رسالة

الرسالة السادسة عشر

#رسالة "16" 🖋️ إبتهال حسن
=الووو
...
صباح النور
.....
نايمه والله يامروة صحيت ب تلفونك دا
.......
ما رجعت والله، حبوبة كانت في المستشفى
.....
الضغط مرتفع وانهيار عصبي عندها كان
...
والله شاكة في حاجة انا، لأن انا قبل ما تقع دا، رجعت انا وهي من المركز والفحوصات واي حاجه كويسه كانت، وصلتها وكنت راجعة البيت، مصطفى ضرب لي قال حبوبة فاقدة الوعي.
.......
اي ما جااية انا في الكلام، المهم ياا زولة، لمن وصلت كده شوفت ولد صغير طالع مستعجل من الشارع حق البيت، واتجاه بيت ناس مصطفى تحديداً
.....
اي بس، مصطفى كان مع الود الصغير دا وحبوبة لقيتو معاه ووقعت، لان ما في سبب يخلي ضغطها يرتفع في خمسة دقيقة كده، والشي اليزيد الشك ان حبوبة ما قاعده تتكلم مع مصطفى، يعني رد و رد ومرات كمان الرد زاتو مافي.
........
ما عايز يحكي هو، ولا حبوبة عايزه تتكلم كمان.
.....
ربنا يسهل
.....
ما عارفه والله، ايامي اجازتي خلصت اساسا، احتمال في نص الأسبوع كده اطلع
......
والله ماشة بيت ناس بثينة
....
امي بتقول سرقت قروش، عايزه امشي افهم منها.
...
خلاص لو طلعت ح اديك خبر.
"اسبوع عدا وما لقيت طريقة ارجع البيت، طول اليوم مع حبوبه، ومصطفى بيطلع ويرجع متأخر، او قاعد في الغرفه بس ، ولسه ما قالوا لي الحصل شنو، انا متأكده الشك العندي دا ف محل، حبوبة لسه ما قاعده تتكلم مع مصطفى، يوم بعد حبوبة نمت طلعت عايزه اقعد شويه في الحديقة الهواء كان حلوو، كنت فاكرة مصطفى في غرفتو، طلعت قعدت كده لقيت مصطفى طالع ب الجهة التانيه من الحديقه.
=مصطفى انت هنا
*اي، حبوبة نايمه ول شنو؟!
=اي نايمه، لقيت الجو حلو قلت اقعد، بس ما قلت لي ب هنا في شنو، طالع من وين انت؟!
*في غرفه
=عليك لله اول مره اعرف "كنت عايزه امشي اشوفها بس في لحظة لقيت مصطفى ماسك يدي، مستغربه كنت، فكا يدي طوالي قال لي
*غرفه خاصه، حقتي مقفول ب المفتاح اساسا
=ايووا معليش طيب.
*ولا يهمك.
" رجعت طوالي قعدت مكاني، مصطفى كان لسه واقف، ومتردد "
*كنت عايز اقول لك معليش لأن في المستشفى كنت عصبي معاك شوية، ومعليش على الجوطة حقت الأسبوع دا كل، ومعليش لأن ما كان في طريقة تمشي بيتكم
=لا م مشكلة، بعدين دا شغلي، يعني واجبي ما في داعي ل الاعتذار، ممكن بس تعتذر عشان كنت عصبي.
*معليش طيب ههه
=خلاص انا قبلت الاعتذار، بس ممكن اعرف الحصل شنو هو، ول شنو ما قاعد تمشي شغلك
*مشكلة بسيطه
=خلاص ممكن تحكي لي احتمال اساعدك
*لا زي ما قلت لك مشكلة بسيطة
=هو انت اي حاجه مشكلة بسيطة مشكلة بسيطة وبتسكت و بتقعد في غرفتك، زي القاعد تهرب، دي ما طريقة عشان تحل بيها مشكلتك حتى لو كانت بسيطه، تواجه مش تقفل على نفسك ول خلاص زاتو ، على العموم كنت عايزه اساعدك انا واسمعك واشوف مشاكلك شنو، لأن في يوم انت ساعدتني وسمعت مني، بس شكلك ما عايز مساعدة بعد اذنك.
"طوالي قومت وكنت عايزه ادخل البيت جوا لأن بالجد كنت متعصبة انا، بس وقفت بصوت مصطفى وهو بيقول لي
*وسن
=نعم
*تعالى اقعدي
=اهاا قعدت
*لك حقي تكوني مستغربه كده مني ومن طريقتي، بس انتي مصيرة عايزه تعرفي مشاكلي شنو
=ما مصيرة بس عايزه اساعدك
*انا زول كتوم شديد، ما عندي أصحاب ما عندي ذرة ثقة ل زول، عشان كده بكون بعيد من الناس، وزي ما قلت هسا بهرب من المشاكل، وبقعد وحيد كده، عارفه انك انتي اول زوله أو زول زاتو يكون عايز يساعدني من غير مصلحة
=انت ل شنو فاكر ان كل الناس عندها مصلحه معاك، في ناس بتكون عايزه تساعدك ل وجه الله كده، وفي أصحاب حقيقين.
*في أي بس انا عندي العقدة دي، أن عايزين مصلحه دائمآ مني.
=لازم يكون عندك أصحاب، او ما شرط أصحاب يعني، المهم يكون عندك ونيس تحكي ليه وتشكي حتى لو ما عندو الحل، المهم انك تقول كل الجواك.
*خلاص ممكن نبقى أصحاب "ومد لي يدو زي العايز يسلم علي"
=ممكن "ومدت يدي انا كمان، كنت مبسوطةوأخيراً ح يتكلم معاي ويحكي لي"
_____________________________________
_الحمد لله بخير، انت كيف
.....
آخر مرة شوفت وجودي ما مرغوب فيه عشان كده قلت احسن اشوف لي مكان تاني انزل تدريب فيه.
.......
ما في تفسير تاني ل طريقتك آخر مره، تسيب لي المكتب و الموقع،دي معناها شنو.
......
ي باشمهندس عارفه مضغوط و اي حاجه، بس دا ما سبب.
.....
نقعد ل شنو اعتذار يعني.
.....
طيب تمام، هو بالجد احنا محتاجين قعدة.
......
بكره اخر يوم عليك في الموقع دا
....
خلاص بكره بعد الشغل موعدنا
...
_________________
*انا نعست يلا تصبحي ع خير
=وانا كمان ماشة انوم بعد دا
*بكره ماشة بيتكم صح
=دي مطردوة ب طريقة تانية صح
*لا م كدة، بس عشان نطلع يوم الجمعه
=خلاص بجي يوم الجمعه بدري.
*خلاص تمام
وسن
=اي
*هو انتي بتعرفي سماح معرفة شخصية؟!
=لا، تقربيا اول مره اشوفها وقت جيت ل الشغل زاتو
*اول مرة عليك لله
=اي، هي اخت مرتضى، مرتضى دا حبيب صحبتي مروة.
*ايوااا
=بس ل شنو السؤال
*لا ما في حاجه سااي.
=بسم الله، هسا تحت مش قلنا أصحاب ونحكي وعود الحاجات دي وين طيب
*هههه خلاص بحكي لك بكره بعد الطلعة، امشي على النوم هسا.
=طيب.
_________________________________"يوم جديد "
*الحمد لله الشغل نال إعجاب كل الناس
_الحمد لله
*الزول بعد كده يأخد راحة فترة شوية، تعبت من موقع ورا موقع
_اي لازم تأخد راحة، انا كمان زي ما قلت لك عايزه أوقف التدريب.
*دا شنو يعني انتي جادة امبارح، وفاء قلت لك معليش والله كنت مضغوط وكده.
_مضغوط ول عايز تهرب مني
*اهرب منك ليه
_تهرب مني وتقول انك بتحبني
*دا كلام شنو يااوفاء
_شاايف هسا كمان عايز تهرب، ملامح وشك كلها اتغيرت هسا مجرد ما قلت لك كده.