رسالة

الرسالة الرابعة

#رسالة"4" 🖋️إبتهال حسن
_اقدر اساعدك كيف طيب ومطلوب مني شنو
=زي ما قلت لك ي..'يقطع كلامهم الشغاله جايب ليها التلفون بضرب'
_طيب لحظة بس 'بعد خمس دقيقة'
=دي امك صح، عرفت ان احنا هنا؟!
_اي.
=تمام طيب، معناها نمشي احنا قبل تطردنا زيها.
_لحظة، هو انتي ممكن تسمعني من غير موضوع الرسالة دا، ومن غير ما امي ول حسين يعرفوا.
=اي اكيد، ح اسمعك ولو ما مرتاحة معاه ممكن اطلقك منو كمان
_بالجد ممكن.
=اي، ما تشيلي هم، انا حاسة بيك، دا رقم تلفوني، وقت ما تكون جاهزه انك تجي عليّ انا بوصف لك تجي،تمام.
_تمام.
=يلا ي مروة
"في العربية "
_غريبه عليك لله في أهل كده
=في ي مروة والله، بكون فاكرين انهم كده بيساعدو عيالهم، وفاكرين كده عيالهم فرحانين ومبسوطين كمان، عارفه ممكن لو سمعت منها وحكيت ليها هي جواها شنو ومتألمة قدر شنو، احتمال كانت عملت خطوة عشانها، بس ما قعدت وسمعت منها، وشكل البت عندها مرض نفسيه زاتو، وما مبسوطة في حياتها، وما صدقت لقيت زول يسمعها ويحس بيها، في الوسط الكل أوامر دا، احنا كنا بالنسبة ليها طوق نجاة.
_ اي شوفتها فرحت لمن قلت ليها ح اسمعك واطلقك من الحقير دا.
=دا شنو شكلنا وصلنا زاتو البيت حق الضحية التانية.
_يلا طيب ي مسهل.
................ *اتشرفت بيكم والله.
=عايزه منك خدمة، ح اساعدكم وانتو ح تساعدوني.
*خدمة شنو؟!
=حصل قبل خمسة سنة حادث حق اعتداء على ود في الروضة والمتهم كان الحارس حق الروضة، بحكم ان الود صغير الحارس كان بديهو الحلاوة والحاجات حقت الشفع، الأم لمن سألت حكا ليها الود ب اي حاجه مشيت وفتحت قضية، والحارس عايز يتحكم عليه، بس عشان الروضة كانت عالمية ودي سمعة ليهم، مدير الروضة طلع شهادة ان الحارس مريض نفسي، والحارس طلع براءة.....الكلام دا حصل مع ولدك صح؟!
*اي. =ح اساعد ولدك واشوف هو متأثر ب الحادث دا ول لا.
*وانتي فائدتك شننو في الموضوع
=والله هو دا موضوع رسالتي،عايزه اسمع من واحساس شنو هسا ، واشوف الموضوع دا مؤثر معاه إلى ياتو حد و 'تقطع كلامها''''
*عايزه تعملي ولدي فأر تجارب صح
=العفو ياخ، انا ح اساعدو، لو هو كويس الحمد لله، تكوني زاتو متطمنه عليه كده، لو ما كويس ابدا معاه علاج نفسي وو"تقطع كلامها تاني"
*ولدي كويس ما عندو عوجه، وأمشي شوفي زول تاني غيرنا،لو انت دكتوره بالجد خلي الانانيه العندك دي، بدل تفتحي على الناس جروح ليها سنين، امشي شوفي قضية حاصلة هسا.
=القضايا دي لسه بتحصل، وح تحصل لسه، عشان كده انا عايزه احاول ب رسالتي دي، اخلي الناس تسبيب خوفها وتتكلم. وو
*ي دكتوره، خلاصة الموضوع انا ماعايزه اسمع محاضره منك هسا، ولدي كويس وشكرا لك، واتفضلي.
"في العربية"
_وسن مالك ساكتة من ما طلعنا
=اقول شنو، المرة قالت كل حاجه.
_دا شنو ما تكوني ساكته من قبيل بتفكري في كلامها دا، ي وسن الموضوع دا حساس شديد وانتي عارفه الحاجه دي، وانتي لسه في البداية ح تلقى لسه كم زول يطردنا ويقول عليك أنانية و ووو، بس انتي خليك مؤمنة أن رسالتك دي ح تنجح مائه في مائة.
=شكل الموضوع ما ح يظبط وانتي قلت هسا انا لسه في البداية ح اغير موضوعها واشوف موضوع ساهل زاتو.
_تغيري الموضوع، والله اديك كف، اسمعني طيب انت جربي اسمعي المتهم بدل الضحية، مش انتي عايزه تعرف الأسباب التخلي يعمل كده، احتمال هو كمان كان ضحية.
=كلامك صح، بس هسا ح نلقى المتهمين ديل وين،حسين دا شكل اساسا ما ح يقابلنا، مش يتكلم معانا.
*اتحركي على القسم نشوف مؤمن ح يساعدنا، دقيقة اضرب ليهو لأن ما يبحب اجي القسم.
"في مطعم"
=شكراً ي باشمهندس على العزومه.
_هو احنا لسه أكلنا ههههه
=مقدماً وكده هههه
_العفو ي هندسة، بعدين العزومه دي مكافأة لك، عشان خلصنا قبل زمن التسليم، وانتي تعبت بالجد وكنت بتجي ايام الإجازات وكدة.
=العفو دا شغلي، وبعدين شنو هندسة ومره باشهندسة بعدين راسي يكبر وانا زولة راسي فاضي ساي ههه ، قول لي وفاء عادي يعني.
_راسك مافاضي هو ف زول رأسو فاضي يشتغل زي شغلك دا، وبعدين أن شاء لله ح تكوني مهندسة كبيرة كمان وعندك شركة مقاولات كبيرة كمان،وتعملي الأحنا ما قادرين نعملوا زاتو.
=أن شاء لله
_عارفة وقت دخلت الجامعه كنت عايز اخلص سريع، كنت فاكر ان ح يكون الشغل قاعد والمراتب كويس، وبعد كم سنة ح اعمل شغلي حقي انا، من غير تعب ومرمطة، بس تأتي الرياح بما لاتشهي السفن.
=حتى وهسا ما عندك شغلك حقك، بس ماشاء الله انت مهندس ناجح جدا، وانا قاعده اشوفك مثلي الأعلى.
_الحمد لله، ما تخلي زول عادي زي مثلك الأعلى، كل مره شوفي اعلا اعلا عشان تبقى اعلا منه زاتو، شوفي مهندس يكون عالمي عشان تبقى اعلا منه،ان شاء لله ما تشوفي الأنا شوفتو يخليك تكرهك المهنه دي زاتو.
=ما عارفه، بس انت عكس الكلام الانت بتقول فيهو دا، يعني انا شايفة مهندس بيحب شغلو جدا، ومخلص فيهو، وبسببو الناس بتجي وتقول عايزين المهندس دا يشتغل لينا وجايب سمعة حلو ل الشركة،ف ظاهر انك شوفت كتير قبل تصل الانت فيه هسا.
_اكضب لو قلت لك ما فكرت اسيب الشغل دا زاتو، اول خمسة سنة لي ف الشغل كانت متعبه جدا، اتطردت من كم شركة بس عشان م كنت راضي على الغش، قعدت قريب ٦ شهور من غير شغل، امشي اي شركه اول سؤال ليهم خليت الشغل ل شنو، ف منهم الكان عايز يغش وانا ما بنفع معاه، وديل قالوا لا من الاول، الحمد لله بعدين لقيت فرصة حقت تعيين ل الشركة كانت فاتحة جديدة فرعها دا، ناس كويسين يخافوا لله، ولمن هسا معاهم، معليش ازعجتك ب قصصي.
=العفو، بحب اسمع القصص حقت النجاحات.
_نجاحات ربنا يجبر ب خاطرك... يلا الاكل جاا.
"في القسم"
*الموضوع حساس بالجد وسن، كويس ما ضربكم زاتو ههههه، بس شنو انتي ما تقيفي امشي في موضوعك دا.
_اي انا كمان قلت ليها كده.
*تشربوا شنو، ول نطلب اكل، اقول ليكم نطلع نأكل زاتو، شكلكم من الصباح ما اكلتوا حاجه في بطنكم.
=شكرا ي مؤمن، والله انا ماجعانه لو عايزين تأكلو وكده انا امشي وبجيكم المساء في البيت.
_انا زاتو ماجعانه.
*خلاص اطلب ليكم ليمون يهدي أعصابكم. 'اتنين ليمون لو سمحت، وخلي الخالة تعمل لي قهوة'. اها اتفضلوا انا اسمع.
=الضحايا كلهم رافضين يتكلموا اساسا زي ما عارف، ف مروه قالت لي نشوف الوش التاني ل القضية.
*المتهم .
=اي، طبعاً ال ف السجن ح يكون عددهم قليل، والعندي ليهم ف القضايا المعاي ح يرفضوا اساسا والباقين ما ح اعرف مكانهم.
*وعايزين اخليكم تشوف ال معاي هنا ف السجن واعرف ليكم الباقين ساكنين وين صح.
_صح.
*الليمون جاا اشربوا كده، انا امشي واجي.
"في بيت أحمد صاحب وليد"
=عليك لله امبارح قلت ليها شنو
_العربيه كان مافيها بنزين، عشان ارجع البيت عشان كده كنت بايت معاك.
=وبكره ح تقول ليها شنو
_ما بايت انا ماشي، العربية الليله مع امي، اديني بس كم شريط كده، وكم يوم وبجيب لك قروش دا والقبل دا
=تمام طيب، بس اشرب دي، ح تخليك تمشي عالم تاني.
_اديني كده نجرب.
"في القسم"
*معليش اتاخرت عليكم
=م مشكلة
*يلا ي ستي، انتي ربنا بيحبك، لأن لقيت ليك موضوع رسالتك، المتهم والضحية في قضية وحده.
=كيف؟!
*لقيت قضية قديمة شديدة، أظن كنت طالب الوقت داك زاتو، المهم، المعتدي عليه طفل عمرو سبعه سنة تقربيا، المحضر بقول ان المتهم ود صاحب الشركه الكان شغال فيها ابو الطفل دا،الأم جات عملت بلاغ، ابو الطفل جا قفل القضية واتنازل عن القضية .
_ما فهمت حاجه، وين المتهم ووين الضحية ال ف قضية وحدة، مش دا كلامك.
*ممكن تخليني اواصل كلامي ي مروه.
=لحظة ي مروة، اها واصل.
*قبل سنة جات قضية زيها في أي حاجه بس اختلاف في حاجات بسيطة، المعتدي عليه طفل ف عمر تسعه سنه تقربيا، المتهم صاحب البيت الشغاله فيهو ام الطفل، شغاله ممرضة ل حبوبة المتهم، طيب هو تعديل بسيط الود ما حصلت ليهو حاجه الأم جات في الوقت المناسب، ابو الطفل جا اتنازل عن القضية ك العاده، ومافي قضية اساسا لو الود ما حصلت ليهو حاجه.
_مؤمن انا ما فاهمه
=لحظة ي مروة انا شكلو فهمت مؤمن قاصد شنو،اسم الطفل في القضية الأولي من، واسم المتهم في القضية التانيه من؟!
*"ب ابتسامه " كنت عارف انك ح تفهمها وهي طايرة زي ما بقولوا
نفس الشخصية مصطفى محمود درويش.