العوض الجميل

الجزء 39

#العوض_الجميل
#ليلى_كريم
#بقلم_فريال
الجزء 39
نطقت سمية قالتلي من بكري حنا ننفعوها على عكسك انت تظلي تتلوهطي ماتشديش دار الله اعلم مع شكون راكي تخرجي سنين وانت تتخطبي ويبطلو عليك لوكان مش شافوك ناس مايحكيو _ ايه شافوني وش دخلك الهاي بروحك وبولادك وماتنسايش دنيا دوارة كيما حاولتي تشوهي سمعتي راح يجي نهار وتتشوه سمعتك _ ضحكتيني انا راني بداري وراجلي وولادي يبالك انت حتى شرفتي باش راح تتزوجي وماشكيتش تجيبي لولاد ماتعياي داخلة عليك الضرة وربي كبير _ خافي على روحك وماتخمميش فيا وبما انو كلش تفضح ليوم ياجماعة علبالكم كريم وش يخدم وهو لقى الشخص الي بعث راجل يشوه سمعتي وماشي مرة وماشي زوج لا هو ديما يبعثو وقالي يامات ويجيو يهزوه للحبس يتربى. انا ماعلباليش شكون الي يبعث في رجال باش يشوهلي سمعتي شاكة في سمية بصح ماعنديش دليل قولت كلامي برك ونشوف وجوهم كيفاه راح يتبدلو، كامل ساكتين من غير سمية الي وجها تبدل وعلامات الخوف ظهرو على وجها صاي فهمت كلش مش شرط تعتارف روحت ليها ديراكت وخبطتها بكف ماجات تستوعب الكف حتى شديتها من شعرها ونخلخل فيها الكلبة ظهرت هي سباب مشاكلي رخيسة، ايه يالالة ظهرتي انت وجدي روحك للحبس تباصي نوريلك لعب كيفاه داير _ اطلقي شعري هبلتي وش راكي تقولي اييي بعدي بعدوها عليا المهبولة هذي، جا عيسى هي يبالها يفكها مني بصح الشي الي دارو خلاها تخاف قبل ماتقدم من جيهتي وتحسب الف حساب نهار هذاك قتلها بالضرب دخلها لشومبرة وطاح عليها بالضرب قتلها قتلها خلى دموماتها يشرشرو وواحد ماقدم يفكها قالك تستاهل بعد ماكمل وعطاها طريحة دار ليما قالها دراهم يهبطو من سما ولا لرض في يدك 5ايام نرجع مانلقاهمش تشوفي شي مايعجبكش دارت لبنات قالتلهم ردولي الذهب الي شريتهولكم ونزيد نبسع الباطيمات وهكا نرد دراهم لختكم قالولها وينى ذهب راكي تحكي عليه ماشريتيلنا والو واذا راكي تحكي على ذهب الي ديناه في جهازنا هذاك شراه بابا وماتساليش فيه، شوكاوها ايه مليحتلها ماعيات دافع عليهم وتشري وتلبس ومع لخر دارو عليها اللهم لا شماتة بصح انا شمتانة، خزرت فيها وضحكت مبروك عليك رجعتي وحدك خلي بناتك ذوك ينفعوك، طلعت لفوق لشومبرتي لميت حوايحي كامل في فاليزة وعيطت لنسا خاوتي قولتلهم يعاونوني لميت كلش ماخليت والو وزدت فت لشومبرة الي فيها جهازي قولت لخويا يديه لدارو حتى نهار عرسي يهزوه من عندو ماعارضش وقبل، تعاونو كامل هزو لحوايج ماعيات يما تحبسني وانا تقول حيط مانسمع مانفهم تجاهلتها لميت حوايحي ووقفت قدام لباب قولتلها كيما قال عيسى 5ايام مانلقاش دراهمي نشكي بيك وخرجت ركبت في طوموبيلتي جيت نديماري حبسني نوفل قالي متسوقيش وانت مقلقة انزلي خليني نسوق وهذاك الي كان نزلت وخليتو يسوق ماطولناش بزاف ولحقنا لدارو دخلت ديراكت لشومبرة طحت حطبة حتى قشي مابدلتوش الدمار والقلقة والغمة ولاشوك وكلش تلمو عليا وكان الحل لوحيد باش نهرب منهم هو رقاد.
#فريال