رسالة

الرسالة السابعة

#رسالة "7" 🖋️إبتهال حسن
=الو اي ي سماح انا تحت
*طيب نازلة
.......
*ازيك
=الحمد لله بخير وانتي كيف؟!
*الحمد لله، الليله مرتاحة من زحمه الموصلات، والجوطة دي
=كل يوم بتمشي ليهم انتي
*والله ما يومياً بس مرات في ملفات بتكون عايزه مراجعه أو توقيع مصطفى عشان كده بكون لازم امشي ليهم.
=اها ربنا يعينك، هو مديرك؟!
*اي، هو مدير الحسابات.
مروة قالت ما اشتغلت ممرضة خاصه قبل كده
=اي، بس كنت بهتم ب حبوبتي لمن امشي البلد.
*حلو طيب، المهم هسا هم ناس تعاملهم رايق جدا، وحبوبة ظريفة شديدة، انا ح اعرفك بيهم وانتي ح تعرفي براك كلامي صح.
=تمام ان شاء الله
_______________________
=اها ي دكتور بقيت كيف؟!
*كويسة هسا عندها خدوش كده في جزء من جسمها، ورجلها ح نعمل ليها اشعه بس ظاهر انها اتفكت
=ممكن ندخل نشوفها
*اخدت مسكن نايمه....
=شكراً لك ي دكتور، يلاا بعد كده انتو امشوا الموقع وانا ح اضرب ل أهلها، شنطتها وين هي
_في العربية
=امشي اجيبها انا، يلا زي ما قلت ليكم، بس واصلوا الشغل حق الليله وارجعوا وبكره ح اديكم القروش.
_____________________
بيت مطلئ باللون الرمادي والأبيض من الخارج في مقدمته حديقة صغيرة.... شاب في نهاية عقد العشرين أو بداية الثلاثين، طويل القامة، عيناه ك حبتا البندق، اسمر بعض الشي "
*السلام عليكم
_وعليكم السلام
*كيفك ي مصطفى حبوبة نايمه ول شنو؟!
_اي نايمة،، اتفضلوا اتفضلوا
=شكراً
*دي وسن ودا مصطفى، واتفضل دا الملف اعمل ليهو مراجعه واديني الباقين عشان ارجعهم معاي الشركة بكره
_مالك مستعجله دقيقة سارة تعمل ليك عصير مسافة اجيب لك الملفات.

"التلفون يضرب"
*دا تلفونك ي وسن
=اي
دي وفاء هسا ح تقول بعدين اجي أسوقها برجع ليها بعدين
_اتفضلي دا الملف، "ساره جابت العصير"
"تاني التلفون يضرب"
_ممكن تردي عادي
=لا م مهم
_يلا امشي انا مع السلامه
الله يسلمك 'بصوت واحد'
_ي وسن، طبعا اكيد سماح قالت لك عندي مواصفات معينه ل ممرضة
=اي، انا م عندي أطفال وما متزوجه اساسا
_تمام، يلا كل شغلك ح يكون مع حبوبة بس مواعيد الأدوية حقتها، أكلها عشان مرات بتأكل سكريات كتيره، وعندها كل شهر فحص شامل في المركز ح اديك رقمهم وو
"التلفون يضرب"
=اسفه بس شكل موضوع مهم لحظة بس
الو اي ي وفاء
انت منو..... مالها... كيف وقعت من السلم يعني..... في ياتو مستشفى.. انا جاية طيب...
_خير ان شاء الله
=اسفة جدا لازم امشي اختي وقعت من السلم وفي المستشفى هسا لازم امشي ليها
_اتفضلي اكيد وسلامتها
=الله يسلمك وبعتذر مره تانيه.
___________
_ي باشمهندس ممكن تدخل ليها صحيت
*وفاء وفاء
=هندسة "ب ابتسامه كلها آلم وتحاول تقوم"
*ما تقومي خليك زي ماانتي حمد على سلامتك
=الله يسلمك، عملت ليكم جوطة في الموقع صح
*جوطة شنو ما مهم المهم انك كويسة هسا كنا خايفين عليك، كل ال ف الموقع كانوا هنا مشوا قبل شوية
_لو سمحت عايزين نمشي نعمل ليها الاشعة
*اتفضلي،،، ممكن اساعدك كمان جيبي يدك ي وفاء اسندي على، الممرضة جابت الكرسي المتحرك" قعدت وفاء
________
=لو سمحت جات شابه وقعت من سلم في موقع قبل شوية
*اي، قاعده تعمل اشعه هسا، شوية وح ترجع اقعدي هنا كانت راقده هنا.
=شكرا
______
_ي باشمهندسة عندك فك في رجلك اليمين، وشوية كدمات في الشمال اعمل ليها دلك طبيعي اسبوعين وح تكوني رجلك كويسه زي زمان
=أن شاء لله، شكرا لك
*تعالى يلا اقعدي، بعد دا ممكن طلعت ي دكتور
_اي ممكن، خليها تسأل الدكتور المتابع هسا معاها، واعمل حسابك تاني، وأهم حاجه العلاج الطبيعي.
=أن شاء لله
______________
=كويسه هي ي امي شوية وح نجي البيت
ما شوفتها قاعده تعمل اشعه رجلها اتفكت الظاهر
انا سالت الدكتور وقال لي ما عندها حاجه خدوش والعلاج الطبيعي ح تبقى كويسه
حاضر، لحظة ي امي شكلها جات
_وسن جيتي متين
=وفاء حبيبتي "حضنتها عليها" سلامتك بقيت كيف هسا
_الحمد لله احسن الدكتور قال لي ممكن اطلع كمان
=اي مشيت ليهو انا
_طيب يلا نمشي ما بحب قعده المستشفيات دي انتي عارفه، نسيت ما عرفتك،دا المهندس عصام مديري في الشغل وهو الضرب لك، دي وسن اختي
=اتشرفنا والله ومعليش على الجوطة حقت وفاء
*الشرف لي، والله احنا المفروض نقول لكم معليش، حصل ليها كل دا ب سبب الشغل حقنا.
_يخووانا انا ما ميتة، شنو معليش وما معليش
=هههههه يلااا يلااا طيب
*لحظة بس طيب
=اتفضل، ح نحرك على العربية احنا طيب.
..............
...........
.....................
=هو مالو اتاخر كده اضرب ليهو، انا من قبيل امي ح تكون بتضرب لي و تلفوني قفل زاتو.
_جاا جاا خلاص
*اتفضلي دي العلاجات، والدكتور حق العلاج بكره ان شاء الله بجي عليكم في البيت ودي الشنطة حقتك
=ي هندسة ما في داعي ل التعب، العلاجات بجيبها ليها انا كان.
_مافي داعي كان، شكرا لك
*العفو دا أقل واجب، ربنا يتم شفاءك ع خير وبكره أن شاء الله نجي نشوفك،يلا في امان الله.
_____________________
=ي زول شوف لي علبة ول اي مصيبه اكب فيها الشريط دا، اختي امبارح عامله معاي تحقيق اصحابك ممنو والقراية وصاحبك شغال شننو، شكلها شافت الشريط
*عرفت من وين انت انها شافت الشريط
=قالت لي شالت الشاحن والشاحن قاعد في الدرج وفي الدرج انا لقيت الشريط قاعد.
*طيب انت ما تعمل حسابك قاعد تخليه ظاهر كده ليه.
=الغرفة حقتي مافي زول قاعد يدخل فيها اساسا، قاعد انضفها برأي زاتو.
*ي زول مش اتكلمت معاها انت بكل ثقة ح تكون عرفت ان الشريط دا ما حقك، وبعدين مش ما سالتك هي خلاص مالك طيب
=انا وسن اختي بعرفها ما تقول لك الحاجه طوالي بتلف وبدور
*ي زول ما تخاف سااي،، بالمناسبه الشريط سعرو زاد حاول جيب قروش زياده تاني
=ل شنو يااخ بعد كده الا اسرق ناس البيت انا، دفعت لك قروش المجموعه و خليتها زاتو
*والله دا سعر السوق، وبعدين انا قلت لك انت العب بكل الاتجاهات، اضرب ل ابوك قل ليهو المصروف بسيط ح يرسل لك ف تلفونك رصيد، قل ل امك كمان عايز مجموعه تانيه حقت رياضيات عربيه اي حاجه، قل ل اختك مش شغاله، العب من كل الاتجاهات.
=بخاف واحد فيهم يقول ل التاني.
*ما تخاف ما في واحد ح يقول.
=دقيقة دي امي ضرب لي.
اي امي متين الكلام، خلاص جاي انا.
_____________________________
_حمد لله ع سلامتك ي بتي، يلا شوفت تاني ما تقول لي شغل وتدريب وكلام كتير،تاني جامعتك بس
*ي أمي عليك لله انتي عارفه انا بحب شغلي دا كيف ما تقول لي كده
=هسا يخووانا دا ما وقتو خليها تاخد راحتها، امشي اعمل ليها عصير انا.
_امشي اجيب لك شوربة قبل العصير، خليك معاها ي وسن احتمال تكون عايزه مساعده عشان تغير هدومها دي.