العوض الجميل

الجزء 35

#العوض_الجميل
#ليلى_كريم
#بقلم_فريال
الجزء 35
انا قاعدة في نص ونشوف فيهم كل وحدة وش تقول نحاول نفهم وش دارت ماما بصح مقدرتش ونستنى في سمية تقول بصح هي رماتلي راس الخيط وراحت لشومبرتها تتعوج. درت ليما نحاول نفهم من عندها سكتتني كي قالتلي روحي اخرجي ياك كنتي رايحة متخليش راجلك يستنى ومديريش على ختك الغيرة قاتلتها، لأول مرة ماما تستعرف بلي سمية تغير مني اصلا هاذ الشي كان واضح لناس الكل غير هي كانت ساكتة بصح ليوم كي تعاركو وهددتها تقولي السر الي بيناتهم كرهتها ماما خليهم يستاهلو هاهي بنتها الي كانت ديما تقيمها وتقدرها وانا تذلتي في اول فرصة باعتها طنجرة ولڨات غطاها لزوج اسوء من بعض، بصح يبقى السر هذا يدور في بالي ولازم نعرفو لانو عندو علاقة بتحقيق حلمي وانا من بين احلامي كنت حابةنروح للخارج ولا نبني كلينيك ليا وحدي وحتى من بابا ربي يرحمو  وعدني يبنيهولي غير الموت داتو مني قبل مايوفي بوعدو. هزيت مفاتحي وجيت خارجة صونا تليفوني لقتيو كريم رفدت عليه قالي اخرجي راني برا نستنى فيك _ وين نخرج كيفاه _ راني قدام داركم نستنى فيك _ علاه ياك تفاهمنا نتلاڨاو _ ايه بصح انا نديك باش واحد مايهدر ويحل فمو نهزك قدامهم كامل والشاطر فيهم يهدر يشوف وش ندير فيه _ شكون الي يهدر وش كان مفهمتش _ اخرجي برك كي تجي ونفهمك متعبيش عقلك الصغير هذاك خليه غير لخدمتك اما المشاكل عليا انا نلقالهم حل _ اوك راني خارجة مع اني مش فاهمة والو، كوبيت عليه وخرجت لقيتو واقف مع خويا عيسى يهدرو عادي روحت ليه لحت سلام برك حشمت من خويا حتى ويكون راجلي بصح جاتني حشومة نركب معاه قدامو حتى من خويا فهمها ودخل خلاني معاه. وش بيك حشمانة هكا _ والو _ الحشمة مليحة بصح مش ديما مذابيك تخليها كي تكوني في داركم برك مش كي تكوني مع البرانية لانو مش ناس كامل كيفك يحبولك الخير _ وش قصدك ووش دخل الهدرة هذي ذوك _ اركبي برك ذوك نفهمك. ركبت معاه ديمارا طريق كامل وهو ساكت وانا ثاني ساكتة مالقيت واش نقولو حشمت منو واصلا نخاف يقول بلي موالفة تركبي مع رجال عليها لقيتي راحتك معايا والمرا هذي خفيفة الريح الي يجي يديها وخلي وخلي كل الافكار السلبية جات في راسي عليها فضلت السكوت احسن من وجع راس مدام منعرفش عقليتو مليح خلي نسكت حتى هو مش من النوع الي يحب يكثر الهدرة يحكي قيس مايفهمك برك مش كيف بعض الرجال يظلو يحكيو ويتمعشقو وكثرو من كلمات الغزل والرومانسية البايخة هذيك ( انا نعافهم والله تقول نخبط جدو بالكف نوريلو عمري وحبي وحياتي وعيينيا وقلبي وخلايا وجلايا نهار كامل وهو يعاود فيهم ولوكان غير جا حاس بيهم عادي المشكل تلقايه يحكي بلا احساس).
#فريال