العوض الجميل

الجزء 13

#العوض_الجميل
#ليلى_كريم
#بقلم_فريال
الجزء 13
فاتو يامات ولحق نهار الجمعة جاو نسا خاوتي كامل تلمو هوما الي وجدو كلش مخلاوني ندير والو كلش داروه مساكن خيرهم عمري ننساه على عكس خواتاتي الي تلمو في دار زي الضياف وجاو كامل بيهم بولادهم تقول عري ولا خطبة وهي غير شوفة، ماما ساكتة حرف ماقالتو اصلا وش راح تقول وهي رايحة تزوجني تتهنى مني هي سبب كرها ليا هو زواج وكي قبلت المرة هذي يجيو يشوفوني سكتت لانو جداتي بهدلتلها هي وخوالي رخسوها وجات طلبت مني سماح ورجعتني لدار مع لول مبغيتش نرجع حتى خويا نوفل محبش قالها خليها تقعد عندي معززة مكرمة مايخصها والو وش دير عندك انت هام ليك بناتك يقومو بيك ياك تفضليهم عليها وتقولي بناتي وبناتي وتشكر وتهزي وتحطي قريب يركبو على ريوسنا من وراك وذوك وش رجعك ولا كي تقطعو دراهم والخدامة راحت هربو ولاو مايجيوش لعندك خافو يخدمو يتحركو شوي تذوب الشحمة الي رافدينها، قالتلو ياوليدي عيب يجيو ناس يشوفوها ويلقاوها في دارك وش يقولو تحب ترجعني مضحكة في وسط الناس على اخر عمري وزيد راني مريضة شكون بيا خواتاتك لاتين بولادهم ميقدروش قلال الصحة مساكن وزيد برجالهم ميقدروش يجيو لعندي ديما _ ااااا ذوك رجعو ميقدروش يجيو ديما لعندك علاه كي كانت ليلى في دار يجيو يوميا وفي العطل يفوتوهم كامل عندك ولا كعاد لقاو خدامة طيب وتسيق وتوكل وتنظف وهوما قاعدين ياكلو ويشربو وفوقها يديو دراهم تعبها وحقها واذا على الصحة هاي ليك ليلى صحتها راحت معاكم هي نتبانش قدامهم قريب يلحقو قنطار ماكلة ورقاظ وفوقها يديرو فالمشاكل مشركات الفم بصح علاه ميكونوش هكا وانت الي طلعتيلهم ڨرادهم يديرو وش يحبو الي ينطق ويقولهم كلمة تاكليهم _ ياوليدي مش هكا انت مش فاهمني _ لا مكلاه تقولي مش فاهمني وتبقاي تبرري انا عارف كلش وكيفاه تفكيرك ووش موالفة ديري في بنتك مليح انت يا يما انانية ومتسطلة وحڨارة اذا بنتك مارحمتيهاش كيفاه حابة ناس ترحمك وترفدك. اليوم هذاك بردلي قلبي فيها بقات من وراه وكي شافاتو مسنطح عيطت لخاوتي وجداتي مع لول قالولها مندخلوش بيناتكم من بعد كي بقات تبكي قبلو يخليوني نرجع بشرط متدناش ليا ولا لدراهمي وحتى من خواتاتي يشدو قدرهم ويبعدو عليا تحلف فيهم نوفل الي تزيد تقيسني بكلمة يمرمدها وهذاك الي صرا كان عند كلمتو وجابلي حقي ثالث ومثلث انا خاوتي هوما سندي واماني والملجأ الوحيد ليا. رجعت لدار لقيتها كوري زبالة كلش محطوط كيما خليتها كيما لقيتها اصلا ماما متقدرش تخدم انو مريضة وخواتاتي باين هربو وراحو كي شافوني رحت خافو يخدمو ويطرطقو لانو ميتحملوش التعب بزاف كيما تقول يما قلال صحة ومساكن. طحت في دار ميناج غسيل مسيح ماخليت فراشات ماخليت قش ماخليت ماعن ماخليت والو وكثر خير نسا خاوتي جاو عاونوني حطينا دار كامل رجعناها تشعل شعيل مع كملنا قدقد جاو الطومبات البقرات مع الجيش المدمر تاعهم.
#فريال