أمنية تحت ظل الخيانة

الحلقة 25🥃

الحلقة 25🥃
صباح جديد نديم قاعد في جنينة بيتو يخمم في زهرة وقت جاتو للجنان باش تطلب فلوس و كيفاش مروان اعترفلو انو يحبها و كيفاش قدمتها امو على اساس ام حاضنة هو هاكك سارح لين قام من سرحتو صياح جيهان كانت تحلم
مشالها حملها و هي تبكي و تحكي
_جيهان : كان في يدي ...ولدي كان في يدي ..جاتني مرا قاتلي هذا مش ولدك هذا ولدي اناا ...و خذاتو مني ...قتلهااا لا هذاكا ولدي انااا
_نديم : باهي كل شي وفا كان كوشماار هيا قووم اشرب ماء و ايجا نهبطو يستنو فينا على لفطور
زهرة طلت مالشباك لقات راجل يعس لبرا حلت الشباك و نادتلو
_زهرة : سمحني ...تنجم تجي لحضة
هي سكرت الشباك و مشات للباب لقاتو وصل
_زهرة : انا لازم نمشي نطل على اختي ...
_هو : سمحني منجمش
_زهرة : انا منيش باش نمشي وحدي ..وزيد انتي باش تمشي معاي ...كان تحب نمشو و منقولوش لمدام راقية ...فيسع منبطوش
_هو : سمحني اما والله مستحيل
_زهرة : باهي
سكرت الباب و رجعت لصالة
_زهرة : مش معقول شنيا هالحالة ...يعني انا لتو مازلت محبوسة ...اما لا لازم نخرج من هوني لازم ناقف بجنب اختي في فترة هذه
هي نديم جا و قعد بحذا امو في تيرااس و في يدو قهوتو
_نديم : امي باش نسالك على حكاية
_للا راقية : اسأل ولدي
_نديم : تو الطفلة هذه شكون. ...انتي عندك فيها الثيقة
_للا راقية : هذه بنت واحد من ريف ..متخافش
_نديم : باهي وين ساكنة تو
_للا راقية : حطيتها في الدار الي في سيدي بوسعيد مش ناقصها شي تهنا
قصت عليهم جيهان لابسة سروال اكحل و مريول اكحل و فيه شوية ابيض و عاملة شعرها كوب شوفال و صباط هابط نوار
_جيهان : لا مش تفاهمنا نشرب القهوة مع بعضنا
_للا راقية : تو نخبر خديجة تعملك ابن قهوة
_نديم : انا يلزمني نمشي نخدم معاش بكري
_للا راقية : ربي معااك ولدي
خلطت عليه جيهاان تجري
_جيهان : ندييم
تلفتلها وهي شدتو من فيستا متاعو
_جيهان : نديم انا متوترة برشا اليوم ...و مشغولة على الطفلة ..اش تاكل و اش تشرب ..
_نديم : متخافش امي لاهية بكل شي و مش مقصرة معاها
_جيهان : كاينك نادم
_نديم : اكيد لا
_جيهان : انت تعرف الي معنداش حل غيرو
_نديم : نعرف اما جيست منحبش نتأمل كان وقت تثبت لحكاية ...متخممش عزيزتي ..هي انا لازم نمشي
_جيهان : خليني نوصلك للباب