من جانبي:-
حسيت بالصدمة لمن سمعتا كلام يُوسف كيف يعني نطلق معقوله عايز يتخلى عني بالسهولة دي.. قلتا ليهو يُوسف انت بتهظر صح ما جادي في كلامك دا.. قال لي ماف سبب يخليني اهظر انا جادي.. قلتا ليهو مش على أساس انك ما ح تتخلى عني وح تفضل معاي دائما هسي الاتغير شنو مش قلتا ح تسندني وتكون لي الأب والأخ والصاحب واي شئ.. قال لي اي نعم قلتا بس انا ما قدرتا أحميك وكنتي ح تموتي بي سببي.. قلتا ليهو ما تخت الحصل دا حجة انت عارف بينك وبين نفسك انو الحصل دا ما ليك ذنب فيهو بس انت عايز تتخلى عني لأنك ما بتحبني والفترة دي كلها كنتا معاي عشان شفقان علي بس شكرا وكتر الله خيرك وريتني اني ما بعني ليك ولا شئ واني كنتا حمل تقيل عليك وهسي جاء الوقت عشان تخلص منو بس اطمن من يوم الليلة ما ح تشوف صورة وشي ولا ح تسمع صوتي وح ترتاح مني للأبد وهسي اطلع من هنا ما عايزك اشوفك.. قال لي هيام انا.. قلتا ليهو اسمي مرة تانية ما تذكرو في لسانك ابدا وهسي اطلع من هنا سريع.. قال لي خلاص اهدي طالع اهدي.. ليه انا كل مرة بحصل معاي كدا وكل ما اتعلق في زول واحبو بمشي ويخليني معقوله للدرجة دي انا ما بستحق انو زول يحبني بس كويس يا يُوسف طالما انت اخترتا انك تبعد عني اتأكد اني ح اخليك تندم على كلامك دا، لمن قرب زمن الفطور لاني متأكدة انو كلهم بنزلو تحت الكافتيريا شلتا بجامة وعباية من الملابس الجابوها لي والشنطة كان في قروش شلتها وكتبتا ليعم رسالة ما تحاولي تفتشو علي لانو ما ح تلقوني انا ح امشي مكان بعيد القى ناس يحبوني وما يتخلو عني ابدا وانت يا يُوسف خليك متذكر الكلام القلتو لي كويس عايز تطلق مني وتخليني بسبب غلطة لا انا ولا انت لينا ذنب فيها بالبساطة دي اخترتا انك تتخلى عني مع انك قبل كدا قلتا لي لو مهما حصل انت ح تفضل جنبي بس في اول اختبار لينا انت اتخليت عني في نص الطريق ولا همك مشاعري واحساسي ح يكون شنو انت ببساطة واحد اناني وبتفكر في نفسك وبس ولا سألتك نفسك مرة واحدة انا عايزة شنو بس منك لحالك قررتا اننا نطلق بس اريحك من الليلة ما ح تشوف وشي ولا تسمع صوتي وح اريحكم مني كلكم وإياكم تحاولو تفتشو علي عشان ما ح تلقوني.. ختيت ليهم الورقة وطلعتا من المستشفى من غير ما زول يحس علي اول مواصلات لقيتها في وشي ركبتها ومشيت الميناء البري ومن هناك قطعتا تذكرة للخرطوم طول الطريق بفكر لو العملتو دا صح ولا غلط بس انا متأكدة انو يُوسف بحبني ومتأكدة برضو انو قرارو دا طلع من خوفو علي بس انا كما خليتو يتراجع عنو ما بكون اسمي هيام عبد القادر مش براهو اختار انو نبعد عن بعض خليهو يتحمل.. وصلتا الخرطوم بعد المغرب ومن هناك طوالي مشيت لي مشاعر في بيتهم دقيت الباب فتحت لي قالت لي وهي مخلوعة هيام انتي كويسة والجابك هنا شنو.. قلتا ليها خليني ادخل وبعدها بفهمك.. جابت لي موية شربتا.. قالت لي انتي كويسة ومش كنتي في المستشفى الطلعك منو ومش كنتي في سنار جيتي مع منو ويُوسف وينو ليه ما جاء معاك.. قلتا ليها اهدي شوية وبفهمك بس الاول مدثر وين.. قالت لي في الغرفة جو.. قلتا ليها ممكن تمشي تنادي في موضوع ضروري اتكلم معاكم فيهو.. قالت لي حاضر هسي بناديهو.. قبل تمشي مدثر جاء طالع وقبل ما يصلنا قال لي مشاعر يُوسف ضرب لي هسي وقال هيام مختفية من الظهر وما لاقينها.. لمن شافني قام سكت.. قال لي انتي متين جيتي هنا ولي هم بفتشو فيك طالما انتي هنا في شنو.. قلتا ليهو ممكن تقعد وانا بفهمكم اي شئ اهدو.. مدثر قال لي خلاص خليني اتصل على يُوسف واكلمو انك عندنا لأنو قلقان عليك شديد.. قلتا ليهو إياك تعمل كدا ما تكلمو.. قال لي لي شنو.. قلتا ليهو اقعد عشان افهمك، حكيت ليهم الحصل من البداية كلو لحدي ما جيت ليهم.. مشاعر قالت لي انتي جنيتي كيف تعملي كدا انتي عارفة هسي بكونو خايفين عليك قدر شنو.. قلتا ليها ما مشكلة خليهم يخافو حبة انا متأكدة انو يُوسف بحبني بس احساسو بالذنب ح يدمر اي شئ وح يفرقنا عشان كدا بالأول هو لازم يقتنع انو ما بقدر يعيش من غيري وبعدها انا ح ارجع ليهم وللوقت داك رجاءً ما تقولو ليهو اي شئ.. مدثر قال لي انتي مجنونة اكيد ولا الضربة الاخدتيها دي أثرت عليك في زول عاقل بتصرف تصرفك دا لا وكمان عايزانا نشارك معاك في اللعبة دي.. قلتا ليهو طيب كلمو وخلينا نطلق كدا ح تكون مبسوط يعني.. قال لي اكيد انا ما عايزكم تنفصلو بس في طرق تانية نقدر نمنع بيها انفصالكم دا.. قلتا ليهو انا ما عارفة دي الطريقة الوحيدة الخطرت على بالي ونفذتها ولو ما عايزين تساعدوني انا بمشي واعتبرو كأنكم ما شفتوني.. مشاعر قالت لي انتي جنيتي ولا شنو اكيد ح نساعدك وما ح تمشي اي مكان مش كدا يا مدثر.. قال ليها ما عندنا حل البنت دي مجنونة وزي ما هربتا من هناك ح تهرب احسن تقعد معانا،اها ح تكلمي متين انتي هنا.. قلتا ليهو بعد يومين بالكتير.. قال لي حرام عليك بتقطعي قلبو من الخوف.. قلتا ليهو خلي يخاف حبة عشان تاني لو قالو ليهو جيب سيرة الطلاق ساي ما يجيبها.. مشاعر قالت لي انتي كان قمتي صعبة.. قلتا ليها لازم اكون صعبة معقوله افرط في راجلي بالسهولة دي اكيد لا.. مدثر قال لينا صحي انتو كيدكم عظيم.. قلتا ليهو في موضوع زي دا لازم يكون عظيم انا راجلي ما عايزة اخسرو هو بحبني وانا بحبو.. قال لي الله يديم بينكم المحبة دائما.. قلتا ليهو اميين وجمعا يارب.. مشاعر قالت لي خليني احضر ليك شئ تأكليهو بتكوني جيعانة.. قلتا ليها صدقتي والله من الصباح بسبب الزعلة ما اكلتا شئ، انتي غرام وغسان وين.. قالت لي اليوم كلو قضوهو لعب عشان كدا نومتهم من بدري.. قلتا ليها ايواا كويس، مشت جابت لي اكلتا وشربتا العصير وقمتا صليت ورقدتا عشان ارتاح يارب يُوسف هسي بكون بعمل في شنو ومهدي وناس عمي اكيد كلهم خايفين علي بس انا كان لازم اعمل كدا عشان احافظ على زواجي، الليل كلو ما قدرتا انوم الصباح اول ما صبح قعدتا في الصالون بقيت مستنية مدثر يجي طالع عشان يضرب لي يُوسف واسمع صوتو واطمن عليهو.. مدثر ومشاعر طلعو من غرفتهم.. مشاعر قالت لي أن شاء الله قدرتي تنومي كويس.. قلتا ليها والله لي الصباح ما قدرتا انوم، مدثر عليك الله اضرب لي يُوسف وافتح الاسبيكر خليني اسمع صوتو.. قال لي حاضر، ضرب ليهو وفتح الاسبيكر يُوسف رد بعد مسافة وكان صوتو باين عليهو التعب والقلق.. مدثر قال ليهو يُوسف كيفك.. يُوسف قال ليهو كيف ح اكون كويس وانا روحي بعيدة عني.. مدثر قال ليهو ما تخاف أن شاء الله ح تلقاها.. يُوسف قال ليهو ياريت من امبارح انا ما خليت مكان ما فتشتا عليها فيهو ما لقيتها كأنو الأرض انشقت وبلعتها اختفت.. مدثر قال ليهو انت حصل بينكم شنو خلاها تختفي.. يُوسف قال ليهو قلتا ليها خلينا نطلق.. مدثر قتل ليهو انت جنيت لي تقول لي كدا وانت بتحبها.. يُوسف قال ليهو لاني غبي فكرتا انو لو بعدتا عني ح تكون في امان بس طلعتا غلطان انا ما بقدر لحظة اعيش بدونها ياريت لو ما قلتا ليها الكلام دا هسي كان ح تكون معاي.. مدثر قال ليهو ولو لقيتها ح تقول ليها شنو.. قال ليهو ح اعتذر ليها عن كل كلمة قلتا وبطلب منها ترجع لي انا اكتشفتا اني ما بقدر بدونها بس هي ترجع لي ومستحيل افرط فيها تاني.. مدثر قال ليهو ما تخاف يا صحبي أن شاء الله ح تلقاها قريب.. يُوسف قال ليهو لو سمعتا عنها أي خبر أو جاتكم عليك الله كلمني.. مدثر قال ليهو حاضر وقفل.. قال لي هسي عاجبك العملتي شفتي خايف عليك كيف حرام عليك بعد كدا خليني اكلمو انك هنا.. قلتا ليهو لالا ما توري ودخلتا جوة الغرفة بقيت ببكي ما عارفه ببكي عليهو ولا على نفسي، اليوم كلو قعدتا في الغرفة ولا طلعتا برة وما حبيت زول يجيني.. بعد العشاء كدا باب الغرفة فتح قلتا ليها مشاعر عليك الله خليني انا ما عايزة اتكلم خليني براي.. سمعتا صوتو الما بغباني قال لي معقوله حتى انا ما عايزة تشوفيني.. قمتا لقيتو دا يُوسف طوالي جريت حضنتو وبقيت ببكي.. قال لي يهون عليك تخليني كدا وتمشي معقوله ما فرقتا معاك للدرجة دي يعني لو ما مدثر كلمني انك هنا ما كنتي عايزة توريني.. قلتا ليهو في الأول انا هنتا عليك قررتا تسيبني من دون ما تفكر انا من دونك ح اعيش كيف.. قال لي يا ستي انا غلطان واسف وتاني ما بعيد الكلام دا وانتي اوعديني انك ما ح تخليني وتمشي تاني.. قلتا ليهو بوعدك اني طول عمري ما ح اسيبك وح أفضل جنبك.. قال لي وانا بوعدك اني ما ح اخليك وان شاء الله دا آخر فراق بينا.. قلتا ليهو أن شاء الله.. طلعنا برة لقيت ناس عمي وخالتو عايدة كلهم قاعدين اول شئ شاكلوني وصرخو فيني وقالو لي تاني لو عدتي تصرف زي دا شوفي ح نعمل فيك شنو..قلتا ليهم توبة تاني ما بعمل كدا.. مهدي قال لي الله يرضى عليك ما تعملي كدا تاني انتي اخر واحدة فضلتي لي من عائلتي ما تمشي وتخليني برضو.. قلتا ليهو والله اسفة وتاني ما بعيد تصرف زي دا انت بس ما تزعل.. قال لي حاضر انتي خليك معاي وانا ما بزعل.. قلتا ليهو انا دائما معاك.. بعدها انا ويُوسف رجعنا بيتنا وناس عمي مشو بيتهم وناس خالتو عايدة برضو مشو بيتهم الجهزو ليهم يُوسف وكان قريب مننا برضو.. بعد يومين عملنا الكرامة، بالمساء كنتا بفتش في يارا عايزاها ما لقيتها مشيت جهة الصالون عشان اشوفها لو هناك لقيتها واقفة مع حسن.. قالت ليهو خليني امشي قبل ما يجي زول ويشوفنا.. حسن قال ليها خليهم يشوفونا ساي وخليهم كلهم يعرفو اني انا بحبك وعايزك على سنة الله ورسوله.. يارا قالت ليهو انت عارف انا زاتي بحبك بس هسي الوقت ما مناسب خلي الأمور تهدأ شوية.. قال ليها اخليها لي متين طالما انا وانتي بنحب بعض وعايزين نكمل حياتنا مع بعض نستنى لي شنو تاني وخير البر عاجله.. قلتا ليهم يا خاينين تحبو من وراي وانا ما عارفه يخسي عليكم.. يارا قالت لي القصة ما زي ما فاهمة.. قلتا ليها انا فاهمة شنو.. قالت لي انا وحسن كنا.. قلتا ليها ماف داعي توضحي اصلا اي شئ باين من حركاتكم وتقعدو تعاينو بي بعض وتخجلو والونسة لي اخر الليل انتو قايلني غبية لي الدرجة دي.. حسن قال لي طالما عارفة حاولي انجزي لي اخوك واقنعي البنت دي رافضة اني امشي اتكلم مع اخوها وابوها.. قلتا ليهو انت ما تركز معاها امشي بتلقاهم جوة بالمرة عمي قاعد كلمهم عشان نحدد موعد الخطوبة والعرس.. يارا قالت ليهو حسن ما تمشي.. قلتا ليهو لو سمعتا كلامها عمركم كلو بتقعدو كدا اسمع مني وامشي كلمهم.. قال لي كلامك صح ح امشي اكلمهم.. يارا قالت لي حرام عليك لي قلتي ليهو يمشي.. قلتا ليها ما حرام ولا شئ انتو بتحبو بعض يبقى مفروض تتزوجو وخلينا نفرح بيكم.. دخلنا جوة لقيت حسن قاعد ومتوتر يقول ليهم الكلام كيف قلتا ليهم يا جماعة الكلام العايز يقولو ليكم حسن انو هو بحب يارا وعايزين يتزوجو بس خجلانين يكلموكم.. عمتو عفراء قالت لي عاد دا يوم الهنى والمنى ويارا نحنا ما بنلقى زيها.. عمي عبد الرحمن قال لينا ونحنا زي حسن ما بنلقى ويا بختنا بيهو.. قلتا ليهم طالما كلكم متفقين نعمل الخطوبة الجمعة الجاية والعرس وقت يتفقو ولا قلتو شنو.. عمي عبد الجليل قال لي كلامك موزون يبقى الجمعة الجاية بإذن الله ح نجي نخطب بتنا الحلوة لي ولدنا.. عمي عبد الرحمن قال ليهو ونحنا بنتشرف بي جيتكم.. بعد خلصو كلام في موضوع الخطوبة كلهم مشو بيوتهم بقينا قاعدين انا ويُوسف قال لي ما تتخيلي انا فرحان قدر شنو انو يارا وحسن ح يتزوجو طول عمري كنتا بتمنى لي اخواتي يعرسو رجال بحبوهم ويصونوهم والحمدلله ربنا استجاب لي دعواتي.. قلتا ليهو ربنا كريم شديد وبدي اي زول على حسب نيتو والبتمناهو.. قال لي في شئ ضروري اقولو ليك.. قلتا ليهو في شنو ما تخوفني.. قال لي نحنا بكرة لازم نسافر سنار.. قلتا ليهو لي شنو السبب شنو.. قال لي لانو بعد بكرة محكمة نجود ولازم نمشي.. قلتا ليهو حاضر ماف مشكلة.. تاني يوم سافرنا سنار ونزلنا في بيتهم استنيت اليوم الثاني يجي بي فارغ الصبر عشان اخلص من الكابوس دا وارتاح من العائلة دي كلها وتاني ما تربطني بيهم اي علاقة.. صباح المحكمة اتجهزنا ومشينا لقيت خالتي منال واخوان نجود هناك.. خالتي منال قالت لي الله يرضى عليك اتنازلي عن الشكوى قبل ما المحكمة تبدأ وليك وعد مني انو ما تشوفي ولا زول فينا وحقك ح نديك ليهو بس اتنازلي عن الشكوى.. قلتا ليها انتي ظاهر عليك فقدتي عقلك ولا حاجة بنت اخوك حاولت تقتلني بكل دم بارد وانتي عايزاني بالبساطة دي اتنازل عن الشكوى انا لو اتنازلتا عنها ما بكون ضريت نفسي لا ح اكون ضريت المجتمع برضو نجود واحدة مجرمة ومكانها السجن وبس هسي لو سمحتي ممكن تبعدي عن طريقي، بعد مسافة جابو نجود ودخلنا قاعة المحكمة والقاضي جاء داخل وبدأت المحكمة.. مشيت ادليت بي شهادتي وحكيت الحصل كلو.. نجود قالت لي انتي عارفة انا ما ندمانة على أي شئ عملتو فيك ولو رجع بي الزمن ح اعملو تاني لأنك تستاهلي تموتي.. القاضي قال ليها لو سمحتي هدوء انتي في قاعة محكمة.. القاضي قال لي حان وقت الحكم، كلنا قمنا.. حكمت المحكمة على المتهمة نجود متوكل بالسجن المؤبد بجريمة القتل مع سابق الإصرار انتهت الجلسة.. صراحة ما اتوقعتا انو تنسجن مؤبد بس تستاهل لانو وجودها برة خطر عليها وعلى المجتمع.. خالتي قالت لي أن شاء الله هسي انبسطي فرقتي عائلتنا كلها مبسوطة.. قلتا ليها انا ما فرقتا عائلتكم ولا شئ الحصل دا كلو نتيجة أعمالكم يلا ضوقو شوية من العيشتو لي الناس الدنيا دوارة وكما تدين تدان وجل العملتو في الناس هدا قاعد يرجع ليكم واحد واحد.. يُوسف قال لي ما تتعبي نفسك معاهم ديل ما ح يفهمو خليهم وارح نمشي.. مبشر قبل ما نمشي قال لي نحنا قسمنا الورثة وحقك محفوظ بس ادينا رقم حساب نحول نصيبك فيهو.. قلتا ليهو شيل رقم حساب يُوسف وحولها لي عندو، يُوسف اداهو رقم الحساب ومشينا.. ما كان في زول من هناك عارف انو المحكمة كانت الليلة لمن رجعنا حكينا ليهم بقرار القاضي.. عمب قال لينا كان تكلمونا نمشي معاكم.. يُوسف قال ليهو ما كان في داعي مشينا وجينا والقصة خلصت خلاص..
