من جانبي:-
بعد المحكمة انتهت خالو متوكل وخالتو منال قالو لي عمو عبد الجليل عايزين يسوقوني معاهم ما بقعد مع ناس عمي اكتر من كدا بعد الحصل مع امي بقو خايفين علي واصلا انا كنتا عايزة بي أي طريقة اطلع من البيت وابعد من المكان شوية وعمو عبد الجليل زاتو ما اعترض لانو عارف اني محتاجه ابعد شوية.. بقيت بجهز في حاجاتي حقات السفر، من يوم عرفنا انو عمتي وداد السبب في موت امي روان بقت ما بتتكلم معاي ولو شافتني بتتجنبني ما عارفه لي شنو قلتا احسن امشي اتكلم معاها قبل امشي العصر كدا مشيت ليها في بيتها اول ما شافتني عملت روحها مشغولة وما شايفاني.. قلتا ليها روان ماف داعي لي حركاتك دي وثانيا انتي مالك بتتصرفي معاي كدا انا غلطتا معاك في شئ.. قالت لي ماف اي شئ وانتي ما غلطي في حاجة.. قلتا ليها طيب مالك بقيتي تتجاهليني وما بتتكلمي معاي وكان جيت مكان انتي بتقومي منو زعلانة مني في شئ لو عملتا حاجة زعلتك من غير قصدي انا اسفة بس عليك الله ما تزعلي مني.. قالت لي والله يا هيومة انا ما زعلانة منك وعمري ما ح ازعل منك.. قلتا ليها طيب مالك متغيرة معاي ولي بتعامليني كدا لو في شئ قولي لي بس ما تتصرفي معاي بالطريقة دي انتي عارفة انك بقيتي أقرب واحدة لي في البيت دا ولا انتي كمان عايزة تبعدي عني وتكرهيني زي الباقين.. قالت لي انا عمري ما ح افكر اكرهك بس عايزاني اتعامل معاك عادي كيف وانا امي كانت السبب في انك خسرتي امك بي سبب امي انا انتي امك ماتت.. قلتا ليها اي صح امك السبب بس انتي ما عندك ذنب.. قالت لي حتى لو ما عندي ذنب لكن انا كل ما اشوفك بتذكر انو امي كانت السبب في موت امك.. قلتا ليها طيب ح يحصل شنو يعني لو بعدتي عني وبقيتي ما بتتكلمي معاي الحقيقة دي ح تتغير اكيد لا عشان كدا خلينا ننسى الفات ونعيش اليوم بي يومو انا ما عايزة اخسرك الا لو انتي حابة الشئ دا.. قالت لي انا زاتي ما عايزة اخسرك والله بس اديني فترة عشان اقدر اتقبل الحصل.. قلتا ليها طيب على راحتك بس خليك متأكدة انو مكانتك في قلبي ما ح تتغير لو مهما حصل، وطلعت رجعتا بيت ناس عمو شلتا تلفوني لقيت في رسالة من ناس سوداني لمن فتحتها كاتبين لمعرفة نتيجة الشهادة السودانية ارسل رقم الجلوس على الرقم 5566، مع الأحداث دي لمن نسيت موضوع النتيجة من اساسو اول ما شفتها قلبي بقى بدق شديد واتوترتا وخلاص اعصابي باظت ودموعي من غير ما أشعر بقت تنزل.. عمتو عفراء جات لقتني ببكي قالت لي هيومة حبيبتي مالك في شنو ما تخوفيني عليك.. اديتها التلفون قرت الرسالة وقعدت تضحك قالت لي قطعي قلبي هسي انا قلتا في شئ حاصل بتبكي عشان النتيجة.. قلتا ليها خايفة يا عمتو النتيجة ما تطلع حلوة واخزل امي وابوي وتنكسر ثقتهم فيني واحلامي واحلامهم كلها تتدمر خايفة ما اجيب النسبة البتدخلني كلية الشريعة والقانون.. قالت لي انتي مش عندك ثقة في ربنا.. قلتا ليها اي ومئة× 100٪.. قالت لي بس خلي ثقة فيهو كبيرة واكيد ما ح يخزلك وفي النهاية كل شيء بحصل لي خير والفي قسمتك ما بفوتك، انتي بس ادعي كتير وان شاء الله خير وربنا بنولك الخير ليك وحتى لو ما جبتي نسبتك العايزاها إياك تفقدي الأمل لانو الخير فيما اختاره الله لنا.. قلتا ليها ونعمة بالله بس برضو ما قادرة أوقف توتر، خليت تجهيز ملابسي وبقيت داخلة ومارقة زي أم العروس لمن جو ناس عمي لقوني في حالتي ديك بقو يعاينو لي ويضحكو ختو الاكل ما قدرتا اكل معاهم وخلاص شايفة الزمن دا بمشي براحة براحة.. بعد العشاء كدا صلاح كان خاتي تلفونو في الشاحن ومرق تلفونو اول مرة ضرب ما رديت تاني ضرب برضو ما رديت في المرة الثالثة لمن ضرب مشيت اشوف دا منو احتمال في شئ مهم لمن شلتا التلفون لقيت الضارب رقم مسجل بي جميلتي♥️قلتا اكيد دي بتكون حبيبتو فتحتا الخط وقبل ما اقول اي كلمة جاني صوت بنت بتقول.. صلاح وين انت انا بضرب لي من جبيل ما بترد علي خوفتني عليك انت كويس صح وبعدين انت شايل التلفون لي شنو لو ما بترد عليهو انت عارف حصل لي شنو ولا فكرتا في شنو لمن ما رديت علي قلبي انقطع من الخوف مالك ساكت انا مش بتكلم معاك رد علي.. قلتا ليها انا ما صلاح لانو صلاح دا طلع وخلى التلفون في الشاحن ولمن شفتا الاتصالات كترت رديت.. قالت لي انتي منو والسمح ليك تردي على تلفون صلاح منو.. حبيت العب بي اعصابها شوية قلتا ليها بالأصل انتي منو وضاربة لي صلاح لي شنو.. قالت لي انا حبيبتو انتي منو لمن تردي على تلفونو.. قلتا ليها انا مرتو ومن حقي ارد علي تلفون راجلي وانتي حبيبتو من وين وعليك الله ما بتخجلي تحبي ليك راجل متزوج عايزة تخربي لي بيتي.. قالت لي مرتو كيف وهو قال لي انو ما متزوج.. قلتا ليها هسي ما تعملي لي فيها ما عارفه ومصدومة راجلي احسن ليك تبعدي عنو، قبل ما اكمل كلامي جاء صلاح داخل قلتا ليهو هاك جميلتك ضربت ليك وطلعتا جري.. بعد مسافة جاني برة في الحوش قال لي انتي قلتي ليها شنو.. قلتا ليهو ما قلتا ليها ولا حاجة مالك.. قال لي هيومة ما تكذبي قلتي ليها شنو.. قلتا ليهو والله كنتا بهظر معاها بس.. قال لي بي صوت عالي أقرب للكوراك انتي القال لي تهظري معاها منو ومنو السمح ليك تردي على تلفوني وبعدين متين الناس بتهظر في موضوع العرس هسي علاقتنا خربت بي سببك وقالت لي ما اتكلم معاها تاني وحظرتني هسي ارتحتي.. قلتا ليهو انا والله ما كان قصدي وما كنتا عارفة انو هي ح تأخد كلامي جد.. قال لي وانا استفيد من كلامك دا شنو تاني انتي اصلا ماف سبب بخليك تردي على تلفوني.. قلتا ليهو كلامك صح وانا اسفة وتاني ما بعيدها ودخلتا جوة لقيت تلفونو فاتح شلتا رقم البنت ودخلتا غرفتي ضربتا ليها في الأول ما ردت بس بعد كررت الاتصال ردت علي ووضحتا ليها انتي كنتا بهظر معاها وانو صلاح هو ولد عمي ما اكتر واسفة لو خربتا العلاقة بينكم بس ما كان قصدي.. قالت لي ما مشكلة انا زاتي غلطانة كان مفروض اسمع من صلاح الأول بس من سمعتا انك مرتو ما قدرتا استوعب اي كلام تاني.. قلتا ليها خلاص ما مشكلة حصل خير وبتمنى العلاقة بينكم تتصلح وطوالي قفلتا بقيت راقدة وبحاول انوم ما قدرتا سمعتا صوت باب الغرفة ضرب طوالي غمضتا عيوني وعملتا نفسي نايمة.. سمعتا صوت حسن بقول لي عارفك صاحية عشان كدا بطلي تمثيل وقومي.. ولا اشتغلتا بي كلامو وفضلت مغمضة عيوني.. قال لي ايواا على راحتك كدا الحلاوة والشوكولاتة بفوتوك لكن ما مشكلة انتي نايمة راحت عليك.. أول ما سمعتا سيرة الحلاوة والشوكولاتة قمتا ناطة من السرير قلتا ليهو إياك تأكلهم براك بقتلك.. قال لي هسي مش كنتي عاملة نايمة كملي نومك ماف ليك اي حلاوة.. قلتا ليهو حسوني حبيبي بهون عليك تأكلهم وتخليني.. قال لي تعالي وراي سريع.. طوالي نزلتا من السرير شلتا طرحتي ومشيت وراهو لي الصالون لقيت كيس حلاوة مصاصة شوكولاتة وشيبس قعدتا وبقيت بأكل جاء صلاح داخل اول ما شفتو بطلتا اكل وقلبتا وشي فيهو وبعاين ليهو من فوق لي تحت شلتا حاجاتي وجيت طالعة.. صلاح قال لي اسمعيني قبل ما تمشي.. قلتا ليهو ما عايزة اسمع منك اي شئ وما تتكلم معاي تاني.. حسن قال لي هيومة اقيفي اسمعي عايز يقول شنو ولو ما عجبك كلامو امشي.. قلتا ليهو حسن من الأحسن انك ما تدخل في الموضوع دا وصلاح ما عايزة اتكلم معاهو و طوالي مشيت من غير ما اسمع منهم قعدتا في غرفتي ورجعتا اكل تاني اتذكرتا موضوع النتيجة بقيت لافة في الغرفة لي الساعة 1 صباحا مرة استغفر ومرة اقرأ قرآن ومرة اقعد ابكي جات الساعة 3 قمتا صليت قيام الليل ودعيت حتى قدرتا انوم شوية صحيت الساعة 7 صليت الصبح وبقيت قاعدة ناس عمو نادوني للشاي قلتا ليهم ما عايزة غلبني البسويهو حوالي الساعة 9 كدا خالو متوكل وخالتو منال جو وبقو كلهم قاعدين برة وانا قافلة على نفسي باب الغرفة الظهر اذن طلعتا صليت وجيت قعدتا تاني الساعة 1 المؤتمر بدأ وانا في اللحظة ديك اعصابي خلاص باظت وما قدرتا اعمل ولا شئ بقيت قاعدة وحاسة الدنيا سخنت بي وجاني صداع شديد وبقيت بشوف طشاش طشاش وحاسة جسمي تقل وبقى ما شايلني يا الله قدرتا اقول ليهم رقمي حق الجلوس، لمن اتأخرت النتيجة حقتي عشان تطلع قلتا معناها خلاص رسبتا لانو لو كنتا ناجحة مفروض تطلع من جبيل بقيت ببكي وببكي بعد مسافة جات روان بتزغرد من برة.. عمتو عفراء قالت ليها اها بشري النتيجة طلعت.. روان قالت ليها اي طلعت وهيومة حبيبتنا جايبة 92.6٪.. عمتو عفراء وخالتو منال بقو يزغردو معاها.. انا بقيت بعاين ليهم ولسه ما مستوعبة انو دي نتيجتي مشيت قلعتا من مهدي التلفون واتأكدتا من اسمي 5 مرات حتى شفتا النتيجة من الفرحة سجدتا سجدة شكر وبقيت ببكي جو ناس عمي باركو لي وجابو الحلاوة والبارد ووزعوهم على الناس الجو يباركو لي في اللحظة دي اتمنيت امي وابوي يكونو معاي ويفرحو لي فرحي بس انا متأكدة انهم شايفني ومبسوطين لي نجاحي وحتى لو هما ما جنبي بس دائما معاي جوة قلبي من الفرح ما عرفتا اليوم متين انتهى تاني يوم من الصباح ودعتا ناس عمي ومهدي وسافرتا مع ناس خالو لي ولاية سنار ودي كان أول مرة انا امشي هناك مشينا 6 ساعات في الشارع حتى وصلنا وقفنا قدام بيت كدا كبير خالو متوكل نزل الشنط من العربية ودخلنا البيت الكبير جواهو كان في كم بيت بشبه بيتنا الفي الخرطوم بس هناك ناس عمي اي واحد فيهم بيتو منفصل عن التاني وعندو باب شارع براهو وفي ممر جوة بربط البيوت كلها مع بعض بس هنا البيوت كلها فاتحة في بعض وبربطهم حوش كبير وفي شجرة كبيرة في نص الحوش دخلنا واحد من البيوت كان فيهو ثلاثة بنات ومعاهم مرة كدا ما بعرفها البنات اول ما شافو خالي وخالتي جو سلمو عليهم حتى سلمو على والمرة جات سلمت علينا قعدنا جابو لينا موية وعصير وحدة من البنات قالت لي خالتو منال يا أمي دي بنت خالتو منى.. خالتو منال قالت ليها اي دي هي.. المرة قالت ليها عاد يا منال البنت دي قطعة من امها البشوفها بقول دي منى ياها زاتها في شبابها الله يرحمها.. خالتو منال قالت لي ما عرفتك ديل بناتي نمارق ونسمة ودي نجود بنت خالك متوكل ودي عائشة مرة خالك وقالت ليهم دي هيام بنت خالتكم منى الله يرحمها.. قلتا ليهم اتشرفنا.. نسمة قالت لي لينا الشرف بي معرفتك.. تلفوني ضرب طلعتو من الشنطة لقيتو دا مهدي طلعتا برة وبقيت بتكلم معاهو بعد قفل ضربت لي عمتو عفراء وبعدها حسن وعمي عبد الجليل بعد خلصتا معاهم كلام دخلتا جوة قلتا ليهم اسفة اتأخرت عليكم بس كنتا بتكلم مع ناس البيت.. خالتو منال قالت لي ولا يهمك اكيد بكونو خايفين عليك وكويس وقت طمنتيهم.. مشو جابو لينا الاكل اكلتا شوية وقمتا اتوضيت وصليت وجيت قعدتا معاهم.. نجود قالت لي خالو يا ابوي انت ما نسيت شئ.. خالي قال ليها ما اظن نسيت حاجة.. قالت ليهو يا ابوي بتبالغ امبارح كانت نتيجتي ونجحتا وينا هديتي.. خالي قال ليها ما ناسيك خليني ارتاح شوية وبعدها نشوف اجيب ليك شنو ونجيب لي هيام معاك.. قلتا ليها نجود كنتي ممتحنة.. قالت لي اي.. قلتا ليها الف مبروك اها بشري جبتي كم.. قالت لي جبتا 70.5٪ والله يبارك فيك، اها وانتي جبتي كم.. قلتا ليها جبتا 92.6٪.. قالت لي ألف مبروك ليك.. قلتا ليها الله يبارك فيك.. بقينا قاعدين بعد العشاء كدا جو ثلاثة اولاد داخلين وسلمو على ناس البيت وقعدو.. واحد منهم قال لي خالتو يا أمي ما عرفتينا على الضيفة دي.. خالتي قالت ليهم دي ما ضيفة دي بنت البيت دا دي هيام بنت منى خالتكم.. واحد تاني قال اووه معناها دي المتمردة الطردتكم لمن كنتو في الخرطوم.. نسمة قالت لي ما تشتغلي بيهو ياسر دا بحب الهظار ما تركزي معاهو.. قلتا ليها اصلا لو بركز مع ناس زيو حياتي بضيع على الفاضي.. ياسر قال لي مقبول الاحراج منك يا بنت الخالة ما مشكلة.. أما الثالث دا قاعد وبعاين لي ساي لمن شككني في روحي.. نسمة قالت لي ياسر دا اخونا الكبير انا ونجود وبشار ومبشر ديل اولاد خالو متوكل.. ياسر قال لي هيام جايي من الهيام والعشق.. قعدو يتونسو وانا بعاين ليهم بعد زهجتا دخلتا جوة نمتا.. مرة اسبوع كامل من جيت البلد وكانو بتكلمو أنو بعد اسبوع عندهم عرس بنت واحدة صاحبة خالتو منال وبتها العروس صاحبة نسمة واليوم كلو نسمة بتكون معاهم.. في يوم بعد العشاء طلعتا براي ماشة الدكان احول رصيد واجيب شيبس وحلاوة مشيت حولتا رصيد وما لقيت الحلاوة والشيبس العايزاهم طلعتا من الدكان راجعة البيت سمعتا صوت كلب وراي اول ما قبلتا عليهو جاء جاري ساكيني بقيت جارية في نص الشارع وبكورك شفتا لي ولد واقف طوالي جريت وادسيت وراهو وانا قلبي ح يقيف من الخوف بعد شوية ما سمعتا صوت الكلب لمن زحيت من الولد شوية شفتا الكلب مشى عاينتا لي الولد لقيتو بعاين لي بي طريقة غريبة من غير ما اتكلم مع الولد طوالي جريت ما وقفتا الا لمن دخلتا البيت جوة يا الله قدرتا اخد نفس شربتا موية وقعدتا بقيت بفكر يارب الولد دا كان بعاين لي بالطريقة دي لي شنو ما حسيت على نفسي نمتا متين صحيت الصباح صليت وشربنا الشاي خالتو منال قالت لي قومي اجهزي ماشين بيت العرس.. مشيت طلعتا لي فستان لبستو ومشينا بيت العرس سلمتا على النسوان الهناك وقعدنا.. خالتو منال قالت لي تعالي سلمي على خالتك عايدة.. جيت سلمتا عليها.. قالت لي سبحان الله تقول منى الواقفة قدامي ما بتها.. قلتا ليها انتي بتعرفي امي من وين.. قالت لي امي دي اختي وصحبتي وكانت من اقرب الناس لي بس بعد عرست ورحلت ما عرفتا عنها أي شئ تاني وخلتني انا وولدها وسكتت.. قلتا ليها ولد شنو.. نسمة جات ساقتني قبل اكمل كلامي معاها مشينا قعدنا مع البنات وبقو يدقو في الدلوكة ويغنو بعد العصر طلعنا وبقينا قاعدين في الحوش شفتا نفس الولد الادسيت وراهو امبارح من الكلب وكان بعاين في الاول قلتا احتمال بعاين لي واحدة من البنات بس لمن ركزتا لقيتو بعاين لي ونهائي عيونو ما نزلها مني وبعاين بي طريقة كانو بعرفني قبل كدا صراحة نظراتو لي وترتني لانو كل ما يجي داخل أو مارق بعاين لي لمن زهجتا من نظراتو لي طوالي قمتا مشيت البيت بقيت بفكر في كلام خالتو عايدة ولد شنو الأمي خلتو معاها ومعقولة امي كان عندها ولد قبل تعرس ابوي طيب حتى لو عندها ولد لي خلتو ومشت يا الله من كترت التفكير حسيت رأسي ح يطرشق.. سمعتا صوت ياسر بقول لي الشاغل بالك يتهنى بيهو.. قلتا ليهو كيف ما فهمتا.. قال لي البتفكري فيهو وسرحانة وبي سببو ما جايبة للدنيا خبر.. قلتا ليهو منو القال ليك انا بفكر في زول.. قال لي واضح ما بتفكري بدليل اني جيت ماري قدامك اكتر من ثلاثة مرات وما شفتيني.. قلتا ليهو لو بفكر ما إلا بفكر في زول وبعدين انا ما مجبورة ابرر ليك لو بفكر في زول ولا لا.. قال لي انتي لي دائماً مسخنة كدا ابردي وخلي ردودك باردة شوية.. قلتا ليهو انت مالك ومالي وبعدين بتدخل في شئ ما بخصك لي شنو.. خالتو منال جات داخلة قالت لي هيومة انتي لي بتطلعي من غير ما توري زول ما عارفه انتي خوفتينا عليك كيف.. قلتا ليها اسفة يا خالتو بس حسيت نفسي تعبانة وجيت ارتاح شوية ونسيت ما كلمتك.. قالت لي ما مشكلة بس تاني ما تعيدي الحركة دي كويس.. قلتا ليها حاضر.. قالت لي انا ماشة اقول ليهم لقيتك كلهم هسي بكونو بفتشو عليك.. قلتا ليها اسفة لاني تعبتكم معاي.. قالت لي ماف مشكلة تعبك راحة.. طلعت وياسر طلع وراها بقيت قاعدة ومن اليوم داك ما مشيت بيت ناس خالتو عايدة الا يوم حنة بتها يسرا بالليل مشيت بيتهم بعد اتجهزتا لمن كنتا مستنية البنات يطلعو شفتا غرفة بعيدة شوية منهم ومضوية صراحة الفضول قتلني امشي اشوف فيها شنو مشيت طوالي باتجاهها لقيت الباب جزء منو فاتح دخلتا اتفاجأتا لمن شفتا صور امي معلقة وكانت شايلة طفل صغير في يدها وكل صورها مع الشافع دا، معقوله يكون دا الطفل الاتكلمت عنو خالتو عايدة طيب علاقتو بي امي شنو وانا واقفة سمعتا صوت واحد بي وراي قال لي انتي السمح ليك تدخلي الغرفة دي منو.........
في رأيكم الطفل دا علاقتو بي منى ام هيام شنو؟؟ ويا ترى هو منو وقصتو شنو؟؟
__________________________♥️
بعض الأسرار من الأفضل انا تبقى مخفية لأن ظهورها قد يتسبب في تدمير احلام البعض عن واقعهم الجميل ليكتشفو حقائق تألمهم ويصتدمو بواقع لمن يخطر على بالهم ولا يدرون عنه أي شئ💔💔
في امان الله♥️
