قال لينا مع الاسف منذر بي سبب الحادث حصل ليهو شلل....... الخبر وقع علينا زي الصاعقة كيف يعني اتشلى يعني ما ح يقدر يمشي تاني.. منذر قال ليهو انت بتقول في شنو.. الدكتور قال ليهو خليك قوي دي فترة وبتعدي ومع العلاج الفيزيائي والتمارين اكيد ح ترجع تمشي تاني بس محتاج شوية وقت وانت لازم تكون صبور.. منذر قال ليهو وقت شنو انت بتقول لي بقيت مشلول ما ح اقدر اتحرك تاني.. قلتا ليهو منذر ممكن تهدأ انت سمعتا الدكتور قال ح ترجع تمشي بس محتاج شوية وقت ما اكتر.. قال لي الكلام بالنسبة ليك سهل لانك واقفة على رجليك بس انا لا ما ح اقدر امشي وح افضل حبيس في الكرسي للابد ماف زول فيكم ح يفهم شعوري شنو.. ماجد قال ليهو منذر خليك اقوى من كدا دي ازمة وح تعدي وترجع تقيف على رجليك تاني وكلنا معاك وما ح نسيبك ابدا.. قال ليهو تكونو معاي واشوف نظرات الشفقة في عيونكم علي الموت اهون لي.. قلتا ليهو بعد الشر عنك ما تقول كدا الحمد لله انك عايش ومعانا دا المهم.. قال لي في شر اكتر من كدا اني ما ح اقدر امشي.. الدكتور قال ليهو ما تقول كدا ودا كلو حكمة ربنا وقدر مكتوب انت اصبر وربك قادر على كل شئ وان شاء الله ح تقدر تمشي تاني.. منذر قال ليهو مع العلاج الفيزيائي القلتو ح اقدر امشي في فترة قدر شنو.. الدكتور قال ليهو الفترة بتتحدد حسب استجابة جسمك للعلاج.. قال ليهو قدر لي قدر شنو.. الدكتور قال ليهو في ناس في اسابيع وناس شهور وناس.. منذر قال ليهو سنين كملها ما تسكت ممكن لي سنين ما اقدر امشي، اطلعو كلكم اطلعو من هنا ما عايز اشوف زول اطلعو.. بقى يصرخ الدكتور قال لينا اطلعو خلوهو براهو طلعنا برة.. قال لينا هو لسه في حالة صدمة وما قادر يتقبل الحصل معاهو محتاج شوية وقت عشان يتعود وانتو حاولو الفترة دي ما تضغطو عليهو كتير واستحملوهو لانو دي اصعب فترة بتمر عليهو ممكن يكون عصبي ومؤذية ليهو قبل الحوليهو وممكن برضو يرفض يتقابل زول او يتكلم معاهو وبعدها كل شئ ح يكون احسن عشان كدا خليكم جاهزين لي كل شئ.. قلتا ليهو طيب يا دكتور نحنا مفروض نعمل شنو ونتعامل معاهو كيف.. قال لي ما تضغطو عليهو واياكم تحسسو بالنقص انو في شئ اتغير واتجنبو تنظرو ليهو بي نظرات الشفقة او انكم زعلانين على حالتو ولازم تقنعو انو يبدأ في العلاج الفيزيائي بأسرع وقت ممكن كل ما بدأ اسرع كل ما وقت رجع يمشي بقى اسرع.. قلتا ليهو شكرا يا دكتور تعبناك معانا.. قال لي ولو دا واجبي ومشى.. كلنا بقينا قاعدين ما عارفين نعمل شنو الموضوع صعب علينا كيف ح يكون بالنسبة لي منذر بقينا خايفين ندخل ليهو ونتكلم معاهو.. بعد ثلاثة ايام خرجو منذر من المستشفى ورجعنا البيت خالتو اماني وخالو عبد الفتاح نحنا منعناهم يمشو لي منذر لانو الدكتور حزرنا انو ما نحسسو بالعجز والشفقة وخالتو لو شافتو ح تزعل وتحسسو بالشفقة فتجنبا لي كدا ما قاعدة تمشي ليهو الا لمن يكون نايم بس.. منذر زاتو رافض يتكلم مع اي زول ولا يشوف زول وكان اتكلم بصرخ علينا وبطردنا وبقول ما عايز يشوف زول ولو جبنا ليهو سيرة العلاج الفيزيائي بقوم الدنيا وما بقعدها حتى الادوية بتاعتو بطل يبلعها غلبنا البنسوي معاهو ما بسمع كلام زول فينا وبعمل الفي رأسو بس وبتجاهلنا كلنا انا بقيت ما عارفة اعمل معاهو شنو انا زاتي تعبتا من جهة الحمل ومن جهة هو الدكتور قال لي ابعد عن الزعل والتوتر بس هم بقو اساسيين في حياتي، هيام هي الوحيدة البتقدر تساعدني منذر من زمان بسمع منها هي واكيد المرة دي برضو ح يسمع منها هي بس الح تساعدني نطلع منذر من الحالة لازم اتصل عليها تجي تتكلم معاهو واكيد ح يسمع منها ويقتنع بي كلامها.............
