ပိုးစုန်းကြူးလေးဖမ်းပေးပါ(Completed)

11

ညချမ်းအေး နံရံကပ်ဘီရိုကို မြင်သည့်တိုင်အဝတ်တွေအား သံသေတ္တာထဲမှာသာ ထားဖြစ်သည်။
အိမ်ကြီးအိမ်ကောင်းမဟုတ်ပေမဲ့တစ်အိမ်လုံးမှာ မရှိတာ မရှိ။ ကုတင်ပေါ်မှာလည်း သင်ဖြူးဖျာလေးက အဆင်သင့်။ ခေါင်အုံး၊စောင် ချထားတာမမြင်သော်ငြား
ရှာကြည့်ရင် သိမ်းထားတာရှိနိုင်သေးသည်။
မပြတ်တမ်း လူလာရှင်းပေးတက်တယ်ဟု ကြားရတာ အမှန်ဖြစ်နိုင်တာမို့ အနည်းငယ် မသက်မသာလည်း ခံစားရသည်။

စိတ်အိုက်တာကြောင့် ရေချိုးဖို့ သံသေတ္တာကိုဖွင့်ကာ ရေလဲပုဆိုးနှင့်အတူ သေချာထုတ်ပိုးထားသော
ဆပ်ပြာ၊သွားတိုက်ဆေး ကိုထုတ်ယူလိုက်၏။
သံသေတ္တာဆိုသည်မှာလည်း ဘော်ဒါဆောင်
နေစဉ်အခါက ထောက်ပံ့ပေးတဲ့မိသားစုမှ  ဝယ်ပေးထားခြင်းသာ။ သူ့မှာ အသုံးဆောင်ဆိုလို့ ဒါတွေပဲရှိတာမို့လား။

ခြင်ထောင်နှင့် ခေါင်းအုံးကအစ ကျောင်းစတက်ကတည်းက သုံးလာတာ ခုထိ ။ သန့်သန့်ရှင်းရှင်းထားသလို ရိုလည်းရိုသေတာမို့ သူ့ပစ္စည်းတွေ အစွန်းအထင်းကင်းကာရှိနေသည်။
သူရေချိုးမသွားခင် တစ်ယောက်ကုတင်ပေါ်မှာတက်၍ ခြင်ထောင်သေချာထောင်လိုက်သည်။
အကုန်ပြီးစီးပြီးနောက် ရေလဲပုဆိုးယူကာ
အိမ်နောက်ဖေးလှေကားကနေတဆင့် ရေကန်ဆီ ရေသွားချိုးလိုက်သည်။
အေးမြသောရေက တနေလုံးပင်ပန်းမူ့အားရေဆေး‌ချလိုက်သလို လန်းဆန်းသွားစေသည်။
ခရီးပန်းသလို တနေကုန် အားကုန်နေတာကြောင့်
‌တစ်နေနေရာရာမှာ ခေါင်းချ ကာ အနားလည်းယူချင်သေးသည်။

ရေချိုးပြီးတော့ နေဝင်ရီရောပြီမို့ အိမ်က မှောင်လာ၏။
ဘာမှ ပြင်ဆင်မထားတာကြောင့် အမြန်ပင် အဝတ်အစားလဲကာ ပြတင်းတံခါးကို ပိတ်လိုက်လေ သည်။ တအားမှောင်လာရင် ဘာမှမမြင်ရပဲနေမှာစိုးလို့ပင်။ အကုန်ပြီးစီးတော့ အိပ်ယာထဲ ဝင်နေလိုက်သည်။ မှောင်နေတာခြင်းအတူတူ သူ အိပ်ယာစောစော ဝင်လိုက်တာ အကောင်းဆုံးဖြစ်မည်ဟုထင်လိုက်တာကြောင့်ဖြစ်၏။

အညောင်းအညာပြေသွားပေမဲ့ သူအိပ်၍ မရသေးပါ။
ထိုအချိန်တဖက်အိမ်ဆီမှ မီးစက်သံသဲ့သဲ့ထွက်လာပြီး ဖျတ်ခနဲ မီးက လင်းလာခဲ့သည်။
ဝိုင်ယာကြိုးဖြင့် နှစ်အိမ်တစ်အိမ် ဆက်သွယ်ထားသည်ထင်၏။ စိတ်ထဲ အိပ်ယာစိမ်းနေတာဖြစ်သလို သူစိမ်အိမ်ဆိုတဲ့အသိကြောင့် သူ့စိတ်ထဲ မလုံမလဲ အနည်းငယ်လည်းရှိနေသေးတာတော့အမှန်။ ခုလို လင်းလင်းထင်းထင်းဖြစ်လာတော့လည်း စိတ်ထဲ ပျော်သွားတာ ကလေးတစ်ယောက်လိုဖြစ်သည်။ အဖြူရောင် မီးချောင်းအောက်တွင် သူ့စိတ်ချလက်ချ ဖြစ် လာကာ တဖြည်းဖြည်းအိပ်
ပျော်သွားခဲ့၏။