رسالة

الرسالة السادسة والعشرون

#رسالة"26" 🖋️ إبتهال حسن
"بعد تلاتة يوم"
" وسن في المستشفى وفي يدها المحاليل"
=وليددد
*بسم لله اهدي ياوسن
=مصطفى وليد وين، وليد خلاص مافي يعني، وليد مافي "تبكي"
*وسن اهدي انتي ليك تلاتة يوم ب الحال دا، ادعي ليهو بالرحمة.
=انا السبب ما عرفت كيف من بدري أن اخوي مدمن انا السبب يا مصطفى، وليدددد
*وسن ما انتي السبب، دا يوم وليد من غير المخدرات ول ب المخدرات كان ح يموت، اهدي خليك قوية الناس كلها بتسأل منك وابوك جا من السفر،شدي حيلك كده عشان بكرة نطلع، الناس منتظرة متين تطلعي
=ابوي جا، ح اقول ليهو شنو، انا ما عايزه اشوف زول يامصطفى
*طيب ل متين ح تكوني كده، وسن انتي ما عندك علاقة ب موت اخوك، وابوك ما ح يقول لك حاجه، انتي خليك قوية عشانهم يااخ مش عمرك كلُ بتكوني قوية عشانهم..
=اي
*خلاص معناها بكره الصباح نطلع حاضر.
=حاضر
___________________
"تاني يوم"
"طلعت من المستشفى وصلت البيت معاي مروة ومصطفى، بقيت امشي خطوة وارجع خطوة، ما متخيلة صوت البكاء دا في بيتنا وما متخيلة البيت تاني ح يكون كيف من غير وليد"
_وسن ادخلي
*ادخلي يا وسن
=مصطفى انت ماشي وين ما تمشي؟
*ماشي اجيب حبوبة وجاي، انتي ادخلي، خليك معاها يا مروة
_ حاضر، تعالى معاي ياوسن.
" دخلت البيت كده النسوان كل وحده بتجي تبكي معاي، لمن وصلت عندي امي، بقيت ابكي لمن مروة جات طلعت معاي غرفتي، شوية وابوي جا"
=ابوي وليد خلاص مافي.
*ربنا يرحمو ويغفر ليهو يا وسن ادعي ليهو هسا، البكاء ما ح يعمل حاجه.
_________________
*شوفت وسن يا حسام
_لا، هي طلعت من المستشفى!
* اي، انا لقيتهم في الباب كان معاها الود،الشغاله معاهم، انا عارفه هي رفضت العرس منك ليه، اكيد عندها علاقة مع الود.
_ما أظن يا أمي وسن زولة صريحة لو عندها حاجه كان بتقول طوالي.
*طيب ل شنو ما رفضت من زمان الا هسا يدوب، اسكت عليك لله انت ما شوفت النسوان فاكرين الود خطيب وسن، قاعده اسمع فيهم يقولوا ربنا عوض أم وسن عن المرحوم ب رجال بناتها، مهند ماشاء لله واقف وقفة جد والله في العزاء ، اما اسمُ من دا مصطفى ولا منُ ما بعرف كان مع وسن في المستشفى وبجي هنا مرات كمان.
_هو وين كده نشوفُ
*طلع بس ح يرجع شكلُ.
________________
*وسن ادعي ل اخوك كفايه بكاء، انا طالع اشوف الرجال، خليك معاها يا مروة
_حاضر يا عمي.
-السلام عليكم، وسن صاحيه
*اي صاحية، اتفضلي يا حجة.
"رفعت راسي كده لقيت حبوبة في باب الغرفة"
=حبوبة حبوبة
-وسن البركة فيكم يا بتي، وحمد لله على سلامتك كمان.
=البركة في الجميع، الله يسلمك،ل شنو طلعتي لمن هنا كان بنزل لك.
-عشان خاطرك يا وسن بطلع برج مش كم سلم.
=الله يخليك لي ياحبوبة.
-انتي هسا صحتك كيف مصطفى قال في المستشفى ما قاعده تأكلي مركبين لك المحاليل دي بس، هسا جيتي بيتك بعد كده تأكلي.
=ماعندي نفس ل حاجه والله ياحبوبة.
-والله يا وسن يا بتي، الفراق صعب وصعب شديد بس دي سنة الحياة، هم السابقون ونحن اللاحقون، في الأول ح تبقى لك صعبه الحياة واي حاجه بس ما تنسى كمان ربنا بيسألك من روحك دي،أهم حاجه تأكلي إن شاء لله لقمتين بس،وبعدين هو لو عايش ما ح يرضى يشوفك كده، وما تنسي كمان اهلك خليك قوية عشانهم.
=ونعمة ب لله، حاضر.
*واحنا عايزين وسن ترجع لينا سريع كمان البيت ما حلو من دونك.
=حاضر أن شاء الله "بإبتسامة باهتة"
_____________________
_دي شنو الصدفة العجيبة دي
*حسام، بالجد صدفة عجيبة، تقصد صدفة ما حلوة
_بتعرف منُ هنا يا مصطفى
*والله مفروض انا أسأل السؤال دا، وسن شغالة معاي ممرضة.
_ممرضة!!!
*اي، بس انت بتعرف هنا منُ
_انا من ناس البيت وسن بتكون بت خالتي،خطيبتي سابقاً
*انت ود خالتها عليك لله،حكيت لي عنك قبل كده.
_شوف سبحان لله، هسا عايز اقول لك حكيت لي عنك، عارف معناها ظن امي غلط لو انت وسن شغالة معاك.
*ما فهمت
_وسن كانت خطيبتي، وهسا النسوان شايفين انك معاها هسا فاكرين انك خطيبها قولوا شغاله معاهو وخطيبتو كمان شكلها، امي كلام النسوان بقى يوسوس في رأسها وانابقيت واقف منتظر اشوف الخطيب دا بس ما كنت متوقع دا انت، بعد عرفت دا انت بقيت مطمئن.
*وليه؟!
_ياصاحبي انت نسيت زمان ول شنو، وشكلك لمن هسا عيان كمان، ايواا انا نسيت ما قولت لك وسن ما ممرضة هي، وسن دكتورة نفسية وعندها رسالة عن الاعتداء الجنسي ل الأطفال، وانت موضوع رسالتها.
*انت بتقول في شنو، انت واحد كضاب
_ما كضاب، اي واحد في العزاء دا اسألُ وسن شغالة شنو ح يقول دكتورة، مش قلت لك حكيت لي عنك، ماهي دي الحكاية انت مشروع رسالتها انها تخليك تبقى كويس،بس شكلك بقيت كويس انت ههههه لأنك بقيت تحبها ظاهر ههههه.
"مصطفى اتحرك طوالي على العربية واتصل على حبوبة عشان تنزل ليهو"
________________
_حسام واقف تتكلم مع الود دا انت بتعرفو ول شنو
*اي
_ انا كمان جاية اقول لك الود الاسم مصطفى جا عشان تشوفو طلعت بتعرفُ كمان.
*معرفة قديمة شديد يا أمي.
_اها وحصل شنو هسا في كلامكم دا قلت ليهو انك خطيب وسن القديم.
*قلت ليهو اي حاجه، وهو ماحيكون خطيب ليها ولا اي حاجه، وخربت ل دكتورة وسن رسالتها الفرحانة بيها دي،ورفضت تزوجني عشانها، خليها نشوف هسا ح تعمل شنو.
__________________
_وسن بتسأل منك يا مصطفى، مالك ما جيت تشوفها
مصطفى مصطفى مالك ما بترد
*اي حبوبة، بشوفها بشوفها، خلينا نمشي البيت احسن.
_________________
"بعد يومين"
*بداية الشهر ان شاء لله ح اسافر.
=تسافر وين يا ابوي ول شنو
*الشغل.
=لسه عايز تمشي ما كفاية السنين دي كلها، ما كفاية وليد عايز منُ يضيع كمان.
*وليد مات عشان انا مسافر يا وسن يعني، وليد مات عشان دا يومُ، انا خلاص بقيت متعود على هناك، والبيت من غير وليد ما ح يكون ليهو طعم.
=انت قعدت متين زاتو عشان تعرف ح يكون كيف، طيب انت بتقول كده القاعد تشوف وليد في السنة مرة، احنا نعمل شنو طيب "بقيت تبكي"
*خلاص نمشي كلنا.
=ابوي ول شنو دا كلُ، يعني ما ينفع نكون هنا وانت تقعد
*وسن ما شايفة ان صوتك بقى عالي ودي اول مرة صوتك يترفع عليّ.
=بلا وسن، بلا غيرُ،وسن تعبت خلاص، اعمل العايز تعملُ يا ابوي انا طالعة زاتو.
"زعلت أن صوتي رفعت في ابوي، طلعت طوالي وما عارفه انا ماشة وين، لقيت نفسي وقفت العربية قدام بيت ناس مصطفى"
___________
=حبوبة
_وسن كيفك يا بتي، وكيف صحتك وكيف اهلك
=الحمد لله كويسين وانا كويسه، مصطفى في؟!
_اي، ماعارفه الايام دي حاصل عليه شنو من آخر مرة كنت معاك دا بس بقى قاعد في الغرفة في الجنينة حتى الأكل بشيل يأكل هناك، ما تكونوا متشاكلين
=لا هو آخر مرة شوفت انا يوم طلعت من المستشفى وتاني ما جا البيت زاتو، هسا هو في الغرفة.
*اي
=طيب بعد اذنك امشي اشوف
"طق طق"
*ما جعان ياحبوبة هسا بعدين بأكل.
=انا وسن يا مصطفى
*وسن!!! ادخلي الباب مفتوح
=مالك قاعد كده حبوبة قالت لي مقفول هناك لك يومين عندك مشكلة في الشغل.
*مشكلة بسيطة.
=احكي طيب، وانا كمان كنت جاية اتكلم معاك شوية.
*مالك في شنو
"مصطفى طريقة كلامُ باردة شديد معاي وما عايز يعاين في اتجاهي زاتو"
=اتكلمت مع ابوي بطريقة ما حلوة، زعلانة شديد من نفسي.
*ابوك اكيد ما ح يزعل منك، امشي اعتذري منُ بس.
=طيب هو انت مالك شكلك ما طبيعي احكي لي.
*احكي لك ك دكتورة نفسية ول ك صديقة؟!
=دكتورة نفسية!!
*اي، مش انتي دكتورة نفسية، وبتعملي رسالتك وانا هو مشروعك "مصطفى فجأة صوتو بقى عالي"
=مصطفى والله انا عايزة اساعدك وو
*و شنو، وعايزه رسالتك تنجح صح كمان، وعاملة مسلسل انك ممرضة وفجأة تبقى صحبتي، بس عارفة انتي دكتورة شاطرة، لأن في فترة بسيطة خليتني أثق فيك، واقول لك كل أسراري والسر الوحيد الأنا كنت ساكت وما قلت لك، انتي طلعت عارفهو كمان بررافوو "بقى يصفق"
=مصطفى والله احلف لك ب رحمة اخوي، انا في البداية ما اكضب لك كنت جاية وهدفي في الرسالة بس، والله بعد قربت منك عرفت قدر شنو انت زول نقي وانا بقيت عايزك اساعدك عشان انت صاحبي ما عشان انا دكتورة "وسن تبكي"
*كفاية ما عايز اسمع منك اي حاجه كفاية، انا كنت غبي شديد شديد، بالجد ما في زول يستاهل الثقة وانتي المرة دا اثبتي لي الكلام دا، واثبتي لي إنك ما ب تستاهلي حبي حتى، وانا الكنت فرحان أن بقيت كويس.
=ما تقول كده عليك لله يا مصطفى،انا..
*انتي شنو، اطلعي ياوسن من هنا، اطلعي من حياتي كلها.
=انا لو طلعت انت ح تكون مرتاح، لو ح تكون مرتاح انا بطلع وتاني ما ح تشوف وشي، بس عليك لله ما ترجع تأذي الأطفال تاني، لو ما عشاني عشان نفسك وعشان حبوبة.
*ح أكون مرتاح، ممكن تطلعي.
=انا طالعة بس عايزه اقول لك انك في الأول كنت بالنسبة لي مريض وهسا بقيت أكبر من انك صاحب، بعد اذنك يا مصطفى.
"طلعت من عند مصطفى مكسورة، ما كنت عايزه ارجع البيت مشيت طوالي ل مروة"
=ودا كل الحصل لمن لقيت نفسي جيت عندك هنا.
_طيب هو عرف من وين انك دكتورة وموضوع الرسالة دا
=احتمال من العزاء، يكون سمع ليهو زول بيقول دكتورة وسن
_طيب لو كلامك دا صح، وموضوع الرسالة برضو سمع زول، اساسا هو مافي زول عارف ب موضوع الرسالة صح؟
=لا ناس ب العدد بس.
_يا زولة يومين وامشي ليهو تاني،بعدين هو بيحبك اكيد ح يسامحك.
=إن شاء لله، مش قلت لك خائفة لمن يعرف الحقيقة انا اخسرُ، انا لو خسرت مصطفى ما عارفه ح يحصل لي شنو.
_ايوااا، يا زولة شكلك انتي كمان بتحبي مصطفى.
=ما عارفة يااخ بس شكلُ.
_مستحيل ما يسامحك هسا يضرب لك.
=تلفوني ماعارفهو وين زاتو من يوم العزاء مقفول.
_خلاص الصباح امشي افتحه، وانا واثقة ح تكون في رسالة من مصطفى، ويلا هسا النوم.
"الصباح تلفون مروة بيضرب"
_يا ربي
الو اي مؤمن

اي وسن هنا

شنو

=في شنو يا مروة
_مؤمن قال مصطفى انتحر