رسالة

الرسالة الخامسة عشر

#رسالة "15" 🖋️ إبتهال حسن
_ابعد من أحمد؟!
*اي، احمد دا حاقد وحاسد عليك، ما تشوف الضحك والهظار
_ههههه أحمد، يااخ لو قلت اي زول تاني ممكن أصدق، احمد دا اخوي ما صحبي.
*لو اخوك وصحبك يخليك تتعاطى القرف دا
_دا كلام شنو ياا مروان انت شكلك تعبان وقاعد تقول اي كلام
*لا انا ما تعبان دي الحقيقة، احمد من الحقد العندو اتجاهك خليك تتعاطي عشان يكسب هو، ويخلي الناس كلها تكرهك و.
"قطع كلامو وليد"
_كفاية عليك لله يا مروان، انت عارف أحمد قال انك كنت عندو قبل كم يوم وقعدت تقول ليهو كلام مامفهوم، أن انا اتغيرت عليك، بس انا ما صدقت، قال لي انك ح تحاول تخرب بيني وبينو، بس ما صدقت، لأن كنت واثق انك ما بتعمل ولا بتقول حاجات زي دي، بس بعد كلامك دا، اتأكدت بالجد أن الناس بتغير.
*مؤلف شاطر كمان هو
_مروان كفاية عليك لله، والبركة فيكم مره تانية ومع السلامه
______________________________________
*الوووو وين؟!
.......
تعالى سريع، حبوبة فاقدة الوعي ولااازم امشي بيها المستشفى
.......
دا ما وقت اسئلتك يااااوسن تعالى سريع
...
_____________________
_اختك دي ما جااية صح
*جاية قالت لي
_اضربي ليها
*بضرب من قبل ما قاعده ترد هي
______________________________
*=خير ياا دكتور حبوبة مالها
-ضغطها مرتفع شديد وعندها انهيار عصبي
=كيف ياا دكتور، قبل كم ساعة عملت ليها فحوصات شاملة وكانت كويسة، وصحتها زي الفل.
-احتمال اتعرضت ل صدمة
=صدمة، حصل شنو ياا مصطفى هو
*دا ما وقتك اسئلتك انتي كمان، شكراً لك ي دكتور، ممكن اشوفها
-أي اتفضل، انا في المكتب لو عايزين حاجه
"في غرفة حبوبة"
=*حمد لله على السلامة ياا حبوبة
_الله يسلمك.
=هسا انتي كيف
_الحمد لله.
=خير يااحبوبة حصل شنو، الفحوصات كانت كويسه، هسا الدكتور يقول لي الضغط مرتفع وعندك انهيار
*هوو انتي ما بتعرفي توقفي اسئلتك دي، دا وقت هسا شايفة انتي "مصطفى كان عصبي شديد، ودي اول مره اشوفو متعصب"
=انا بس عايزه عارفه الضغط مرتفع ل شنو، احتمال الغلط من ناس المركز، احتمال الفحوصات كمان كلها غلط، عايزه اتأكد بس ما اكيد، بعد اذنكم ماشة اشوف الدكتور.
____________________________________
=اي يااوفاء.
......
ما جاية.
.....
كنت في الطريق ضربوا لي قالوا حبوبة تعبانه، كان لازم ارجع
........
في المستشفى هسا
...
خلي امي تخليها تمشي بيتهم انا بمشي ليها عديل في البيت.
.....
ما عارفه، ماشه اشوف الدكتور يقول نطلع متين
.....
تمام مع السلامة.
.....
*ممكن تمشي لو عايزه
=مصطفى!! عايزه اتطمئن على حبوبة اول
*كويسة هي امشي الليله اساسا يوم اجازتك
=ما ماشة، عايزه ادخل ل الدكتور اول
________________
*بتك قالت كده
_ياالله من وسن دي
*انا امشي اقول ل بثينة تمشي بيتهم
_امشي خلاص، نشوف نهاية الموضوع دا شنو.
"التلفون يضرب"
*الوو
...
تمام الحمد لله
....
تعبانه شوية
......
هو سأل مني المهندس عصام.
......
طيب خلااص لمن يسأل مني، اعملي نفسك ما عارفه حاجه، تمام
...
ما في حاجه والله
.....
طيب الله يسلمك، سلامات كتيره ل ناس المكتب عليك لله.
__________________________________
-بكرة المساء ح اكتب ليكم على خروج
=هي هسا كيف
-هي كويسة، بس عايز اتأكد من الضغط وكده، وح اكتب ليها على شوية علاجات، وبعدين اطلعوا
=إن شاء الله
-أجر وعافية إن شاء الله
__________________________
*ما شوفت الحصل ياوليد
_في شنو؟!
*بثينة سرقت قروش من امي
_كيف يعني
*كلنا ما مصدقين اساسا، بس امي قالت ما في زول غريب بدخل الغرفة غير بثينة، ومستحيل احنا نكون سرقنا القروش يعني
_اي صح كلامها، مستحيل احنا، وبعدين حصل شنو
*ولا حاجه، امي قالت عايزه تفتح بلاغ، وسن ضربت وقالت لي نخليها تمشي وهي بتمشي ليها في البيت.
_احسن اي، هي وسن
*الناس الشغالة عندهم ديل، الحبوبة في المستشفى عشان كده ما جات الليله هي.
_ايواا، يلاا انا نعسان تصبحي ع خير
_____________________________
=الدكتور قال لينا بكره نطلع يااحبوبة
_عليك لله انا ما بحب القعده حقت المستشفى دي، انا كويسة ما عندي عوجة
=الحمد لله، بس عايز يتأكد من الضغط دا ونطلع بعد كده
*خلاص يااوسن امشي انتي وانا بقعد معاها.
=لا لو انت تعبان ارجع، انا ما طالعه الا وحبوبة معاي
_خلاص انا في الكافتيريا تحت لو عايزين حاجة اديني خبر.
"تاني يوم المساء طلعنا، بس كان في حاجه غريبة حاصلة حبوبة ما كانت بتكلم مع مصطفى، رد و رد بس ومرات كمان ما قاعد ترد، انا متأكدة حاصلة حاجه وحبوبة ضغطها دا مرتفع اكيد في مصيبة، وشاكة في حاجة لو طلعت صح، يبقى دا موضوع تاني"
=حمد لله على السلامة يا حبوبة، أن شاء لله البيت منور كده دايماً ب وجودك
_الله يسلمك، عايزه امشي الغرفة.
=حاضر يلاا
*امسكي دي العلاجات،الوقت مكتوب عندك.
____________________________
*اتخيل بس قال لي اعمل حسابي منك وانت زول حاقد وحاسد ونيتك ما خير لي هههههههه، طبعاً انا في العزاء ما باقي لي الا اضحك
_عليك لله شوف مروان دا، دا كل يطلع منو
*ياازول كلام كبير كده، وانا اساسا ما صدقت ولا حرف
_عايز يخرب بيننا انت عارف
*اساسا شكلو كده، بس على منو، انا قلت ليهو انا ممكن أصدق اي زول يكون نيتو كعبه الا أحمد، يااخ انت اخوي قبل صحبي
_انت كمان، ربنا يعلم بس ب معزتك، وربنا يدوم الخوة دي.
*امييين ياارب
_امسك تذكرة البورده دي هدية مني لك.