أحببتك في الخفاء باللهجة الجزائرية 💌

part 01

01 🧜🏻‍♀️
خرجت من ليسي كارهة حياتي و حاسة كاين حجرة فوق قلبي و هموم الدنيا عليا ديت طريق لي تكون فارغة ل دارنا مكنتش حابة ناس تمشي و تشوف دموعي خيرت طريق فارغة و قعدت نمشي و دموعي نحس فيهم يحرقوا على خدي مقدرتش نحبس شهقتي ماحسيت غير بروحي طحت فلرض و قعدت نبكي على كلشي وعلى حياتي لي إنقلبت  راح نحكيلكم شوي باش تفهموا أنا إسمي سما كنت عايشة عادي كأي طفلة  أما  يقلك دوام الحال محال حياتي تبدلت من نهار ماما و بابا تطلقوا مكانش كاين مصروف و انا كنت نعتمد على ليكور بزاف و لكن بعد هاذي وضعية كان لازم نحبس  بسبب المشاكل تع دارنا  لي غيرولي حياتي 180  نرجعوا ل بلاصتنا و أنا نبكي ماحسيت غير بجهامة فوق راسي طلعت راسي و بانلي واحد مقدرتش نوصفوا عينيه برك كانوا يبانو حطلي مشوار و راح انا مستوعبتش بسك كان مغطي روحوا مخلي غير عينيه لي يشبهوا ل السماء يلمعوا انا مكانتش عندي علاقات مع ذراري مقدرتش نعرفوا شكون علابيها فوتت القصة و رفدت المشوار و رحت و باش نسرعلكم قصة
بعد عامين
كملت قرايتي و و طلعت للجامعة و كنت فرحانة بزاف و أخيرا حلمي راح يتحقق درت إدارة أعمال بما أنو كنت تسير و إقتصاد نضت صباح كي العادة كيما سراقين مكانش عندي بنادم ينوضني ماما مكانتش من نوع لي ينوض مع ولادو و طيبلهم كان كلشي وحدي و خويا كان راقد دخلت دوشت و لبست و صليت صلاتي دعيت ربي يسهلي و رحت نقرا و كيما تعرفوا مع دزاير و الكوس و تطباع قريب عمري خرجت مع كوس وصلت عادي دخلت ل لونفي حكمت بلاصتي حلوة عند تاقة متستغربوش نحب بلاصتي بزاف كانت طل على برا و على واحد جاردان كان يعجبني بزاف انا مكنتش مخالطة و محاولتش نخالط بسك في كل مرة كنت ندير صحابات كانوا يغدروني و يوجعولي قلبي برك علابيها قررت نبعد على الناس كنت حابة نبقى غير انا و نفسي وبرك وانا قاعدة نكتب و نتبع مع بروف تع هم يهدر بزاف و غير لفرونسي و انا شويا راسي ثقيل تع لغات وانا نتبع لفت إنتباهي طفل يشوف فيا كانوا عينيه زرقين يلمعوا غست معا عينيه كانوا بزاف يجذبوا الانظار منكذبش عليكم مقدرتش نحي عيني من عينو عينيه تحسهم البحر ( 😭😭😭 يادري الشعر و عيون الزرقاء ) فطنت على صوت تلاميذ يخرجوا فقت على روحي و خرجت نجري منعرف واش صرالي مارانيش من النوع لي ينجذب ل ذراري بسهولة لا علينا خرجت نفطر و نروح نخدم نسيت نقلكم بلي نخدم عند سوبيرات كيما تعرفوا ماعنديش شكون يصرف عليا كيما كان الحال رحت فطرت و جيت خارجة و شكون شفت ؟ اكزاكتلي ذا العيون السماوية كان مع زوج صحابوا داخلين انا درت بظهري مكنتش خاصة يشوفوني على تبهديل لي درتوا معاه في لونفي كي فات عليا حسيت ب بارفان لي دايروا و معلومة عليا انا نحب بارفان تع رجال أكثر تقعد أكثر من تع النساء يعني عندي خبرة في تع الرجال فطنت على روحي و رحت نجري ل خدمة قريب منتحاوز على جال ميسيو لي معلاباليش إسموا
ذا العيون الزرقاء
رحت نخدم و قعد مول سوبيرات يزن على راسي و كان لازم نتحمل لا نعشي ناكل في خبز يابس خرجت على المغرب هكاك و حكمت تاكسي و رحت لدار و شفت دار مظلمة كيما العادة كل واحد في شمبرتوا تمنيت ندخل و نلقى ماكلة سخونة ولا نلقى جو العائلي لي تمنيت نحس بيه لا علينا دخلت ل شمبرتي ودوشت و صليت صلاتي و مجانيش رقاد جا في مخي ذا العيون الزرقاء معرفتش علاه كل منشوف فيه نحس حاجة في عينيه مفهمتهاش تخليني نحب نزيد نغرق و نفهم كتر بصح منقدرش تقلبت في فراشي حتى رقدت
_____________________________________________
واش رايكم في البارت ؟
واش تحبوا تشوفوا مذابيا نلقى رايكم