها واخليها تحبني هي الانسانة الوحيدة الاتمنيتها تكون معاي بس براي خسرتها ياريت لو يرجع بي الزمن تاني وح اعمل كل البقدر عليهو عشان تكون لي لاني لي هسي بحبها وما قادر اشيلها من بالي ولا اطلعها من قلبي بس هسي الفايدة شنو وهي بقت لي واحد تاني وح تكمل معاهو باقي حياتها ،انت يا منذر عايزها تعمل شنو وانت قدامها مشيت اتزوجتا وعشتا حياتك ح تستناك مثلا ما اكيد ح تمشي وتكمل حياتها.. انت لسه قاعد تفكر فيها صح متين انا ح ارتاح منها اقتنع خلاص هي عرست وتاني ما ح ترجع ليك كفاية تفكير فيها.. رهف عليك الله ما تعملي لي جوطة في رأسي انا الليلة ما ناقصك نهائي اطلعي من دربي احسن ليك.. قالت ليهو اطلع من دربك كيف يعني انت ناسي اني مرتك.. قال ليها تصدقي دي الحاجة الوحيدة البتمنى انساها يوم اسود يوم اتزوجتك فيهو.. قالت ليهو انا يا منذر بتقول لي كدا وثانيا انا ما جبرتك تتزوجني براك جيت وقلتا عايزني.. قال ليها دي كانت غلطتا وعمري كلو ح أفضل ندمان عليها لو رجع بي الزمن تاني مستحيل اغلط غلط زي دا.. قالت ليهو هسي انا بقيتني غلط انا عملتا ليك شنو لمن بتقول لي كدا قصرتا معاك في شنو الحب الانا حبيتك ليهو ماف واحدة تانية بتقدر تحبك ليهو انا عملتا اي شئ عشانك.. قال ليها ماف زول قال ليك تعملي انا حبك دا مضايقني ما عايزك تحبيني انتي ما بتفهمي كم مرة انا اقول ليك اني ما عايزك ولا بحبك ولا ح يجي يوم واحبك فيهو انا حبيت مرة واحدة وقلبي قفل عليها وتاني ما ح احب واحدة غيرها.. قالت ليهو حبيت هيام وتاني ما ح تحب بس فهمني هي أحسن مني في شنو ولا زايدة عني في شنو لمن ما تحبني شنو الفيها وانا ما فيني عشان تفضلها علي دائما مافي اسم زول في لسانك غيرها لي بتعمل كدا ياخ راعي لي شوية ولي مشاعري انا مجبورة اتحمل دا كلو لي شنو.. قال ليها ماف زول قال ليك اتحملي ولا زول جبرك وبعدين انتي بتقارني نفسك معاها لي شنو وانتي عارفة انو انتي قدامها ولا شئ.. قالت ليهو طيب انت طالما بتحبها وما عايزني ليه اتزوجتني.. قال ليها كانت غلطتا في لحظة غضب اتصرفتا وهدا بدفع ثمنها لي هسي.. قالت ليهو انا طلعتا غلطتا انت ليه بتتكلم من غير ما تفكر على فكرة انا عندي مشاعر وبحس ليه بتكسر خاطري بالطريقة دي دا جزاء حبي وتعلقي فيك.. قال ليها ماف زول طلب منك تحبيني وتتعلقي بي ماف.. قالت ليهو انت عارف كلامك صح بس اعمل شنو ماف زول فينا بقدر يختار ح يحب منو ويكره منو بس عايزة اقول ليك حاجة انت تستاهل اي شئ حصل معاك وكويس أنو هيام ما حبتك ولا ح تحبك في البداية انا كنتا بكره هيام وبقول انها هي الحاجز بينا بس اكتشفتا انو هي ما ليها اي ذنب وانت وحدك الملام في الحتة دي وانا مبسوطة لأنها عرست وقررت تكمل حياتها بعيد عنك وبتمنى من جوة قلبي ربنا يسعدها ويهنيها.. قال ليها انا شايف الايام دي لسانك وعايز ليهو قص انا ما عارف البخليني استحملك شنو.. قالت ليهو ما تستحملني طلقني وخليني ارتاح من العيشة البتقرف دي.. قال ليها ما تستعجلي على قدرك انا بس مستنيك تولدي وبعدها بطلقك وارتاح منك.. قالت ليهو ما مجبور تستنى ولو على ولدي انا بربيهو براي ما محتاجة ليك.. قال ليها ولدي ما ح يتربى غير معاي ومستحيل اخليهو ليك.. قالت ليهو ولدي ح يكبر معاي وح اجتهد انو ما اخليهو يطلع زيك ويشبهك ولا في اي شئ ولا يكون قاسي وما براعي لي مشاعر الناس زيك كدا.. قال ليها بنعيش ونشوف القعدة معاك تقرف انا طالع.. قالت ليهو انا ما مسامحاك على أي شئ عملتو فيني وربنا ينتقم منك ويطلع لي حقي منك عاجل وليس آجل.. طلعتا من البيت وركبتا العربية وماشي في الشارع وبفكر في حياتي وح يحصل فيها شنو تاني وانا سايق ما انتبهتا للشاحنة الجاية بالاتجاه التاني وضربت فيني وتاني ما وعيت على أي شئ......
