العوض الجميل

الجزء 01

#العوض_الجميل
#بقلم_فريال
الجزء الاول
مفهمتش علاه مجتمعنا معقد هكا ويحڨر لمرا بزاف اذا قرات يقولو عليها خامجة واذا مقراتش ميطلقوهاش تزوجت خامجة خرجت دخلت خدمت حوست لبست تحجبت عرات ديما لمرا مش مليحة ومنبوذة ولعيوب السبع فيها على عكس الراجل يدير وش يحب واحد مايحكي عليه تحت شعار الراجل عيبو جيبو برك ويدير وش يحب معندو مايخسر على عكس المرأة تخسر كلش واهم شي سمعتها. عندنا في مجتمعنا لمرا كي تكبر شوي ومتزوجش يبداو يعيطولها بايرة عانس فاتها الزواج ذوك شكون يديها طفرت فيها واذا تزوجت تدي شيخ ولا واحد مطلق ولا ارمل بولادو المهم متديهش عازب، لدرجة هذي عندهم الزواج خير من كلش خير من لقراية الخدمة رضاية الوالدين التربية الاخلاق المبادئ، حتى وتكوني متربية بخدمتك بشهريتك بصح تفوتي الثلاثين ومتتزوجيش يحطو فيك لعيوب السبع ويوليو يحتاقروك يذلوك يسبوك يهينوك، والاصعب من كل هذا انو الانسان الي يجرح فيك ويذلك هوما عائلتك، المجروح من عائلتها لا يشفى ابدا،
كان خذلانهم كافيا لاثبات ان لا شيء يدوم ومهما عاد بي الزمن لن تعود مكانتهم كما كانت. لا بل سيأتي اليوم الذي ابكي فيه من شدة فرحتي واقول كنت اعلم بانك لن تخذلني ياالله. وستعوضني عوضا جميلا.
نضت كيف عوايدي صليت لفجر ودعيت ربي يفرج عليا ونتهنى من هاذ لمعيشة الي يشوفني يقول راهي هانية وشكون كيفها وحتى كاين ناس حاسديني على حياتي بصح لوكان يعرفو وش راني نعاني يشفقو عليا، من برا مرا قوية وبخدمتها وطوموبيلتها شهريتها بصح لوكان يعاشروني ويعرفو بلي المظاهر خداعة واني نخدم باطل صح نجيب دراهم بصح منحكمهش نسلك الحمدلله خيرات ربي بصح نص شهريتي تديها ماما وتمدها لخواتاتي لمتزوجات لوكان صح جاو محتاجين ولا ناقصينهم حوايج ورجالهم مش لاحقين باش يوفرولهم كلش نقول معليش بصح راهم بخيرهم يلبسو يحوسو ياكلو يشربو يلبسو غير الحاجة المخيرة هوما وولادهم بصح ماما الله يسمحلها ديرها مكرة فيا وتمدلهم دراهمي وتعبي ونص شهريتي الي بقا نصرف على دار نقضي نسلك تريسيتي الغاز الما نكسي ماما وروحي، ماجيت نشري طوموبيلتي بشق النفس كنت نقتاصد ونخبي بدرڨة على ماما باش متشوفهمش وتديهملي، راح تقولو عادي ماماك ومن حقها تدي دراهمك ولازم عليك تمديلها لانو تعبت عليك ورباتك بصح كاينة حاجة تغيض ماما على العين وراس نمدلها دراهمي وروحي وكلش عندي بصح هي كي تدي دراهم تمدهم لخواتاتي لبنات وبابا ربي يرحمو خلالها شهرية تكفيها وتوفيها تعيشها ملكة بلا ماننساو دراهم الي يجيوها من لوزينات كل شهر خاوتي يبعثولها حقها وحقي وهي تاكلو تشري الذهب لبناتها وتقلشهم وخلي الڨاراجات الي تحتنا ثاني كراتهم. راح تقولو مكانش ام دير مع بنتها هاذ الشي غير اذا كانت بنت راجلها ومهيش بنتها الحقيقية، للآسف انا بنتها من لحمها ودمها المازوزية تاعها صغيرة الدار كنت القريبة ليها تحبني وتعزني وديما دافع عليا وهذا الي خلا خواتاتي يغيرو ويكرهوني حتى من بابا كان مدللني الي نطلبها يجيبهالي. ماما مزال عندها عقلية بكري وحتى من لفامي تاعنا كامل هك عندهم المرا لازم تتزوج صغيرة واذا متزوجتش عيب كبير والي تفوت العشرين وتكون بلا زواج يسموها بايرة، انعم هيه تفوتي عشرين سنة يرجعو يعيطولك بايرة خواتاتي كامل تزوجو وهوما صغار بسن ال18 غير انا رفضت رفض قاطع وبكيت ندبت حبست روحي في الشومبرة يامات نايفتهم وكي طحت فراش وعادو يتجاراو بيا في سبيطارات قبا بابا يخليني نكمل قرايتي وميزوجنيش، ماما دارت مادرات وكيفاه وتخليها بلا زواج وخواتاتها كامل تزوجو غير هي بقات وش دير بيها خليها تتزوج مدامها صغيرة وكامل يخطبو فيها خير ماتكبر وتبقالك في دار، ندبت عيطت كلات روحها وبابا بقا على نفس القرار ومقبلش يزوجني وخلاني نكمل قرايتي، وكيما كان الحال ديت الباك وقريت في الجاميعة وتخرجت وبديت نخدم في سبيطار كان بابا راح يحل كلينيك ويحطها باسمي وحدي بصح القدر كان عندو رأي آخر ومات قبل مايبني لكلينيك ويدير وش كان متمني، بعد وفاتو كلش تبدل ولا نقولو اصلا كلش كان مبدل غير بابا كان واقف معايا ومخالهمش يدناو ليا، بعد ما مات هجمو عليا كامل ماما خواتاتي يسبو يبهدلو يعايرو وديفوا توصل بيهم يضربوني وانا نسكت نجي ندافع على حقي تنوض ماما تندب وياخسارة تعبي عليك ومكيش متربية ترجعي الهدرة لخواتاتك كبار عليك ومتحشميش رخيسة لوكان جيتي مرا راكي زي نداداتك في دارك وتربي ولادك مش قاعدتلي في دار زي الحيط يا البايرة، كل الالفاظ تقولهم وهذا كامل من تحراش بناتها لانو غاضتهم كي ماقراوش وانا قريت ونساو بلي هوما الي بغاو الزواج وكامو لا علاقة بالقراية وقتهم كامل يروح في التزوقيل والدوران. راح تقولو وينهم خاوتك الرجال علاه ميدافعوش عليك، خاوتي كل واحد خرج بدارو وخلاوني انا وماما في دار وهوما يسكنو قريب منا في نفس الكارتي وكي يجيو ماما تعاملني مليح هوما يخرحو هي ترجع لعوايدها كي نجي نخبرهم ولا نخرج من دار ونروح نكري تبدا تدعي وتسب وتقولي نتبرا منك ومكيش بنتي ومنسمحلكش وطيح زعما تتغاشى ولبنات ينوضو يندبو وقتلتيها وهكا عجبك الحال وهوما اصلا سباب المشاكل ويبالهم يقدرو يفوتوها عليا بلي صح مريضة ونساو بلي انا طبيبة صح اختصاصي التوليد بصح نفهم في الامور هذو مليح ونسكت نخليهم فالاخير تبقى ماما ومنقدر نديرلها والو.