العوض الجميل

الجزء 14

#العوض_الجميل
#ليلى_كريم
#بقلم_فريال
الجزء 14
وصلو النسا ورجال جاو في بزاف يماه جداتو وختو ومرت خوه خالتو عمتو مرت عمو وعمو وهو وباباه وخوه، فوتو الرجال لصالو لكبير والنسا لصغير دخلوهم سلمو عليهم ورحبو بيهم ماما فرحانة بيهم وعجبوها كعاد لابسين وعادلين وباين بلي مرفهين كيفها اما خواتاتي فكل وحدة مشنفة وقاعدة في جيهة تقول راهم في جنازة ونسا خاوتي قايمين بيهم وحطولهم ضيافة ويضحكو ويقصرو معاهم مام هوما ظراف وهدارين بزاف مش من النوع الي يسكتو لا هوما ملي دخلو يحكيو برك الي جات. دخلت لعندهم يماه تسلم وتحضن مام الي جاو معاه عجبتهم شوي هكا عيط خويا لمرتو قالها الراجل حب يشوفها قولها تخرج لشومبرة باش يجي وهذاك الي كان روحت لشومبرة شوي هكا دخل هو وخويا لاح عليا السلام رديتلو وبقيت مهبطة راسي حشمت من خويا ومنو كعاد منعرفوش، خرج خويا وخلانا وهو قعد مقابلني بدا يعرف في روحو قالي اسمي هيثم عندي 40 سنة مقاول بداري والحمدلله رزقي يكفي ويوفي بلا مانتوشي رزق بابا يعني طول عمري مرفه وعايش في دلال وكي نتزوجو مكلاه تخدمي لانو انا نكفي ونوفي وزيد مرتي جبتها ليا لدار تقابلني تهتم بيا وباحتياجاتي كيما راكي عارفة الراجل يحتاج لمرا معاه وانا قعدت لعمر هذا باش قررت نتزوج بعد ماشبعت من كلش مش راح نقولك اني نظيف ومدرت والو في حياتي لا بالعكس درت كلش وشبعت منو ماخليت حتى حاطة في خاطري وذوك قررت نتزوج ويما شافاتك في العرس وعجبتيها وانا منقدرش نرفض اي طلب ليما لانها عزيزة عليا وديما واقفة معايا حتى ونغلط ومذابيك مام انت متقيسيهاش لانو منضمنلكش وش ندير فيك اذا وصلتيها، وبالنسبة ليك انت كيف ماني نشوف تباني عاقلة بصح مع ليام يبان كلش ومن ذوك نقولك اذا كشما درتي في الماضي تاعك احكيلي لانو منحبش ندي مرا خلاطة ومشات من قبل نحب مرتي تكون غير ليا مدارت والو ماخرجت ماحكات ماحبت نديها فيارج من كلش مش من الحاجة هذيك برك نعرف كلش وانا خرجت ومشيت وعلبالي وش يديرو تحت مسمى الحب والعشق وتبقى طفلة فيارج بصح بلايص خرين يدنسو وراكي فاهمة قصدي، ايه انطقي وقوليلي وش رايك فيا مع انو علبالي الجواب بصح نحب نسمع من فمك طول عمري وانا لبنات يجريو ورايا ماخصني والو طول وعرض وزين ودراهم واسمي وحدو يكفي ويوفي باش نجيبها بنت العشرين وذوك لوكان نبغي نجيبها وراهم يجريو ورايا بصح انا منحبش المرا الي تجري ورايا وتذل روحها نحب لمرا الي مدايرة قيمة لعمرها. انا بقيت ساكتة تشوكيت ملقيت مانقول اول مرة نشوفو وهو صدم ديراكت بدا يحكي معايا هكا ماحشم ماوالو وباين بلي خلاط كبير ودايرها كحلة مع لبنات وفوق هذا كامل مغرور ومتكبر، بقا يشوف فيا ويستنى جوابي قبل ماننطق دخل خويا قالي وش رايك انت قالو هيثم خليها تقرر مزال الوقت منا لغدوا عيطولي وقولولي جوابكم. هو خرح وانا رجعت لنسا قعدت معاهم سقساوني اذا عجبني هيثم ولا لا سكت ماقلت والو اصلا وش نقولهم ولدهم مغرور ومتكبر وباين بلي خلاط منقبلش بيه نستنى يخرجو برك ونقولهم منيش قابلة مستحيل ندي واحد كيفو. زادو شوي وخرجو وبداو خواتاتي ونسا خاوتي يحكيو عليهم زادو جاو خاوتي سقساوني على راي اذا نقبل ولا نو نطقت سمية قالتلي غير مكلاه تقبلي باين ناس يعيفو وميليقوش وتعرفي لمرفهين هاذو ميرحموش الناس وصعاب بزاف، انا كنت راح نقولهم منيش قابلة بصح كي نطقت سمية وبدات تقنع فيا باش نبطل درتها مكرة فيها وقولتلهم راني قابلة بصح مكنتش عارفة بلي الخطوة الي درتها ماراح يجيني منها غير وجع الراس والمشاكل ومستحيل نتهنى في حياتي ونفرح كيف باقي لبنات.
#فريال