رسالة

الرسالة الثانية عشر

#رسالة "12" 🖋️ إبتهال حسن
=مصطفى دي المره التاني الليلة توقف قلبي.
الو اي برجع لك.
_معليش كنت عايز اشرب موية سمعت صوت بس، ما كنت فاكر دي انتي.
=اي قبل ما خلصت كلامي معاه عشان كده.
_ما قلت رسالة شنو
=رسالة، اااا اهااا، اي لا دا موضوع تاني.
_من غير قصد سمعتك بتقول قاعده معاهم عشان موضوع الرسالة.
=اي، دا موضوع تاني، بتكلم عن صحبتي كان.
_اهاا تمام، تصبحي ع خير.
"شكلو انا ح أقع يوم بسبب كلامي دا، الحمد لله طلعت منها هسا، لازم اعمل حسابي تاني،اساسا كل دا بسبب حسام دا، عليك لله جاب لي موضوع العرس دا من وين هسا، بقيت قاعده افكر لمن نومت في الكنبه ما صحيت الا بصوت مصطفى"
_وسن مالك نايمة هنا؟!
=نومت فجأة، كنت بفكر شوية، هي الساعه كم؟!
_خمسة ونص
=حبوبة ما صحيت؟!
_لا لسه، ما قصدي أتدخل في حياتك بس ظاهر انك متضايقة شوية.
=ظاهر لدرجه دي، موضوع جايط شوية هو
_ممكن اسمعكِ لو عايزه
=انا ما متعوده احكي، بس حالياً محتاجة اتكلم
_اتفضلي بسمعك انا
=كان عامل شروط ان الممرضة تكون سنجل
_اي
=انا كضبت عليك
_ليه متزوجه انتي
=لا، مخطوبة هي ما خطوبة يعني بس كل الاهل والناس عارفين
_دي المشكلة يعني، لمن زمن عرسك يقرب ممكن تسيبي الشغل وانا بشوف وحده تاني، ما هو مستحيل تكوني قاعده كده
=لا، المشكلة ما هنا، المشكلة ان انا ماعايزه العرس دا
_ليه؟!
=انا شايفة ان زي اخوي، ما عندي وربع احساس واحد أن ممكن في يوم يكون زوجي.
_قريبك هو يعني
=اي ود خالتي، من لمن كنا صغار وسن ل حسام خلاص.
_بس السبب انك شايفة هو زي اخوك
=لا، هو ما الشخص المناسب، انا عايزه الشخص ال ح اعيش معاهو دا احس بالأمان معاه ، اكون مرتاحه إني معاهو، معاهو ما افكر في بكره، فهمت ما الزول الأنا عايزه اقضي باقي حياتي معاهو.. و حاجات كتيره ومافي صفه وحده فيهم عند حسام.
_خلاص قولي ليهم ما عايزهو
=أمي فرحانه جدا بالعرس دا شايفه ان هو زول كويس ما فيهو عيب، كل مره اقول عايزه افتح معاه الموضوع دا بشوف الفرح في عيونها بسكت، ولو كلام سااي من فوق فوق اقول ان ما عايزهو، بحس بيها متضايقة، ما عايزه اقتل الفرحة من عيونها.
_اي، بس الكلام دا ما يكون على حساب نفسك، يعني انتي لو مامبسوطة اكيد امك كمان ح تكون ما مبسوطة، هسا تفرح كم يوم ب العرس وكده وبتها اتزوجت بس بعد العرس انتي ح تجي تشكي ليها، الوقت داك بالجد الفرحه ح تموت من عيونها.
=صح كلامك
_حاولي اتكلمي مع ابوك وهو ح يساعدك كمان في طريقة توصل بيها رفضك ل امك، طيب هو انتي صليت استخاره في الموضوع دا؟!
=لا
_حاولي صلي كمان، لو لقيت نفسك مرتاحه في الموضوع خلاص، اما لو لا اتكلمي طوالي انك رافضة، انا عن نفسي انصحك ما تعملي حاجه انتي ما مرتاحه فيها
=إن شاء الله، شكرا، بالجد كنت محتاجه اتكلم
_العفو على شنو، شكلك كان ظاهر انك متضايقة، يلا بعد اذنك طالع
=طالع الشغل ب الوقت دا
_اكيد لا، كيف اطلع ب هدوم البيت يعني، طالع قريب وجاي.
=تمام
"ما عارفه ل شنو حكيت ل مصطفى بس كنت مرتاحه وانا بحكي ليهو، طلعت كل حاجه في قلبي، وبالجد كنت متضايقة شديد، بعد طلع كنت مرتاحه وحاسه نفسي خفيفة مشيت عملت كيكه، وساره عملت الشاي، مصطفى جا وكان أول مره يقعد يشرب معانا"
_تسلم يدك الكيكة حلوة
=الله يسلمك
_يلا ي حبوبة انا امشي
*الله معاك
_____________________________________
*ياا أحمد عليك لله جيب من العندك وانا بديك القروش
_والله ي وليد انا زاتو ما معاي، وما معاي قروش زاتو، القروش كلها رسلتها ل اهلي
*يااخ راسي ح ينفجر، ح اموت انا
_والله لو عندي انت عارف ما بقصر معاك، امشي جيب قروش، وانا نص ساعه بجيب لك العايزو انت
*اجيب قروش من وين انا قروش كل المجموعات القاعد اقول دخلها اديك ليها، واخر قروش امبارح اختي خليتها لي، اخدتها بيها، ما باقي الا اسرق
_طيب مالو اسرق!!
*اسرق!!
_اسرق عشان ترتاح من الصداع دا
*اسرق منو لاكن؟!
_ناس البيت، اكيد ما ح يشكوا فيك صح
*اي اي صح كلامك، فكره يلااا ح امشي سريع واجي انا
"طلع مستعجل وفي الباب كان في واحد صحبهم حتى ما سلم عليهو"
=وليد طالع مستعجل كده مالو
_ماشي يجيب قروش
=قروش لك يعني
_لا قروش عشان اجيب ليهو بوردة
=شنو!!!!! انت مجنون ل شنو خليتو يتعاطى القرف دا، وليد دا مش صحبك، ما كفايه انك شغال فيهو كمان بتخلي صحبك يتعاطى القرف حقك دا، ولو عايز تكسب منو انت؟!!!!!!، انا مئة مره قلت لك وليد خليهو يبعد من القرف حقك دا "بصوت كل زعل"
_مالك زعلان عليهو كده وليد دا ما يستاهل كل دا، مش دا صحبك من عشره سنه، هسا هو صحبك، لا ما صحبك، اقول لك ما صحبك ليه، لأن انت ما قاعد تقدم ليهو حاجه، ما قاعد تساعدو، وليد الانت زعلان عليه كده صاحب مصلحه ما اكتر.
=وليد عمرو ما كان صاحب مصلحه، هو لمن هسا صحبي بس شويه ما زي زمان، لأن انا اتحولت من المدرسة وبقرأ مجال غيرو، عشان كده ح يكون مع مشغوليات القراية، ما في وقت نكون زي زمان، بس انت شايفو كده عشان عايز تشوف كده ويكون عندك سبب تغطي بيهو على قرفك وعملتك دي
"أصواتهم كلها زعل"
_عندي مئة سبب ما سبب واحد، زي ما قلت عايز اكسب منو، يبقى زبوني
=ل شنو يااخ وليد دا ما صحبك ما اخوك
_لا، ما صحبي ما اخوي، في فرق كبير بيننا، واحد ربنا مديهو اي حاجه، شاطر في المدرسة ومتميز كمان، و وضعهم كويس، وكل الناس بتحبو، اي مكان امشي فيهو هو ما معاي الناس قبل تسلم علي بتسأل من وليد، بقيت في أي مكان بسمع وليد وليد، حتى البت الكنت معجب بيها، طلعت هي معجبة ب وليد، اما انا واحد جاي من البلد عشان يشتغل ويرسل اي جنيه ل اهلو وبقرأ المدرسة من غير ما اهلي يعرفوا زاتو، بسبب الشغل مستوى في المدرسة قاعد ينزل، كل الناس بتعامل معاي على أساس انا ما من مستواهم، زي كأن انا ما بعرف اتونس واضحك زي ما وليد بضحك ويتونس معاهم ، شوفت الفرق قدر شنو ياامروان، عشان كده كان لازم يبقى مدمن عشان انا اكسب من قروشو، عشان مستواه في المدرسة ينزل زي ما انا حقي نازل، عشان الناس لمن تعرف ان وليد مدمن تبعد عنو، عشان البت المعجبة بيهو كمان تكرهو....
=ليه يااخ كمية الحقد والحسد العندك دي، دا كل فى قلبك انت اتجاه وليد، والضحك والهظار دا كل كضب يعني، وليد مايستاهل منك دا كلو، عارف هو مميز وكل الناس بتحبوا ل شنو عشان قلبو أبيض، بعدين انت لو فكرت شوية ح تلقى انك عندك حاجات كتيره ربنا أكرمك بيها، بس انت ما شايفها، عارف ليه، عشان مركز في حياة وليد، وعايز تدمرها، وانا ما ح اخليك تدمر حياتو ....... "طلع مروان من البيت طوالي"