العوض الجميل

الجزء 50

#العوض_الجميل
#ليلى_كريم
#بقلم_فريال
الجزء 50
تغدينا انا وياه لميت لماعن غسلتهم وروحت لشومبرة نلم في قشنا الحق يقال عاوني انا نجبد في القش وهو يلوح في الفاليزة ويرتب ظهر منظم بزاف، كعاد تعاونا ليه ليه كملنا درت خيماري وهبطت انا وياه شادلي في يدي عيت نحاول نجبدها والو لاصق فيا مابغا يطلقني وانا حشمت خايفة يخرج كاش واحد ويشوفنا هكا عيب. دخلنا لقيناهم كامل في الصالو مع شافونا ويطلقوها بالزغاريت خواتاتو نسا خاوتو يزغرتو وحدة مور وحدة انا حشمت والي زاد كمل عليا اخت جداتو كي قالتلي وش وليدي كريم دار خدمتو وبزايدة راني نشوف المشية تلفتلك ابنتي تبقاي معاه يامات تولي تمشي كل رجل في جيهة، نسا خاوتو وخواتاتو سلمو عليا وباركولي وخرجو بقات غير يماه وجداتو واختها هو يضحك جاتو عادي وكامل هكاك تبالي والفو بيها. قعدت قدام عجوزتي قالتلي محبيتش نطلع لعندك ونقلقك ستنيتك تهبطي انت ونباركلك، جبدت ڨورمات ركبتهالي وحتى من جداتو لبستلي زوج مسايس اختها دارتلي ليبوكل قالتلي مبروك عليك العقوبة لزيادتك وتجيبي سبع كيف كريم طول وعرض _ آمين يارب تعيشي ربي يحفظك _ بوه عليك باش تقولي العقوبة ليك مام انت تتزوجي قولتيلي ربي يحفظك ياووو ادعيو نلقى راجل نتزوجو مكرة في المرحوم لوكتاه نبقى بلا زواج انا ولادي زوجو وولدو وزوجو ولادهم وانا بقيت وحدي فليل كل واحد يرقد مع مرتو وانا نبات مع جنون خلي نتزوج نتمتع اليامات الي بقاو من عمري ونموت هانية ماشي ديما راجل الي يعاود زواج بعد موت مرتو خلي نبدلو شوي ونعاود انا، سكت مابغيتش نعاندها لعجوز هذي باين كلات كواغطها تخلط برك كامل يضحكو عليها غير انا ساكتة مش موالفة. جات قعدت قدامي وقالتلي وش وليدي وجعك بزاف _ كيفاه _ ياووو ماتلعبيهاش مافهمتيش اصلا راهي باينة هو طول وعرض تلفلك المشية راكي بالسيف ماتقعدي هذا غير نهار لول وصرالك هكا امالا كي يديك شهر هذا تكونو وحدكم يروحك معوجة خلاص ويكرشك فوقها بتوام، شوفي نقولك حاجة غير نحي لحشمة معايا الي هنا كامل يعرفوني مقودة نحكي برك وحتى من راجلك هاز طبايعي يبان واعر ورزين بصح والله ماتلقاي كيفو عاقل ومقود وحنين قعد للوقت هذا باش تزوج خليناه على راحتو قولنا كبير ويعرف صلاحو ومكلاه ندخلو نهار يحب يتزوج يجي يقولنا وهذاك الي كان قعد حتى ل42 سنة وخيرك انت خطبك وتزوجتو وذوك راكي في دارو لوكان ماداكش راهو هبل وماقال لحتى واحد بلي يحبك خلى كلش فالغم خايف يصرالو كيما صرا في شبابو عليها قالهم صاحبي دبرلي مرا وراني ناوي نخطبها وحتى يما بغاتها وعجبتها وواحد مايدخل. هي تحكي وتشكر فيه وانا عينيا عليه نشوف فيه كيفاه يحكي ويقصر مع جداتو ويماه وفي نفس لوقت نخمم وش صرالو في شبابو ووعلاه خايف يقولهم بلي يحبني زعما حشم وخاف يضحكو عليه كعاد حب وحدة كبيرة وتزوجها، ليه ليه تقلبو حوالي وقلقت يعني ديما هكا فرحتي مؤقتة ديما ماتكملش معايا ولازم يخرجلي مشكل.