من جانب يُوسف:-
من وقت هيام جابت لي سيرة الموت واني ممكن افقدها الفكرة ساي كانت مميتة بالنسبة لي احساس اني ممكن اخسرها وفي يوم اصحى وما ألقاها جنبي ومعاي بتقتلني من جوة، طريق السفر كلو وانا بفكر في كلامها قدر ما احاول ما افكر فيهو ما بقدر وصلنا البيت وسلمنا على ناس امي وبعدها كان عندي مشوار وطلعتا اقضيهو واجي راجع مشيت شفتا الدكاكين ياداب بدو يفرغوها وينقلو البضاعة لي الشاحنات عشان يودوها الخرطوم بعدها مشيت أرض ابوي الزراعية وشفتا الشغل ماشي فيها كيف اتفقدتا تلفوني عشان اضرب لي هيام اشوفها بتعمل في شنو ما لقيتو في جيبي قلتا احتمال نسيتو في العربية مشيت العربية فتحتا باب العربية لقيت هيام متصلة علي رديت عليها وقبل ما اقول اي كلمة سمعتها بتصرخ وبتقول نجود عليك الله ما تعملي لي شئ انا ما لي ذنب عليك الله ما تقتليني.. هيام هيام انتي كويسة بقيت بصرخ بي اسمها ما سمعتا صوت تاني ركبتا عربيتي وطوالي اتحركتا على بيت ناس نجود الطريق كلو وانا بدعي ما تحصل ليها حاجة يارب احفظها لي وما تحرمني منها يارب ما تعمل لي شئ هيام زاتها البوديها لي نجود شنو ونجود عايزة تقتلها بي شنو يارب اصل قبل ما تحصل ليها حاجة سايق بي سرعة لمن قربتا اعمل حادث وصلتا بيت ناس نجود لزيت الباب لقيت هيام واقعة في الأرض وغرقانة في دمها والسكين مغروزة في بطنها ورأسها كابي دم ونجود قاعدة جنبها وبتضحك قالت لي شفتا العقبة الوحيدة الكانت بيناتنا خلاص اختفت وماتت وانا وانت ح نبقى مع بعض وح نفرح وننبسط.. قستا تنفسها لقيت لسه في نبض شلتها وطلعتا بيها برة وبقيت بنادي على حسن ويزيد من البيت سمعو صوتي جو طالعين ركبتا هيام العربية وحسن ساقها على المستشفى.. هيام الله يرضى عليك ما تخليني اتحملي شوية وح نصل المستشفى وح تبقي كويسة عليك الله ما تخليني انتي عارفة انا بحبك قدر شنو وما بقدر اعيش من غيرك ما تسيبيني خليك معاي اتحملي شوية بس.. حسن أسرع ياخ ح نخسرها أسرع.. قال لي اصبر قربنا نصل ما فضل كتير هيام عليك الله اتحملي عشانك وعشانا نحنا لازم تتحملي انتي طول عمرك بتتحملي وبتكوني قوية وما قاعدة تستسلمي الليلة عشانا خليك قوية وما تستسلمي واتحملي شوية بس.. وصلنا المستشفى نزلتها ودخلنا جوة ختيتها في النقالة.. الممرضة قالت لي ما بنقدر ندخلها غرفة العمليات قبل ما الشرطة تجي.. قلتا ليها انتي ظاهر عليك جنيتي شوية وح تموت في ايدنا وانتي تقولي لي شرطة.. قالت لي دي قوانين المستشفى وما بقدر اخالفها.. قلتا ليها تحرق المستشفى على قوانينها انا ح اخسر مرتي هنا وانتي جاية تقولي لي قوانين.. جاء واحد من الدكاترة قال لينا في شنو واصواتكم عالية لي شنو.. قلتا ليهو اصواتنا عالية لانو الممرضة دي قالت ما بتدخل مرتي غرفة العمليات قبل الشرطة تجي كل دقيقة بتروح بتشكل خطر على حياتها.. الدكتور قال ليها دخليها غرفة العمليات سرعة وانا هسي جايي.. قالت ليهو بس يا دكتور القوانين.. قال ليها ماف قوانين بتخلينا نخسر مريض بي سببها اعملي القلتو ليك سريع وبعد تجي الشرطة بنحلها.. قال لي ما تخاف بإذن الله ح ننقذها وبعمل كل البقدر عليهو عشان مرتك تبقى كويسة ..قلتا ليهو لازم تعمل اكتر من البتقدر عليهو مرتي لازم تطلع من غرفة العمليات وهي كويسة ما لازم يحصل ليها شئ انت فاهم.. قال لي يا استاذ أهدأ نحنا واجبنا ننفذ كل مرضانا وان شاء الله مرتك ح تبقى كويسة ومشى على غرفة العمليات.. كل شئ حصل بي سببي انا لو ما كان جبتها معاي ما كان مشت ليهم وحصل الحصل ولو ما خليتها وطلعتا كان انقذتها ياريت لو رديت على اتصالاتها من بدري كان لحقتها وكانت هسي ح تكون معاي كل شئ حصل بي سببي انا ما قدرتا أنقذ المرأة البحبها.. حسن قال لي ما تلوم نفسك ماف زول فينا كان متوقع انها ممكن تمشي ليها ويحصل كدا ولو على الذنب برضو علي انا لانو اتصلت على وما سمعتا التلفون لو سمعتو كان قدرتا الحقها وانقذها بس هي حصل معاها شنو.. قلتا ليهو دي نجود العملت كدا حاولت تقتلها وكلو بي سببي انا لو منعتها من البداية دا كلو ما كان حصل.. حسن قال لي ما تلوم نفسك كل شئ حصل قسمة ربنا ونحنا ما علينا غير ندعي ليها تقوم بالسلامة.. قلتا ليهو ونعمة بالله بس برضو الذنب ذنبي انا.. بعد مسافة ناس امي جو قالت لي هيام وين هسي كويسة صح.. قلتا ليها هسي دخلوها غرفة العمليات وما عارفين عنها أي شئ.. قالت لي هي حصل ليها شنو.. قلتا ليها دي نجود حاولت تقتلها.. قالت لي البنت دي عايزة منها شنو ما كفاية العملو فيها ابوها وهسي هي جاية تكمل عليها الله ينتقم منها ياخ.. سارا قالت لي هي ح تكون كويسة وما ح نخسرها صح ما ح تخلينا وتمشي.. قلتا ليها ما تخافي وخلي ثقتك في ربنا كبيرة وان شاء الله ح تكون كويسة وترجع لينا بصحة وعافية.. ابوي قال لي شد حيلك وخليك قوي دي أزمة وح تعدي وهيام ح ترجع لينا كويسة.. قلتا ليهو بتمنى يا ابوي والله بتمنى.. الشرطة جات الضابط قال لينا انتو أهل المغدور بيها.. قلتا ليهو انا زوجها.. قال لي نحنا مقدرين الظرف الانتو مارين بيهو بس برضو دا شغلنا ونحنا لازم نقبض العمل فيها كدا.. قلتا ليهو ولا يهمك انا اكتر منك عايز تمسكوها وتتحاسب على العملتو في زوجتي.. قال لي لو عارف تفاصيل او بتعرف الحاولت تقتل مرتك ورينا ليهو ونحنا ح نلقي القبض عليهو.. قلتا ليهو نجود متوكل هي الحاولت تقتل مرتي وتخلص منها.. قال لي نجود دي منو ومصلحتها شنو من أنها تقتل مرتك وعندك دليل انو هي العملت كدا.. قلتا ليهو نجود بتكون بنت خالها لي مرتي وحاولت تقتلها لانو بتكرهها وقبل كدا حاولت تشوه سمعة مرتي ولانو قايلة انو مرتي هي دخلت بينا وفرقتنا عن بعض مع انو انا وهي ما كان في بيناتنا اي شئ والدليل السكين الانطعتا بيها مرتي اكيد ح تلقو بصماتها عليها ولو مشيتو بيتهم ح تلقو مكان مرتي انغدر بيها والدم مالي المكان وهي اكيد ح تلقوها هناك.. قال لي اتأكد اننا ح نعمل كل البنقدر عليهو عشان نمسك العملت في مرتك كدا بس لازم واحد فيكم يمشي معانا عشان نتعرف على نجود ويوصلنا لي بيتهم.. يزيد قال لي الضابط انا ح امشي معاكم.. قال ليهو وانت منو.. قلتا ليهو دا اخوي الأصغر مني.. الضابط قال ليهو اتفضل معانا وشكرا لي تعاونكم معانا.. حسيت المستشفى بقت تضغط على نفسي وجودها جوة في كل لحظة بقتلني من جوة لو كنتا معاها ما كان حصل معاها كدا ولو رديت من اول مكالمة كان حصلتها وما كانت هسي بتصارع بين الحياة والموت انا عجزتا اني أنقذ مرتي البحبها فايدة وجودي معاها شنو وهي وقت احتاجتني فيهو ما كنتا جنبها وما قدرتا احميها، طلعتا برة المستشفى وبقيت قاعد في واحد من الكراسي البرة جاء راجل عجوز قعد جنبي.. قال لي باين من ملامح وجهك انك مهموم وفي شئ مضايقك احكي بترتاح.. قلتا ليهو مرتي جوة بتصارع بين الحياة والموت وانا ما قادر اعمل ليها اي شئ حتى فشلتا في إني احميها وبي سببي هي في الوضع دا ياريت لو بقدر ارجع بالزمن وانقذها.. قال لي يا ولدي كل شئ بحصل قسمة ونصيب والكاتبو ربنا ح يحصل وانت العرفك شنو احتمال الحصل دا كلو لي خير انت ما عارفو وثانيا دا ابتلاء من ربنا ليك وانت لازم تصبر وتدعي ربنا يقومها ليك بالسلامة وحتى لو انت كنتا لحقتها لو ما الليلة بكرة ممكن يحصل ليها شئ عشان كدا ما تخت الذنب عليك ربنا كاتب ليها انو يحصل ليها كدا ونحنا ما عندنا حق نعترض على حاجة كاتبها ربنا كل العلينا نصبر وندعي وبإذن الله مرتك ح تقوم بالسلامة وترجع ليك احسن من اول انت بس ادعي ليها وإياك تيئس من رحمة ربنا لانو رحمتو وسعت كل شيء خليك دائما واثق في ربك لانو رب الخير لا يأتي إلا بالخير وهسي قوم صلي ركعتين وادعي من جوة قلبك وربنا ح يستجيب لي دعواتك ويعافيها ليك.. قلتا ليهو شكرا يا عم الكلام معاك فادني.. قال لي ماف داعي للشكر المهم مرتك تبقى كويسة وهسي قوم اعمل القلتو ليك.. قمتا اتوضيت ومشيت الجامع صليت وبقيت أدعي يارب احفظ لي هيام وما تحرمني منها انت عارف وعالم بي حالي يارب ترجع لي بالسلامة يارب انت الرزقتني حبها وزرعتو في قلبي يارب ما اخسر الزولة البحبها انا راضي حتى لو فضلت بعيدة مني المهم تكون عايشة حتى لو ما معاي المهم اتأكد انها بخير يارب انا واثق فيك وعارف انك ما ح تردني خايب يارب اشفيها وعافيها يارب يا قادر يا كريم انا ما بقدر اتخيل حياتي وهي ما موجودة فيها انا والله قلبي واجعني يارب أجبر بخاطري وارحمني برحمتك يارب العالمين.. ما عارف قعدتا قدر شنو بدعي...
